Mangin Progresibo​—Mag-uswag

SANG una mo nga natun-an ang pag-aplikar sang mga prinsipio sa Biblia, ang namat-an na nga mga panghunahuna, paghambal, kag paggawi amat-amat nga nagbag-o. Ang kalabanan sini natabo bisan sang wala pa ikaw nakapalista sa Teokratikong Eskwelahan Para sa Ministeryo. Sa karon mahimo nga nag-uswag ka na tubtob sa punto nga gindedikar mo ang imo kabuhi kay Jehova. Nagakahulugan bala ini nga magauntat ka na sa pag-uswag? Indi. Ang imo bawtismo panugod lamang.

Si disipulo Timoteo nagaalagad na subong isa ka Cristianong gulang sang ginsilingan sia ni Pablo nga ‘binagbinagon’ ang laygay nga ginhatag sa iya kag ang mga pribilehiyo sang pag-alagad nga gintugyan sa iya​—sa ‘pag-ukod sa’ sining mga butang​—​agod nga ang iya “pag-uswag madayag sa tanan nga tawo.” (1 Tim. 4:12-15) Nagasugod ka pa lang sa pagsunod sa dalanon sang kamatuoran ukon madamo na sing eksperiensia sa Cristianong pagkabuhi, dapat mangin interesado ka nga mag-uswag.

Sa Efeso 3:14-19, mabasa naton nga si apostol Pablo nangamuyo nga ang iya mga masigkatumuluo ‘bug-os nga makahangop sa hunahuna sang kasangkaron kag kalabaon kag kataason kag kadalumon’ sang kamatuoran. Sa sina nga tulumuron, si Jesus naghatag sing mga dulot nga mga lalaki sa pagtudlo, sa pagpasibu, kag sa pagpalig-on sang kongregasyon. Ang regular nga pagpamalandong sa inspirado nga Pulong sang Dios, upod ang panuytoy gikan sa eksperiensiado nga mga manunudlo, makabulig sa aton nga “magtubo” sa espirituwal.​—Efe. 4:11-15.

Ina nga pagtubo nagalakip sing ‘pagbag-o sa puwersa nga nagapahikot sa imo hunahuna.’ Nagalakip ini sang pagtukod sing isa ka mabakod nga huyog sang hunahuna nga nahisuno sa iya sang Dios kag ni Cristo. Nagakinahanglan ini sing padayon nga pagpadayag sa ila mga panghunahuna, agod nga ‘masuklob ang bag-o nga personalidad.’ (Efe. 4:​23, 24) Kon ginatun-an mo ang mga Ebanghelyo, ginatamod mo bala ini nga mga kasaysayan sang kabuhi ni Cristo subong isa ka sulundan nga imo pagasundon? Ginatinguhaan mo bala nga kilalahon ang espesipiko nga mga kinaiya nga ginpakita ni Jesus kag nian ginapanikasugan gid nga ilugon ini sa imo kabuhi?​—1 Ped. 2:21.

Ang mga topiko nga ginalakip mo sa paghambalanay mangin isa ka palatandaan sang kasangkaron sang imo pag-uswag. Ang mga nagsuklob sang bag-o nga personalidad wala nagahambal sang di-bunayag, malaw-ay, binastos, ukon negatibo nga mga pulong. Sa baylo, ang ila paghambal “maayo para sa pagpalig-on . . . agod mahatag sini kon ano ang maayo sa mga nagapamati.” (Efe. 4:​25, 26, 29, 31; 5:​3, 4; Jud. 16) Ang ila mga komento kag mga pagpahayag sa pribado kag sa mga miting sa kongregasyon nagapakita nga ang kamatuoran nagapabag-o sang ila kabuhi.

Kon wala ka na “ginabolabola sang mga balod kag ginapalidpalid sang tagsa ka hangin sang panudlo,” ini nagapakita man sang imo pag-uswag. (Efe. 4:14) Halimbawa, ano ang imo reaksion kon ang kalibutan magpaulan sa imo sing bag-o nga mga ideya, mga prinsipio, ukon mga porma sang kalingawan? Masulay ka bala nga gamiton ang tion gikan sa espirituwal nga mga hilikuton agod himud-usan ina nga mga butang? Ang paghimo sina makapakunol gid sang espirituwal nga pag-uswag. Daw ano ka maalamon nga magbakal sing tion para sa espirituwal nga mga hilikuton!​—Efe. 5:​15, 16.

Ang imo pagpakig-angot sa iban nga mga tawo mangin isa man ka patimaan sang imo pag-uswag sa espirituwal. Natun-an mo bala nga mangin ‘mainawaon sing malum-ok, hilway nga nagapatawad’ sa imo mga kauturan?​—Efe. 4:32.

Ang imo pag-uswag sa paghimo sang mga butang sa paagi ni Jehova dapat mapadayag sa kongregasyon kag sa puluy-an. Dapat makita man ini sa eskwelahan, sa publiko nga mga duog, kag sa duog nga imo ginatrabahuan. (Efe. 5:21–​6:9) Kon sa sining tanan nga kahimtangan ginapadayag mo sing bug-os ang diosnon nga mga kinaiya, nian ang imo pag-uswag mapadayag mismo.

Si Jehova nagtugyan sa kada isa sa aton sang mga ikasarang kag mga kinaadman. Ginapaabot niya sa aton nga gamiton ini para sa iban agod nga paagi sa aton, mapabutyag niya ang iya di-bagay nga kaayo. Tuhoy sini si apostol Pedro nagsulat: “Suno sa dulot nga nabaton sang kada isa, gamita ini sa pag-alagad sa isa kag isa subong maayong mga tulugyanan sang di-bagay nga kaayo sang Dios.” (1 Ped. 4:10) Paano mo ginatungdan ang imo pagkatinugyanan?

Si Pedro nagpadayon: “Kon ang bisan sin-o nagahambal, ihambal niya ini subong sang sagrado nga mga pahibalo sang Dios.” (1 Ped. 4:11) Ini nga bersikulo nagapadaku sang responsabilidad nga maghambal sing nahisanto gid sa Pulong sang Dios, agod nga mahimaya ang Dios. Ang paagi nga ginahimo ina nga paghambal dapat man maghimaya kay Jehova. Ang paghanas nga ginahatag paagi sa Teokratikong Eskwelahan Para sa Ministeryo makabulig sa imo nga magamit ang imo dulot sa sina nga paagi​—nagahimaya sa Dios paagi sa pagbulig sa iban. Upod sina subong imo tulumuron, paano mo takson ang imo pag-uswag sa eskwelahan?

Sa baylo nga hunahunaon kon daw ano na kadamo nga mga punto ang imo natuptupan sa imo speech counsel nga pormas ukon ang sahi sang mga asaynment nga ginhatag sa imo, hunahunaa ang kasangkaron nga ginpauswag sang paghanas ang kalidad sang imo halad sang pagdayaw. Ginahanda kita sang eskwelahan nga mangin epektibo pa sa ministeryo sa latagon. Busa pamangkuta ang imo kaugalingon: ‘Ginahandaan ko gid bala ang akon ihambal sa pag-alagad sa latagon? Natun-an ko bala nga ipakita ang personal nga interes sa mga ginapanaksihan ko? Ginapahamtang ko bala ang sadsaran para sa mga pagduaw liwat paagi sa pagbilin sa mga tawo sing isa ka pamangkot para hambalan sa masunod nga tion? Kon may ginahiwat ako nga pagtuon sa Biblia, nagapanikasog bala ako nga mag-uswag subong isa ka manunudlo nga nagalab-ot sang tagipusuon?’

Indi pagtamda ang pag-uswag paagi lamang sa mga pribilehiyo sang pag-alagad nga ginhatag sa imo. Ang imo pag-uswag makita, indi sa asaynment, kundi sa kon ano ang imo ginahimo sa sini. Kon ginhatagan sing asaynment nga nagalakip sang pagpanudlo, pamangkuta ang imo kaugalingon: ‘Gingamit ko gid bala ang arte sang pagpanudlo? Ginhatag ko bala ang materyal sa paagi nga nag-apektar ini sa kabuhi sang mga nakabati sini?’

Ang pagpalig-on nga gamiton ang imo dulot nagapahangop sang paggamit sing inisyatibo. Nagamatumato ka bala nga manghikot upod sa iban sa ministeryo sa latagon? Nagapangita ka bala sing mga kahigayunan nga buligan ang mga bag-uhan, lamharon, ukon may sablag nga mga katapo sang imo kongregasyon? Nagaboluntaryo ka bala sa pagtinlo sa Kingdom Hall ukon sa pagbulig sa nagkalainlain nga paagi sa mga kombension kag mga asambleya? Maka-auxiliary payunir ka bala sa pulupanag-on? Makaalagad ka bala subong regular payunir ukon makabulig sa isa ka kongregasyon diin mas daku ang kinahanglanon? Kon ikaw isa ka utod nga lalaki, nagapanikasog ka bala nga malab-ot ang Makasulatanhon nga mga kalipikasyon para sa ministeryal nga mga alagad kag mga gulang? Ang imo kahanda sa pagbulig kag sa pagbaton sing responsabilidad isa ka tanda sang pag-uswag.​—Sal. 110:3.

Kon nagabatyag ka nga nalimitehan bangod kulang sang eksperiensia sa Cristianong pagkabuhi, magpakabakod. Ang Pulong sang Dios ‘makapaalam sa isa nga indi eksperiensiado.’ (Sal. 19:7; 119:130; Hulu. 1:​1-4) Ang pag-aplikar sa laygay sang Biblia nagatugot sa aton nga makabenepisyo gikan sa himpit nga kaalam ni Jehova, nga mas daku sing balor sangsa bisan ano nga tinun-an nga matigayon paagi sa eksperiensia lamang. Apang, samtang nagauswag kita sa aton pag-alagad kay Jehova, matigayon man naton ang mapuslanon nga eksperiensia. Paano naton ini magamit sing maayo?

Bangod napadayag sa nagkalainlain nga mga kahimtangan sa kabuhi, ang isa ka tawo mahimo masulay nga mangatarungan: ‘Naatubang ko na ini anay nga kahimtangan. Nahibaluan ko kon ano ang himuon.’ Amo bala ini ang dalanon sang kaalam? Ang Hulubaton 3:7 nagpaandam: “Indi magpakaalam sa imo kaugalingon nga mga mata.” Ang eksperiensia dapat magpasangkad gid sang aton pagtamod tuhoy sa mga butang nga dapat binagbinagon kon nagaatubang sa mga kahimtangan sa kabuhi. Apang kon nagauswag kita sa espirituwal, ang aton eksperiensia dapat magpatudok man sa aton hunahuna kag tagipusuon nga kinahanglan naton ang pagpakamaayo ni Jehova agod magmadinalag-on. Nian, ang aton pag-uswag mapadayag, indi paagi sa pag-atubang naton sang mga kahimtangan nga may pagsalig sa kaugalingon, kundi paagi sa aton kahanda sa pagpangayo sing panuytoy ni Jehova sa aton kabuhi. Ginapakita ini paagi sa aton pagsalig nga wala sing bisan ano nga matabo nga wala niya ginatugot kag paagi sa paghupot naton sing masinaligon kag mahigugmaon nga kaangtanan upod sa aton langitnon nga Amay.

Ginkilala ni apostol Pablo, walay sapayan nga hamtong sia sa espirituwal kag hinaplas nga Cristiano, nga kinahanglan niya nga padayunon ang ‘paghimulat’ agod matigayon ang tulumuron nga kabuhi. (Filip. 3:13-16) Amo man bala sini ang imo pagtamod?

Tubtob sa anong kasangkaron nga nagahimo ikaw sing pag-uswag? Taksa ang imo pag-uswag paagi sa kon daw ano ka bug-os ang pagsuklob mo sang bag-o nga personalidad, kon daw ano ka bug-os ang pagpasakop mo sa pagkasoberano ni Jehova, kag kon daw ano kaukod nga ginagamit mo ang imo mga dulot sa pagpadungog kay Jehova. Samtang nagabenepisyo ikaw gikan sa pagpanudlo sa Teokratikong Eskwelahan Para sa Ministeryo, ang mga kinaiya nga ginpadaku sa Pulong sang Dios dapat progresibo nga makita sa imo paghambal kag pagpanudlo. Hupti sing maayo ini nga mga bahin sang imo pagtubo. Huo, magkalipay sa sini, kag ang imo pag-uswag makita gid.