Kon Magkari si Jesus sa Himaya sang Ginharian

“May iban sang nagatindog diri nga indi na makatilaw sing kamatayon tubtob nga makita anay nila ang Anak sang tawo nga nagakari sa iya ginharian.”​—⁠MATEO 16:⁠28.

1, 2. Ano ang natabo wala madugay pagkatapos sang Pentecostes 32 C.⁠E., kag ano ang katuyuan sang hitabo?

WALA madugay pagkatapos sang Pentecostes 32 C.⁠E., tatlo sa mga apostoles ni Jesucristo ang nakakita sing tumalagsahon nga palanan-awon. Suno sa inspirado nga rekord, “gin-upod ni Jesus si Pedro kag si Santiago kag si Juan nga iya utod kag gindala sila sing pahain sa bukid nga mataas. Kag nagbaylo-dagway sia sa atubangan nila.”​—⁠Mateo 17:​1, 2.

² Ang palanan-awon tuhoy sa pagbaylo-dagway natabo sa isa ka makahalanguyos nga tion. Ginsugiran na ni Jesus ang iya mga apostoles nga magaantos sia kag mapatay sa Jerusalem, apang nabudlayan sila sa paghangop sa iya ginhambal. (Mateo 16:​21-23) Ang palanan-awon nagpabakod sa pagtuo sang tatlo ka apostoles ni Jesus bilang paghanda sa iya nagapakari nga kamatayon kag subong man sa mga tinuig sang lakas nga pagpangabudlay kag pagtilaw nga maeksperiensiahan sang Cristianong kongregasyon. May matun-an bala kita gikan sa palanan-awon? Huo, bangod ang ginlandong sini aktuwal nga nagakahanabo sa tion naton.

3, 4. (a) Ano ang ginsiling ni Jesus anom ka adlaw antes sang pagbaylo-dagway? (b) Ilaragway ang natabo sa tion sang pagbaylo-dagway.

³ Anom ka adlaw antes sang pagbaylo-dagway, ginsilingan ni Jesus ang iya mga sumulunod: “Ang Anak sang tawo ginpat-od nga magakari sa himaya sang iya Amay upod sang iya mga anghel, kag nian magatumbas sia sa tagsa ka tawo suno sa iya binuhatan.” Ining pinamulong matuman sa “konklusion sang sistema sang mga butang.” Si Jesus nagsiling pa: “Sa pagkamatuod ginasiling ko sa inyo nga may iban sang nagatindog diri nga indi na makatilaw sing kamatayon tubtob nga makita anay nila ang Anak sang tawo nga nagakari sa iya ginharian.” (Mateo 16:​27, 28; 24:​3; 25:​31-34, 41; Daniel 12:4) Ang pagbaylo-dagway natabo bilang katumanan sining naulihi nga pinamulong.

⁴ Ano gid bala ang nakita sang tatlo ka apostoles? Ang masunod amo ang paglaragway ni Lucas sa natabo: “Kag samtang nagapangamuyo [si Jesus] ang dagway sang iya nawong nagbalhin kag ang iya panapton nagputi sing masilaw. Subong man, tuluka! duha ka lalaki ang nakighambal sa iya, nga sanday Moises kag Elias. Nagpakita sila nga may himaya kag naghambal tuhoy sa iya paglakat nga napat-od na nga matabo sa Jerusalem.” Nian, “naporma ang panganod kag naglikop [sa mga apostoles]. Sang makasulod sila sa panganod, hinadlukan sila. Kag nagguwa ang tingog sa panganod, nga nagasiling: ‘Ini ang Anak ko, ang isa nga pinili. Magpamati kamo sa iya.’ ”​—⁠Lucas 9:​29-31, 34, 35.

Ang Pagtuo Napabakod

5. Ano ang epekto sang pagbaylo-dagway kay apostol Pedro?

⁵ Nakilala na ni apostol Pedro si Jesus subong “ang Cristo, ang Anak sang Dios nga buhi.” (Mateo 16:16) Ginpamatud-an sang pinamulong ni Jehova gikan sa langit ina nga pagpakilala, kag ang palanan-awon tuhoy sa pagbaylo-dagway ni Jesus isa ka paandam tuhoy sa pagkari ni Cristo nga may kagamhanan kag kahimayaan sang Ginharian, sa ulihi agod hukman ang katawhan. Kapin sa 30 ka tuig pagkatapos sina nga pagbaylo-dagway, si Pedro nagsulat: “Indi paagi sa pagsunod sa mga sugilanon nga pinatupato sing malalangon nga ginpahibalo namon sa inyo ang gahom kag presensia sang aton Ginuong Jesucristo, kundi subong mga saksi nga nakakita sang iya pagkahalangdon. Kay nakabaton sia gikan sa Dios nga Amay sing dungog kag himaya, sang ang mga pulong subong sini ginhatag sa iya sang halangdon nga himaya: ‘Ini hinigugma ko nga Anak nga sa iya nahamuot ako.’ Huo, nabatian namon ining mga pulong nga ginhatag gikan sa langit samtang upod kami sa iya sa bukid nga balaan.”​—⁠2 Pedro 1:​16-18; 1 Pedro 4:⁠17.

6. Ano ang natabo pagkatapos sang pagbaylo-dagway?

⁶ Karon, ang aton pagtuo ginapalig-on man paagi sa nakita sang tatlo ka apostoles. Sa pagkamatuod, progresibo ini nga nagakahanabo sugod sang 32 C.⁠E. Sang masunod nga tuig, si Jesus napatay kag ginbanhaw, nagkayab sa tuo nga kamot sang iya Amay. (Binuhatan 2:​29-36) Sang Pentecostes sadto nga tuig, ang bag-ong “Israel sang Dios” nagluntad, kag ang pagbantala nga hilikuton ginsugdan, sugod sa Jerusalem kag sang ulihi naglapnag tubtob sa kaukbungan sang duta. (Galacia 6:​16; Binuhatan 1:8) Halos gilayon nga gintilawan ang pagtuo sang mga sumulunod ni Jesus. Ang mga apostoles gindakop kag ginbunal sing tuman bangod indi sila mag-untat sa pagbantala. Sang ulihi si Esteban ginpatay. Nian, si Santiago, nga nakasaksi sa pagbaylo-dagway, ginpatay. (Binuhatan 5:​17-40; 6:​8⁠–​7:​60; 12:​1, 2) Apang, sanday Pedro kag Juan nakalampuwas sa pag-alagad sing matutom kay Jehova sa madamo pa nga tinuig. Sa katunayan, sang maghingapos na ang nahaunang siglo C.⁠E., ginrekord ni Juan ang dugang pa nga nakita sa palanan-awon tuhoy kay Jesus nga yara sa langitnon nga himaya.​—⁠Bugna 1:​12-20; 14:​14; 19:​11-16.

7. (a) San-o nagsugod nga matuman ang palanan-awon tuhoy sa pagbaylo-dagway? (b) San-o gintumbasan ni Jesus ang pila suno sa ila binuhatan?

⁷ Kutob sang magsugod ang “adlaw sang Ginuo” sang 1914, madamo sa mga palanan-awon nga nakita ni Juan ang natuman. (Bugna 1:10) Ano naman ang tuhoy sa ‘pagkari [ni Jesus] sa himaya sang iya Amay,’ subong sang ginlandong sang pagbaylo-dagway? Ining palanan-awon nagsugod nga matuman sa pagkabun-ag sang langitnon nga Ginharian sang Dios sang 1914. Sang si Jesus, kaangay sa bituon sa kaadlawon, nagguwa sa bug-os uniberso nga danyag subong bag-ong naglingkod sa trono nga Hari, amo sadto, kon sa aton pa, ang pagpamanagbanag sang isa ka bag-ong adlaw. (2 Pedro 1:​19; Bugna 11:​15; 22:16) Gintumbasan bala ni Jesus sadto nga tion ang iban suno sa ila mga buhat? Huo. May mabakod nga pamatuod nga wala madugay pagkatapos sadto, ang langitnon nga pagbanhaw sa hinaplas nga mga Cristiano nagsugod.​—⁠2 Timoteo 4:​8; Bugna 14:⁠13.

8. Anong mga hitabo ang magatanda sang katapusan sang katumanan sang palanan-awon tuhoy sa pagbaylo-dagway?

⁸ Apang, sa dili madugay, si Jesus magaabot “sa iya himaya, kag ang tanan nga anghel upod sa iya” agod hukman ang bug-os nga katawhan. (Mateo 25:31) Sa sina nga tion, ipahayag niya ang iya kaugalingon sa bug-os niya halangdon nga himaya kag hatagan ang “kada isa” sing makatarunganon nga katumbas tungod sa iya buhat. Ang mga katulad-karnero magapanubli sing kabuhi nga walay katapusan sa Ginharian nga ginhanda para sa ila, kag ang mga katulad-kanding magakadto sa “walay katapusan nga kalaglagan.” Daw ano katahom ina nga konklusion sa katumanan sang palanan-awon tuhoy sa pagbaylo-dagway!​—⁠Mateo 25:​34, 41, 46; Marcos 8:​38; 2 Tesalonica 1:​6-10.

Ang Ginhimaya nga mga Kaupdanan ni Jesus

9. Dapat bala kita magpaabot nga mangin kaupod ni Jesus sanday Moises kag Elias sa katumanan sang palanan-awon tuhoy sa pagbaylo-dagway? Ipaathag.

⁹ Si Jesus wala nagaisahanon sa pagbaylo-dagway. Sanday Moises kag Elias nakita upod sa iya. (Mateo 17:​2, 3) Literal bala nga didto sila? Indi, kay ang duha ka lalaki madugay na nga napatay kag nagatulog sa yab-ok nga nagahulat sing pagkabanhaw. (Manugwali 9:​5, 10; Hebreo 11:35) Magaupod bala sila kay Jesus kon magakari sia sa langitnon nga himaya? Indi, bangod sanday Moises kag Elias nagkabuhi antes pa mabuksan ang langitnon nga paglaum sa mga tawo. Mangin bahin sila sang dutan-on nga “pagbanhaw . . . sa mga matarong.” (Binuhatan 24:15) Gani ang ila presensia sa palanan-awon sang pagbaylo-dagway simbuliko. Sang ano?

10, 11. Sin-o ang ginalaragway nanday Elias kag Moises sa lainlain nga konteksto?

¹⁰ Sa iban nga mga konteksto, sanday Moises kag Elias matagnaon nga mga persona. Subong manugpatunga sang katipan sa Kasuguan, si Moises naglandong kay Jesus, ang Manugpatunga sang bag-ong katipan. (Deuteronomio 18:​18; Galacia 3:​19; Hebreo 8:6) Si Elias naglandong kay Juan Bautista, ang mensahero sang Mesias. (Mateo 17:​11-13) Dugang pa, sa konteksto sang Bugna kapitulo 11, sanday Moises kag Elias naglandong sa hinaplas nga nagkalabilin sa tion sang katapusan. Paano naton ina nahibaluan?

¹¹ Ti, buksi ang Bugna 11:​1-6. Sa bersikulo 3, aton mabasa: “Pahanabuon ko ang akon duha ka saksi nga magpanagna sing isa ka libo kag duha ka gatos kag kan-uman ka adlaw nga napanaptan sing panapton nga sako.” Ining tagna natuman sa nagkalabilin sang hinaplas nga mga Saksi sadtong Inaway Kalibutanon I.a Ngaa duha ka saksi? Bangod ang hinaplas nga nagkalabilin nagahimo sing hilikuton nga, sa espirituwal nga paagi, kaangay sa ginhimo nanday Moises kag Elias. Ang bersikulo 5 kag 6 padayon nga nagasiling: “Kon may bisan sin-o nga luyag magsamad [sa duha ka saksi], nagaguwa ang kalayo sa ila mga baba kag nagalamon sang ila mga kaaway; kag kon may bisan sin-o nga luyag magsamad sa ila, dapat sia patyon sa sining bagay. Ini sila may awtoridad sa pagtakop sa langit agod nga wala sing ulan ang magatupa sa mga adlaw sang ila pagpanagna, kag may awtoridad sila sa ibabaw sang mga tubig agod himuon ini nga dugo kag sa pagsakit sa duta sing tanan nga sahi sang kalalat-an sing masunson suno sa luyag nila.” Busa, ginapahanumdom kita sang mga milagro nga ginhimo nanday Elias kag Moises.​—⁠Numeros 16:​31-34; 1 Hari 17:​1; 2 Hari 1:​9-12.

12. Sa konteksto sang pagbaylo-dagway, sin-o ang ginalaragway nanday Moises kag Elias?

¹² Sin-o, nian, ang ginalandong nanday Moises kag Elias sa konteksto sang pagbaylo-dagway? Si Lucas nagsiling nga nagpakita sila kaupod ni Jesus nga “may himaya.” (Lucas 9:31) Sing maathag, nagalandong sila sa mga Cristiano nga ginhaplasan sing balaan nga espiritu subong “mga masigkamanunubli” ni Jesus kag busa nakabaton sing makalilipay nga paglaum nga “mahimaya kaupod” niya. (Roma 8:17) Ang ginbanhaw nga mga hinaplas mangin kaupod ni Jesus kon magkari sia sa himaya sang iya Amay sa ‘pagtumbas sa kada isa suno sa iya binuhatan.’​—⁠Mateo 16:⁠27.

Mga Saksi Kaangay Nanday Moises kag Elias

13. Anong mga kinaiya ang nagatanda kanday Moises kag Elias subong nagakaigo nga matagnaon nga mga larawan sang hinaplas nga mga masigkamanunubli ni Jehova nga ginhimaya upod sa iya?

¹³ May talalupangdon nga mga bahin nga nagapakilala kanday Moises kag Elias subong nagakaigo nga matagnaon nga mga larawan sang hinaplas nga mga masigkamanunubli ni Jesus. Sanday Moises kag Elias nangin humalambal ni Jehova sa madamo nga tuig. Lunsay nila natigayon ang kasingkal sang isa ka gumalahom. Sa tion sang kinahanglanon, ang tagsa ginsuportahan sang isa ka dumuluong nga pamilya. Lunsay sila nagpanagna sing masidla sa mga hari kag nagtindog nga malig-on batok sa butig nga mga manalagna. Nakita nanday Moises kag Elias ang mga pagpakita sang gahom ni Jehova sa Bukid sang Sinai (nga gintawag man nga Horeb). Lunsay sila gintangdo nga mga salili sa nasidlangan nga bahin sang Jordan. Kag nakita sadtong panahon nanday Moises (upod ni Josue) kag Elias (upod ni Eliseo) ang pinakamadamo nga milagro, luwas sadtong natabo sang panahon nga nagakabuhi si Jesus.⁠b

14. Paano ang mga hinaplas nag-alagad subong humalambal ni Jehova, kaangay nanday Moises kag Elias?

¹⁴ Indi bala nga ina tanan nagapahanumdom sa aton sa Israel sang Dios? Huo, sa pagkamatuod. Si Jesus nagsugo sa iya matutom nga mga sumulunod: “Busa lakat kamo kag maghimo sing mga disipulo sa mga tawo sa tanan nga kapungsuran, nagabawtismo sa ila sa ngalan sang Amay kag sang Anak kag sang balaan nga espiritu, nagatudlo sa ila nga tumanon ang tanan nga butang nga ginsugo ko sa inyo. Kag, yari karon! ako kaupod ninyo sa tanan nga adlaw tubtob sa katapusan sang sistema sang mga butang.” (Mateo 28:​19, 20) Bilang pagtuman sa sining mga pulong, ang hinaplas nga mga Cristiano nag-alagad subong humalambal ni Jehova sugod sang Pentecostes 33 C.⁠E. tubtob karon. Kaangay nanday Moises kag Elias, naagom nila ang kasingkal sang mga gumalahom kag nagpanaksi sa ila. Ginsilingan ni Jesus ang iya 12 ka apostoles: “Ti, dalhon kamo sa atubangan sang mga gobernador kag sang mga hari bangod sa akon, subong panaksi sa ila kag sa mga pungsod.” (Mateo 10:18) Ang iya mga pinamulong sulit-sulit nga natuman sa maragtas sang Cristianong kongregasyon.​—⁠Binuhatan 25:​6, 11, 12, 24-27; 26:⁠3.

15, 16. Ano ang pagkaanggid sang mga hinaplas sa isa ka bahin kag nanday Moises kag Elias sa isa naman ka bahin tuhoy sa ila (a) wala kahadlok nga pagpangapin sa kamatuoran? (b) pagbaton sing bulig sa mga di-Israelinhon?

¹⁵ Dugang pa, ang mga Cristiano nangin wala sing kahadlok kaangay nanday Moises kag Elias sa pagpangapin sa kamatuoran batok sa relihiosong kabutigan. Dumduma kon paano ginpakamalaut ni Pablo ang Judiyong butig nga manalagna nga si Bar-Jesus kag mataktikanhon apang malig-on nga ginbuyagyag ang kabutigan sang mga dios sang mga taga-Atenas. (Binuhatan 13:​6-12; 17:​16, 22-31) Dumduma, man, nga sa modernong tion ginbuyagyag nga may kasidla sang hinaplas nga nagkalabilin ang Cristiandad kag ini nga pagpanaksi nagsakit sa iya.​—⁠Bugna 8:​7-12.⁠c

¹⁶ Sang ginpalagyuhan ni Moises ang kasingkal ni Paraon, nagdangop sia sa puluy-an sang isa ka di-Israelinhon, nga si Reuel, nga gintawag man si Jetro. Sang ulihi, nakabaton si Moises sing hamili nga laygay tuhoy sa pag-organisar gikan kay Reuel, kag ang iya anak nga lalaki, si Hobab, nagtuytoy sa Israel pakadto sa kahanayakan.d (Exodo 2:​15-22; 18:​5-27; Numeros 10:29) Ang mga katapo sang Israel sang Dios ginbuligan man bala sang mga indibiduwal nga indi hinaplas nga mga katapo sang Israel sang Dios? Huo, ginsuportahan sila sang “dakung kadam-an” sang “iban nga mga karnero,” nga nakita sa esena sining katapusan nga mga adlaw. (Bugna 7:​9; Juan 10:​16; Isaias 61:5) Nagtagna sang mainit, mahigugmaon nga suporta nga ihatag sining “mga karnero” sa iya hinaplas nga mga kauturan, si Jesus nagsiling sa ila sing matagnaon: “Gingutom ako kag ginhatagan ninyo ako sing makaon; gin-uhaw ako kag ginhatagan ninyo ako sing mainom. Nangin estranghero ako kag ginbaton ninyo ako sing maabiabihon; hubo, kag ginpanaptan ninyo ako. Nagmasakit ako kag gin-atipan ninyo ako. Nabilanggo ako kag nagkari kamo sa akon. . . . Sa pagkamatuod nagasiling ako sa inyo, Sa bagay nga ginhimo ninyo ini sa isa sang labing kubos sining akon mga utod, ginhimo ini ninyo sa akon.”​—⁠Mateo 25:​35-40.

17. Paano ang mga hinaplas nakaeksperiensia sing kaanggid sa naagihan ni Elias sa Bukid sang Horeb?

¹⁷ Dugang pa, ang Israel sang Dios nakaeksperiensia sing kaanggid sa naagihan ni Elias sa Bukid sang Horeb.e Kaangay ni Elias sadtong panahon nga nagapalagyo sia gikan kay Reyna Jesebel, naghunahuna ang mahinadlukon nga hinaplas nga nagkalabilin nga natapos na ang ila hilikuton sang matapos ang Inaway Kalibutanon I. Nian, kaangay man ni Elias, nasumalang nila si Jehova, nga nagkari sa paghukom sa mga organisasyon nga nagapangangkon subong “panimalay sang Dios.” (1 Pedro 4:​17; Malaquias 3:​1-3) Samtang ang Cristiandad nasapwan nga ginakulang, ang hinaplas nga nagkalabilin ginkilala subong ang “matutom kag mainandamon nga ulipon” kag gintangdo sa ibabaw sang tanan nga pagkabutang ni Jesus sa duta. (Mateo 24:​45-47) Sa Horeb, si Elias nakabati sing “matawhay, mahinay nga tingog” nga iya gali ni Jehova, naghatag sa iya sing dugang pa nga hilikuton. Sa malinong nga panag-on sang mga tuig pagkatapos sang inaway, ang matutom hinaplas nga mga alagad ni Jehova nakabati sang iya tingog gikan sa mga pahina sang Biblia. Nahantop man nila nga may hilikuton sila nga dapat himuon.​—⁠1 Hari 19:​4, 9-18; Bugna 11:​7-13.

18. Paano ang tumalagsahon nga mga pagpadayag sang gahom ni Jehova ginpaagi sa Israel sang Dios?

¹⁸ Sa katapusan, ang tumalagsahon nga mga pagpadayag sang gahom ni Jehova ginpaagi bala sa Israel sang Dios? Sang mapatay si Jesus, ang mga apostoles naghimo sing madamong milagro, apang amat-amat ini nga nauntat. (1 Corinto 13:​8-13) Karon, wala kita sing makita nga mga milagro sa pisikal nga paagi. Sa pihak nga bahin, si Jesus nagsiling sa iya mga sumulunod: “Sa pagkamatuod nagasiling ako sa inyo, Sia nga nagatuo sa akon, ina man nga isa magahimo sing mga buhat nga ginahimo ko; kag magahimo sia sing mga buhat nga dalagku pa sa sini.” (Juan 14:12) May nahaunang katumanan ini sang ginbantala sang mga disipulo ni Jesus ang maayong balita sa bug-os nga Emperyo sang Roma sadtong unang siglo. (Roma 10:18) Dalagku pa nga mga buhat ang ginahimo karon samtang ginapangunahan sang hinaplas nga nagkalabilin ang pagbantala sang maayong balita “sa bug-os napuy-an nga duta subong panaksi sa tanan nga kapungsuran.” (Mateo 24:14) Ang resulta? Nasaksihan sang ika-20 nga siglo ang pagtipon sa pinakamadamo nga dedikado, matutom nga mga alagad ni Jehova sa maragtas. (Bugna 5:​9, 10; 7:​9, 10) Daw ano ka halangdon nga pamatuod sang gahom ni Jehova!​—⁠Isaias 60:⁠22.

Ang mga Kauturan ni Jesus Nagakari sa Himaya

19. San-o ang hinaplas nga mga kauturan ni Jesus nakita kaupod niya sa himaya?

¹⁹ Sang matapos sang nagkalabilin sang hinaplas nga mga kauturan ni Jesus ang ila dutan-on nga kabuhi, ginhimaya sila upod sa iya. (Roma 2:​6, 7; 1 Corinto 15:​53; 1 Tesalonica 4:​14, 17) Busa nangin dimamalatyon sila nga mga hari kag mga saserdote sa langitnon nga Ginharian. Kaupod ni Jesus, ila nian ‘bantayan ang mga tawo paagi sa bilugon nga salsalon amo nga nabuong sila kaangay sa mga suludlan nga daga.’ (Bugna 2:​27; 20:​4-6; Salmo 110:​2, 5, 6) Kaupod ni Jesus, magalingkod sila sa mga trono nga nagahukom sa “napulog-duha ka tribo sang Israel.” (Mateo 19:28) Malangkagon nga ginhulat sang nagaugayong nga tinuga ining mga hitabo, nga bahin sang “pagpahayag sa mga anak sang Dios.”​—⁠Roma 8:​19-21; 2 Tesalonica 1:​6-8.

20. (a) Tuhoy sa anong paglaum ginpabakod sang pagbaylo-dagway ang pagtuo ni Pedro? (b) Paano karon ginapabakod ang mga Cristiano sang pagbaylo-dagway?

²⁰ Si Pablo naghambal tuhoy sa pagpahayag ni Jesus sa tion sang “dakung kapipit-an” sang nagsulat sia: “Magaabot sia agod himayaon may kaangtanan sa iya mga balaan kag agod tamdon nga may katingalahan sa sina nga adlaw may kaangtanan sa tanan nga nagpakita sing pagtuo.” (Mateo 24:​21; 2 Tesalonica 1:10) Daw ano katahom ina nga palaabuton para kanday Pedro, Santiago, Juan, kag sa tanan hinaplas sang espiritu nga mga Cristiano! Ang pagbaylo-dagway nagpabakod sang pagtuo ni Pedro. Sing pat-od, ang pagbasa tuhoy sa sini magapabakod man sang aton pagtuo kag magapalig-on sang aton pagsalig nga sa dili madugay ‘tumbasan [ni Jesus] ang tagsa ka tawo suno sa iya binuhatan.’ Makita sang matutom hinaplas nga mga Cristiano nga nagakabuhi tubtob karon nga ang ila pagsalig nga himayaon sila kaupod ni Jesus ginapamatud-an. Naglig-on ang pagtuo sang iban nga mga karnero sa pagkahibalo nga luwason niya sila tubtob sa katapusan sining malauton nga sistema sang mga butang pakadto sa mahimayaon nga bag-ong kalibutan. (Bugna 7:14) Daw ano nga pagpalig-on nga magtindog sing malig-on tubtob sa katapusan! Kag ini nga palanan-awon magatudlo sa aton sing madamo pa, subong sa makita naton sa masunod nga artikulo.

[Mga footnote]

Madumduman Mo Bala?

◻ Sin-o ang nakita nga kaupod ni Jesus sa pagbaylo-dagway?

◻ Paano napabakod sang pagbaylo-dagway ang pagtuo sang mga apostoles?

◻ Sang nakita sanday Moises kag Elias nga “may himaya” kaupod ni Jesus sa pagbaylo-dagway, sin-o ang ila ginarepresentar?

◻ Ano ang pagkaanggid nanday Moises kag Elias sa isa ka bahin kag sang Israel sang Dios sa isa naman ka bahin?

[Kapsion sa pahina 10]

Ang pagbaylo-dagway nagpabakod sang pagtuo sang mga Cristiano sang nagligad kag karon