“Magpangamuyuay Kamo”

SI Jehova amo ang “Manugpamati sang pangamuyo.” (Salmo 65:2) Pirme niya ginapamatian ang mga pangamuyo sang bug-os tagipusuon nga debotado sa iya, kag makasiguro kita nga nagapamati sia kon magpangamuyuay sila.

Apang ngaa magpangamuyuay? Ano ang dapat nga ipangamuyo? Kag anong diosnon nga mga kinaiya ang ginapadaku kon magpangamuyuay kita?

Ngaa Magpangamuyuay?

Ginapalig-on sang Kasulatan ang katawhan ni Jehova nga magpangamuyuay. Ang pagpangamuyo tungod sa iban amo ang isa sa mga pangabay ni apostol Pablo sa Dios. (Colosas 1:​3; 2 Tesalonica 1:11) Dugang pa, si disipulo Santiago ­nagsulat: “Magpangamuyuay kamo.”​—⁠Santiago 5:⁠16.

Ang mga pangamuyo tungod sa mga alagad sang Dios epektibo. Ginapakita ini sa Santiago 5:​13-18, diin ang nagamasakit sa espirituwal nga Cristiano ginlaygayan nga tugutan ang mga gulang sa kongregasyon nga “pangamuyuan nila sia, nga ginahaplas sia sing lana sa ngalan ni Jehova.” Ang pagpamati sa ila pangamuyo mahimo magapabakud sa napung-aw nga tawo kag magahaylo sa iya nga sabton man sang Dios ang iya kaugalingon nga mga pangamuyo. (Salmo 23:​5; 34:18) Luwas sa pagpangamuyo upod sa indibiduwal, ang mga gulang nagatinguha sa pagpasag-uli sang iya espirituwal nga kapagros paagi sa pagpabutyag sing Makasulatanhon nga mga panghunahuna kaangay sang nagapasulhay nga lana.

Si Santiago nagadugang: “Ang pangamuyo sang pagtuo magaayo sang nagamasakit, kag si Jehova magabangon sa iya.” Huo, ang tawo nga nagamasakit sa espirituwal mahimo mabuligan paagi sa “pangamuyo sang pagtuo” sang mga gulang. Dugang pa, ang Dios “magabangon sa iya” sa espirituwal nga kapagros kon handa sia nga magpabulig paagi sa Kasulatan. Apang kamusta kon ang espirituwal nga balatian nagresulta sa serioso nga sala? Ti, kon ang indibiduwal nagahinulsul, si Jehova magapatawad sa iya.

“Busa,” siling ni Santiago, “magtinu-aray kamo sang inyo mga sala kag magpangamuyuay kamo, agod nga mag-ayo kamo. Ang pangamuyo sang matarong nga tawo may dakung gahom sa mga pagpanghikot sini. Si Elias . . . nagpangamuyo sing hanuot nga indi mag-ulan; kag wala mag-ulan sa duta sa tatlo ka tuig kag anum ka bulan. Nian nagpangamuyo sia liwat, kag ang langit naghatag sing ulan kag ang duta nagpatubas sang iya bunga.” (1 Hari 17:​1-7; 18:​1, 42-45) May gahom sa pangamuyo sang matarong nga tawo nga nahisanto sa kabubut-on sang Dios.​—⁠1 Juan 5:​14, 15.

Ano ang Ipangamuyo?

Ang bisan ano nga butang mahimo mangin tema sang pangamuyo para sa masigkatumuluo. Halimbawa, ginpangabay ni Pablo sa iban nga ipangamuyo nga kuntani may ikasarang sia sa pagpamulong sang maayong balita. (Efeso 6:​17-20) Ano kon nahibaluan naton nga ginasulay ang isa? Makapangamuyo kita nga ‘indi sia makahimo sing sala’ kag nga indi sia pagbayaan sang Dios sa pagsulay kundi luwason sia gikan sa malaut, si Satanas nga Yawa. (2 Corinto 13:7; Mateo 6:​13) Kag kon ang isa nagamasakit sa pisikal, mapangabay naton kay Jehova nga hatagan sia sang ginakinahanglan nga kusog agod mabatas ang iya balatian.​—⁠Salmo 41:​1-3.

Pirme nagakaigo nga ipangamuyo ang ginhingabot nga mga masigkasumilimba ni Jehova. Si Pablo kag ang iya mga kaupdanan nag-antos sing daku nga paghingabot, kag ginsilingan niya ang mga Cristiano sa Corinto: “Kamo man magbulig gid sa amon paagi sa inyo pangamuyo, agod nga madamo ang magpasalamat tungod sa amon bangod sang pagpakamaayo nga ginhatag sa amon nga sabat sa madamo nga pangamuyo.” (2 Corinto 1:​8-11; 11:​23-27) Bisan pa kon nabilanggo kita, sarang kita makapangamuyo tungod sa iban pa ginhingabot nga mga kauturan, pirme nagadumdom nga si Jehova nagapamati sang “pangamuyo sang mga matarong.”​—⁠Hulubaton 15:⁠29.

Labi na nga dapat naton ipangamuyo ang aton mga kauturan nga nagaabaga sing daku nga mga responsabilidad sa sulod sang organisasyon ni Jehova. Nagalakip ini sa mga nagatuytoy sang organisasyon kag nagahanda sing espirituwal nga pagkaon nga ginhatag sang “matutom kag mainandamon nga ulipon.” (Mateo 24:​45-47) Halimbawa, ang mga katapo sang Nagadumala nga Hubon sang mga Saksi ni Jehova nagakabagay sang aton pangamuyo, kag sarang naton mapangamuyo nga hatagan sila sang Dios sing “espiritu sang kaalam.”​—⁠Efeso 1:​16, 17.

Cristianong mga Kinaiya Ginpadaku

Paagi sa pagpangamuyo tungod sa mga masigkatumuluo, ginapakita naton ang aton kaugalingon nga nagakabalaka, dimakagod, kag mahigugmaon. Ang dimakagod kag mahigugmaon nga pagkabalaka para sa aton espirituwal nga mga kauturan nga lalaki kag babayi nagahisanto sa punto ni Pablo nga ang gugma “wala nagapangita sang iya kaugalingon nga mga interes.” (1 Corinto 13:​4, 5) Ang pagpangamuyo tungod sa iban isa ka paagi sang “pagtamod, indi sa kaugalingon lamang nga mga butang, kundi man sa mga butang sang iban.” (Filipos 2:4) Kon ginahimo naton ang espirituwal nga kaayuhan sang iban nga aton kabalaka sa pangamuyo, masapwan man naton ang aton kaugalingon nga nagasuod sing labi sa ila sa utudnon nga gugma nga nagapakilala sa mga disipulo ni Jesus.​—⁠Juan 13:​34, 35.

Ang kinaiya sang patugsiling ginapalambo tungod sa ginapangamuyo naton. (1 Pedro 3:8) May simpatiya kita sa ila, nagaambit sa ila mga interes kag mga kasisit-an. Sa tawhanon nga lawas, kon ang isa ka kamot nasamad, ang iban nagatatap sini kag nagatinguha sa pagpakanay sa pag-antos nga tuga sang pilas. (Ipaanggid ang 1 Corinto 12:​12, 26.) Sing kaanggid, ang pagpangamuyo tungod sa nagaantos nga mga kauturan nga lalaki kag babayi nagapalambo sang aton simpatiya tungod sa ila kag nagabulig sa aton nga dumdumon sila. Kita ang may nawasi kon ginakalipatan naton ang matutom nga mga masigka Cristiano sa aton mga pangamuyo, kay ang Dios kag si Cristo wala nagasikway sa ila.​—⁠1 Pedro 5:​6, 7.

Ang lainlain nga diosnon nga mga kinaiya ginapadaku kon ginapangamuyo naton ang iban. Mangin labi kita ka mahangpunon kag mapailubon sa ila. Ang posible nga kapait ginagabot, nagahatag sing hulot para sa makapalig-on nga mga panghunahuna nga nagahimo sa aton nga mahigugmaon kag malipayon. Ang pagpangamuyo sa iban nagapauswag man sang paghidait kag paghiusa sa tunga sang katawhan ni Jehova.​—⁠2 Corinto 9:​13, 14.

Padayon nga Magpangamuyuay

Kaangay ni Pablo, mapangabay naton ang iban nga ipangamuyo kita. Luwas sa pagpangamuyo kaupod naton, ang aton mga abyan mahimo makapangamuyo sa Dios sing pribado tungod sa aton, nagahingalan sa aton, nagasambit sang aton problema, kag nagapangabay nga buligan niya kita. Kag magaabot ang bulig, kay si Jehova “makahibalo magluwas sang mga tawo nga may diosnon nga debosyon sa pagsulay.”​—⁠2 Pedro 2:⁠9.

Ang mga Saksi ni Jehova nga nagasambit sa aton sa ila mga pangamuyo may mga pagtilaw man​—⁠ayhan mas mabudlay sang sa aton. Apang, ginadala nila ang aton mga kabalaka sa atubangan sang Hari nga Dayon, ayhan nagahibi pa tungod sa aton. (Ipaanggid ang 2 Corinto 2:​4; 2 Timoteo 1:​3, 4.) Daw ano gid ka mapasalamaton kita tungod sini! Busa, sa pag-apresyar kag tungod sa iban pa nga rason nga bag-o lang ginhambalan, magpangamuyuay kita.