Mga Pamatan-on—Paano Ninyo Handaan ang Bawtismo?

1, 2. (a) Ipaathag kon ngaa serioso nga desisyon ang magpabawtismo. (b) Ano ang dapat siguruhon sang isa antes magpabawtismo, kag ngaa?

PAMATAN-ON ka bala kag nagaplano nga magpabawtismo? Kon amo, pinakadaku nga pribilehiyo ang matigayon mo. Pero suno sa nagligad nga artikulo, serioso nga desisyon ang magpabawtismo. Nagasimbulo ini sang imo dedikasyon—isa ka serioso nga promisa nga ginhimo mo kay Jehova. Luyag mo sia alagaron sing dayon paagi sa pag-una sang iya kabubut-on sa imo kabuhi. Gani mabawtismuhan ka lang kon makasarang ka na sa paghimo sini, kon handum mo ini, kag nahangpan mo ang kahulugan sang dedikasyon.

² Ano abi kon indi ka pa sigurado kon bala handa ka na magpabawtismo? Ukon gusto mo na tani magpabawtismo pero indi magpasugot ang imo mga ginikanan kay sa banta nila kulang ka pa sing eksperiensia sa pagkabuhi subong Cristiano? Kon amo sini, indi magkasubo. Sa baylo, hingaliti ini nga kahigayunan para mag-uswag, kay sa ulihi mabawtismuhan ka gid. Parte sa sini, binagbinaga kon paano ka makapahamtang sing mga tulumuron sa (1) imo mga pagpati, (2) imo mga buhat, kag (3) imo apresasyon.

3, 4. Ano nga leksion ang matun-an sang mga pamatan-on sa halimbawa ni Timoteo?

³ Hunahunaa ang imo sabat sa sining mga pamangkot: Ngaa nagapati ako nga nagaluntad ang Dios? Ano ang nagpakumbinsi sa akon nga ang Biblia gin-inspirar nga Pulong sang Dios? Ngaa kumbinsido ako nga ang mga talaksan sang Dios sa moral mas maayo sangsa pagkabuhi sa kalibutan? Gingamit ini nga mga pamangkot indi para magduhaduha ka. Sa baylo, magabulig ini sa imo nga sundon ang laygay ni apostol Pablo: ‘Pamatud-i ninyo sa inyo kaugalingon kon ano ang maayo kag kalahamut-an kag himpit nga kabubut-on sang Dios.’ (Roma 12:2) Pero ngaa dapat pamatud-an pa sang mga Cristiano sa Roma ang pila ka butang kay ginbaton na nila ini?

⁴ Binagbinaga ang halimbawa sa Biblia. Nahibaluan gid ni Timoteo ang Kasulatan. Gintudluan sia sang iya iloy kag lola “kutob sa pagkalapsag.” Pero, ginpalig-on ni Pablo si Timoteo: “Magpadayon ka sa mga butang nga imo natun-an kag nabuyok ka nga patihan.” (2 Tim. 3:14, 15) Suno sa isa ka reperensia, ang orihinal nga tinaga sa “nabuyok” nagakahulugan sing “mangin kumbinsido kag sigurado parte sa isa ka butang.” Kumbinsido si Timoteo sa kamatuoran. Ginbaton niya ini, indi bangod ginsugo sia sang iya iloy kag lola, kundi nangatarungan sia mismo kag nabuyok.—Basaha ang Roma 12:1.

5, 6. Ngaa importante nga mahibaluan mo maggamit sang “ikasarang sa pagpangatarungan” samtang bata ka pa?

⁵ Kamusta ikaw? Mahimo nga madugay ka na nga nakahibalo sang mga kamatuoran sa Biblia. Kon amo, ngaa indi mo pagtinguhaan nga binagbinagon sing maayo ang mga rason sang imo ginapatihan? Magapabakod ini sang imo pagpati kag madaug mo ang mga pag-ipit sang mga katubotubo, propaganda sang kalibutan, ukon bisan ang imo sayop nga mga handum.

⁶ Kon gamiton mo ang imo “ikasarang sa pagpangatarungan” samtang bata ka pa, mahimo mo masabat ang imo mga katubotubo kon mamangkot sila: ‘Ano ang pamatuod mo nga may Dios? Ngaa ginatugutan sang mahigugmaon nga Dios ang kalautan? Paano nagluntad ang Dios?’ Kon handa ka, ini nga mga pamangkot indi magpaluya sang imo pagtuo kundi mapahulag ka pa gid nga magtuon.

7-9. Ipaathag kon paano makapalig-on sang imo pagpati ang mga giya sa pagtuon nga “Ano Gid ang Ginatudlo sang Biblia?”

⁷ Ang mapisan nga pagtuon makabulig sa imo nga masabat ang mga pamangkot, madula ang imo mga pangduhaduha, kag mapalig-on ang imo mga pagpati. (Binu. 17:11) May mga publikasyon kita para magamit mo sa pagtuon. Nakabulig gid sa iban ang brosyur nga The Origin of Life—Five Questions Worth Asking kag ang libro nga Is There a Creator Who Cares About You? Dugang pa, madamo nga pamatan-on ang nanamian kag nakabenepisyo sa mga giya sa pagtuon nga “Ano Gid ang Ginatudlo sang Biblia?” nga makita sa jw.org/hil nga website. Para mabasa ini, buksi ang PANUDLO SANG BIBLIA. Ang kada giya sa pagtuon nga makita diri gindesinyo nga mapalig-on ang imo pagpati sa panudlo sang Biblia.

⁸ Kay pamilyar ka na sa Biblia, mahimo masabat mo dayon ang mga pamangkot sa sining mga giya sa pagtuon. Pero ngaa sigurado ka sa imo mga sabat? Ginapangabay ka sini nga mangatarungan sa pila ka teksto kag isulat mo ang imo mga sabat. Makabulig ini sa imo nga planuhon kon paano mo ipaathag sa iban ang imo mga pagpati base sa Biblia. Ang giya sa pagtuon nga “Ano Gid ang Ginatudlo sang Biblia?” nakabulig sa madamo nga pamatan-on nga mapalig-on ang ila mga pagpati. Kon maka-Internet ka, palihug ilakip ini sa imo personal nga pagtuon.

⁹ Kon palig-unon mo ang imo mga pagpati, nagahanda ka para sa bawtismo. Ang isa ka tin-edyer nga sister nagsiling: “Antes ako mamat-od nga magpabawtismo, gintun-an ko ang Biblia kag ginsiguro nga amo ini ang matuod nga relihion. Nagabakod pa gid ang akon pagpati kada adlaw.”

10. Ngaa ang nabawtismuhan nga Cristiano dapat magpakita sing buhat suno sa iya pagtuo?

¹⁰ Ang Biblia nagasiling: “Ang pagtuo, kon wala ini sing mga buhat, patay ini.” (Sant. 2:17) Kon mabakod ang imo pagpati, makita ini sa imo mga buhat. Ano nga mga buhat? Ang Biblia nagapatuhoy sa “balaan nga paggawi kag sa mga buhat sang diosnon nga debosyon.”—Basaha ang 2 Pedro 3:11.

11. Ipaathag kon ano ang “balaan nga paggawi.”

¹¹ Para mapakita ang “balaan nga paggawi,” dapat matinlo ka sa moral. Ginatinguhaan mo bala ini? Halimbawa, binagbinaga ang nagligad nga anom ka bulan. Paano mo ginpakita nga ang imo “mga ikasarang sa paghangop” nahanas sa pagkilala sang maayo kag malain? (Heb. 5:14) May madumduman ka bala nga mga kahimtangan nga ginbatuan mo ang pagsulay ukon pag-ipit sang mga katubotubo? Wala bala mahuy-an ang imo pagtuo sa imo paggawi sa eskwelahan? Nagapanindugan ka bala sa imo ginapatihan sa baylo nga magsunodsunod lang sa imo mga klasmeyt para indi ka nila pagpakalainon? (1 Ped. 4:3, 4) Ang matuod, wala sing himpit nga tawo. Bisan ang madugay na nga mga alagad ni Jehova nahuya kon kaisa nga manindugan sa ila pagtuo. Pero dapat ipabugal sang nagdedikar kay Jehova nga dal-on ang iya ngalan, kag dapat ipakita niya ini paagi sa iya buhat.

12. Ano ang pila ka “buhat sang diosnon nga debosyon,” kag paano mo ini dapat tamdon?

¹² Ano naman ang parte sa “mga buhat sang diosnon nga debosyon”? Lakip sa sini ang imo mga hilikuton sa kongregasyon, pareho sang pagtambong sa miting kag pagpakigbahin sa ministeryo. Lakip man sa sini ang mga hilikuton sa espirituwal nga indi hilmunon, pareho sang pagpangamuyo nga ikaw lang kag ang imo personal nga pagtuon. Wala ginabug-atan sa sini ang nakadedikar sang iya kabuhi kay Jehova. Sa baylo, ginapakita niya ang panimuot ni Hari David, nga nagsiling: “Ang paghimo sang imo kabubut-on, O Dios ko, amo ang akon kalipay, kag ang imo kasuguan yari sa akon tagipusuon.”—Sal. 40:8.

13, 14. Ano ang makabulig sa imo nga mahimo ang “mga buhat sang diosnon nga debosyon,” kag paano nakabenepisyo sa sini ang pila ka pamatan-on?

¹³ Para makahimo ka sang mga tulumuron, may worksheet kita sa pahina 308 kag 309 sang libro nga Questions Young People Ask—Answers That Work, Volume 2. Puede mo isulat sa worksheet ang imo mga sabat sa mga pamangkot pareho sang “Espesipiko bala ang imo mga pangamuyo, kag paano sini ginapakita ang imo gugma kay Jehova?” “Ano ang imo ginatun-an?” “Nagabantala ka bala bisan wala ang imo mga ginikanan?” May sululatan man sa worksheet para sa imo mga tulumuron sa pagpangamuyo, pagtuon, kag ministeryo.

¹⁴ Madamo nga pamatan-on nga nagaplano sa pagpabawtismo ang nabuligan sini nga worksheet. Ang pamatan-on nga sister nga si Tilda nagsiling: “Ginbutang ko sa worksheet ang akon mga tulumuron. Isaisa ko ini nga ginhimo, kag pagligad sang mga isa ka tuig, handa na ako nga magpabawtismo.” Nakabenepisyo man sa sini si Patrick nga pamatan-on nga brother. Nagsiling sia: “Nahibaluan ko na ang akon mga tulumuron, pero ang pagsulat sini nagbulig pa gid sa akon para lab-uton ini.”

15. Ipaathag kon ngaa ang dedikasyon personal nga desisyon.

¹⁵ Ang isa sang pinakaserioso nga pamangkot sa worksheet amo: “Maalagad ka pa bala kay Jehova bisan mag-untat sa pag-alagad ang imo mga ginikanan kag mga abyan?” Dumduma nga kon nakadedikar kag nabawtismuhan ka na nga Cristiano, ikaw mismo ang may salabton kay Jehova. Wala nagadepende sa iban ang imo pag-alagad sa iya—bisan gani ang imo mga ginikanan. Ang imo balaan nga paggawi kag mga buhat sang diosnon nga debosyon pamatuod nga kumbinsido ka sang kamatuoran kag luyag mo nga sundon ang mga talaksan sang Dios, gani handa ka na magpabawtismo.

16, 17. (a) Ano dapat ang magapahulag sa isa nga mangin Cristiano? (b) Paano mailustrar ang apresasyon sa gawad?

¹⁶ Ginpamangkot si Jesus sang tawo nga madamo sing nahibaluan sa Mosaikong Kasuguan: “Ano bala ang pinakaimportante nga sugo?” Si Jesus nagsabat: “Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.” (Mat. 22:35-37) Ginpatalupangod diri ni Jesus kon ano dapat ang motibo sa mga hilikuton sang isa ka Cristiano, lakip ang bawtismo—bug-os tagipusuon nga gugma kay Jehova. Ang isa sang pinakamaayo nga paagi nga magdugang ang imo gugma kay Jehova amo ang pagpamalandong sa pinakadaku nga regalo ni Jehova—ang halad nga gawad sang iya Anak. (Basaha ang 2 Corinto 5:14, 15; 1 Juan 4:9, 19.) Magapasalamat ka kon hunahunaon mo ang gawad kag ang mahimo sini sa imo.

¹⁷ Ang imo apresasyon sa gawad mahimo mailustrar sa sini nga paagi: Imadyina nga may nagluwas sa imo sang diutayan ka lang malumos. Mapuli ka lang bala, mailis, kag kalimtan na lang ang natabo? Indi gid! Pasalamatan mo gid ang nagluwas sa imo kay utang mo sa iya ang imo kabuhi! Pero mas daku pa ang utang naton kay Jehova nga Dios kag kay Jesucristo. Kon wala ang gawad, daw pareho lang nga nalumos kita sa sala kag kamatayon. Pero bangod sang ila daku nga gugma, may paglaum na kita nga mabuhi sing dayon sa Paraiso sa duta!

18, 19. (a) Ngaa indi ka dapat mahadlok kon dampig ka kay Jehova? (b) Paano mangin maayo ang imo kabuhi kon mag-alagad ka kay Jehova?

¹⁸ Ginaapresyar mo bala ang nahimo ni Jehova sa imo? Kon amo, nagakaigo lang nga idedikar mo ang imo kabuhi kay Jehova kag magpabawtismo. Dumduma, ang pagdedikar nagalakip sang serioso nga promisa kay Jehova nga himuon sing dayon ang iya kabubut-on, bisan ano man ang matabo. Mahadlok ka bala nga himuon ina nga promisa? Indi! Dumduma nga luyag pirme ni Jehova nga mangin maayo ang imo kahimtangan, kag sia “nagapadya sa mga hanuot nga nagapangita sa iya.” (Heb. 11:6) Ang pagdedikar mo kay Jehova kag pagpabawtismo indi magapalain sa imo. Kundi mangin maayo ka pa kon mag-alagad ka kay Jehova. Ang isa ka 24 anyos na nga utod nga nabawtismuhan sang bata pa sia nagsiling: “Mahimo nga mas madamo ako sing nahibaluan kon medyo gulang na ako nagpabawtismo, pero kay nagdesisyon ako samtang bata pa nga magdedikar kay Jehova, nag-amlig ini sa akon sa impluwensia sang kalibutan.”

¹⁹ Tuhay gid si Jehova kay Satanas. Gusto lang ni Satanas nga hingalitan ka kag wala sia sing mahatag nga kaayuhan sa nagadampig sa iya. Ngaa? Wala sing maayo nga palaabuton kag paglaum si Satanas. Gani paano sia makahatag sing isa ka butang nga wala sa iya? Ang mahatag gid lang niya amo ang indi maayo nga palaabuton, pareho sa matabo sa iya!—Bug. 20:10.

20. Ano ang himuon sang pamatan-on para makadedikar kag makapabawtismo? (Tan-awa man ang kahon nga “Bulig Para Mag-uswag Ka sa Espirituwal.”)

²⁰ Gani ang pagdedikar sang imo kabuhi kay Jehova amo ang pinakamaayo nga mahimo mo. Handa ka na bala sa sini? Kon amo, indi magpangalag-ag. Pero kon nagaalang-alang ka pa, gamita ang mga panugda sa sini nga artikulo para mag-uswag ka. Si Pablo nagsulat sa mga taga-Filipos: “Bisan ano man nga pag-uswag ang aton nahimo sa sini, padayon kita nga maglakat sa husto nga paagi sa amo gihapon nga dalanon.” (Fil. 3:16) Kon sundon mo ini nga laygay, makadedikar ka na kay Jehova kag makapabawtismo.