Magtan-aw sa Unhan sang mga Butang nga Imo Makita!

ANG maayong pisikal nga panulok isa ka pagpakamaayo. Sa katunayan, ang kalabanan nga mga tawo nagasiling nga pila lamang ka butang nga ginapanag-iyahan nila ang kapin pa ka malahalon sangsa panulok. Apang, para sa mga Cristiano, may isa ka sahi sang panulok nga ginhinambitan ni apostol Pablo nga kapin pa ka daku ang balor sangsa bisan maayong pisikal nga panulok. “Ginatuon namon ang amon mga mata, indi sa mga butang nga makita, kundi sa mga butang nga dimakita,” sulat ni Pablo. (2 Corinto 4:18) Mahimo nga isa gid ini ka pinasahi katama nga sahi sang panulok nga nagapaposible sa isa nga makita ang mga butang nga dimakita! Mahimo naton ini matawag nga 20/20 nga panulok sang espirituwal nga sahi.

Ngaa Kinahanglanon?

Ang mga Cristiano sadtong nahaunang siglo nagakinahanglan gid sini nga sahi sang espirituwal nga panulok. Ginhimo nila ang ila Cristianong ministeryo sa idalom sang daku nga kabudlayan. Ginpabutyag ini ni Pablo sa sining paagi: “Ginaipit kami sa tagsa ka luyo, apang wala mapiuti; ginapalibog, apang wala mawad-i sing paglaum; ginahingabot, apang wala mapatumbayai; ginapanglampusan, apang wala malaglag.”​—⁠2 Corinto 4:​8, 9.

Walay sapayan sining mga kahimtangan, ang matutom nga mga disipulo nagtindog nga malig-on. Upod ang dakung pagtuo sa Dios, nakasiling sila kaangay ni Pablo: “Wala kami ginalapyo, kundi bisan nga ang amon pagkatawo nga sa guwa nagaluya, pat-od gid nga ang amon pagkatawo sa sulod nagabag-o adlaw-adlaw.” Apang, ano ang nagpahanabo sining adlaw-adlaw nga pagbag-o? Si Pablo nagpadayon sa pagsiling: “Bangod bisan ang kapipit-an malip-ot sa tion kag mamag-an, nagapanghikot ini sa amon sing isa ka himaya nga may kapin kag kapin pa nga kabug-aton kag walay katapusan; samtang ginatuon namon ang amon mga mata, indi sa mga butang nga makita, kundi sa mga butang nga dimakita. Kay ang mga butang nga makita umalagi, apang ang mga butang nga dimakita walay katapusan.”​—⁠2 Corinto 4:​16-18.

Ginpalig-on ni Pablo ang iya espirituwal nga mga kauturan nga indi pagtugutan ang mga problema, mga kabudlayan, mga paghingabot​—⁠bisan ano man nga sahi sang mga kapipit-an⁠—​sa pagpaburon sang ila pagtan-aw sa mahimayaon nga padya nga ginpahamtang sa atubangan nila. Dapat sila magtan-aw sa unhan sang ila karon nga mga kahimtangan, nagatuon sang ila mga mata sa makalilipay nga resulta sang Cristianong dalanon. Amo yadto ang nagbulig sa ila nga mabag-o sa adlaw-adlaw ang ila pamat-od nga magpadayon sa pagpakig-away. Ang mga Cristiano karon nagakinahanglan man sing amo sina kaayo nga espirituwal nga panulok.

Tamda ang Karon nga mga Kapipit-an Subong Malip-ot sa Tion!

Sing dimalikawan, makita naton adlaw-adlaw ang mga butang nga indi naton luyag makita. Sa pagpasiplat sa salaming, indi gid naton malikawan nga makita ang di-halandumon nga mga depekto kag mga higko sa pisikal nga lawas, mga patimaan sang pisikal nga pagkadihimpit. Kon magtan-aw kita sa salaming sang Pulong sang Dios makita naton ang espirituwal nga mga depekto kag mga higko, sa aton kaugalingon kag sa iban. (Santiago 1:​22-25) Kag kon magtan-aw kita sa adlaw-adlaw nga pamantalaan ukon sa telebisyon, ang mga sugilanon tuhoy sa inhustisya, kapintas, kag trahedya gilayon nga nagatawag sang aton igtalupangod kag nagapahanusbo sa aton.

Luyag ni Satanas nga mahanusbo kita bangod sang mga butang nga aton nakita ukon magalikday kag magasugod sa pagpangalag-ag sa pagtuo. Paano naton matapna nga mahanabo ini? Dapat naton sundon ang halimbawa nga ginpahamtang ni Jesucristo, subong sang ginrekomendar ni apostol Pedro sang nagsiling sia: “Sa katunayan, gintawag kamo sa sining dalanon, kay si Cristo man nag-antos tungod sa inyo, nga nagabilin sa inyo sing sulundan agod sundon ninyo sing maayo ang iya mga tikang.” (1 Pedro 2:21) Sa tanan nga bahin sang Cristianong pagkabuhi, si Jesus isa ka himpit nga halimbawa.

Sa pagtudlo kay Jesus subong ang aton sulundan, ilabi na nga ginsambit ni Pedro nga si Jesus nag-antos. Sa pagkamatuod, nag-antos sing daku si Jesus sa duta. Subong “batid nga manugpangabudlay” ni Jehova nga yadto didto sang gintuga ang tawo, nahibaluan gid niya kon ano ang tuyo sang Dios sa mga tawo. (Hulubaton 8:​30, 31) Apang karon nakita niya mismo kon nangin ano sila bangod sang sala kag pagkadihimpit. Adlaw-adlaw nakita niya kag dapat pakig-angutan ang mga pagkadihimpit kag mga kaluyahon sang tawo. Mahimo nga mabudlay gid yadto sa iya.​—⁠Mateo 9:36; Marcos 6:⁠34.

Luwas sa kapipit-an sang iban, naagihan man ni Jesus ang iya kaugalingon nga mga kapipit-an. (Hebreo 5:​7, 8) Apang upod ang himpit nga espirituwal nga panulok, nagtan-aw sia sa unhan pa sini agod makita ang padya nga pagabayawon sa dimamalatyon nga kabuhi tungod sang iya dalanon sang integridad. Nian subong Mesianikong Hari, may pribilehiyo sia nga mabayaw ang nasit-an nga katawhan gikan sa manubo nga kahimtangan sini pabalik sa kahimpitan nga orihinal nga gintuyo ni Jehova. Ang pagtuon sang iya mata sa sining dimakita nga mga paglaum sa palaabuton nakabulig sa iya nga huptan ang kalipay sa diosnon nga pag-alagad walay sapayan sang mga kapipit-an nga nakita niya sa adlaw-adlaw. Si Pablo nagsulat sang ulihi: “Tungod sa kalipay nga ginbutang sa iya atubang nagbatas sia sing usok sang pag-antos, nga nagatamay sang kahuluy-an, kag naglingkod sa tuo nga kamot sang trono sang Dios.”​—⁠Hebreo 12:⁠2.

Wala gid pagtuguti ni Jesus ang mga kabudlayan kag mabudlay nga mga kahimtangan nga magpahanusbo sa iya, nga maglikday, ukon magpangalag-ag sa iya pagtuo. Subong mga disipulo niya, dapat naton sundon sing maayo ang iya mataas nga halimbawa.​—⁠Mateo 16:⁠24.

Magkonsentrar sa Dimakita nga Walay Katapusan nga mga Butang!

Sang ginpakita kon ano ang nagpaposible kay Jesus nga makabatas, gintudlo man ni Pablo ang dalanon para sa aton sang nagsulat sia: “Magdalagan kita nga may pagbatas sang dalaganon nga ginabutang sa aton atubang, nga nagatulok sing maayo sa Pangulo nga Ahente kag Manughimpit sang aton pagtuo, si Jesus.” (Hebreo 12:​1, 2) Huo, agod makadalagan sa Cristianong dalanon sing madinalag-on kag malipayon, dapat kita magtan-aw sa unahan sang mga butang nga yara gid sa atubangan naton. Apang paano kita ‘makatulok sing maayo’ kay Jesus, kag ano ang mahimo sini para sa aton?

Subong isa ka halimbawa, sang 1914, si Jesus ginpalingkod subong Hari sang Ginharian sang Dios, kag nagagahom sia halin sa langit. Ini tanan, siempre pa, dikitaon sa aton pisikal nga mga mata. Apang, kon ‘magtulok kita sing maayo’ kay Jesus, ang aton espirituwal nga panulok magabulig sa aton nga makita nga nagahanda sia karon sa pagpanghikot agod tapuson ang karon malauton nga sistema sang mga butang kag ang pagtabog kay Satanas kag sang iya demonyo nga mga hubon pakadto sa bilangguan sang wala sing hinimuan. Dugang pa, ipakita sang aton espirituwal nga panulok ang makatilingala nga bag-ong kalibutan nga sa sini “wala na sing kamatayon, ukon kalisud ukon paghibi ukon kasakit pa. Ang nahaunang mga butang nagtaliwan.”​—⁠Bugna 19:​11-16; 20:​1-3; 21:⁠4.

Gani, nian, sa baylo nga mabug-atan sang umalagi nga mga kapipit-an nga ayhan dapat naton atubangon kada adlaw, ngaa indi ituon ang aton panulok sa mga butang nga dayon? Paagi sa mga mata sang pagtuo, ngaa indi magtan-aw sa unhan sang balatian kag kakagod sining nadagtaan nga duta agod makita ang isa ka paraiso nga puno sing mapagros, malipayon, kag mainulikdon nga mga tawo? Ngaa indi magtan-aw sa unhan sang aton mga depekto, sa pisikal kag espirituwal, kag makita ang aton kaugalingon nga nahilway sa sini sing dayon bangod sang halad nga gawad ni Cristo? Ngaa indi magtan-aw sa unhan sang mga bangkay nga ginbilin sang inaway, krimen, kag kasingki kag makita ang bag-ong mga ginbanhaw nga ginatudluan sang paghidait kag pagkamatarong ni Jehova?

Dugang pa, ang ‘pagtulok sing maayo’ kay Jesus nagalakip man sang pagtuon sang aton espirituwal nga panulok sa kon ano na ang nahimo sang Ginharian, walay sapayan nga dikitaon, sa tunga sang katawhan sang Dios sa duta: paghiusa, paghidait, gugma, utudnon nga pagpalangga, kag espirituwal nga kabuganaan. Ang isa ka Cristianong babayi sa Alemanya, sa tapos matan-aw ang vid­eo nga United by Divine Teach­ing, nagsulat: “Ang vid­eo labi pa nga magabulig sa akon nga huptan sa hunahuna nga tuman kadamo nga Cristianong mga kauturan nga lalaki kag babayi sa bug-os nga kalibutan sa sini gid nga tion ang nagaalagad sing matutom kay Jehova​—⁠kag walay sapayan ini sang pagpamatok sang publiko. Daw ano gid ka bilidhon ang aton utudnon nga paghiusa sa isa ka kalibutan nga may kasingki kag dumot!”

“Nakita” mo man bala si Jehova, si Jesus, ang matutom nga mga anghel, kag ang minilyon ka masigka-Cristiano nga nagatindog sa tupad mo? Kon amo, indi ka magakabalaka sing sobra sa “kabalaka sining sistema sang mga butang” nga magapadulog sa imo bangod sang pagluya sing buot kag magahimo sa imo nga mangin “dimabungahon” sa Cristianong pag-alagad. (Mateo 13:22) Gani ‘magtulok sing maayo’ kay Jesus paagi sa pagtuon sang imo espirituwal nga mga mata sa natukod na nga Ginharian sang Dios kag sa mga pagpakamaayo sini, sa karon kag sa palaabuton.

Mabuhi Agod Makita Kon Ano ang Dikitaon!

Nakita ang daku nga kinatuhayan sang dayon nga bag-ong kalibutan sang Dios kag sang nagakamudmod nga daan nga kalibutan karon, dapat kita mapahulag sa paggawi sang aton kaugalingon sa paagi nga maisip kita nga takus mabuhi agod makita sing literal ang mga butang nga makita lamang naton paagi sa mga mata sang pagtuo karon. Kadam-an sang mga banhawon ang mabudlayan sa pagpati kon ano ang ila makita kon magabugtaw sila kag makita ang matarong nga paraiso nga duta nga tuhay katama gikan sa kalibutan nga nakita nila antes sila napatay. Handurawa ang aton kalipay nga mangin buhi agod masug-alaw sila kag mapaathag sa ila kon ano ang ginhimo sang Dios.​—⁠Ipaanggid ang Joel 2:​21-27.

Huo, daw ano gid ka bilidhon ang maayong espirituwal nga panulok, kag daw ano ka importante nga huptan ini nga masipat! Sarang naton ini mahimo paagi sa tayuyon nga paghimo sang personal nga pagtuon sa Biblia, pagtambong sa Cristianong mga miting, pagsugid sa iban nahanungod sang aton napasad-sa-Biblia nga paglaum, kag labaw sa tanan, pagpangamuyo sing panuytoy sang Dios. Magahupot ini sang aton espirituwal nga panulok nga masipat kag matin-aw, nagapaposible sa aton nga makatan-aw sa unhan sang mga butang nga makita!