Silas—Tuburan sang Pagpalig-on

KUTOB sang maaga nga bahin sang Cristianong maragtas, ang hilikuton sang matutom nga nagalakbay nga mga manugtatap importante sa pagpalig-on sa mga kongregasyon sang katawhan sang Dios kag sa pagpalapnag sing maayong balita tubtob sa pinakaukbong nga bahin sang duta. Lakip sa una nga mga manugtatap nga gintangdo amo si Silas, isa ka manalagna kag nagapanguna nga katapo sang kongregasyon sang Jerusalem. May importante sia nga papel sa daku nga pag-uswag sang pagbantala nga hilikuton kag isa sang mga misyonero nga una nagbantala sa teritoryo sang Europa. Paano si Silas nangin kalipikado gid sa paghimo sini tanan? Kag ano ang iya mga kinaiya nga maayo nga ilugon naton?

Ang Hulusayon sa Pagtuli

Sang nag-utwas ang pamangkot tuhoy sa pagtuli nga mahimo tunaan sang pagbahinbahin sang 49 C.E., ang nagadumala nga hubon sa Jerusalem kinahanglan magpalapnag sing maathag nga panuytoy sa mga Cristiano agod mahusay ang hulusayon. Sa amo sini nga kahimtangan nga si Silas, ginatawag man nga Silvano, makita sa rekord sang Biblia. Ayhan isa sia sang mga nagdesisyon nga ginpili sadto subong tiglawas sang “mga apostoles kag tigulang nga mga lalaki,” sa pagpaalinton sang ila desisyon sa “mga kauturan sa Antioquia kag Siria kag Cilicia.” Sa Antioquia, si Silas kag si Judas (Barsabas), kaupod sanday Bernabe kag Pablo, nagdul-ong sang dala nila nga mensahe, nga maathag nga nagasugid paagi sa paghambal sing mga hitabo tuhoy sa sinapol sa Jerusalem, sa kon ano ang nadesisyunan, kag sa kaundan sang sulat. “Ginpalig-on [man nila] ang mga kauturan paagi sa madamo nga diskurso kag nagpabakod sa ila.” Makalilipay nga nagresulta ini sa ‘pagkalipay’ sang mga Cristiano sa Antioquia.—Binuhatan 15:1-32.

Busa daku ang nahimo ni Silas sa paghusay sining panguna nga hulusayon. Apang ang iya hilikuton indi mahapos. Indi mahibaluan kon ano ang mangin reaksion sang kongregasyon sa Antioquia sa kon ano ang nadesisyunan. Sa amo, “nagakinahanglan sing isa nga may daku nga kaalam kag mataktikanhon sa pagpaathag sang ginsulat sang mga apostoles,” siling sang isa ka komentarista. Ang pagpili kay Silas sa sining mabudlay nga hilikuton nagasugid sa aton kon ano sia nga sahi sang tawo. Masaligan sia sa pagtiglawas sing matutom sa mga panuytoy sang nagadumala nga hubon. Mahimo nga isa man sia ka maalam nga manugtatap nga makapakalma sa kahimtangan kon may katalagman nga magbinangig ang kongregasyon.

Paglakbay Kaupod ni Pablo

Indi mapat-od kon bala si Silas nagbalik sa Jerusalem ukon wala pagkatapos sadtong misyon. Ano man ang natabo, pagkatapos sang pagbanggianay ni Bernabe kag ni Pablo tungod kay Juan Marcos, ginpili ni Pablo si Silas, nga didto sa Antioquia sadtong tion, kay ang bag-o nga paglakbay gintuyo sang primero nga duawon liwat ang mga siudad nga ginbantalaan anay ni Pablo sang una niya nga paglakbay bilang misyonero.—Binuhatan 15:36-41.

Ayhan ginpili si Silas bangod sang iya positibo nga panimuot sa misyon sa mga Gentil kag bangod ang iya awtoridad subong isa ka manalagna kag humalambal sang nagadumala nga hubon makabulig sa pagdala sang ila mga desisyon sa mga tumuluo sa Siria kag Cilicia. Maayo gid ang mga resulta. Ang tulun-an sang Binuhatan nagasugid: “Karon samtang nagalakbay sila sa mga siudad ginadala nila sa mga didto ang mga dekrito nga ginpamat-uran sang mga apostoles kag sang mga tigulang nga didto sa Jerusalem nga tumanon. Busa, sa pagkamatuod, ang mga kongregasyon padayon nga naglig-on sa pagtuo kag nagdugang sa kadamuon adlaw-adlaw.”—Binuhatan 16:4, 5.

Samtang padayon nga naglakbay ang mga misyonero, duha ka beses nga ginpalikaw sila sang balaan nga espiritu gikan sa ila gintuyo nga ruta. (Binuhatan 16:6, 7) Gindugang sa mga nagalakbay si Timoteo, sa Listra, sa tapos sang di-maathag nga “mga tagna” nahanungod sa iya. (1 Timoteo 1:18; 4:14) Paagi sa palanan-awon kay Pablo, nga may dulot man sang pagpanagna, ang magkaupod nga mga nagalakbay ginsugo nga maglayag padulong sa Macedonia, sa Europa.—Binuhatan 16:9, 10.

Ginbunal kag Ginbilanggo

Sa Filipos, “ang panguna nga siudad sang distrito,” naagyan ni Silas ang di-malipatan nga kabudlayan. Sang mapaguwa ni Pablo ang espiritu sang pagpamakot gikan sa ulipon nga babayi, ginganoy sang iya mga agalon si Silas kag si Pablo sa atubangan sang mga mahistrado sang siudad bangod nakita nila nga ang ginahalinan sang ila kita nadula. Subong resulta, ginpakahuy-an ining duha paagi sa pagpaatubang sa ila sa publiko subong mga malaut, kag ang ila mga panapton ginkusnit kag ginbunal sila sing mga bilugon sa balaligyaan.—Binuhatan 16:12, 16-22.

Yadto nga pagbunal indi lamang makakulugmat nga silot, nga indi na maagwanta sang tawo, kundi, sa kaso ni Pablo kag ni Silas, supak man ini sa kasuguan. Ngaa? May yara mga kasuguan sa Roma nga wala sing Romano nga banwahanon ang sarang bunalon. Si Pablo isa ka Romano, kag mahimo nga amo man si Silas. Sa tapos sang ‘madamo nga paglapdos’ ginbilanggo sanday Pablo kag Silas diin gintakod ang ila mga tiil sa mga pandug. “Makakulugmat nga instrumento” ini, paathag ni Gus­tav Stäh­lin, “diin ang mga batiis sang mga bilanggo ginabika tubtob sa masarangan, agod nga indi sila makatulog.” Apang, sang tungang-gab-i, walay duhaduha nga ang ila mga likod puno sing nagangutngot nga pilas, “si Pablo kag si Silas nagpangamuyo kag nagdayaw sa Dios paagi sa ambahanon.”—Binuhatan 16:23-25.

Nagasugid ini sa aton sing isa pa ka butang tuhoy sa personalidad ni Silas. Malipayon sia bangod nag-antos sila tungod sa ngalan ni Cristo. (Mateo 5:11, 12; 24:9) Maathag nga amo man ini nga espiritu ang nagbulig kay Silas kag sa iya mga kaupod sadtong una nila nga misyon sa Antioquia nga mangin epektibo sa pagpalig-on kag sa pagpabakod sa kongregasyon, nga nagpahalipay sa ila masigka-Cristiano. Ang kalipay ni Pablo kag ni Silas mahimo nagdugang sang milagruso nga ginhilway sila sa bilangguan paagi sa linog kag nabuligan nila ang mahikog kuntani nga manugbantay sang bilangguan kag ang iya pamilya nga magtuo sa Dios.—Binuhatan 16:26-34.

Wala mahadlok sanday Pablo kag Silas sa pagbunal kag pagkabilanggo. Sang ginpadala ang sugo nga paguwaon sila, wala sila naghalin sa Filipos sing tago nga nahuya, subong sang ginpaabot sang mga mahistrado. Nagpakalig-on sila kag ginbalik nila ang problema sa mga arogante kag mapiguson nga mga opisyal. “Ginpabunal nila kami sa dayag nga wala mahukmi, mga tawo nga mga Romano, kag ginpabilanggo kami; kag karon paguwaon kami nila sa tago?” pamangkot ni Pablo. “Indi, sa pagkamatuod! kundi pakaria sila kag paguwaon kami.” Bangod nahadlok sa mga resulta, naobligar ang mga mahistrado nga makiluoy sa duha nga maghalin sa siudad.—Binuhatan 16:35-39.

Sa tapos mapatudok sa hunahuna sang mga awtoridad ang ila mga kinamatarong subong mga Romano, nagtuman si Pablo kag si Silas sa pangabay sang mga mahistrado—apang nagpaalam sila anay sa ila mga abyan. Nahisuno sa kon ano ang kahimtangan karon sang bug-os nga paglakbay nga pagbantala, liwat nga “ginpalig-on” ni Silas kag sang iya kaupod ang mga kauturan kag naghalin.—Binuhatan 16:40.

Gikan sa Macedonia Pa Babilonia

Wala maluyahan sing buot sa indi kuntani maayo nga inagihan, sanday Pablo, Silas, kag ang ila mga kaupdanan nagpadayon sa bag-o nga mga teritoryo sang pagmisyonero. Liwat nga nag-atubang sila sing mga kabudlayan sa Tesalonica. Bangod nagmadinalag-on si Pablo sa iya ministeryo sa sulod sang tatlo ka Adlaw nga Inugpahuway, ang mahisaon nga mga manugpamatok nagsugyot sang hubon sa paggamo sa ila, amo nga maalamon nga nagbiya sa siudad ang mga misyonero sa gab-i. Nagpakadto sila sa Berea. Sang mahibal-an ang mga hinimuan ni Pablo kag sang iya mga kaupod sa amo nga siudad, nag-apas didto ang mga manugpamatok gikan sa Tesalonica. Isahanon nga nagpadayon si Pablo, samtang si Silas kag si Timoteo nagpabilin sa Berea agod tatapon ang grupo sang bag-o nga mga interesado. (Binuhatan 17:1-15) Nagbuylog liwat sanday Silas kag Timoteo kay Pablo sa Corinto, nga may dala nga maayong balita kag ayhan sing isa ka regalo halin sa matutom nga mga abyan sa Macedonia. Mahimo nga nakabulig ini sa nagakinahanglan nga apostol nga untatan ang iya sekular nga hilikuton, nga ginhimo niya sa amo nga tion, kag mapagsik nga nagbalik sa bug-os tion nga pagbantala. (Binuhatan 18:1-5; 2 Corinto 11:9) Sa Corinto, si Silas kag si Timoteo gintawag man nga mga ebanghelisador kag mga kaupod ni Pablo. Gani maathag nga wala man maghinay ang ila mga hilikuton sa sadto nga siudad.—2 Corinto 1:19.

Ang paggamit sing pronombre nga “kami” sa bug-os nga mga sulat sa mga taga-Tesalonica—nga lunsay ginsulat sa Corinto sa sadtong tion—ginpahangop nga sanday Silas kag Timoteo nagbulig sa pagsulat. Apang, ang ideya nga si Silas nagpakigbahin sa pagsulat napasad ilabi na sa ginsiling ni Pedro tuhoy sa isa sang iya mga sulat. Si Pedro nagsiling nga ginsulat niya ang iya una nga sulat “paagi kay Silvano, isa ka matutom nga utod.” (1 Pedro 5:12) Bisan pa nga nagakahulugan lamang ini nga si Silvano ang nagdala sini, ang pagkatuhay sa estilo sang duha ka sulat ni Pedro mahimo nagapakita nga gingamit niya si Silas sa pagsulat sa una nga sulat apang indi sa ikaduha. Sa amo, ang isa pa sang madamo nga ikasarang kag teokratikong pribilehiyo ni Silas ayhan amo ang sekretaryo.

Isa ka Huwaran nga Dapat Ilugon

Kon hunahunaon naton sing maayo ang mga butang nga nahibaluan naton nga ginhimo ni Silas, dalayawon gid ang iya rekord. Maayo gid sia nga huwaran para sa mga misyonero kag nagalakbay nga mga manugtatap karon. Masinakripisyuhon nga ginkadtuan niya ang malayo nga mga lugar nga may daku nga panikasog, indi agod makatigayon sing materyal nga butang ukon kabantugan, kundi sa pagbulig sa iban. Ang iya katuyuan amo ang pagpalig-on sa ila paagi sa maalamon kag mataktikanhon nga laygay, nahanda sing maayo kag mahigugmaon nga mga pamulongpulong, subong man paagi sa iya kakugi sa ministeryo sa latagon. Ano man ang imo katungdanan sa tunga sang organisado nga katawhan ni Jehova, kon tinguhaan mo man nga mangin positibo—bisan sa atubangan sang kalisdanan—mangin tuburan man ikaw sing pagpalig-on sa imo mga masigkatumuluo.

[Mapa sa pahina 29]

(Para sa kabug-usan sang teksto, tan-awa ang publikasyon)

Ikaduha nga Paglakbay ni Pablo Bilang Misyonero

The Great Sea

Antioch

Derbe

Lystra

Iconium

Troas

Philippi

Amphipolis

Thessalonica

Beroea

Athens

Corinth

Ephesus

Jerusalem

Caesarea

[Cridet Line]

Mountain High Maps® Copyright © 1997 Digital Wisdom, Inc.