Ano ang Madula Kon Mag-abot Na ang Ginharian sang Dios?

1, 2. (a) Ngaa daw pareho sa isa ka palatyon nga kriminal ang sistema sang mga butang subong? (Tan-awa ang piktyur sa umpisa sini nga artikulo.) (b) Ano ang mangin resulta kon malaglag na ining malaut nga sistema?

IMADYINA ang isa ka kriminal nga ginsentensiahan sing kamatayon. Daw mapagros sia kag wala sing balatian, pero pareho lang nga patay na sia kay ginadala sia sang mga guardia sa lugar diin sia pagapatyon.

² Daw pareho sa sining palatyon nga kriminal ang sistema sang mga butang subong. Madugay na nga nasentensiahan ining malaut nga kalibutan, kag malapit na ini laglagon. Ang Biblia nagsiling: “Ang kalibutan nagataliwan.” (1 Juan 2:17) Sigurado gid nga matapos ini nga sistema. Pero may kinatuhayan ang katapusan sini nga kalibutan sa sentensia sang kriminal. Sa adlaw nga pagapatyon ang kriminal, mahimo may magprotesta pa sa iya sentensia, kag magkuestyon kon bala makatarunganon gid ini ukon maglaum nga ipaiway anay ang pagpatay. Pero ang sentensia sa sini nga kalibutan ginpat-od na sang himpit kag makatarunganon nga Soberano sang uniberso. (Deut. 32:4) Indi na mapaiway ang sentensia sang kalibutan, kag wala sing makakuestyon kon bala makatarunganon ini. Kon malaglag na ini nga kalibutan, ang tanan nga tinuga sa uniberso magaugyon nga napatuman ang hustisya. Daku gid ini nga paumpaw!

 3. Ano ang binagbinagon naton nga apat ka problema nga madula kon mag-abot na ang Ginharian sang Dios?

³ Pero ano ang nalakip sa “kalibutan” nga “nagataliwan”? Madula ang kalabanan sang ginakabig sang mga tawo subong nga bahin na sang kabuhi sa sini nga kalibutan. Masubo bala ini nga balita? Indi gid! Ang matuod, importante ini nga bahin sang “maayong balita sang Ginharian.” (Mat. 24:14) Gani hambalan naton kon ano ang madula kon mag-abot na ang Ginharian sang Dios. Binagbinagon naton ang apat ka problema: malaut nga mga tawo, malain nga mga organisasyon, malain nga mga buhat, kag makapasubo nga mga kahimtangan. Sa kada isa sini, hibaluon naton (1) kon paano kita naapektuhan sini, (2) kon ano ang himuon ni Jehova sa sini, kag (3) kon ano ang ibulos niya sa sini.

 4. Paano kita naapektuhan sang malaut nga mga tawo?

⁴ Paano kita naapektuhan sang malaut nga mga tawo? Sa tapos gintagna ni apostol Pablo nga ang aton panahon mangin “makahalanguyos nga mga tion nga mabudlay atubangon,” nagsulat sia: “Ang malaut nga mga tawo kag mga impostor magalain pa gid.” (2 Tim. 3:1-5, 13) Nakita mo bala nga natuman ini nga tagna? Madamo sa aton ang nangin biktima sang mapintas nga mga nagapangdaugdaug, madinumtanon nga mga panatiko, kag mga kriminal. Ang iban sa ila kilala gid nga malaut; pero ang iban nagapakunokuno lang nga maayo. Bisan pa indi kita mismo ang nabiktima nila, apektado man kita. Nagalalain kita kon makabati kita parte sa ila makangilidlis nga ginapanghimo. Makakulugmat gid ang kapintas nila sa mga kabataan, mga tigulang, kag mga maluya. Ang ila paggawi sapatsapaton kag demonyohanon. (Sant. 3:15) Pero may maayong balita ang Pulong ni Jehova parte sa sini.

 5. (a) Ano nga kahigayunan ang ginhatag pa sa mga malauton? (b) Ano ang matabo sa ulihi sa malaut nga mga tawo nga indi gusto magbag-o?

⁵ Ano ang himuon ni Jehova? Ginahatagan subong ni Jehova sing kahigayunan ang mga malauton nga magbag-o. (Isa. 55:7) Wala pa sila mahukman bilang mga indibiduwal. Ini nga sistema amo ang nasentensiahan na. Pero kamusta ang mga indibiduwal nga indi gusto magbag-o kag padayon nga nagaugyon sa sini nga sistema asta sa pagsugod sang dakung kapipit-an? Ginpromisa ni Jehova nga dulaon niya sa duta ang tanan nga malauton. (Basaha ang Salmo 37:10.) Basi maghunahuna ang mga malauton nga indi ini matabo sa ila. Ginatago sang madamo ang ila ginahimo, kag masami nga indi sila masilutan. (Job 21:7, 9) Pero ginapahanumdom kita sang Biblia: “Ginatan-aw [sang Dios] ang ginahimo sang tawo, kag makita Niya ang tanan niya nga tikang. Wala sing kadudulman ukon pitipit nga kadulom nga mapanaguan ang mga nagahimo sing kahalitan.” (Job 34:21, 22) Wala sing makapanago kay Jehova nga Dios. Wala sing makapakunokuno sa iya atubangan; makita gid sang Dios ang tanan. Gani sa tapos sang Armageddon, bisan pa pangitaon naton ang mga malauton sa ila nahamtangan anay, wala na sila didto. Madula gid sila sing bug-os!—Sal. 37:12-15.

 6. Sin-o ang magapabilin kon madula na ang malaut nga mga tawo, kag ngaa maayo ini nga balita?

⁶ Sin-o ang magapabilin kon madula na ang malaut nga mga tawo? Nagpromisa si Jehova: “Ang mga mahagop magapanubli sang duta, kag mangin malipayon gid sila sa bugana nga paghidait.” Mabasa naton sa ulihi nga bahin sini nga salmo: “Ang mga matarong magapanubli sang duta, kag magapuyo sila sa sini sa wala sing katubtuban.” (Sal. 37:11, 29) Sin-o ang “mga mahagop” kag “mga matarong”? Ang mga mahagop amo ang mapainubuson nga nagapatudlo kag nagapatuytoy kay Jehova; ang mga matarong amo ang nagahimo sang ginapatuman ni Jehova nga Dios. Sa kalibutan subong, mas madamo ang malauton sangsa matarong. Pero sa maabot nga bag-ong kalibutan, ang mga mahagop kag matarong na lang ang mabilin nga buhi. Himuon gid nila nga paraiso ang duta!

 7. Paano kita naapektuhan sang malain nga mga organisasyon?

⁷ Paano kita naapektuhan sang malain nga mga organisasyon? Madamo nga kalautan sa sini nga kalibutan ang ginhimo sang mga organisasyon, kag indi lamang sang mga indibiduwal. Halimbawa, ang relihioso nga mga organisasyon nagapatalang sa minilyon bangod wala ini nagasugid sang kamatuoran parte sa Dios, sa palaabuton sang duta kag katawhan, kag iban pa. Nagasiling man ini nga indi masaligan ang Biblia. May mga gobierno nga nagapalig-on sang inaway kag kasingki bangod sa rasa, nagapigos sa mga imol kag maluya, nagabaton sang hamham kag may ginadampigan para sa ila kaayuhan. Ang makagod nga mga korporasyon nagahigko sang palibot, nagaubos sang duna nga manggad, kag nagapamentaha sa mapinatihon nga mga bumalakal para magmanggaranon ang pila ka tawo samtang minilyon ang nagaantos bangod sang kaimulon. Ang malain nga mga organisasyon amo gid ang kabangdanan sang madamo nga problema sa kalibutan subong.

 8. Suno sa Biblia, ano ang matabo sa mga organisasyon nga daw malig-on sa panulok sang mga tawo subong?

⁸ Ano ang himuon ni Jehova? Magasugod ang dakung kapipit-an kon salakayon sang pulitikal nga mga panguluhan ang tanan nga organisasyon sang butig nga relihion nga ginarepresentar sang makihilawason nga Babilonia nga Daku. (Bug. 17:1, 2, 16; 18:1-4) Laglagon sing bug-os ini nga mga organisasyon. Pero ano ang matabo sa iban pa malain nga mga organisasyon? Ginpaanggid sang Biblia sa mga bukid kag mga isla ang madamo nga organisasyon kag institusyon nga daw malig-on sa panulok sang mga tawo subong. (Basaha ang Bugna 6:14.) Gintagna sang Pulong sang Dios nga madula ang mga gobierno kag ang tanan nga ginasuportahan sini nga mga organisasyon nga daw ginkuha sa ila nahamtangan. Sa katapusan nga bahin sang dakung kapipit-an, laglagon ang tanan nga gobierno sining daan nga kalibutan kag ang tanan nga nagadampig sa ila kag indi sa Ginharian sang Dios. (Jer. 25:31-33) Pagkatapos sini, wala na gid sing malain nga organisasyon!

 9. Ngaa masiling naton nga organisado gid ang bag-o nga duta?

⁹ Ano ang magabulos sa malain nga mga organisasyon? May organisasyon pa bala sa duta pagkatapos sang Armageddon? Ginasugiran kita sang Biblia: “May bag-o nga langit kag bag-o nga duta nga ginahulat naton suno sa iya saad, kag sa sini magapuyo ang pagkamatarong.” (2 Ped. 3:13) Dulaon ang daan nga langit kag duta nga amo ang malain nga mga gobierno kag mga tawo nga nagapasakop sing bug-os sa ila. Ano ang mabulos sa sini? Ang “bag-o nga langit kag bag-o nga duta” nagakahulugan nga may bag-o nga gobierno kag bag-o nga grupo sang mga tawo sa duta nga gamhan sini nga gobierno. Ipakita gid sang Ginharian nga pagagamhan ni Jesucristo ang kinaiya ni Jehova nga Dios, nga isa ka Dios sang kahim-ong. (1 Cor. 14:33) Gani mangin organisado ang “bag-o nga duta.” May masaligan nga mga lalaki nga mangin mga manugtatap. (Sal. 45:16) Tuytuyan sila sang Cristo kag sang kaupod niya nga 144,000 ka manuggahom. Handurawa ang tion nga ang tanan nga malain nga mga organisasyon buslan na sang isa ka nahiusa nga organisasyon nga indi gid maghimo sing malain!

10. Ano nga malain nga mga buhat ang lapnag sa inyo lugar, kag ano ang epekto sini sa imo kag sa imo pamilya?

¹⁰ Paano kita naapektuhan sang malain nga mga buhat? Nagakabuhi kita sa kalibutan nga lapnag ang paghimo sang malain. Kinaandan na lang ang imoral, indi bunayag, kag masingki nga mga buhat sa sini nga sistema. Nabudlayan ilabi na ang mga ginikanan kon paano proteksionan ang ila mga kabataan sa sining malain nga mga buhat. Nagasagad na gid ang mga nagahimo sang kalingawan nga papatihon kita nga okey lang ang tanan nga klase sang malain nga buhat kag ginapakanubo sini ang talaksan ni Jehova sa husto kag sala. (Isa. 5:20) Ginapakigbatuan sang matuod nga mga Cristiano ini nga impluwensia. Ginapanikasugan nila nga magpabilin nga matutom bisan pa lapnag ang pagbalewala sa talaksan ni Jehova.

11. Ano ang matun-an naton sa ginhimo ni Jehova sa Sodoma kag Gomorra?

¹¹ Ano ang himuon ni Jehova sa malain nga mga buhat? Binagbinaga ang ginhimo niya sa lapnag nga paghimo sang malain sa Sodoma kag Gomorra. (Basaha ang 2 Pedro 2:6-8.) Natublag gid ang matarong nga si Lot sa malain nga ginahimo sang mga tawo sa ginaistaran nila sang iya pamilya. Sang ginlaglag ni Jehova ang bilog nga lugar, wala lamang niya gindula ang malain nga ginahimo didto. “Nagpahamtang sia sang sulundan sa mahanabo sa indi diosnon nga mga tawo sa palaabuton.” Gani dulaon man ni Jehova ang malain nga mga buhat subong kon hukman na niya ini nga sistema sang mga butang, pareho sang pagdula niya sa tanan nga imoral nga mga buhat sadto.

12. Ano ang gusto mo himuon kon madula na ining daan nga sistema sang mga butang?

¹² Ano ang magabulos sa malain nga mga buhat? Madamo sang makalilipay nga hilikuton sa Paraiso nga duta. Hunahunaa ang paghimo sini nga duta nga mangin paraiso ukon ang pagpatindog sing mga balay naton kag sang aton mga hinigugma. Ginalauman man naton nga abiabihon ang minilyon nga napatay nga pagabanhawon kag tudluan sila parte kay Jehova kag sa tanan niya nga ginhimo para sa katawhan. (Isa. 65:21, 22; Binu. 24:15) Mangin masako gid kita sa makalilipay nga hilikuton nga magadayaw kay Jehova!

13. Ano nga makapasubo nga mga kahimtangan sa kalibutan subong ang resulta sang pagrebelde nanday Satanas, Adan, kag Eva?

¹³ Paano kita naapektuhan sang makapasubo nga mga kahimtangan? Ang malaut nga mga tawo, malain nga mga organisasyon, kag malain nga mga buhat amo ang kabangdanan kon ngaa makapasubo ang kahimtangan sa sini nga duta. Sin-o sa aton ang indi apektado sang inaway, kaimulon, ukon pagpakalain sang iban nga rasa? Tanan kita apektado man sang balatian kag kamatayon. Resulta ini sang pagrebelde kay Jehova sang tatlo ka malauton nga sanday Satanas, Adan, kag Eva. Indi gid naton malikawan subong ang malain nga resulta sang ila pagrebelde.

14. Ano ang himuon ni Jehova sa makapasubo nga mga kahimtangan? Maghatag sing halimbawa.

¹⁴ Ano ang himuon ni Jehova sa makapasubo nga mga kahimtangan? Nagpromisa si Jehova nga dulaon niya ang tanan nga inaway. (Basaha ang Salmo 46:8, 9.) Dulaon man niya ang balatian. (Isa. 33:24) Dulaon ni Jehova sing dayon ang kamatayon. (Isa. 25:8) Dulaon niya ang kaimulon. (Sal. 72:12-16) Amo man sini ang himuon niya sa iban pa makapasubo nga mga kahimtangan nga nagapabudlay sa aton pagkabuhi subong. Dulaon man niya ang malain nga “hangin” sang sistema sini nga kalibutan, kay madula na ang malain nga impluwensia ni Satanas kag sang iya mga demonyo.—Efe. 2:2.

15. Ano ang pila ka butang nga madula pagkatapos sang Armageddon?

¹⁵ Mahanduraw mo bala ang kalibutan nga wala na sing inaway, balatian, ukon kamatayon? Wala na sing mga soldado bisan diin! Wala na sing armas ukon monumento sa inaway. Wala na sing ospital, doktor, nars, ukon health insurance; wala na sing morge, punerarya, ukon patyo! Bangod wala na sing krimen, wala na sing guardia, pulis, kag mahimo wala na sing kandado ukon yabi! Indi na gid kita mabalaka.

16, 17. (a) Ano nga paumpaw ang mabatyagan sang makalampuwas sa Armageddon? Iilustrar. (b) Paano naton masigurado nga magapabilin kita kon magtaliwan ining daan nga kalibutan?

¹⁶ Ano ang mangin kabuhi naton kon madula na ang makapasubo nga mga kahimtangan? Indi ini mahapos handurawon. Naanad na kita sa pagkabuhi sa sining daan nga kalibutan amo nga daw indi na naton matalupangdan ang makapasubo nga mga kahimtangan. Pareho ini sa mga tawo nga nagaistar malapit sa estasyunan sang tren nga daw wala na lang sa ila ang gahod, kag sa mga nagaistar malapit sa halabuyan sang basura nga daw wala na lang sa ila ang baho. Pero kon madula na ang tanan nga makapasubo nga mga kahimtangan, daku gid ini nga paumpaw!

¹⁷ Ano ang magabulos sa nabatyagan naton nga kabalaka subong? Ang Salmo 37:11 nagasabat: “Mangin malipayon gid sila sa bugana nga paghidait.” Indi ka bala malipay sa sini nga promisa? Amo ini ang gusto ni Jehova para sa imo. Gani panikasugi gid nga mangin suod kay Jehova nga Dios kag sa iya organisasyon sa sining mabudlay nga katapusan nga mga adlaw! Pabalori ang imo paglaum, pamalandungi ini, handurawa ini, kag isugid ini sa iban! (1 Tim. 4:15, 16; 1 Ped. 3:15) Gani masigurado mo nga indi ka magataliwan upod sining nasentensiahan na nga kalibutan. Sa baylo, magapabilin ka nga buhi kag malipayon sing wala sing katapusan!