Nagapakita Ka Bala sing “Nagahulat nga Panimuot”?

“Ano bala nga sahi sang mga tawo dapat mangin amo kamo sa balaan nga paggawi kag sa mga buhat sang diosnon nga debosyon, nga nagahulat kag ginadumdom gid pirme ang presensia sang adlaw ni Jehova!”​​—⁠2 PEDRO 3:​11, 12.

1, 2. Paano naton ilaragway ang “nagahulat nga panimuot” may kaangtanan sa adlaw ni Jehova?

HANDURAWA ang isa ka pamilya nga nagapaabot sing mga bisita para sa panihapon. Madali na lang ang gintalana nga tion sang ila pag-abot. Ang asawa masako sa paghanda sing pagkaon. Ang iya bana kag mga kabataan nagabulig sa pagpat-od nga ang tanan nahanda na. Ang tanan nakunyag. Huo, ang bug-os nga pamilya malangkagon nga nagahulat sa pag-abot sang mga bisita kag nagapaabot sing isa ka manamit nga pagkaon kag maayo nga pagpakig-upod.

² Subong mga Cristiano, nagahulat kita sing isa ka butang nga labi pa ka importante. Ano ini? Kita tanan nagahulat sang “adlaw ni Jehova”! Tubtob wala pa ini mag-abot, kinahanglan mangin kaangay kita ni manalagna Miqueas, nga nagsiling: “Si Jehova ang padayon nga hulaton ko. Magapakita ako sing nagahulat nga panimuot sa Dios sang akon kaluwasan.” (Miqueas 7:7) Nagapahangop bala ini sang pagkawala sing ginahimo? Indi. Madamo sing dapat himuon.

 3. Suno sa 2 Pedro 3:​11, 12, ano dapat ang panimuot sang mga Cristiano?

³ Si apostol Pedro nagabulig sa aton nga matigayon ang nagakaigo nga panimuot samtang nagahulat. Sia nagsiling: “Ano bala nga sahi sang mga tawo dapat mangin amo kamo sa balaan nga paggawi kag sa mga buhat sang diosnon nga debosyon, nga nagahulat kag ginadumdom gid pirme ang presensia sang adlaw ni Jehova!” (2 Pedro 3:​11, 12) Talupangda nga isa ini ka mabaskog nga pagtuaw. Wala diri nagapamangkot si Pedro. Sa iya duha ka inspirado sang Dios nga sulat, ginlaragway niya kon ano dapat nga sahi sang mga tawo ang mga Cristiano. Ginlaygayan man niya sila nga padayon nga maghimo sing ‘balaan nga paggawi kag mga buhat sang diosnon nga debosyon.’ Bisan pa mga 30 ka tuig na ang nagligad kutob sang ginhatag ni Jesucristo ang tanda “sang katapusan sang sistema sang mga butang,” dapat padayon nga magbantay ang mga Cristiano. (Mateo 24:3) Dapat nila ‘hulaton kag dumdumon gid pirme’ ang presensia sang adlaw ni Jehova.

 4. Ano ang nadalahig sa ‘pagdumdom gid pirme sa presensia sang adlaw ni Jehova’?

⁴ Ang Griegong tinaga diri nga ginbadbad “ginadumdom gid pirme” literal nga nagakahulugan sing “pagpadasig.” Sa pagkamatuod, indi naton ‘mapadasig’ sing literal ang adlaw ni Jehova. Kay man, ‘wala gani naton mahibaluan ang adlaw ukon oras’ nga magaabot si Jesucristo sa paghukom sa mga kaaway sang iya Amay. (Mateo 24:36; 25:13) Ginapaathag sang isa ka reperensia nga ang gamot nga berbo sang ekspresyon nga “pagpadasig” nagakahulugan diri sing “‘pagdalidali’ kag sa amo suod nga naangot sa ‘pagkakugi, pagkaaktibo, pagkabalaka sa isa ka butang.’” Gani ginapalig-on ni Pedro ang mga masigkatumuluo nga handumon sing hanuot ang presensia sang adlaw ni Jehova. Mahimo nila ini paagi sa pagdumdom sini pirme. (2 Pedro 3:12) Bangod malapit na gid ang “daku kag makakulugmat nga adlaw ni Jehova,” dapat dumdumon man naton ini pirme.​​—⁠Joel 2:​31.

Maghulat Upod ang “Balaan nga Paggawi”

 5. Paano naton mapakita nga handum gid naton nga makita ang “adlaw ni Jehova”?

⁵ Kon handum gid naton nga makalampuwas sa adlaw ni Jehova, ipakita naton ini paagi sa aton ‘balaan nga paggawi kag mga buhat sang diosnon nga debosyon.’ Ang ekspresyon nga “balaan nga paggawi” nagapahanumdom sa aton sang laygay ni Pedro: “Subong matinumanon nga mga anak, indi na kamo magpauyon suno sa mga kailigbon ninyo anay sa inyo pagkawala sing ihibalo, kundi, nahisuno sa Isa nga Balaan nga nagtawag sa inyo, magpakabalaan man kamo sa tanan ninyo nga paggawi, bangod nasulat na: ‘Magpakabalaan kamo, kay balaan ako.’”​​—⁠1 Pedro 1:14-16.

 6. Agod mangin balaan, ano ang dapat naton himuon?

⁶ Agod mangin balaan, dapat huptan naton ang pisikal, mental, moral, kag espirituwal nga katinlo. Nagahanda bala kita para sa “adlaw ni Jehova” paagi sa paghupot sa aton kaugalingon nga balaan subong mga indibiduwal nga nagadala sang ngalan ni Jehova? Indi mahapos karon nga huptan ining kaputli bangod ang mga talaksan sang kalibutan sa moral labi pa nga nagalain. (1 Corinto 7:​31; 2 Timoteo 3:13) Nakita bala naton nga nagasangkad ang kal-ang sa ulot sang aton mga talaksan sa moral kag sang ila nga yara sa kalibutan? Kon indi naton nakita, dapat kita magkabalaka. Indi ayhan nga ang aton personal nga mga talaksan, bisan pa mas mataas sangsa ila sa kalibutan, naganubo man? Kon amo, dapat kita maghimo sing positibo nga aksion nga tadlungon ang mga butang agod mapahamut-an ang Dios.

7, 8. (a) Paano kita mahimo malipat sa pagkaimportante sang paghimo sing “balaan nga paggawi”? (b) Ano nga mga pagtadlong ang mahimo nga kinahanglan?

⁷ Bangod sang pornograpiya sa Internet kag mahimo ini matan-aw sing kinaugalingon, ang pila nga wala anay sining imoral nga materyal makakita na karon sing “wala katapusan nga suplay sang seksuwal nga mga kahigayunan,” siling sang isa ka doktor. Kon magtan-aw kita sa sining di-matinlo nga mga site sa Internet, wala naton ginatuman ang sugo sang Biblia nga ‘indi magtandog sing butang nga di-matinlo.’ (Isaias 52:11) ‘Ginadumdom gid bala naton pirme ang presensia sang adlaw ni Jehova’? Ukon ginapaisol bala naton sa aton hunahuna ina nga adlaw, nga nagapangatarungan nga bisan ginahigkuan naton ang aton hunahuna sing mahigko nga materyal, may tion pa man kita sa pagtinlo sa aton kaugalingon? Kon may problema kita tuhoy sa sini, hilingagawon gid nga mangabay kita kay Jehova nga ‘ilikaw ang aton mga mata sa pagtan-aw sa walay pulos kag tipigan kita nga buhi sa iya dalanon’!​​—⁠Salmo 119:37.

⁸ Ang kalabanan nga mga Saksi ni Jehova, mga kabataan kag mga tigulang, nagasunod sa mataas nga mga talaksan sang Dios sa moral kag nagalikaw sa imoral nga mga siod sining kalibutan. Nakahibalo sang pagkahilingagawon sang aton tion kag sang paandam ni Pedro nga “ang adlaw ni Jehova magaabot subong sang kawatan,” padayon sila nga nagahimo sing “balaan nga paggawi.” (2 Pedro 3:10) Ang ila mga buhat nagapamatuod nga ‘ginahulat nila kag ginadumdom gid pirme ang presensia sang adlaw ni Jehova.’⁠a

Maghulat Upod ang “mga Buhat sang Diosnon nga Debosyon”

 9. Ang diosnon nga debosyon nagapahulag sa aton nga himuon ang ano?

⁹ Ang “mga buhat sang diosnon nga debosyon” importante man agod madumdom naton pirme ang adlaw ni Jehova. Ang “diosnon nga debosyon” nagadalahig sang tudok nga pagtahod sa Dios nga nagapahulag sa aton sa paghimo sing kalahamut-an sa iya mga mata. Ang mainunungon nga kaangtanan kay Jehova amo ang nagapahulag sa sining mga buhat sang diosnon nga debosyon. Kabubut-on niya nga “ang tanan nga sahi sang tawo maluwas kag makadangat sa sibu nga ihibalo sang kamatuoran.” (1 Timoteo 2:4) ‘Indi luyag sang Dios nga ang bisan sin-o malaglag kundi luyag niya nga ang tanan makadangat sa paghinulsol.’ (2 Pedro 3:9) Kon amo, indi bala dapat nga ang aton diosnon nga debosyon magpahulag sa aton nga manikasog sing dugang pa agod buligan ang mga tawo sa pagtuon tuhoy kay Jehova kag ilugon sia?​​—⁠Efeso 5:1.

10. Ngaa dapat kita magbantay batok sa “malimbungon nga gahom sang manggad”?

¹⁰ Ang aton kabuhi magabugana sa mga buhat sang diosnon nga debosyon kon ginapangita naton sing una ang Ginharian sang Dios. (Mateo 6:33) Nagalakip ini sang aton balanse nga pagtamod sa materyal nga mga butang. Si Jesus nagpaandam: “Huptan ninyo nga nagamuklat ang inyo mga mata kag mag-andam batok sa tanan nga sahi sang pagkamahamkunon, kay bisan pa may kabuganaan ang isa ka tawo ang iya kabuhi indi resulta sang mga butang nga ginapanag-iyahan niya.” (Lucas 12:15) Bisan pa mabudlay handurawon nga mabulag kita sang gugma sa kuarta, maayo nga talupangdon naton nga ‘ang kabalaka sining sistema sang mga butang kag ang malimbungon nga gahom sang manggad makalumos sa pulong’ sang Dios. (Mateo 13:22) Mahimo indi mahapos ang magpangita sing palangabuhian. Gani, sa pila ka bahin sang kalibutan, madamo ang nagapangatarungan nga agod mangin maayo ang pangabuhi, dapat sila magsaylo sa mas matin-ad nga pungsod, ayhan nagabiya sang ila pamilya sa sulod sang pila ka tuig. Bisan ang pila ka katawhan sang Dios nagapangatarungan sa sining paagi. Paagi sa pagkadto sa iban nga pungsod, mahimo nga mangin masulhay ang pangabuhi sang ila pamilya. Apang, ano ang mahimo nga matabo sa espirituwal nga kahimtangan sang ila mga hinigugma nga ginbiyaan sa puluy-an? Bangod wala sing nagakaigo nga ulo sa puluy-an, may espirituwalidad bala sila nga kinahanglanon agod makalampuwas sa adlaw ni Jehova?

11. Paano ginpakita sang isa ka pangayaw nga trabahador nga ang mga buhat sang diosnon nga debosyon mas importante sangsa manggad?

¹¹ Ang isa ka pangayaw nga trabahador gikan sa Pilipinas nakatuon sing kamatuoran sa Biblia gikan sa mga Saksi ni Jehova sa Japan. Sang matun-an niya ang mga salabton tuhoy sa pagkaulo gikan sa Kasulatan, narealisar niya nga kinahanglan niya buligan ang iya pamilya nga mangin mga sumilimba ni Jehova. (1 Corinto 11:3) Ang iya asawa sa Pilipinas nagpamatok gid sa iya bag-o nasapwan nga pagtuluuhan kag luyag sang asawa nga magpadayon sia sa pagpadala sing kuarta sa baylo nga magpauli agod tudluan ang pamilya sang iya pasad-sa-Biblia nga mga pagtuluuhan. Apang, bangod napahulag sia sang pagkahilingagawon sang tion kag kabalaka sa iya mga hinigugma, nagpauli sia. Ang iya pagpailob sa mahigugmaon nga pagpakig-angot sa mga katapo sang pamilya ginpadyaan. Sang ulihi, ang iya pamilya nahiusa sa matuod nga pagsimba, kag ang iya asawa nagsulod sa bug-os tion nga ministeryo.

12. Ngaa dapat naton unahon ang espirituwal nga mga intereses sa kabuhi?

¹² Ang aton kahimtangan mahimo mapaanggid sa mga indibiduwal sa isa ka nagakasunog nga bilding. Maalamon bala nga magparikparik sa pagsalbar sa materyal nga mga butang gikan sa nagadabadaba nga bilding nga buot na marumpag? Sa baylo, indi bala mas labi pa ka importante nga salbahon ang mga kabuhi​​—⁠ang aton kag ang ila sang aton pamilya kag sang iban pa nga nagapuyo sa bilding? Bueno, ining malaut nga sistema sang mga butang malapit na marumpag, kag yara sa katalagman ang mga kabuhi. Nahisayran ini, dapat gid naton unahon ang espirituwal nga mga intereses kag makugi nga magkonsentrar sa nagaluwas-kabuhi nga pagbantala sing Ginharian nga hilikuton.​​—⁠1 Timoteo 4:⁠16.

Dapat Kita Mangin “Walay Dagta”

13. Ano nga kahimtangan ang luyag naton nga masapwan kita kon mag-abot ang adlaw ni Jehova?

¹³ Nagapadaku sa importansia sang paghupot sing nagahulat nga panimuot, si Pedro nagsiling: “Mga hinigugma, sanglit ginahulat ninyo ining mga butang, himua ninyo ang inyo labing masarangan agod nga sa katapusan masapwan [sang Dios] kamo nga walay dagta kag walay mantsa kag sa paghidait.” (2 Pedro 3:14) Dugang pa sa laygay niya nga maghimo sing balaan nga paggawi kag mga buhat sang diosnon nga debosyon, ginapadaku ni Pedro ang pagkaimportante nga masapwan ni Jehova sa katapusan nga mangin mga indibiduwal nga natinluan sang hamili nga dugo ni Jesus. (Bugna 7:​9, 14) Kinahanglan nga ang isa magtuo sa halad ni Jesus kag mangin dedikado kag bawtismado nga alagad ni Jehova.

14. Ano ang nadalahig sa mangin “walay dagta”?

¹⁴ Ginapalig-on kita ni Pedro nga himuon ang aton bug-os nga masarangan agod masapwan nga “walay dagta.” Ginahuptan bala naton ang aton mga panapton sang Cristianong paggawi kag personalidad nga walay dagta, nga wala namantsahan sang kalibutan? Kon makita naton ang higko sa aton mga panapton, ginatinguhaan naton gilayon nga kuhaon ini. Kon ang paborito naton nga panapton ang nahigkuan, ilabi na nga mauti kita sa pagtinlo sini. Amo man bala sini ang aton ginabatyag kon mamantsahan ang aton malaragwayon nga Cristianong mga panapton bangod sang pila ka kasawayan sa aton personalidad ukon paggawi?

15. (a) Ngaa dapat maghimo ang mga Israelinhon sing mga plikos sa mga sidsid sang ila panapton? (b) Ngaa ang mga alagad ni Jehova karon tuhay gid?

¹⁵ Dapat maghimo ang mga Israelinhon sing “mga plikos sa mga sidsid sang ila mga panapton” kag ‘magbutang sing asul nga higot sa ibabaw sang plikos sa sidsid.’ Ngaa? Agod madumduman nila ang mga sugo ni Jehova, tumanon ini, kag “mangin balaan” sa ila Dios. (Numeros 15:38-​40) Subong mga alagad ni Jehova karon, tuhay gid kita sa kalibutan bangod ginatuman naton ang mga kasuguan kag mga prinsipio sang Dios. Halimbawa, ginahuptan naton ang katinlo sa moral, ginatahod naton ang pagkabalaan sang dugo, kag ginalikawan naton ang tanan nga sahi sang idolatriya. (Binuhatan 15:​28, 29) Madamo ang nagatahod sa aton bangod sang aton malig-on nga determinasyon nga huptan ang aton kaugalingon nga walay dagta.​​—⁠Santiago 1:⁠27.

Dapat Kita Mangin “Walay Mantsa”

16. Ano ang nadalahig sa paghupot sa aton kaugalingon nga “walay mantsa”?

¹⁶ Nagsiling man si Pedro nga dapat masapwan kita nga “walay mantsa.” Paano ini posible? Ang dagta masami nga makuha ukon matinluan apang indi ang mantsa. Ang isa ka mantsa nagapakita nga nagdukot na ini, ukon may kasawayan. Ginlaygayan ni apostol Pablo ang mga masigka-Cristiano sa Filipos: “Padayon nga himua ninyo ang tanan nga butang nga walay pagkumod ukon pagsinuay, agod nga mangin di-salawayon kamo kag inosente, mga anak sang Dios nga walay mantsa sa tunga sang kaliwatan nga tiko kag balingag, nga sa tunga nila nagasiga kamo subong mga sulu sa kalibutan.” (Filipos 2:​14, 15) Kon sundon naton ini nga laygay, likawan naton ang mga pagkumod kag sinuay kag alagaron ang Dios nga may putli nga motibo. Mapahulag kita sang gugma kay Jehova kag sa aton mga isigkatawo samtang ginabantala naton “ining maayong balita sang ginharian.” (Mateo 22:35-​40; 24:14) Dugang pa, padayon naton nga ibantala ang maayong balita bisan pa ang kalabanan nga mga tawo indi makahangop kon ngaa nagaboluntaryo kita sang aton tion sa pagpanikasog nga buligan ang iban nga makatuon tuhoy sa Dios kag sa iya Pulong, ang Biblia.

17. Ano dapat ang aton motibo kon nagahandum kita sing mga pribilehiyo sa Cristianong kongregasyon?

¹⁷ Sanglit luyag naton nga masapwan nga “walay mantsa,” dapat usisaon naton ang aton mga motibo sa tanan nga mga butang nga aton ginahimud-usan. Gintalikdan na naton ang dalanon sang kalibutan sa paghimo sing mga butang bangod sang kakagod, subong sang paghingamo nga makaagom sing kamanggaran ukon gahom. Kon nagahandum kita sing mga pribilehiyo sa Cristianong kongregasyon, kabay nga ang aton mga motibo nagapabilin nga putli kag kabay nga pirme kita napahulag sang gugma kay Jehova kag sa iban. Makapapagsik nga makita ang espirituwal nga mga lalaki nga malipayon nga “nagahandum sang palangakuan sang manugtatap” kag mapainubuson nga nagahandum nga magpaulipon kay Jehova kag sa ila mga masigkatumuluo. (1 Timoteo 3:⁠1; 2 Corinto 1:24) Sa pagkamatuod, ang mga kalipikado nga mag-alagad subong mga gulang ‘nagatatap sa panong sang Dios . . . sing kinabubut-on; indi tungod sa di-bunayag nga daug, kundi sing malangkagon; indi nga nagapakaginuo sa mga palanublion sang Dios, kundi mangin mga huwaran sa panong.’​—⁠1 Pedro 5:1-4.

Dapat Yara Kita “sa Paghidait”

18. Sa ano nga mga kinaiya kilala ang mga Saksi ni Jehova?

¹⁸ Sa katapusan, ginsilingan kita ni Pedro nga dapat kita masapwan “sa paghidait.” Agod matuman ini nga kinahanglanon, dapat may paghidait kita upod kay Jehova kag sa aton isigkatawo. Ginapadaku ni Pedro ang importansia sang ‘mainit nga gugma sa isa kag isa’ kag sang pagpakighidait sa mga masigka-Cristiano. (1 Pedro 2:​17; 3:​10, 11; 4:⁠8; 2 Pedro 1:​5-7) Agod mahuptan ang paghidait, dapat nagahigugmaanay kita. (Juan 13:​34, 35; Efeso 4:​1, 2) Ang aton gugma kag paghidait ilabi na nga makita kon ginahiwat ang aton internasyonal nga mga kombension. Sa isa ka kombension sa Costa Rica sang 1999, naugot ang isa ka manugbaligya sa erport bangod di-hungod nga nalipdan sang lokal nga mga Saksi nga nagaabiabi sa nagaalabot nga mga delegado ang iya balaligyaan. Apang, sa ikaduha nga adlaw, natalupangdan niya ang gugma kag paghidait sa malangkagon nga pag-abiabi sa mga delegado, bisan pa indi sila kilala sing personal sang lokal nga mga Saksi. Sa katapusan nga adlaw, nagbuylog ang manugbaligya sa pag-abiabi kag nagpangabay sing isa ka pagtuon sa Biblia.

19. Ngaa importante nga makighidait sa mga masigkatumuluo?

¹⁹ Ang aton pagkasinsero sa pagpakighidait sa aton espirituwal nga mga kauturan may epekto gid sa kon daw ano ka hanuot nga ginahulat naton ang adlaw ni Jehova kag ang iya ginsaad nga bag-ong kalibutan. (Salmo 37:11; 2 Pedro 3:13) Pananglitan nabudlayan kita nga makighidait sa isa ka masigkatumuluo. Makita bala naton ang aton kaugalingon nga nagapuyo upod sa iya sing mahidaiton sa Paraiso? Kon nakasayop ang isa ka utod sa aton, dapat kita ‘makighidait gilayon sa iya.’ (Mateo 5:​23, 24) Ang paghimo sini importante gid kon luyag naton nga may paghidait upod kay Jehova.​​—⁠Salmo 35:27; 1 Juan 4:⁠20.

20. Sa ano nga mga paagi dapat ipakita ang “nagahulat nga panimuot”?

²⁰ ‘Ginahulat bala naton kag ginadumdom gid pirme ang presensia sang adlaw ni Jehova’? Ginapakita naton ang aton handum gid nga makita ang katapusan sang kalautan paagi sa pagpabilin nga balaan sa sining imoral nga kalibutan. Dugang pa, ang aton hanuot nga paghulat sa pag-abot sang adlaw ni Jehova kag sa kabuhi sa idalom sang paggahom sang Ginharian makita sa aton mga buhat sang diosnon nga debosyon. Kag ang aton pagpaabot nga magkabuhi sa mahidaiton nga bag-ong kalibutan ginapabanaag sa aton pagpakighidait sa aton mga masigkasumilimba karon. Paagi sini, ginapakita naton nga may yara kita “nagahulat nga panimuot” kag “ginadumdom gid pirme ang presensia sang adlaw ni Jehova.”

[Nota]

Madumduman Mo Bala?

• Ano ang buot silingon sang “ginadumdom gid pirme ang presensia sang adlaw ni Jehova”?

• Paano ginapakita ang “nagahulat nga panimuot” may kaangtanan sa aton paggawi?

• Ngaa importante gid ang “mga buhat sang diosnon nga debosyon”?

• Ano ang dapat naton himuon agod masapwan kita ni Jehova nga “walay dagta kag walay mantsa kag sa paghidait”?

[Retrato sa pahina 11]

Ang “nagahulat nga panimuot” ginapabanaag sa balaan nga paggawi

[Retrato sa pahina 12]

Ang pagbantala sing Ginharian nga hilikuton nagaluwas sing kabuhi

[Retrato sa pahina 14]

Samtang ginahulat naton ang adlaw ni Jehova, makighidait kita sa iban