‘Indi Madali Mationg sa Imo Pangatarungan’

“Ginapakiluoy namon sa inyo nga indi kamo madali magpationg sa inyo pangatarungan ukon magmaligban bisan paagi sa inspirado nga ekspresyon ukon sa pulong ukon sa sulat nga daw gikan sa amon.”—2 TESALONICA 2:1, 2.

 1. Anong matahom nga mga handumanan ang madumduman naton kon dumdumon naton ang tion nga naton-an naton una ang kamatuoran?

MASAMI nga madumduman naton ang matahom nga mga handumanan kon aton dumdumon subong mga Cristiano ang tion sang maton-an naton una ang kamatuoran gikan sa Pulong sang Dios. Matahom ini, makatarunganon, kag makaalayaw. Ang aton mga tagipusuon napuno gid sing apresasyon sang maton-an naton ang nahanungod kay Jehova kag sa iya gamhanan nga mga kinaiya, lakip ang iya daku nga gugma kag kaluoy! Nagakalipay kita kon makig-upod kita sa masigka tumuluo nga nagapakita sing matuodtuod nga Cristianong gugma kag nagakabuhi sa prinsipio sang Biblia.

 2. Subong mga alagad ni Jehova, ano ang aton paglaum, kag sa anong espirituwal nga kahimtangan nasapwan naton ang aton kaugalingon?

² Mapasalamaton gid kita nga naton-an naton nga sa dili madugay dulaon ni Jehova ang kasakit, ang kasubo, kag bisan ang kamatayon. (Bugna 21:3, 4) Handurawa lamang, ang magkabuhi sing dayon sa paraiso nga duta, nga may himpit nga panglawas kag bug-os nga kalipay! Daw imposible. Apang matuod ini. Ginasakdag ini sang Pulong sang Dios. Makalilipay gid ini! Walay duhaduha, ang aton balatyagon daw subong sang iya sang mga disipulo ni Jesus sang magpakita sia sa ila sa tapos sia mabanhaw. Nagsinilingay sila: “Wala bala nagadabdab ang aton mga tagipusuon sa sulod naton sang magpamulong sia sa aton sa dalan, sang nagtalastas sia sa aton sang mga Kasulatan?” (Lucas 24:32) Huo, sang maton-an ang kamatuoran kag madedikar ang aton kabuhi kay Jehova, nasapwan naton ang aton kaugalingon sa espirituwal nga paraiso. Isa gid ka pagpakamaayo!

 3. Paano ginatinguhaan sang Yawa kag sang iban nga nagapamatok nga idingot sa aton ang mga pagpakamaayo sang espirituwal nga paraiso ni Jehova?

³ Apang ang mangin yara sa espirituwal nga paraiso ni Jehova indi isa ka butang nga mapasapayanan naton. Nagsulod kita sa sining paraiso sing boluntaryo; makaguwa kita (ukon paguwaon kita) kon indi kita magpati ukon hungod nga magalapas sa matarong nga kasugoan ni Jehova. Sa pagkamatuod, indi ini mahanabo kon ginahuptan naton nga makusog ang ‘aton nahaunang gugma,’ kon padayon naton nga ginaapresyar ang tanan nga mga aman ni Jehova agod magapabilin kita nga makusog sa espirituwal. (Bugna 2:4) Apang ang Yawa kag ang iban pa nga nagapamatok sa matuod nga pagsimba lantip sa pagdaya. Indi gid naton pagkalipatan nga handa gid sila sa pagsulay sa aton sa masarangan nila. Ang ila propaganda gindesinyo sa pagpaluya sang aton pagtuo, sa pagpabugnaw sang aton gugma sa Dios, sa pagsab-ug sang pangduhaduha sa aton hunahuna—huo, sa paghimo sang espirituwal nga paraiso nga daw indi gid man gali paraiso.

 4. Ano ang resulta kon pahanugotan naton ang aton pagtuo nga magluya kag kon palambuon naton ang serioso nga mga pangduhaduha?

⁴ Suno sa isa ka hulubaton, mahimo kita magalab-ot sa punto nga mabudlayan na kita, ayhan imposible pa gani, nga makita ang kagulangan sang espirituwal nga paraiso bangod sang pagtan-aw sing suod sa dihimpit tawhanon nga mga kahoy nga yari diri karon. Ang aton kalipay sa pagtuon sang kamatuoran sang Pulong sang Dios, ang aton matahom nga paglaum, ang gugma nga napalambo naton sa Dios kag sa aton espirituwal nga kautoran, kag ang aton kakugi sa pag-alagad kay Jehova sarang mag-ugdaw. Kon indi dayon pagahimuon ang makusog nga tikang sa pagbato sa bisan anong espirituwal nga pag-usmod, sa dili madugay ang mahigugmaon nga mga kinahanglanon sang Dios daw mabug-at. Ang manamit nga espirituwal nga kalan-on gikan sa “matutom kag mainandamon nga ulipon” daw butang nga makahuluya, kag ang paghiliutod sang mahigugmaon nga mga alagad ni Jehova daw isa ka panimalay sang mga kaaway. Nian ang lamang nga kaayawan, sang mga balingag, amo sa primero ang pagbunal sa masigka ulipon paagi sa pasipala kag binutig.—Mateo 24:45-51.

 5. Paano nga ang nawasi sang isa mapaanggid sa nawasi nanday Adan kag Eva sang gintabog sila sa Paraiso sa Eden?

⁵ Huo, indi lamang naton mawasi ang mga pagpakamaayo sang espirituwal nga paraiso karon kundi, sing labi ka serioso, mawasi man ang paglaum nga magkabuhi sing dayon sa dutan-on nga Paraiso. Kag mawasi naton ini bangod man sang rason nga nawasi nanday Adan kag Eva ang Paraiso sa Eden. Yara na sa ila ang tanan nga butang nga kinahanglan nila agod magmalipayon sing himpit kag magkabuhi sing dayon. Apang ang kahilwayan—sing aktuwal ang tuhay nga panudlo—mas importante sa ila sang sa pagtuman kay Jehova kag sa mga pagpakamaayo sa Eden. Ginlimbongan si Eva. Samtang wala paglimbongi si Adan, gintugotan niya ang puwersa sang mga sirkumstansia, upod ang makusog nga impluensia sang iya asawa, nga magtiklod sa iya nga magpakasala man. Gani, ginpaguwa sila sa Paraiso, agod magkabuhi sing makasulubo tubtob sa ila kamatayon. Nadula nila ang paglaum nga magkabuhi sing dayon kag ginpapanubli nila ang sala kag kamatayon sa ila kaanakan. (Genesis 3:1-7, 14-19, 24; 1 Timoteo 2:14; Roma 5:12) Daku gid nga bili ang ginbayad nila sa ginatawag nila nga kahilwayan!

 6. (a) Ano nga kabalaka ang ginpabutyag ni Pablo nahanungod sa iban sa kongregasyon sang Corinto? (b) Paano man ginpakita ini nga kabalaka sa ginsulat sa kongregasyon sang Tesalonica?

⁶ Ginpabutyag ni apostol Pablo ini nga kabalaka: “Nagakahadlok ako nga subong nga ang man-ug naglimbong kay Eva, ang inyo mga hunahuna patalangon gikan sa hanuot kag putli nga katutom kay Cristo.” (2 Corinto 11:3) Nakita ni Pablo nga nagakaigo isulat ang nahanungod sa pila ka sayop nga panudlo nga nagalapnag sadtong kaadlawan niya. Sa iya ikaduhang sulat sa kongregasyon sang Tesalonica, nagsulat sia: “Ginapakiluoy namon sa inyo nga indi kamo madali magpationg sa inyo pangatarungan ukon magmaligban bisan paagi sa inspirado nga ekspresyon ukon sa pulong ukon sa sulat nga daw gikan sa amon, subong nga yari na ang adlaw ni Jehova. Walay tawo nga maglimbong sa inyo sa bisan anong bagay.”—2 Tesalonica 2:1-3.

Indi Makig-angot sa mga Apostata

 7. (a) Anong mga pamangkot ang nagautwas kon mabaton sa koreo ang isa ka apostata nga literatura? (b) Kon tuhoy sa pag-amlig sa kaugalingon gikan sa impluensia sang mga apostata, ngaa ang sobra nga pagsalig makatalagam?

⁷ Ti, ano ang himuon mo kon ginaatubang ka sang apostata nga panudlo—sang malimbungon nga mga pangatarungan—nga nagasiling nga ang imo ginapatihan subong Saksi ni Jehova indi matuod? Halimbawa, ano ang himuon mo kon makabaton ka sing sulat ukon literatura, nga sa pagbukas sini nakita mo dayon nga naghalin gali ini sa isa ka apostata? Basahon mo bala ini bangod sang imo pagkamausisaon nga mahibal-an ang ginasiling niya? Ayhan mangatarungan ka: ‘Indi ako sini maapektohan; makusog ako sa kamatuoran. Kag, luwas pa, kon kita ang may kamatuoran, wala kita sing dapat ikahadlok. Ang kamatuoran magamadinalag-on sa pagtilaw.’ Sa paghunahuna sing subong sini, ginpakaon sang iban sa ila hunahuna ang apostata nga pangatarungan kag sa amo serioso nga nagpangduhaduha. (Ipaanggid ang Santiago 1:5-8.) Gani dumduma ang paandam sa 1 Corinto 10:12: “Busa ang nagahunahuna nga nagatindog sia mag-andam basi kon mapukan sia.”

 8. Ano nga bulig ang ginakinahanglan sang iban nga nagapangduhaduha?

⁸ Paagi sa mahigugmaon nga bulig sang nagaulikid nga mga kautoran, ang iban nga ginsab-ugan sing pangduhaduha sang mga apostata naulian pagkatapos sang panag-on sang espirituwal nga kagumon kag libog. Apang ini nga kasakit nalikawan kuntani. Sa Hulubaton 11:9 ginsilingan kita: “Sa iya baba ang tawo nga walay Dios naglaglag sa iya isigkatawo, apang paagi sa ihibalo ang matarong luwason.” Ginsilingan ni Judas ang iya masigka Cristiano nga “padayon nga kaluoyan ang iban nga nagapangduhaduha; nagaluwas sa ila paagi sa pagsagmit sa kalayo.” (Judas 22, 23) Ginlaygayan ni Pablo ang manugtatap nga si Timoteo nga tudloan “nga may kalum-ok ang mga kasumpong niya; ang Dios ayhan magatugot sa ila sa paghinulsul kag sa pagkilala sang kamatuoran, kag makapalagyo sila sa siod sang Yawa, sa tapos nga mapabihag niya sila sa paghimo sang iya kabubut-on.”—2 Timoteo 2:25, 26.

 9. Ano ang masubo nga resulta para sa mga nagsikway sa matuod nga pagsimba?

⁹ Sing masubo, ang iban nagdangat sa kompleto nga kadulom, tubtob nga nagbalik sila sa sayop nga panudlo sang Cristiandad. Si apostol Pedro nagsulat nahanungod sang masubo nga resulta para sa iban nga naglakat anay sa kamatuoran apang nagtalikod sang ulihi. Nagsiling sia: “Kay kon sa tapos nga nakapalagyo sila sa mga kadagtaan sang kalibutan paagi sa pagkilala sang aton Ginuo kag Manluluwas nga si Jesucristo, masaw-id sila liwat sa ila kag madaug, ang ila naulihi nga kahimtangan mangin malain pa sang sa nahauna.” Nagsiling ni Pedro nga daw kaangay sila sang ido nga nagabalik sa iya kaugalingon nga suka kag sang napaligoan nga nayon nga nagtubog liwat sa lunang.—2 Pedro 2:20-22.

10. (a) Ano ang ginasiling ni Jehova nahanungod sa pagpamati sa mga apostata? (b) Kaanggid sa ano ang pagbasa sang apostata nga literatura?

¹⁰ Kon ang isa ka tawo magasiling sa aton, ‘Dili ini pagbasaha’ ukon, ‘Dili ina pagpamatii,’ ayhan masulay kita nga indi pagsapakon ang iya laygay. Apang dumduma, sa sini nga bahin si Jehova amo ang Isa nga nagasiling sa aton sa iya Pulong kon ano ang himuon. Kag ano ang ginasiling niya nahanungod sa mga apostata? “Likawi sila” (Roma 16:17, 18); “indi kamo makig-upod” sa ila (1 Corinto 5:11); kag “dili [sila] pag-abiabiha sa inyo balay ukon pagtamyawon [sila]” (2 Juan 9, 10). Maathag ini nga mga pulong kag matin-aw nga mga tuytoy. Kon, bangod sang pagkamausisaon, basahon naton ang literatura sang isa ka kilala nga apostata, indi bala nga daw ginaagda naton ining kaaway sang matuod nga pagsimba pasulod sa aton puluy-an kag maglingkod upod sa aton kag magsugid sang iya apostata nga mga ideya?

11, 12. (a) Ano nga ilustrasyon ang ginahatag agod buligan kita sa pag-apresyar nga indi kita makabasa nga wala sing hinalung-ong sang apostata nga literatura? (b) Paano ini maaplikar tuhoy sa kabalaka ni Jehova sa iya katawhan?

¹¹ Iilustrar naton ini sa sining paagi: Halimbawa ang imo tin-edyer nga anak nga lalaki nakabaton sing pornograpiko nga balasahon sa koreo. Ano ang himuon mo? Kon luyag niya ini basahon bangod sang pagkamausisaon, magasiling ka bala: ‘Sige anak, basaha ini. Indi ka sini mahalitan. Kutob sa pagkabata gintudloan ka namon nga malain ang imoralidad. Luwas pa, dapat mo man mahibaloan kon ano ang nagakatabo sa kalibutan agod makita mo nga malain gid ini’? Mangatarungan ka bala sing subong sina? Aba indi! Sa baylo, ipakita mo sa iya ang katalagman sang pagbasa sang pornograpiko nga literatura kag ayhan magalaygay sa iya nga sunogon ini. Ngaa? Bangod bisan pa kon daw ano kakusog ang isa sa kamatuoran, kon ginapakaon niya ang iya hunahuna sing tiku nga mga ideya nga masapwan sa kaangay sina nga literatura, maapektohan ang iya hunahuna kag tagipusuon. Ang madugay na nga sayop nga handum nga natanum sa iya tagipusuon magatuga sa ulihi sang tiku nga gana sa sekso. Ang resulta? Si Santiago nagsiling nga kon ang sayop nga handum maggulang, magapamunga ini sang sala, kag ang sala nagadul-ong sa kamatayon. (Santiago 1:15) Gani ngaa sugdan ang nagainasod-asod nga reaksion?

¹² Ti, kon magahulag kita sing matinuoron gid agod amligan ang aton kabataan nga indi madayag sa pornograpiya, indi bala nga paabuton man naton nga laygayan kita sang aton mahigugmaon langitnon nga Amay gikan sa espirituwal nga pakighilawas, lakip ang apostasya? Nagsiling sia, Pahilayo kamo sa sini!

13. Ano ang himuon kon ang makahalangkat nga mga pamangkot, pasad sa ginsiling ukon ginsulat sang apostata, ginpautwas samtang nagapakigbahin sa hilikuton nga pagbantala?

¹³ Apang halimbawa nagabantala kita sang maayong balita kag ang mga tawo nagpautwas sing mga pamangkot ukon mga pagpamatok nga kaangay sadtong ginapautwas sang mga nagapamatok? Sa pagkamatuod, kon ang isa indi sinsero kag luyag lamang nga makigbais, masami nga mas maayo nga magkadto na lamang kita sa pihak nga ganhaan. Apang kon ang isa hanuot nga nagapamangkot nahanungod sa pila ka butang nga ginasiling sang apostata, ano ang himuon mo? Una, pamangkuton naton sia kon ano gid ang kabangdanan sang iya pagkabalaka. Ayhan isa ukon duha lamang ini ka punto. Nian magapabilin kita sa sini kag sabton ini gikan sa Kasulatan, gikan sa mga publikasyon sang Sosiedad, kag gikan sa maminatud-on nga nahibaloan naton tuhoy sini nga topiko. Indi kita dapat maghinakop nga basahon naton ang isa ka libro ukon polyeto nga puno sing pasipala kag kabutigan agod suayon ang butig nga ginasiling kag ginatudlo sang mga nagapamatok.

Magsalig kay Jehova

14. Ano ang mahigugmaon nga ginakabalak-an sang aton langitnon nga Amay sa aton, kag ngaa makasalig kita sing bug-os sa iya?

¹⁴ Samtang nagaabante kita kag nagapalig-on sang pagtuo kag nagapabilin nga masaku sa pag-alagad sa Ginharian, makasalig gid kita kay Jehova, nakahibalo nga, subong aton mahigugmaon kag langitnon nga Amay, luyag niya ang labing maayo para sa aton. Ginatudloan kita sang Dios; ginapaandaman niya kita. Ginahimo niya ini paagi sa iya Pulong kag paagi sa matin-aw nga panuytoy nga ginahatag sang iya makita nga organisasyon. Kon mangayo kita sa isa ka mahigugmaon nga ginikanan sing tinapay kag isda, indi niya kita paghatagan sing bato ukon man-ug. Ang Dios indi man magadaya ukon magalimbong sa aton. (Mateo 7:7-11) Apang, indi kita maamligan sing bug-os sang Dios gikan sa pagsulay ukon sa malimbungon nga kabutigan kag yawan-on nga propaganda. Nagsiling sia tuhoy sa iya kaugalingon: “Ako, si Jehova, amo ang imo Dios, ang Isa nga nagatudlo nga sa kapuslanan, ang Isa nga nagatuytuy sa imo sa dalanon nga laktan mo.” (Isaias 48:17) Huo, si Jehova ‘nagatudlo sa aton sa aton kapuslanan.’ Ginasilingan niya kita nga palayuan ang mga apostata kag ang ila mga panudlo, kag para gid ini sa aton kaugalingon nga pangamlig. Nagakahulugan ini sang aton kabuhi.

15. Ano nga mga paandam ang ginahatag ni apostol Pablo nahanungod sa iban nga nagatinguha sa pagpatalikod sing disipulo?

¹⁵ Ginpaandaman ni apostol Pablo ang iya masigka Cristianong mga gulang: “Gikan sa inyo gid magalutaw ang mga tawo nga nagapamulong sing mga butang nga balingag sa pagpasunod sa ila sang mga disipulo.” (Binuhatan 20:30) Kon padayunon naton nga pamatian ang malimbungon nga mga argumento kag ang makagalanyat nga pangatarungan, ang “mga butang nga balingag” daw mangin matadlong pamatian. Sa dalayon nga pagtan-aw ni Eva sa ginadumilian nga bunga kag sa pagpamati sa balingag nga pangatarungan sang Yawa, labi pa gid sia nga nakombinse nga husto ang Yawa. Si Pablo nagpaandam: “Andam kamo: basi nga may isa nga magalimbong sa inyo paagi sa pilosopiya kag daya nga walay pulos suno sa tawhanon nga pinalatonlaton nga sugid, suno sa nahauna gid nga pagtolon-an sang kalibutan kag indi suno kay Cristo.” (Colosas 2:8) Ginapakita man sang apostol nga “paagi sa matanlas kag matahom nga hambal [sang mga apostata] ginalimbongan nila ang mga tagipusuon sang mga bunayag.” (Roma 16:17, 18; ipaanggid ang 2 Corinto 11:13-15.) Sa pagkamatuod, ang kamatuoran nga may pila nga nadala bangod sina nga sahi sang propaganda wala nagakahulugan nga sundon naton sila. Apang dapat kita mangin alisto.

16. Ang pag-aplikar sa anong Makasulatanhon nga mga paandam makabulig sa aton sa pagbato sa mga panikasog ni Satanas nga limbongan kag ipahilayo ang mga tawo gikan sa matuod nga pagsimba?

¹⁶ Ang mga padugi sang Yawa wala magbaylo kutob sa Eden. Ginagamit niya ang malimbungon nga pangatarungan kag ganyat nga makawiwili sa kaugalingon. Si Pedro nagsulat: “Sa inyo man magalutaw ang dimatuod nga mga manunudlo. Sa tago magapasulod sila sing malaglagon nga mga sekta . . . Subong man, paagi sa pinahitohito nga mga pulong himuslan kamo nila.” (2 Pedro 2:1-3) Ang butang nga pinahitohito gindesinyo nga daw matuod tan-awon ukon pamatian. Sa 2 Timoteo 2:14-19, ginpadaku ni Pablo ang importansia sang paggamit sang Pulong ni Jehova sa pagtadlong sa mga bagay apang ginpaandam niya ang pagkinahanglan nga likawan ang mga apostata, nga ang ‘dibalaan nga pagwakal nagalapas sa kon ano ang balaan,’ kay, nagsiling sia, “ang ila pulong magaab-ab subong sang kalamayo.”

17, 18. (a) Paano nga ang apostata nga panudlo kaangay sang kalamayo? (b) Ano nga paandam ang ginhatag ni apostol Pedro nahanungod sadtong nagatinguha sa pagpahilayo sa aton gikan sa matuod nga pagsimba? (c) Ano nga mga pamangkot ang pagasabton sa masunod nga pagtinuon?

¹⁷ Nagakaigo gid nga pagpaanggid! Kaangay sang kalamayo, ang apostata nga pangatarungan isa gid lang ka maabtik maglapnag nga espirituwal nga kamatayon. Kag sanglit ang mga katapo sang kongregasyon kaangay sang isa ka lawas, may katalagman nga ang iban maapektohan. Kon ang isa nga nagapalapnag sang apostata nga mga panudlo indi mapasag-uli sa espirituwal nga kapagros paagi sa mahigugmaon apang malig-on nga pag-aplikar sang balsamo sang Pulong sang Dios, nagakaigo nga utdon ini nga katapo (idisfellowship) agod maamligan ang iban pa nga katapo sang lawas. (Ipaanggid ang Tito 1:10, 11.) Indi kamo magpalaton sa espirituwal nga sahi sang makamamatay nga kalamayo! Hupti ang espirituwal nga kapagros paagi sa paglikaw nga malatnan sang apostata nga panudlo. Pamatii ang maalam nga laygay sa 2 Pedro 3:17, 18: “Busa, kamo, mga hinigugma, nga nakahibalo nga daan sini, mag-andam kamo basi kon dalhon kamo sang sayop sang mga malauton kag madula sa inyo nga pagkalig-on. Apang magtubo kamo sa bugay kag pagkilala sang aton Ginuo kag Manluluwas nga si Jesucristo.”

¹⁸ Apang paano naton maamligan ang aton kaugalingon gikan sa apostasya? Paano naton mapunggan ang aton tagipusuon gikan sa pagpamati sa apostata nga pangatarungan? Ini nga mga pamangkot pagabinagbinagon sa masunod nga artikulo.

Nadumduman Mo Bala?

◻ Paano naton mahimo nga mawasi ang mga benepisyo sang espirituwal nga paraiso ni Jehova?

◻ Ngaa ang pagbasa sing apostata nga publikasyon kaangay sang pagbasa sing pornograpiya nga literatura?

◻ Ano ang himuon kon ginapamangkot kita nahanungod sa pila nga ginapangangkon sang mga apostata?

◻ Ngaa ang apostata nga mga panudlo kaangay sang kalamayo?

[Laragway sa pahina 12]

Maalamon mo bala nga ginahaboy ang mga balasahon sang mga apostata?