Mga Kalamidad—Pamatuod Bala nga Mapintas ang Dios?

ANG GINASILING SANG IBAN: “Ang Dios ang nagagahom, gani sia ang kabangdanan sang mga kalamidad; mahimo nga mapintas sia.”

ANG GINASILING SANG BIBLIA: “Ang bug-os nga kalibutan yara sa gahom sang isa nga malauton.” (1 Juan 5:19) Sin-o ang “isa nga malauton”? Ginapakilala sia sang Biblia nga amo si Satanas. (Mateo 13:19; Marcos 4:15) Daw indi bala ini mapatihan? Hunahunaa ini: Kon si Satanas ang nagagahom sa kalibutan, maimpluwensiahan gid niya ang mga tawo para mangin maiyaiyahon, dalok, kag makitid sing panghunahuna pareho niya. Indi bala nga ginapakita sina kon ngaa indi maayo ang pag-atipan sang tawo sa duta? Madamo nga eksperto ang nagpaandam nga ang indi maayo nga pag-atipan sa duta amo ang panguna nga rason sang mga kalamidad ukon amo gid ang ginatunaan sini, nagapalala, ukon nagahalit pa gid sa mga tawo.

Ti ngaa ginatugutan sang Dios si Satanas nga himuon ini? Ang sabat makita sa panugod sang maragtas sang tawo, sang nagrebelde ang aton una nga mga ginikanan sa Dios bilang Manuggahom. Sugod sadto amo sina ang ginhimo sang kalabanan. Ini nga pagpili—ang pagsikway sang paggahom sang Dios—nagpahamtang sa katawhan sa kamot sang kaaway sang Dios, si Satanas. Gani gintawag ni Jesus si Satanas nga “manuggahom sang kalibutan.” (Juan 14:30) Maggahom bala si Satanas asta san-o? Indi!

Si Jehovaa apektado sa pag-antos nga ginahimo ni Satanas. Ang matuod, nasakitan ang Dios sa pag-antos sang mga tawo. Halimbawa, parte sa kabudlayan nga natabo sa pungsod sang Israel, ang Biblia nagasiling parte sa Dios: “Sa tanan nila nga kapipit-an ginpiotan sia.” (Isaias 63:9) Bangod sang kaluoy sang Dios, tapuson niya sa indi madugay ang mapintas nga paggahom ni Satanas! Gintangdo niya ang iya Anak, si Jesucristo, nga mangin matarong nga Hari asta san-o.

KON PAANO KA NADALAHIG: Bisan pa napaslawan ang paggahom ni Satanas nga amligan ang mga tawo sa mga kalamidad, mahimo ini sang paggahom ni Jesus. Gin-amligan niya anay ang iya mga disipulo sa mabaskog nga unos. Ang Biblia nagasiling: “Ginsaway [niya] ang hangin kag nagsiling sa dagat: ‘Hipos! Maglinong ka!’ Kag nagtunong ang hangin, kag naglinaw.” Ang mga disipulo nagsiling: “Sin-o gid ini, bangod bisan ang hangin kag dagat nagatuman sa iya?” (Marcos 4:37-41) Ini nga hitabo nagapasalig sa aton nga amligan ni Jesus ang tanan nga matinumanon nga katawhan kon maghari na sia.—Daniel 7:13, 14.