Walay Sapayan sang mga Pagtilaw, Manguyapot sa Inyo Pagtuo!

“Kabiga ninyo nga bug-os nga kalipay, mga kauturan ko, kon makasugata kamo sing nanuhaytuhay nga mga pagtilaw.”​—⁠SANTIAGO 1:⁠2.

1. Walay sapayan sang ano nga ang katawhan ni Jehova nagaalagad sa iya nga may pagtuo kag may “kalipay sa tagipusuon”?

ANG katawhan ni Jehova nagaalagad subong mga Saksi niya nga may pagtuo sa iya kag “kalipay sa tagipusuon.” (Deuteronomio 28:​47; Isaias 43:10) Ginahimo nila ini walay sapayan nga ginatublag sila sing madamong pagtilaw. Walay sapayan sang ila mga kabudlayan, nakaagom sila sing lugpay gikan sa mga pulong: “Kabiga ninyo nga bug-os nga kalipay, mga kauturan ko, kon makasugata kamo sing nanuhaytuhay nga mga pagtilaw, kay nakahibalo kamo nga ining natilawan nga kinaiya sang inyo pagtuo nagahikot sing pagbatas.”​—⁠Santiago 1:​2, 3.

2. Ano ang nahibaluan tuhoy sa manunulat sang sulat ni Santiago?

² Ina nga pinamulong ginsulat sang mga 62 C.⁠E. ni disipulo Santiago, ang utod sa iloy ni Jesucristo. (Marcos 6:3) Si Santiago isa anay ka gulang sa kongregasyon sa Jerusalem. Sa katunayan, sia, si Cefas (Pedro) kag si Juan “daw amo ang mga haligi”​—⁠mabakod, malig-on nga mga tagsakdag sang kongregasyon. (Galacia 2:9) Sang ang problema tuhoy sa sirkunsisyon ginpresentar sa “mga apostoles kag sa mga tigulang nga lalaki” sang mga 49 C.⁠E., si Santiago naghimo sing Makasulatanhon nga panugda nga ginbaton naman sang nagadumala nga hubon sadtong nahaunang siglo.​—⁠Binuhatan 15:​6-29.

3. Ano ang pila sa mga problema nga gin-atubang sang nahaunang-siglo nga mga Cristiano, kag paano naton matigayon ang labing daku nga benepisyo gikan sa sulat ni Santiago?

³ Subong isa ka mainulikdon nga espirituwal nga manugbantay, ‘kilala [ni Santiago] ang dagway sang panong.’ (Hulubaton 27:23) Nahangpan niya nga ang mga Cristiano nagaatubang sadto sing mabug-at nga mga pagtilaw. Ang panghunahuna sang pila nagkinahanglan sing pagbag-o, kay nagpakita sila sing paboritismo sa mga manggaranon. Para sa pila, ang pagsimba pormalidad lamang. Ang iban nagatuga sing halit bangod sang ila maparas nga mga dila. Ang kalibutanon nga espiritu may makahalalit nga mga epekto, kag madamo ang indi mapailubon ukon mapangamuyuon. Sa katunayan, ang pila ka Cristiano nagamasakit sa espirituwal. Ginpatalupangod sang sulat ni Santiago ini nga mga problema sa makapalig-on nga paagi, kag ang iya laygay praktikal gihapon sa karon subong sadto sang nahaunang siglo C.⁠E. Makapanginpulos kita sing daku kon binagbinagon naton ini nga sulat subong isa nga ginsulat sa aton sing personal.⁠a

Kon Makaeksperiensia Kita Sing mga Pagtilaw

4. Paano naton dapat tamdon ang mga pagtilaw?

⁴ Ginapakita sa aton ni Santiago kon paano tamdon ang mga pagtilaw. (Santiago 1:​1-4) Wala nagasambit sang iya labot sa Anak sang Dios, mapainubuson niya nga gintawag ang iya kaugalingon nga “ulipon sang Dios kag ni Ginuong Jesucristo.” Si Santiago nagsulat sa “napulog-duha ka tribo” sang espirituwal nga Israel nga “nag-alaplaag,” una bangod sang paghingabot. (Binuhatan 8:​1; 11:​19; Galacia 6:​16; 1 Pedro 1:1) Subong mga Cristiano, kita man ginahingabot, kag “makasugata [kita] sing nanuhaytuhay nga mga pagtilaw.” Apang kon dumdumon naton nga ang mga pagtilaw nga ginbatas nagapabakod sang aton pagtuo, ‘kabigon naton ini nga bug-os nga kalipay’ kon matabo ini sa aton. Kon huptan naton ang aton integridad sa Dios, sa tion sang mga pagtilaw, magahatag ini sa aton sing dayon nga kalipay.

5. Ano ang mahimo nga nalakip sa aton mga pagtilaw, kag ano ang matabo kon mabatas naton ini sing madinalag-on?

⁵ Ang aton mga pagtilaw nagalakip sang kapiutan nga kinaandan sa katawhan. Halimbawa, ang mapigaw nga panglawas mahimo nga magapapiot sa aton. Ang Dios wala karon nagahimo sing milagruso nga mga pag-ayo, apang ginasabat niya ang aton mga pagpangamuyo sing kaalam kag kabakod nga kinahanglanon agod mabatas ang balatian. (Salmo 41:​1-3) Nagaantos man kita tungod sa pagkamatarong subong ginahingabot nga mga Saksi ni Jehova. (2 Timoteo 3:​12; 1 Pedro 3:14) Kon mabatas naton sing madinalag-on ini nga mga pagtilaw, ang aton pagtuo ginapamatud-an, nangin isa sang “natilawan nga kinaiya.” Kag kon ang aton pagtuo magamadinalag-on, ini “nagahikot sing pagbatas.” Ang pagtuo nga labi nga ginapabakod paagi sa mga pagtilaw magabulig sa aton nga mabatas ang palaabuton nga mga pagtilaw.

6. Paano ‘makapanghikot sing bug-os ang pagbatas,’ kag anong praktikal nga mga tikang ang sarang himuon kon napaidalom kita sa pagtilaw?

⁶ “Apang,” siling ni Santiago, “pahikuta sing bug-os ang pagbatas.” Kon tugutan naton ang pagtilaw nga magapadayon nga wala ginatinguhaan nga tapuson ini sa gilayon paagi sa dimakasulatanhon nga mga paagi, ang pagbatas ‘magapanghikot’ agod mangin himpit kita subong mga Cristiano, nga wala sing kakulangan sa pagtuo. Sa pagkamatuod, kon ang pagtilaw nagapadayag sing pila ka kaluyahon, dapat kita mangayo sing bulig kay Jehova sa paglandas sini. Ano kon ang pagtilaw amo ang pagsulay nga maghimo sing seksuwal nga imoralidad? Ipangamuyo naton ina nga problema kag nian magpanghikot suno sa aton mga pangamuyo. Ayhan dapat kita magsaylo sing obra ukon maghimo sing iban pa nga mga tikang agod mahuptan ang integridad sa Dios.​—⁠Genesis 39:​7-9; 1 Corinto 10:⁠13.

Ang Pagpangita Sing Kaalam

7. Paano kita mahimo nga mabuligan sa pag-atubang sa mga pagtilaw?

⁷ Ginapakita sa aton ni Santiago kon ano ang himuon kon indi naton mahibaluan kon paano atubangon ang isa ka pagtilaw. (Santiago 1:​5-8) Si Jehova indi magabasol sa aton tungod sa kakulangan sing kaalam kag sa pagpangamuyo sini nga may pagtuo. Buligan niya kita nga tamdon sing nagakaigo ang isa ka pagtilaw kag batason ini. Ang mga Kasulatan mahimo nga ipahanumdom sa aton sang mga masigkatumuluo ukon sa tion sang pagtuon sang Biblia. Ang mga hitabo nga ginmaniobra suno sa kabubut-on sang Dios magabulig sa aton nga mahibaluan kon ano ang dapat naton himuon. Mahimo kita ubayan sang espiritu sang Dios. (Lucas 11:13) Agod maagom ini nga mga benepisyo, natural lamang nga magpabilin kita nga suod sa Dios kag sa iya katawhan.​—⁠Hulubaton 18:⁠1.

8. Ngaa ang isa nga nagaduhaduha wala sing mabaton gikan kay Jehova?

⁸ Si Jehova nagahatag sa aton sing kaalam nga mabatas ang mga pagtilaw kon kita ‘padayon nga mangabay nga may pagtuo, nga wala gid nagapangduhaduha.’ Ang isa nga nagaduhaduha “kaangay sang balod sa dagat nga ginapalid sang hangin kag ginatumbotumbo” sing dimapaktan. Kon indi kita malig-on sa espirituwal, ‘indi kita dapat maghunahuna nga magabaton kita sing bisan ano gikan kay Jehova.’ Indi kita dapat mangin ‘dimapinamat-uron’ kag “indi malig-on” sa pangamuyo ukon sa iban pa nga mga paagi. Sa baylo, magtuo kita kay Jehova, ang Tuburan sang kaalam.​—⁠Hulubaton 3:​5, 6.

Ang mga Manggaranon kag mga Imol Mahimo Makahugyaw

9. Ngaa may rason kita sa paghugyaw subong mga sumilimba ni Jehova?

⁹ Bisan pa nga ang kaimulon amo ang isa sang aton mga pagtilaw, dumdumon naton nga ang manggaranon kag imol nga mga Cristiano mahimo makahugyaw. (Santiago 1:​9-11) Antes mangin mga sumulunod ni Jesus, ang kalabanan nga mga hinaplas mga imol sa materyal kag ginatamay sang kalibutan. (1 Corinto 1:26) Apang makahugyaw sila tungod sa “pagbayaw” sa ila sa kahimtangan sang mga manunubli sang Ginharian. (Roma 8:​16, 17) Sa pihak nga bahin, ang mga manggaranon nga ginpadunggan anay nakaagom sing “pagkakubos” subong mga sumulunod ni Cristo bangod gintamay sang kalibutan. (Juan 7:​47-52; 12:​42, 43) Apang, subong mga alagad ni Jehova, kita tanan sarang makahugyaw bangod ang kalibutanon nga manggad kag mataas nga tindog katumbas sa wala kon ipaanggid sa espirituwal nga mga manggad nga ginaagom naton. Kag daku gid ang aton pasalamat nga ang bugal tuhoy sa sosyal nga tindog wala sing duog sa tunga naton!​—⁠Hulubaton 10:​22; Binuhatan 10:​34, 35.

10. Paano dapat tamdon sang isa ka Cristiano ang materyal nga manggad?

¹⁰ Si Santiago nagabulig sa aton nga mahangpan nga ang aton kabuhi wala nasandig sa manggad kag sa kalibutanon nga hinimuan. Subong nga ang katahom sang bulak indi makaupang nga mapatay ini sa “masingkal nga init” sang adlaw, ang manggad sang tawo nga manggaranon indi man makapalawig sang iya kabuhi. (Salmo 49:​6-9; Mateo 6:27) Mahimo sia mapatay samtang nagatinguha sa iya “mga dalanon sang kabuhi,” ayhan sa negosyo. Gani, ang importante nga butang amo ang mangin “manggaranon sa Dios” kag ang paghimo sang tanan nga masarangan naton sa pagpauswag sang mga interes sang Ginharian.​—⁠Lucas 12:​13-21; Mateo 6:​33; 1 Timoteo 6:​17-19.

Malipayon ang mga Nagabatas Sing Pagtilaw

11. Ano ang mga paglaum sang mga nagapanguyapot sa ila pagtuo walay sapayan sang mga pagtilaw?

¹¹ Imol man ukon manggaranon, magamalipayon lamang kita kon mabatas naton ang aton mga pagtilaw. (Santiago 1:​12-15) Kon mabatas naton ang mga pagtilaw nga ang aton pagtuo malig-on gihapon, sarang kita matawag nga malipayon, kay may kalipay sa paghimo sing kon ano ang husto sa itululok sang Dios. Paagi sa pagpanguyapot sa ila pagtuo tubtob sa kamatayon, ang ginpanganak-sang-espiritu nga mga Cristiano nakabaton sing “purongpurong sang kabuhi,” ang pagkadimamalatyon sa mga langit. (Bugna 2:10; 1 Corinto 15:​50) Kon may dutan-on kita nga mga paglaum kag ginahuptan ang aton pagtuo sa Dios, makapaabot kita sing kabuhi nga walay katapusan sa paraiso nga duta. (Lucas 23:​43; Roma 6:23) Maayo gid si Jehova sa tanan nga nagatuo sa iya!

12. Kon ginapiutan, ngaa indi kita dapat magsiling: “Ginatilawan ako sang Dios”?

¹² Posible bala nga tilawan kita mismo ni Jehova paagi sa kapiutan? Indi, indi kita dapat magsiling: “Ginatilawan ako sang Dios.” Si Jehova wala nagabuyok sa aton sa paghimo sing sala kundi pat-od nga magabulig sa aton kag magahatag sa aton sing kusog nga kinahanglanon agod mabatas ang mga pagtilaw kon magpabilin kita nga dimationg sa pagtuo. (Filipos 4:13) Ang Dios balaan, gani wala niya kita ginabutang sa mga kahimtangan nga magapaluya sang aton inugbato sa paghimo sing sala. Kon mabutang kita sa dibalaan nga kahimtangan kag makahimo sing sala, indi naton sia pagbasulon, “kay sa malaut nga butang ang Dios indi matilawan ukon sia mismo magatilaw kay bisan sin-o.” Walay sapayan nga mahimo pahanugutan ni Jehova ang isa ka pagtilaw agod disiplinahon kita para sa aton kaayuhan, wala sia nagatilaw sa aton nga may malaut nga tinutuyo. (Hebreo 12:​7-11) Si Satanas mahimo magsulay sa aton sa paghimo sing sala, apang ang Dios magaluwas sa aton gikan sa sinang isa nga malauton.​—⁠Mateo 6:⁠13.

13. Ano ang matabo kon wala naton ginasikway ang sayop nga kailigbon?

¹³ Dapat kita mangin mapangamuyuon bangod ang isa ka sitwasyon mahimo nga magadul-ong sa isa ka sayop nga kailigbon nga magabuyok sa aton sa sala. Si Santiago nagsiling: “Ang kada isa ginatilawan kon ginabuyok kag ginahaylo sia sang iya kaugalingon nga kailigbon.” Indi naton mabasol ang Dios sa sala naton kon ginatugutan naton ang aton tagipusuon nga hunahunaon ang makasasala nga kailigbon. Kon wala naton ginasikway ang sayop nga kailigbon, ‘magapanamkon ini,’ magatubo sa tagipusuon, kag “nagapanganak sa sala.” Kon ang sala nahimo na, “nagapatubas [ini] sing kamatayon.” Sing maathag, dapat naton bantayan ang aton tagipusuon kag batuan ang makasasala nga mga huyog. (Hulubaton 4:23) Si Cain ginpaandaman nga ang sala magadaug sa iya, apang wala sia makig-away. (Genesis 4:​4-8) Gani, nian, kamusta kon nagasugod kita sa paglakat sa dimakasulatanhon nga dalanon? Pat-od gid nga dapat kita magpasalamat kon ang Cristianong mga gulang magatinguha sa pagpasibu sa aton agod indi kita makasala batok sa Dios.​—⁠Galacia 6:⁠1.

Ang Dios​—⁠Ang Tuburan Sang Maayong mga Butang

14. Sa anong kahulugan masiling nga ang mga dulot sang Dios “himpit”?

¹⁴ Dapat naton dumdumon nga si Jehova amo ang Tuburan, indi sang mga pagtilaw, kundi sang maayong mga butang. (Santiago 1:​16-18) Ginapatuhuyan ni Santiago ang mga masigkatumuluo subong “hinigugma nga mga kauturan” kag ginapakita nga ang Dios amo ang Manughatag sang ‘tagsa ka maayong dulot kag himpit nga regalo.’ Ang espirituwal kag materyal nga mga dulot ni Jehova “himpit,” ukon kompleto, nga wala sing kulang. Nagagikan ini “sa hitaas,” gikan sa puluy-an sang Dios sa mga langit. (1 Hari 8:39) Si Jehova amo ang “Amay sang langitnon nga mga kapawa”​—⁠ang adlaw, bulan, kag mga bituon. Nagahatag man sia sa aton sing espirituwal nga kapawa kag kamatuoran. (Salmo 43:​3; Jeremias 31:​35; 2 Corinto 4:6) Indi kaangay sang adlaw nga nagabalhin sing mga landong samtang nagalakat ini kag yara lamang sa putukputukan sa kaudtuhon, ang Dios yara pirme sa putukputukan sa pag-aman sing maayo. Pat-od gid sia nga magasangkap sa aton agod maatubang ang mga pagtilaw kon himuslan naton sing bug-os ang iya espirituwal nga mga aman paagi sa iya Pulong kag sa “matutom kag mainandamon nga ulipon.”​—⁠Mateo 24:⁠45.

15. Ano ang isa sang labing maayo nga mga dulot ni Jehova?

¹⁵ Ano ang isa sang labing maayo nga dulot sang Dios? Ang pagpanganak sa espirituwal nga mga anak paagi sa balaan nga espiritu, nga nagapanghikot suno sa maayong balita, ukon “pulong sang kamatuoran.” Ang mga nakaeksperiensia sing espirituwal nga pagkabun-ag amo ang “nahaunang mga bunga,” nga ginpili sa tunga sang katawhan agod mangin langitnon nga “ginharian kag mga saserdote.” (Bugna 5:​10; Efeso 1:​13, 14) Ayhan ginahunahuna ni Santiago ang nahaunang mga bunga sang sebada nga gindulot sang Nisan 16, nga amo ang petsa sang ginbanhaw si Jesus, kag ang pagdulot sang duha ka bilog nga tinapay nga ginhimo gikan sa trigo sa adlaw sang Pentecostes, sang ginpasagahay ang balaan nga espiritu. (Levitico 23:​4-11, 15-17) Sa sadto nga hitabo, si Jesus mangin ang nahaunang mga bunga kag ang iya mga masigkamanunubli “isa ka sahi sang pangunang mga bunga.” Kamusta naman kon may dutan-on kita nga paglaum? Ti, ang paghinumdom sini magabulig sa aton sa pagpanguyapot sa aton pagtuo sa Manughatag sang “tagsa ka maayong dulot,” nga nagpaposible sang kabuhi nga walay katapusan sa idalom sang paggahom sang Ginharian.

Mangin ‘Manugtuman Sang Pulong’

16. Ngaa dapat kita mangin ‘madagmit sa pagpamati apang mahinay sa paghambal kag sa kaakig’?

¹⁶ Nagaeksperiensia man kita sing mga pagtilaw sa aton pagtuo karon mismo ukon wala, dapat kita mangin “mga manugtuman sang pulong.” (Santiago 1:19-25) Dapat kita mangin “madagmit sa pagpamati” sa pulong sang Dios, mangin masinulundon nga mga manugtuman sini. (Juan 8:47) Sa pihak nga bahin, mangin “mahinay [kita] sa paghambal,” ginatulutimbang sing maayo ang aton mga ginasiling. (Hulubaton 15:​28; 16:23) Ayhan si Santiago nagalaygay sa aton nga indi mangin maabtik sa pagsiling nga ang aton mga pagtilaw naghalin sa Dios. Ginalaygayan man kita nga mangin “makuli sa pagpangakig; kay ang kaakig sang Dios wala nagahikot sang pagkamatarong sang Dios.” Kon naakig bangod sa ginsiling sang iban, ‘maghinay’ kita agod malikawan naton ang matimaluson nga sabat. (Efeso 4:​26, 27) Ang maakigon nga espiritu mahimo nga magahatag sa aton sing mga problema kag mangin isa ka pagtilaw kay ang iban indi makapatubas sang ginapatuman sa aton sang pagtuo sa aton matarong nga Dios. Isa pa, kon “daku [kita] sing paghangop,” mangin “makuli kita sa pagpangakig,” kag ang aton mga kauturan nga lalaki kag babayi magasuod sa aton.​—⁠Hulubaton 14:⁠29.

17. Ano ang matigayon paagi sa pagkuha sang kalainan sa tagipusuon kag hunahuna?

¹⁷ Pat-od gid nga dapat kita mangin hilway sa “tanan nga kahigkuan”​—⁠sa tanan nga butang nga nagapaakig sa Dios kag nagapukaw sing kasingkal. Dugang pa, dapat naton ‘isikway inang kalakasan nga butang, ang kalainan.’ Dapat naton tanan tinluan ang aton kabuhi sing bisan ano nga kahigkuan sang unod ukon espiritu. (2 Corinto 7:​1; 1 Pedro 1:​14-16; 1 Juan 1:9) Ang pagkuha sing kalainan gikan sa tagipusuon kag hunahuna magabulig sa aton nga ‘batunon nga may kalum-ok ang pagpatudok sang pulong’ sang kamatuoran. (Binuhatan 17:​11, 12) Bisan kon daw ano na kita kadugay nga mga Cristiano, dapat naton padayon nga ipatudok ang dugang pa nga Makasulatanhon nga kamatuoran sa aton. Ngaa? Bangod paagi sa espiritu sang Dios, ang ginpatudok nga pulong nagapatubas sing “bag-ong personalidad” nga nagadul-ong sa pagtigayon sing kaluwasan.​—⁠Efeso 4:​20-24.

18. Paano ang isa nga manugpamati lamang sang pulong tuhay sa isa nga manugtuman man sini?

¹⁸ Paano naton mapakita nga ang pulong amo ang aton giya? Paagi sa pagkamangin masinulundon nga “mga manugtuman sang pulong, kag indi mga manugpamati lamang.” (Lucas 11:28) Ang “mga manugtuman” may pagtuo nga nagapatubas sing mga buhat subong sang makugi nga pagpakigbahin sa Cristianong ministeryo kag regular nga pagkomento sa mga miting sang katawhan sang Dios. (Roma 10:​14, 15; Hebreo 10:​24, 25) Ang isa ka manugpamati lamang sang pulong “kaangay sang isa ka tawo nga nagatan-aw sang iya kinaugali nga nawong sa salaming.” Nagatan-aw sia, nian nagalakat kag ginakalimtan ang mahimo nga dapat tadlungon sa iya dagway. Subong “mga manugtuman sang pulong,” mahalungon naton nga ginatun-an kag ginatuman ang “himpit nga kasuguan” sang Dios, nga nagalakip sang tanan nga butang nga ginapahimo niya sa aton. Busa ang kahilwayan nga ginaagom naton kabaliskaran gid sa pagkaulipon sa sala kag kamatayon, kay nagapadulong ini sa kabuhi. Gani ‘magpadayon kita sa himpit nga kasuguan,’ dalayon nga nagausisa kag nagatuman sini. Kag hunahunaa lamang! Subong ‘mga manugtuman sang hilikuton, indi malimuton nga mga manugpamati,’ nagakalipay kita bangod sang kahamuot sang Dios.​—⁠Salmo 19:​7-11.

Indi Lamang Pormal nga mga Sumilimba

19, 20. (a) Suno sa Santiago 1:​26, 27, ano ang ginapatuman sa aton sang matinlo nga pagsimba? (b) Ano ang pila ka halimbawa sang walay dagta nga pagsimba?

¹⁹ Agod matigayon naton ang kahamuot sang Dios, dapat naton dumdumon nga ang matuod nga pagsimba indi pormalidad lamang. (Santiago 1:​26, 27) Mahimo kita maghunahuna nga kalahamut-an kita nga ‘pormal nga mga sumilimba’ ni Jehova, apang ang iya opinyon sa kada isa sa aton amo gid ang importante. (1 Corinto 4:4) Ang isa ka serioso nga kasaypanan mahimo nga amo ang kapaslawan sa ‘pagpugong sa dila.’ Ginadaya naton ang aton kaugalingon kon magahunahuna kita nga nahamuot ang Dios sa aton pagsimba kon pasipalahan naton ang iban, magbinutig, ukon indi paggamiton sing nagakaigo ang dila sa iban pa nga mga paagi. (Levitico 19:​16; Efeso 4:25) Sa pagkamatuod, indi naton luyag nga ang aton “porma sang pagsimba” mangin “walay pulos” kag dikalahamut-an sa Dios tungod sa bisan ano nga rason.

²⁰ Walay sapayan nga wala ginasambit ni Santiago ang tanan nga bahin sang matinlo nga pagsimba, nagsiling sia nga nagalakip ini sang “pag-atipan sa mga ilo kag sa balo nga mga babayi sa ila kapipit-an.” (Galacia 2:​10; 6:​10; 1 Juan 3:18) Ang Cristianong kongregasyon nagapakita sing pinasahi nga interes sa pag-aman para sa balo nga mga babayi. (Binuhatan 6:​1-6; 1 Timoteo 5:​8-10) Sanglit ang Dios amo ang Manug-amlig sang balo nga babayi kag sang ilo, makigkooperar kita sa Iya paagi sa paghimo sang aton bug-os nga masarangan sa pagbulig sa ila sa espirituwal kag sa materyal. (Deuteronomio 10:​17, 18) Ang matinlo nga pagsimba nagakahulugan man sing “paghupot sa kaugalingon nga walay higko gikan sa kalibutan,” sa dimatarong nga tawhanon nga katilingban nga ginagamhan ni Satanas. (Juan 17:​16; 1 Juan 5:19) Busa magpabilin kita nga hilway sa didiosnon nga paggawi sang kalibutan agod mahimo naton mahimaya si Jehova kag mangin mapuslanon sa iya pag-alagad.​—⁠2 Timoteo 2:​20-22.

21. May kaangtanan sa sulat ni Santiago, anong dugang nga mga pamangkot ang nagakabagay nga binagbinagon naton?

²¹ Ang laygay ni Santiago nga nabinagbinag na naton dapat magbulig sa aton nga mabatas ang mga pagtilaw kag manguyapot sa aton pagtuo. Dapat ini magpauswag sang aton apresasyon sa mahigugmaon nga Manughatag sang maayong mga dulot. Kag ang mga pinamulong ni Santiago nagabulig sa aton sa paghimo sing matinlo nga pagsimba. Ano pa ang ginapatalupangod niya sa aton? Ano pa nga mga tikang ang sarang naton himuon agod pamatud-an nga may matuod kita nga pagtuo kay Jehova?

[Footnote]

Paano Mo Sabton?

◻ Ano ang magabulig sa aton agod mabatas ang mga pagtilaw?

◻ Walay sapayan sang mga pagtilaw, ngaa sarang makahugyaw ang mga Cristiano?

◻ Paano kita mangin mga manugtuman sang pulong?

◻ Ano ang nalakip sa matinlo nga pagsimba?

[Piktyur sa pahina 9]

Kon napaidalom sa pagtilaw, magtuo sa ikasarang ni Jehova sa pagsabat sa mga pangamuyo

[Mga piktyur sa pahina 10]

Ang “mga manugtuman sang pulong” nagabantala sang Ginharian sang Dios sa bug-os nga kalibutan