“Mga Butang nga Nagapabaskog sang Aton Paglaum”

ISA sadto ka mainit-init nga aga sang Domingo, Septiembre 10, sang magtipon ang 4,155 sa matahom nga Assembly Hall of Jehovah’s Witnesses sa Jersey City, New Jersey, para sa gradwasyon sang ika-87 nga klase sang Watchtower Bible School of Gilead. Lakip sa tumalambong amo ang 24 ka estudyante kag ang ila gin-agda nga mga bisita upod sa mga katapo sang pamilya Bethel gikan sa Brooklyn kag sa uma sang Sosiedad.

Napahipos sa gilayon ni Albert Schroeder ang tumalambong sang alas 10:​00 s.a. nga amo ang tsirman sadto nga adlaw. Sa tapos sang nagabukas nga ambahanon, si John Barr ang nangamuyo. Ining duha ka utod lunsay katapo sang Nagadumala nga Hubon. Nagpresentar si Utod Schroeder sing malip-ot nga rekord sang klase kag nagsiling nga ang mga gradwado “nakahanda na sa pagpakigbahin sa bug-os globo nga hilikuton sang mga Saksi ni Jehova, nga karon sa 210 ka kadutaan.” Nian ginpakilala niya ang pito ka humalambal.

Si Robert Wallen, nga nagatrabaho sa Executive Offices sa ulong-talatapan sa Brooklyn, nagpasad sang iya tema nga, “Maghupot sing Mainit nga Gugma para sa Isa kag Isa,” sa 1 Pedro 4:⁠8. Nagsiling sia nga ang mga misyonero dapat magbuligay, kag sanglit ang tanan nga estudyante sini nga klase minyo, ginpatuhoy niya ang iya komento labi na sa mga mag-asawa. “Dapat higugmaon sang asawa ang iya bana bisan pa mas madasig sia makatuon sang dumuluong nga hambal,” laygay niya. “Dapat sia mangin mahinangpanon kag maluluy-on. Subong man, dapat niya hangpon ang iya bana kon sia ang nakatuka nga magluto sa bug-os nga semana!” (Sa masami, ang tagsa ka misyonero ginatangduan sing regular nga adlaw sa pagluto sang pagkaon para sa tanan nga nagapuyo sa puluy-an sang mga misyonero.) Nian ginlaragway sang humalambal ang mga kapaslawan kag makahalam-ot nga mga eksperiensia sang iban nga bana sang nagatuon sila sa pagluto, subong sang eksperiensia sang isa ka bana nga naggamit sing baking soda sa baylo sang baking powder. Ginpakita man ni Utod Wallen nga dapat man ang bana “mangin mahinantupon sa mga kinahanglanon sang iya asawa,” kay ang daku nga bahin sang tion sang bana mahimo nga ginahinguyang sa pag-atipan sa mga salabton sa kongregasyon. Sa mga bana kag mga asawa, sia nagsiling: “Mangin makapalig-on pirme; dili maghambal sing negatibo nga mga komento, bisan sa isa kag isa. Likawi ang pagpain sang imo kaugalingon. Kag kon magsayop ka, batuna ina.”

Ang masunod nga humalambal, si Daniel Sydlik, isa ka katapo sang Nagadumala nga Hubon, nagpili sang tema nga: “Hupti nga Nagasiga ang Kalayo sang Espiritu sang Dios,” pasad sa 1 Tesalonica 5:⁠19. “Ang kalayo sarang makapainit-init kag sarang makalaglag,” siling niya. “Kon kaisa ang mga misyonero makapalig-on kag kon kaisa makapahadlok sila. Ang isa ka tigulang nga Aprikano nagsiling anay: ‘Hinaya lang ang paghuyop,’ subong sang sa diutay nga kalayo nga luyag mo magdabdab! Kon nagapakighambal nahanungod sa mga butang nga masapwan mo sa inyo asaynment​—⁠wala sing tabon nga mga imburnal, mga langaw, magahod nga trapiko, bag-o nga pungsod, indi kilala nga relihion​—⁠magpakita sing pagtahod. Mas madamo nga langaw ang madakop mo paagi sa pulot sang sa langgaw. Tun-i ang ‘paghuyop sing mahinay’ kag sa amo mahuptan mo nga nagasiga ang kalayo sang espiritu ni Jehova.”

Nian ang tema nga “Mag-unong sa Inyo Asaynment nga May Kapagsik kag Paghalong” ginpasangkad ni Kenneth Flodin, manugtatap sang Puluy-an Bethel sa Watchtower Farms. Sanglit ang Gilead School yara na karon sa Watchtower Farms, ang tanan nga gradwado nakakilala kay Utod Flodin. Duha ka bahin ang ginpasangkad sa iya pamulongpulong: (1) materyalismo kag (2) negatibo nga hambal kag negatibo nga panghunahuna. “Likawi ang kakagod kag indi pag-ulikid sa kaugalingon” amo ang laygay. “Panan-awa ang mga kasulhay kag matahom nga mga butang sa bag-ong kalibutan; indi pagpangitaa ini karon,” siling niya. Agod mabuligan ang mga estudyante nga likawan ang pagkanegatibo, ginbalikwat sang humalambal ang Numeros 13:​28, 32. “Kon kaisa,” siling niya, “pareho nga mga butang ang ginatan-aw sang mga tawo, apang ang iban may negatibo nga pagtamod, ang iban may positibo nga pagtamod. Kaangay ni Caleb sang una, magsalig kay Jehova. Isugid sa iban ang imo positibo nga panghunahuna. Kag kon masumalang mo ang negatibo nga hambal, isli ang tema agod malikawan ang negatibo nga panghunahuna.”

Si Lloyd Barry, isa ka katapo sang Nagadumala nga Hubon kag isa anay ka misyonero, naghatag sing praktikal nga laygay. “Ang gugma, kalipay, kag paghidait amo ang kinahanglanon nga mga kinaiya para sa bag-o nga mga misyonero,” siling niya. “Makilala mo ang mga kaluyahon sang iban sa inyo puluy-an sang mga misyonero, apang tamda ang imo kaugalingon nga mga kaluyahon.” Gin-alimunaw niya ang iya una nga mga adlaw sa Hapon sang ang mga misyonero nalipay sa pagkaon sing isda kada adlaw, apang nian nag-abot ang bag-o nga mga misyonero nga alerdyik sa isda. Gani gin-islan ang putahe bilang gugma sa mga bag-o mag-alabot. Naglaygay man sia: “Hupti ang pagkadlaw sa imo kaugalingon; dili gid pagpatunuri sing adlaw ang bisan ano nga problema mo. Hupti ang paghidait sa puluy-an, kag mangin malipayon kamo sa inyo pagkabuhi subong mga misyonero.”​—⁠Efeso 4:⁠26.

Nian si Jack Redford, isa sang mga instruktor sa Gilead, naghambal sa tema nga: “Tapuson ni Jehova ang Inyo Paghanas,” nga nagapasad sang iya komento sa 1 Pedro 5:⁠10. Sia nagsiling: “Sarang kamo mahanas ni Jehova paagi sa pagtugot nga mag-utwas ang mga kahimtangan nga mabudlay atubangon. Subong nga ginhanas niya ang mga apostoles anay sa pag-atubang sa nagasumpakilay nga mga personalidad, hanason man niya kamo. Indi magluya kon nagasumpakilay ang mga opinyon. Mangin handa sa pagpasibu sang imo personalidad. Ang bugal nagapabudlay sini, apang ang pagkamapainubuson nagapaposible sini. Tun-i ang pagkamapasibuon. Hanason man kamo ni Jehova sa pagpasibu sa iban. ‘Indi [lang] pagsapaka ang tanan nga ginahambal sang mga tawo’ nahanungod sa imo.” (Manugwali 7:​21, 22) Ang paghingabot isa man ka paghanas. Ang mga misyonero nga nakabatas sang paghingabot malipayon kag wala sing paghinulsol, kundi kalipay lamang bangod nahanas sila sang paghingabot.

Nian si Ulysses Glass, isa pa ka instruktor, naghatag sang hingapusan nga pamulongpulong sa mga gradwado. Gingamit niya ang Efeso 4:​1-3, nga ginadayaw ang klase sa ginpakita nila nga paghiusa sa mga kinaiya nga ginlaragway sa sini kag ginpalig-on sila nga padayunon ang paghimo sini, nga nagasiling: “Ang paghidait isa ka butang nga nagawagkos, kag kinahanglanon ini sa paghiusa.” Nian nagpadayon sia sa Efeso 4:​4-6 kag ginrepaso niya ang pagkamakapulunaw sang espiritu sang Dios, nga ginapahanumdom ang tanan nga “si Jehova amo ang Tuburan sang bug-os nga dinamiko nga kusog. Dapat kita mapunaw sa iya; isa ka makahaladlok nga butang nga mahulog sa iya mga kamot.”​—⁠Hebreo 10:⁠31.

Daku nga Paglaum

Nian namati ang tanan nga may hanuot nga interes kay Theodore Jaracs, isa ka katapo sang Nagadumala nga Hubon sang mga Saksi ni Jehova, nga naghambal tuhoy sa pinakadaku nga tema: “Mga Butang nga Nagapabaskog sang Aton Paglaum.” Nagapangatarungan sa 1 Corinto 2:​9, sia nagsiling: “Ining bersikulo wala nagahambal nahanungod sa materyal nga mga butang, kay ang masunod nga bersikulo, ang 1 Corinto 2:​10, nagahambal tuhoy sa ‘madalom nga mga butang sang Dios.’ Nagadalahig ini sang ‘kaalam sang Dios’ tuhoy sa ‘balaan nga tinago,’ ang iya ‘natago nga kaalam’ nga naghalin sa duog nga lampas pa sa sining sistema solar, huo, gikan sa Dios mismo.” (1 Corinto 2:7) Nian ang tumalambong gintudlo sa Isaias 64:​4, nga isa ka pahanumdom nga ‘magpadayon sa paglaum’ sa Dios kag sa mga butang nga iya ginhanda.

Daw ano gid ang paglaum sang katawhan sang Dios! Ginpakita ni Utod Jaracz ang masunod: “Sang 1919 napukan ang Babilonia nga Daku; sang 1922 amo ang makakulunyag nga pagpalig-on nga ‘ibantala ang Hari kag ang Ginharian,’ nga ibantala ang natukod na nga Ginharian sa bug-os nga kalibutan; sang 1935 natun-an sang katawhan sang Dios ang kahulugan sang ‘dakung kadam-an’ sa Bugna 7:​9; sang 1943 nakita nila ang Gilead School nga nagsugod sa pagpadala sing mga misyonero sa mga ukbong sang duta; sa karon, 1989, kamo nga mga gradwado may pribilehiyo sa pagsugid sing maayong mga butang sa katawhan sa inyo asaynment nga nalangkag sa pagpamati.”

Sa tapos mapanghatag ang mga diploma, ginbasa sang isa sa mga estudyante ang isa ka makatalandog nga sulat sang pag-apresyar gikan sa klase.

Sang hapon, gindumalahan ni Lon Schilling, coordinator sang Watchtower Farms Committee, ang ginpalip-ot nga Pagtinuon sa Lalantawan. Nian ang mga estudyante nagpresentar sing makalilipay nga musikal nga programa kag gindrama nila ang pila sang ila mga eksperiensia sa pag-alagad sa latagon. Pagkatapos sini, ang lokal nga mga manugbantala nagpresentar sing sibu sa tion nga drama nga natig-uluhan: “Paglandas sang Malalangon nga mga Buhat ni Satanas.” Bilang katapusan, sa tapos mamati sa interbyu sa anom sang bag-o nga mga gradwado, ang malipayon nga panong nag-amba sang nagatakop nga ambahanon kag nalipay sa pagbuylog sa pangamuyo sang 96-anyos nga presidente sang Gilead School, nga si Frederick Franz.

[Kahon sa pahina 23]

ESTADISTIKA SANG KLASE

Kadamuon sang pungsod nga gintiglawas: 5

Kadamuon sang pungsod nga ginpadalhan: 10

Kadamuon sang mag-asawa: 12

Kabilugan nga kadamuon sang mga estudyante: 24

Promedyo nga edad: 30.9

Promedyo nga tinuig sa kamatuoran: 13.4

Promedyo nga tinuig sa bug-os tion nga ministeryo: 9.2

[Piktyur sa pahina 23]

Ika-87 nga Naggradwar nga Klase sang Watchtower Bible School of Gilead

Sa listahan sa ubos, ang mga raya ginnumerohan halin sa una pa likod, kag ang mga ngalan nalista halin sa wala pa tuo sa tagsa ka raya.

(1) Heindel, E.; Andrews, D.; Casavant, D.; Montanez, E.; Nale, P.; Koukaras, S. (2) Miell, T.; Heithaus, M.; Melton, T.; Hagberg, N.; Kettinen, M. (3) Kettinen, L.; Andrews, W.; Koukaras, E.; McCollough, S.; Melton, G.; McCollough, J. (4) Heindel, W.; Casavant, G.; Miell, G.; Montanez, J.; Nale, M.; Hagberg, I.; Heithaus, K.