Mag-andam sa mga Mayubiton!

Sa karon, ang mga pagpanagna dagaya, kag ang negosyo tuhoy sa futurology (pagtuon sa mahimo nga matabo sa palaabuton pasad sa karon nga mga hitabo) hinali nga nagtin-ad. “Samtang nagahilapit ang tuig 2000,” siling sang The Daily Telegraph sang London, “may dikinaandan nga butang nga nagakatabo apang indi gid man nga wala ginapaabot. Linibo ka tawo sa bug-os nga kalibutan ang nagaeksperiensia sing dikinaandan kag sa masami makakulugmat nga mga palanan-awon tuhoy sa palaabuton.” Para sa madamong tagpanilag, ining daku nga interes sa palaabuton isa lamang ka pagsulit sang ginlauman anay nga mga pagbag-o nga wala matuman.

SAMTANG ang trapiko sa kalesa nagdugang sang ika-19 nga siglo, isa ka tawo ang nagtagna nga ang mga siudad sa Europa mapuno sa ulihi sang ipot sang kabayo. Sa pagkamatuod, ang iya gintagna nagsala. Busa, sang ginpadaku ang masunson nga pagsayop sang mga tagna, ang The Times sang London nagsiling: “Ang palaabuton isa lamang ka tumpok sang ipot sang kabayo.”

Ang iban nagayubit sa mga tawo nga may nakita nga katalagman sa unhan. Halimbawa, ginhangkat sang isa ka propesor sang business sa isa ka unibersidad sa Estados Unidos ang mga nagatagna sing pag-usmod sa palibot nga nagapusta kon bala magalain pa ang hitabo. Suno sa ginreport sang New Scientist nga magasin, nagsiling sia nga ang “aton kalidad sang kabuhi nagauswag kag padayon nga magauswag sa walay katubtuban.”

Sa tunga sang kagumon sa mga pagpangangkon kag mga pagkontra sa sini, madamo ang nagapati nga ang tanan halos indi magabag-o. Nagayaguta sa bisan anong panghunahuna nga ang Dios magapasilabot sa mga hilikuton sang tawo, nagapakita sila sing panimuot nga kaangay sa ginpakita sang mga nagyaguta sadtong unang siglo C.⁠E.

Ang Tanan Bala Amo Gihapon?

Ang ikaduhang inspirado nga sulat sang Cristianong si apostol Pedro, nga ginsulat sang mga 64 C.⁠E., nagpaandam: “Sa katapusan nga mga adlaw ang mga mayubiton magaabot nga may pagyubit, nga nagalakat suno sa ila kaugalingon nga mga kailigbon.”​—⁠2 Pedro 3:⁠3.

Ang mga mayubiton nagatinguha nga ang ila ginayubit mangin kaladlawan. Ang tawo nga nagapadala sa yubit mahimo mahulog sa makagod nga siod bangod sa masami luyag sang mayubiton nga ang mga nagapamati magaugyon sa iya. Ayhan ang pila sang mga mayubiton nga ginpaandaman ni Pedro kaangay sini, “nagalakat suno sa ila kaugalingon nga mga kailigbon.” Sang ginpaandaman ang iya bumalasa, ang apostol naggamit sing empatiko nga porma sang ekspresyon. Nagpaandam sia tuhoy sa pag-abot sang ‘mga mayubiton nga may mga pagyubit.’

Ginduhaduhaan sang unang-siglo nga mga mayubiton ang kamatuoran sang “ginsaad nga presensia” ni Cristo, nga nagasiling: “Diin ining ginsaad nga presensia niya? Ti, kutob sang pagtulog sa kamatayon sang aton mga katigulangan, ang tanan nagapadayon sing subong gid kutob sa ginsuguran sang pagtuga.” (2 Pedro 3:4) Daw amo sina ang kahimtangan para sa ila. Apang, sadto anay sang tuig 33 C.⁠E., gintagna ni Jesus ang kalaglagan sang siudad sang Jerusalem. “Magaabot sa imo ang mga adlaw,” siling niya, “nga magatukod ang imo mga kaaway sing mataliwis nga mga talutog kag libutan ka kag ipiton ka sa tagsa ka luyo, kag was-agon ka nila sa duta kag ang imo mga anak sa sulod nimo, kag wala sila sing ibilin sa imo nga bato nga nasampaw sa bato.” Nagsayop gid ang mga nagyubit sa sadto nga paandam! Sang 70 C.⁠E., ginlikupan sang Romanong mga hangaway ang Jerusalem kag ginlaglag ang siudad, kag madamo ang napatay sa mga pumuluyo sini. Ngaa ang kalabanan nga mga pumuluyo sang siudad wala makahanda sa sining kalaglagan? Bangod wala sila makahantop nga ang Dios nag-usisa sa ila paagi sa iya Anak, si Jesus.​—⁠Lucas 19:​43, 44.

Ginapatuhuyan ni apostol Pedro ang palaabuton nga pagpasilabot sang Dios nga Labing Gamhanan. “Ang adlaw ni Jehova magaabot subong sang makawat,” paandam ni Pedro. (2 Pedro 3:10) Sa sina nga tion dulaon sang Dios ang mga didiosnon gikan sa bug-os nga globo kag luwason ang mga ginhukman nga matarong. Subong sang masunson nga ginapaathag sini nga balasahon, ang “presensia” ni Cristo Jesus nagsugod sang 1914. Apang ang pagpanghikot niya subong Manuglaglag sang Dios sa pagdula sang kalautan palaabuton pa. Gani, ang paandam sang apostol nga mag-andam sa mga mayubiton labi ka hilingagawon karon.

Ayhan madugay ka na nga nagahulat sa pagpasilabot sang Dios sa mga hilikuton sang tawo. Ano ang magabulig sa imo agod padayon ikaw nga magahulat sing mapailubon nga indi malimbungan sang mga mayubiton? Padayuna palihug ang pagbasa.

[Blurb sa pahina 4]

‘Magaabot sa imo ang mga adlaw, nga . . . ang imo mga kaaway . . . magalibot sa imo kag magaipit sa imo sa tagsa ka luyo, . . . kag wala sila sing ibilin sa imo nga bato nga nasampaw sa bato.’ Indi yadto isa ka paandam nga yulubiton. Ginlaglag sang Romanong mga hangaway ang Jerusalem, kag madamo ang napatay.