Ang Paggamit ni Jehova sang “Kabuangan” sa Pagluwas sa mga Nagatuo

“Kay sanglit, sa kaalam sang Dios, ang kalibutan paagi sa iya kaalam wala makakilala sa Dios, nahamut-an sang Dios ang pagluwas sa mga nagatuo paagi sa kabuangan sang amon ginawali.”—1 CORINTO 1:21.

1. Sa anong kahulugan si Jehova magagamit sing “kabuangan,” kag paano naton nahibaluan nga ang kalibutan sa kaalam sini wala makakilala sa Dios?

ANO? Magagamit bala si Jehova sang kabuangan? Indi gid! Apang sarang niya magamit kag ginagamit niya ang daw kabuangan sa kalibutan. Ginahimo niya ini agod luwason ang mga tawo nga nakakilala kag nagahigugma sa iya. Paagi sa kaalam sini, ang kalibutan indi makakilala sa Dios. Gin-athag ini ni Jesucristo sang nagsiling sia sa pangamuyo: “O Amay nga matarong, ang kalibutan wala makakilala sa imo.”—Juan 17:25.

2. Paano nga ang mga dalanon ni Jehova kag ang mga dalanon sang kalibutan daw magkapareho, apang ano ang mga kamatuoran?

² Ang pinamulong ni Jesus nagapakita nga ang mga dalanon ni Jehova tuhay gikan sa iya sang kalibutan. Sa pahapyaw mahimo nga ang katuyuan sang Dios kag ang iya sining kalibutan daw magkapareho sa isa kag isa. Mahimo nga ang mga tulumuron sining kalibutan daw may pagpakamaayo sang Dios. Halimbawa, ang Biblia nagasiling nga ang Dios magatukod sing isa ka matarong nga panguluhan nga magadala sing kabuhi nga may paghidait, kalipay, kag kabuganaan sa katawhan sa duta. (Isaias 9:6, 7; Mateo 6:10) Sa kaanggid, ang kalibutan nagapalanog sang iya katuyuan nga hatagan ang katawhan sing paghidait, kabuganaan, kag maayo nga panguluhan paagi sa ginatawag nga bag-ong kalibutan nga kahimusan. Apang ang mga katuyuan sang Dios kag ang iya sang kalibutan indi magkapareho. Ang katuyuan ni Jehova amo ang pagbindikar sang iya kaugalingon subong ang Supremo nga Soberano sang uniberso. Himuon niya ini paagi sa isa ka langitnon nga panguluhan nga magadula sang tanan nga dutan-on nga mga panguluhan. (Daniel 2:44; Bugna 4:11; 12:10) Gani ang Dios indi pareho sa sining kalibutan. (Juan 18:36; 1 Juan 2:15-17) Amo sina kon ngaa ang Biblia nagapamulong tuhoy sa duha ka sahi sang kaalam—“ang kaalam sang Dios” kag “ang kaalam sang kalibutan.”—1 Corinto 1:20, 21.

Ang Sadsaran nga Depekto sang Kaalam sang Kalibutan

3. Bisan pa ang kaalam sang kalibutan daw makadalayaw, ngaa ang ginsaad sang tawo nga bag-ong kalibutan nga kahimusan indi gid mangin makaalayaw?

³ Para sa mga wala ginatuytuyan sang kaalam sang Dios, ang kaalam sang kalibutan daw sa makadalayaw. May yara mataas-pamatian nga mga pilosopiya sang kalibutan nga nagaganyat sang hunahuna. Linibolibo ka institusyon sang mas mataas nga pagtuon ang nagapaambit sang impormasyon gikan sa ginakabig sang madamo nga pinakatalalupangdon nga mga panghunahuna sang katawhan. Ang dalagku nga mga librarya bugana sing natipon nga ihibalo sang mga siglo sang tawhanon nga eksperiensia. Apang, walay sapayan sini, ang bag-ong kalibutan nga kahimusan nga ginapanugda sang mga gumalahom sang kalibutan mangin isa lamang ka pagginahom sang dihimpit, nadagtaan sang sala, mamalatyon nga mga tawo. Gani, inang kahimusan mangin dihimpit, nagasulit sang madamong nagligad nga mga sayop kag indi gid makabusog sa mga kinahanglanon sang tanan nga katawhan.—Roma 3:10-12; 5:12.

4. Sa ano napaidalom ang ginpanugda nga bag-ong kalibutan nga kahimusan, kag upod ang anong resulta?

⁴ Ang ginapanugda nga bag-ong kalibutan nga kahimusan sang tawo napaidalom indi lamang sa tawhanon nga pagkamakasasala kundi sa impluwensia man sang malauton nga espirituhanon nga mga tinuga—huo, ni Satanas nga Yawa kag sang iya mga demonyo. Ginbulag ni Satanas ang mga hunahuna sang katawhan agod indi sila magpati sa “maayong balita sang himaya ni Cristo.” (2 Corinto 4:3, 4; Efeso 6:12) Busa, ang kalibutan nagaantos sang lainlain nga mga balatian. Nagaantos ini sang kalisang kag halit bangod sang iya makahalalit nga panikasog nga gamhan ang kaugalingon nga wala ang bulig sang Dios kag wala nagasapak sa balaan nga kabubut-on. (Jeremias 10:23; Santiago 3:15, 16) Busa, subong sang ginsiling ni apostol Pablo, “ang kalibutan paagi sa iya kaalam wala makakilala sa Dios.”—1 Corinto 1:21.

5. Ano ang sadsaran nga depekto sang kaalam sining kalibutan?

⁵ Ano, kon amo, ang sadsaran nga depekto sang kaalam sining kalibutan, lakip ang iya mga plano para sa bag-ong kalibutan nga kahimusan? Ini amo ang dipagsapak sang kalibutan sa kon ano gid ang indi madinalag-on nga dipagsapakon—ang supremo nga pagkasoberano ni Jehova nga Dios. Bugalon ini nga nagadumili sa pagkilala sa balaan nga pagkasoberano. Hungod nga gindula sang kalibutan si Jehova sa iya tanan nga mga plano kag nagsalig sa iya kaugalingon nga ikasarang kag mga buko. (Ipaanggid ang Daniel 4:31-34; Juan 18:37.) Ginaathag sang Biblia nga “ang kahadlok kay Jehova amo ang pamuno sang kaalam.” (Hulubaton 9:10; Salmo 111:10) Apang, ang kalibutan wala gani nagtuon sining sadsaran nga kinahanglanon sang kaalam. Busa, kon wala ang balaan nga pagsakdag, paano ini magmadinalag-on?—Salmo 127:1.

Pagbantala sang Ginharian—Binuang Ukon Praktikal?

6, 7. (a) Yadtong ginatuytuyan sang kaalam sang Dios nagabantala sang ano, apang paano sila ginatamod sang kalibutan? (b) Suno kay sin-o kaalam ang klero sang Cristiandad nagabantala, kag upod ang anong resulta?

⁶ Sa pihak nga bahin, yadtong mga nakakilala sa Dios nagapakita sang kaalam sang Dios kag nagapakamaayo nga magpatuytoy sa sini. Subong sang gintagna ni Jesus, ginabantala nila “ining maayong balita sang ginharian . . . sa bug-os napuy-an nga duta.” (Mateo 4:14; 28:19, 20) Ina bala nga pagbantala praktikal karon, nga ang aton duta napun-an sang kagamo, polusyon, kaimulon, kag tawhanon nga pag-antos? Sa mga maalam sang kalibutan inang pagbantala nahanungod sa Ginharian sang Dios kabuangan lamang, indi praktikal. Ginatamod nila ang mga manugbantala sang Ginharian sang Dios subong mga tagimtim nga nagapabug-at sa bapor sang Estado kag nagapahinay sang pag-uswag sini padulong sa halandumon nga politikal nga panguluhan. Ginasakdag sila sa sini sang klero sang Cristiandad, nga nagabantala suno sa kaalam sining kalibutan kag wala nagasugid sa katawhan kon ano ang kinahanglan nila nga mahibaluan nahanungod sa bag-ong kalibutan sang Dios kag sa iya Ginharian nga panguluhan, bisan pa amo ini ang pangunang panudlo ni Cristo.—Mateo 4:17; Marcos 1:14, 15.

⁷ Ang istoryador nga si H. G. Wells nagpatalupangod sini nga kapaslawan sang klero sang Cristiandad. Sia nagsulat: “Talalupangdon ang daku nga importansia nga ginhatag ni Jesus sa panudlo nga gintawag niya nga Ginharian sang Langit, kag ang mapaanggid nga pagpakadiutay sini sa paagi kag panudlo sang kalabanan nga Cristianong mga iglesia.” Apang, agod ang katawhan sining kaliwatan makatigayon sang kabuhi, dapat anay sila mamati nahanungod sa gintukod na nga Ginharian sang Dios, kag agod makapamati sila may isa nga dapat magbantala sang maayong balita nahanungod sini.—Roma 10:14, 15.

8. Ngaa ang pagwali sang maayong balita sang Dios amo ang pinakapraktikal nga butang nga himuon karon, apang anong dalanon ang mangin wala sing mapinadayunon nga benepisyo?

⁸ Ang pagbantala sang maayong balita sang Dios, kon amo, amo ang pinakapraktikal nga butang nga himuon karon. Amo ini bangod ang mensahe sang Ginharian nagahatag sing matuod nga paglaum nga nagapuno sang tawhanon nga mga tagipusuon sing kalipay sa sining katapusan nga mga adlaw nga ang ‘ital-ital nga mga tion nga mabudlay atubangon yari diri.’ (2 Timoteo 3:1-5; Roma 12:12; Tito 2:13) Samtang ang kabuhi sa sining kalibutan dipat-od kag malip-ot, ang kabuhi sa bag-ong kalibutan sang Dios mangin walay katapusan, sa tunga sang kalipay, kabuganaan, kag paghidait diri mismo sa duta. (Salmo 37:3, 4, 11) Subong sang ginsiling ni Jesucristo, “kay ano bala ang mapulos sang tawo kon maangkon niya ang bug-os nga kalibutan kag madula ang iya kalag? ukon ano bala ang ihatag sang tawo nga baylo sang iya kalag?” Kon madula sang isa ka tawo ang kinamatarong sa kabuhi sa bag-ong kalibutan sang Dios, ano ang pulos sining kalibutan nga magataliwan? Ang karon nga pagkalipay sina nga tawo sa materyal nga mga butang wala sing kabilihanan, wala sing pulos, kag umalagi lamang.—Mateo 16:26; Manugwali 1:14; Marcos 10:29, 30.

9. (a) Sang ang isa ka tawo nga gin-agda nga mangin sumulunod ni Jesus nangabay sing pagpaisol, ano ang ginlaygay ni Jesus sa iya nga himuon? (b) Paano kita maapektuhan sang sabat ni Jesus?

⁹ Ang isa ka tawo nga gin-agda ni Jesus nga mangin sumulunod niya nagsiling: “Tuguti ako anay sa pagkadto kag sa paglubong sang akon amay.” Ano ang ginlaygay ni Jesus nga himuon niya? Nakahibalo nga ang tawo nagapaisol sang pinakaimportante nga buluhaton sa paghulat lamang tubtob mapatay ang iya mga ginikanan, si Jesus nagsabat: “Baya-i ang mga patay sa paglubong sang ila kaugalingon nga mga patay, apang lakat ka kag ibantala ang ginharian sang Dios.” (Lucas 9:59, 60) Yadtong nagapakita sing kaalam paagi sa pagtuman kay Cristo indi makatalikod sa pagtuman sang ginsugo sa ila nga ibantala ang mensahe sang Ginharian. Ang balaan nga kaalam nagapaalisto sa ila nga ining kalibutan kag ang iya mga gumalahom ginpamatbatan. (1 Corinto 2:6; 1 Juan 2:17) Ang mga sumalakdag sang pagkasoberano sang Dios nakahibalo nga ang lamang matuod nga paglaum para sa katawhan nasandig sa balaan nga pagpasilabot kag pagginahom. (Zacarias 9:10) Gani samtang yadtong nagapanag-iya sang kaalam sining kalibutan wala nagapati sa Ginharian sang Dios kag wala maluyag sa sinang langitnon nga panguluhan, ang katawhan nga ginatuytuyan sang balaan nga kaalam nagahimo sang kon ano ang makahatag sing matuod nga benepisyo sa ila mga isigkatawo, nagahanda sa ila para sa kabuhi nga walay katapusan sa ginsaad nga bag-ong kalibutan ni Jehova.—Juan 3:16; 2 Pedro 3:13.

“Kabuangan sa Nagakawala”

10. (a) Sang si Saulo sang Tarsus ginkombertir, anong buluhaton ang ginhimo niya, kag paano niya ini gintamod? (b) Tungod sa ano nakilal-an ang dumaan nga mga Griego, apang paano gintamod sang Dios ang ila kaalam?

¹⁰ Si Saulo sang Tarsus, nga nangin si Pablo nga apostol ni Jesucristo, naghimo sining nagaluwas-kabuhi nga buluhaton. Makatarunganon bala hunahunaon nga sang ginkombertir ni Jesucristo si Saulo, gintangdo Niya sia sa paghimo sang isa ka binuang nga hilikuton? Wala maghunahuna si Pablo sing amo sina. (Filipos 2:16) Sadto nga tion ang mga Griego ginkabig nga amo ang labing maalam nga mga tawo sa kalibutan. Ginpabugal nila ang ila dalagkung mga pilosopo kag mga maalamon. Bisan pa si Pablo nagapamulong sing Griego, wala niya ginsunod ang pilosopiya kag pagtulun-an sang Gresya. Ngaa? Bangod inang kaalam sining kalibutan kabuangan sa Dios.a Ginpangita ni Pablo ang balaan nga kaalam, nga nagpahulag sa iya nga ibantala ang maayong balita sa balay kag balay. Ang pinakadaku nga Manugbantala sa tanan nga tion, si Jesucristo, nagpahamtang sing halimbawa kag nagsugo sa iya sa paghimo sini man nga buluhaton.—Lucas 4:43; Binuhatan 20:20, 21; 26:15-20; 1 Corinto 9:16.

11. Sa kahulugan, ano ang ginsiling ni Pablo nahanungod sa sugo sa iya nga magwali kag sa kaalam sang kalibutan?

¹¹ Si Pablo nagasiling sini nahanungod sa iya komisyon nga magbantala: “Ginpadala ako ni Cristo . . . sa pagwali sang maayong balita, indi sa kaalam sang mga pulong, basi kon magmanginwalay gahom ang usok sang pag-antos ni Cristo. Kay ang pulong sang usok sang pag-antos [ang halad gawad ni Jesus] kabuangan sa nagakawala, apang sa aton nga ginaluwas ini gahom sang Dios. Kay nasulat na: ‘Laglagon ko ang kaalam sang mga maalam, kag pakawalaon ko ang paghangop sang mga mahangpunon.’ Diin bala ang maalam [subong sang pilosopo]? Diin bala ang escriba? Diin bala ang manugbais sining sistema sang mga butang? Wala bala pagpakabuanga sang Dios ang kaalam sang kalibutan? Kay sanglit, sa kaalam sang Dios, ang kalibutan paagi sa iya kaalam wala makakilala sa Dios, nahamut-an sang Dios ang pagluwas sa mga nagatuo paagi sa kabuangan sang amon ginawali.”—1 Corinto 1:17-21.

12. Ano ang ginahimo ni Jehova paagi sa ‘mga kabuangan sang ginawali,’ kag ano ang reaksion sadtong maluyag sang “kaalam gikan sa hitaas”?

¹² Bisan pa daw indi mapatihan, ang mga tawo mismo nga ginatawag sang kalibutan nga buangbuang amo ang ginagamit ni Jehova subong iya mga manugwali. Huo, paagi sa kabuangan sang pagministro sining mga manugwali, ginaluwas sang Dios ang mga nagatuo. Ginahimos ni Jehova ang mga butang agod ang mga manugwali sining “kabuangan” indi makahimaya sang ila kaugalingon, kag ang iban nga mga tawo indi makatarunganon nga makahimaya sadtong paagi sa ila nabatian nila ang maayong balita. Amo ini agod “walay tawo nga magpabugal sa atubangan sang Dios.” (1 Corinto 1:28-31; 3:6, 7) Matuod, ang manugwali may importante nga papel, apang ang mensahe nga ginsugo sa iya nga ibantala amo ang nagapanghikot padulong sa kaluwasan sang isa ka tawo kon magtuo sia sa sini. Yadtong maluyag sang “kaalam gikan sa hitaas” indi magatamay sa mensahe sang manugwali bangod nga daw buangbuang sia kag kubos, ginhingabot, kag nagapamalaybalay. Sa baylo, ang mga mahagop magatahod sang isa ka manugbantala sang Ginharian subong isa ka manugwali nga ginsugo ni Jehova kag nagakari sa ngalan sang Dios. Magahatag sila sing daku nga importansia sa mensahe nga ginadala sang manugwali paagi sa baba kag paagi sa naimprinta nga pahina.—Santiago 3:17; 1 Tesalonica 2:13.

13. (a) Paano gintamod sang mga Judiyo kag mga Griego ang pagbantala nahanungod kay Cristo nga ginlansang? (b) Gikan sa anong mga grupo sang katawhan nga wala gintawag ang madamo nga mangin mga sumulunod ni Jesus, kag ngaa?

¹³ Nagapadayon sang iya paghinun-anon sa mga dalanon sang Dios, si Pablo nagasiling: “Ang mga Judiyo nagakinahanglan sing mga tanda kag ang mga Griego nagapangita sing kaalam; apang amon ginawali si Cristo nga ginlansang sa usok sang pag-antos, nga sa mga Judiyo kasandaran kag sa mga Gentil kabuangan; apang, sa mga tinawag, mga Judiyo kag mga Griego, si Cristo amo ang gahom sang Dios kag kaalam sang Dios. Kay ang kabuangan sang Dios maalam pa sa mga tawo, kag ang kaluyahon sang Dios makusog pa sa mga tawo. Kay tan-awa ang pagtawag sa inyo, mga kauturan, indi madamo sa inyo ang maalam suno sa kalibutanon nga mga talaksan, indi madamo ang mga gamhanan, indi madamo ang mga dungganon; kundi ginpili sang Dios ang buangbuang sang kalibutan sa pagpakahuya sang maalam, ginpili sang Dios ang kubos kag talamayon sang kalibutan, bisan ang mga butang nga indi amo, sa pagpakawalay pulos sang mga butang nga amo.”—1 Corinto 1:22-27; ipaanggid ang Isaias 55:8, 9.

14. (a) Kon pamangkuton nahanungod sa ila mga kredensiyal, ano ang ginatudlo sang mga Saksi ni Jehova? (b) Ngaa nagdumili si Pablo nga pahamut-an ang mga Griego paagi sa pagpakitakita sang kaalam sang kalibutan?

¹⁴ Sang si Jesus yari sa duta, ang mga Judiyo nagpangayo sing tanda gikan sa langit. (Mateo 12:38, 39; 16:1) Apang si Jesus wala maghatag sing bisan ano nga tanda. Sa kaanggid, ang mga Saksi ni Jehova sa karon wala nagapakita sing katulad sang tanda nga mga kredensiyal. Sa baylo, ginatudlo nila ang sugo sa ila nga ibantala ang maayong balita, subong sang narekord sa mga bersikulo sa Biblia subong sang Isaias 61:1, 2; Marcos 13:10; kag Bugna 22:17. Ang mga Griego sadto anay nagpangita sing kaalam, mas mataas nga tinun-an sa mga butang sining kalibutan. Samtang si Pablo gintudluan sang kaalam sining kalibutan, nagdumili sia sa pagpahamuot sa mga Griego paagi sa pagpakitakita sini. (Binuhatan 22:3) Nagpamulong kag nagsulat sia sa kinaandan nga Griego sang mga timawa, sa baylo sang klasiko nga Griego. Si Pablo nagsiling sa mga taga-Corinto: “Sang pagkara ko sa inyo, mga kauturan, wala [ako] magkara nga nagabantala sa inyo sang balaan nga tinago sang Dios nga may pagkasampaton sang pulong ukon sang kaalam. . . . Ang akon pulong kag akon pagwali indi sa dalayawon nga mga pulong sang kaalam kundi sa kahayagan sang espiritu kag sang gahom, agod nga ang inyo pagtuo, indi mapahamtang sa kaalam sang mga tawo, kundi sa gahom sang Dios.”—1 Corinto 2:1-5.

15. Tuhoy sa ano ginpahanumdom ni Pedro ang mga manugyubit sang maayong balita, kag paano ang karon nga sitwasyon kaanggid sa iya sang adlaw ni Noe?

¹⁵ Sa sining katapusan nga mga adlaw, ang mga mayubiton sang maayong balita sang nagapakari nga bag-ong kalibutan sang Dios kag sang nagahilapit nga katapusan sining kalibutan ginpahanumdom ni apostol Pedro nga ang kalibutan sang adlaw ni Noe “ginlapawan sang tubig kag nawala.” (2 Pedro 3:3-7) Nagaatubang sinang malaglagon nga katapusan, ano ang ginhimo ni Noe? Madamong tawo ang naghunahuna sa iya subong isa lamang ka manunukod sang arka. Apang si Pedro nagasiling nga sang ginpahanabo sang Dios ang Anaw sa dumaan nga kalibutan, “gintipigan [Niya] si Noe, nga manugbantala sang pagkamatarong, kaupod sang iban nga pito.” (2 Pedro 2:5) Sa ila kalibutanon nga kaalam, yadtong didiosnon nga mga tawo nga nagkabuhi antes sang Anaw walay duhaduha nga nagyubit sa ginbantala ni Noe kag gintawag sia nga buangbuang, direalistiko, kag dipraktikal. Sa karon, ang matuod nga mga Cristiano nagaatubang sang kaanggid nga sitwasyon, kay ginpaanggid ni Jesus ang aton kaliwatan sa iya sang adlaw ni Noe. Apang, walay sapayan sang mga manugyubit, ang pagwali sang maayong balita sang Ginharian indi lamang isa ka hambalanon. Kaangay sang pagwali nga ginhimo ni Noe, nagakahulugan ini sang kaluwasan para sa manugwali kag para sa mga nagapamati sa iya!—Mateo 24:37-39; 1 Timoteo 4:16.

‘Mangin mga Buangbuang Agod Mangin mga Maalam’

16. Ano ang mahanabo sa kaalam sining kalibutan sa Armagedon, kag sin-o ang makalampuwas pasulod sa bag-ong kalibutan sang Dios?

¹⁶ Sa dili madugay, sa Armagedon, laglagon ni Jehova nga Dios “ang kaalam sang mga maalam.” Dulaon niya “ang paghangop sang mga mahangpunon” nga nagahimo sing mga pagpakot kon paano ang ila bag-ong kalibutan nga kahimusan magadala sing maayo pa nga mga kahimtangan para sa katawhan. “Ang inaway sang dakung adlaw sang Dios nga Labing Gamhanan” magasunog sang tanan nga madaya nga pangatarungan, pilosopiya, kag kaalam sining kalibutan. (1 Corinto 1:19; Bugna 16:14-16) Ang lamang nga makalampuwas sa sinang inaway kag makatigayon sang kabuhi sa bag-ong kalibutan sang Dios amo yadtong nagatuman sa ginatawag sining kalibutan nga kabuangan—huo, ang mahimayaon nga maayong balita sang Ginharian ni Jehova.

17. Paano ang mga Saksi ni Jehova nangin ‘mga buangbuang,’ kag ano ang determinado nga himuon sang mga manugwali sang Dios sang maayong balita?

¹⁷ Ang mga Saksi ni Jehova, nga ginatuytuyan sang iya espiritu, wala mahuya nga ibantala ang ginatawag sang kalibutan nga kabuangan. Sa baylo nga tinguhaan nga mangin maalam sa kalibutan, nangin ‘mga buangbuang’ sila. Paano? Paagi sa paghimo sang pagbantala sang Ginharian nga hilikuton agod mahimo sila nga magmaalam, subong sang ginsulat ni Pablo: “Kon ang bisan sin-o sa inyo nagahunahuna nga sia maalam sa sining sistema sang mga butang, magmanginbuangbuang sia agod nga magmaalam sia.” (1 Corinto 3:18-20) Ang mga manugwali ni Jehova sang maayong balita nakahibalo sang nagaluwas-kabuhi nga balor sang ila mensahe kag magapadayon sa pagwali sini sa walay langan tubtob sa katapusan sining kalibutan kag sang iya kaalam sa inaway sa Armagedon. Sa dili madugay, si Jehova nga Dios magabindikar sang iya bug-os uniberso nga pagkasoberano kag magahatag sang kabuhi nga walay katapusan sa tanan nga nagatuo karon kag nagapanghikot sa ‘kabuangan nga ginawali.’

[Footnote]

Ano ang Imo mga Sabat?

◻ Ano ang duha ka sahi sang kaalam?

◻ Ano ang sadsaran nga depekto sang kaalam sang kalibutan?

◻ Ngaa ang pagwali sang maayong balita amo ang pinakapraktikal nga butang nga himuon?

◻ Ano ang mahanabo sa dili madugay sa tanan nga kaalam sang kalibutan?

◻ Ngaa ang mga Saksi ni Jehova wala mahuya sa pagwali sa ginatawag sang kalibutan nga kabuangan?

[Laragway sa pahina 23]

Ginpangita sang mga Griego ang kalibutanon nga kaalam kag ang pagwali ni Pablo masami nga gintamod subong kabuangan