Paano Ginapakita ni Jehova nga Ginahigugma Niya Kita?

 1. Ano ang ginpalig-on ni apostol Juan nga hunahunaon sang mga Cristiano, kag ngaa?

ANG ginsiling ni apostol Juan nga mabasa sa 1 Juan 3:1 takus gid pamalandungan. Sang nagsiling sia, “hunahunaa kon daw ano kadaku ang gugma sang Amay sa aton,” ginpalig-on niya ang mga Cristiano nga hunahunaon kon paano ginpakita sang Dios ang iya gugma sa ila kag kon daw ano ini kadaku. Ang paghangop naton sa sining gugma ni Jehova pat-od nga magapadalom sang aton gugma sa iya kag magapabakod sang aton kaangtanan sa iya.

 2. Ngaa nabudlayan ang iban sa pagpati nga ginahigugma sila sang Dios?

² Pero ang iban nabudlayan sa pagpati nga ginahigugma sang Dios ang mga tawo. Para sa ila, dapat kahadlukan kag tumanon ang Dios. Ukon mahimo bangod sa sala nga mga panudlo, nagabatyag sila nga ang Dios indi mahigugmaon kag mabudlay higugmaon. May mga nagapati naman nga ginahigugma sang Dios ang tanan bisan ano pa ang ila ginahimo. Sang nagtuon ka sang Biblia, natun-an mo nga ang gugma amo ang panguna nga kinaiya ni Jehova kag amo ini ang nagpahulag sa iya nga ihatag ang iya Anak para gawaron kita. (Juan 3:16; 1 Juan 4:8) Pero mahimo bangod sang pagpadaku sa imo ukon sang imo ginhalinan, nabudlayan ka magpati nga ginahigugma ka sang Dios.

 3. Ano nga kamatuoran ang makabulig sa aton nga mahibaluan nga ginahigugma kita sang Dios?

³ Gani paano ginapakita ni Jehova nga ginahigugma niya kita? Ang sabat sa sini nagadepende sa aton paghangop sa aton kaangtanan kay Jehova nga Dios. Siempre, si Jehova ang Manunuga sang tanan nga tawo. (Basaha ang Salmo 100:3-5.) Amo kon ngaa ginatawag sang Biblia si Adan nga “anak sang Dios,” kag gintudluan ni Jesus ang iya mga sumulunod nga tawgon ang Dios nga ‘Amay naton nga yara sa langit.’ (Luc. 3:38; Mat. 6:9) Si Jehova ang Manughatag sing Kabuhi, gani sia ang aton Amay. Ang aton kaangtanan sa iya pareho sa kaangtanan sang mga anak sa ila amay. Buot silingon, ginahigugma kita ni Jehova pareho sa paghigugma sang maayo nga amay sa iya mga anak.

 4. (a) Ngaa tuhay si Jehova sa tawhanon nga mga amay? (b) Ano ang binagbinagon naton sa sini nga artikulo kag sa masunod?

⁴ Pero indi perpekto ang tawhanon nga mga amay. Bisan ano nila nga pagtinguha, indi nila bug-os nga mailog ang paghigugma ni Jehova bilang amay. Ang matuod, may pila nga nagdaku sa pamilya nga ang kahimtangan may malain nga epekto sa ila emosyon ukon hunahuna. Masakit gid ini kag makapasubo. Pero pat-od gid nga tuhay si Jehova. (Sal. 27:10) Bangod nahibaluan naton nga ginahigugma kita kag ginaatipan ni Jehova, nagasuod pa gid kita sa iya. (Sant. 4:8) Sa sini nga artikulo, binagbinagon naton ang apat ka paagi nga ginapakita ni Jehova ang iya gugma sa aton. Sa masunod nga artikulo, binagbinagon naman naton ang apat ka paagi nga mapakita naton ang aton gugma sa iya.

 5. Ano ang ginsiling ni apostol Pablo sa mga taga-Atenas parte sa Dios?

⁵ Sang si apostol Pablo ara sa Atenas, Gresya, natalupangdan niya nga ang siudad puno sing mga diosdios kag nagapati ang mga tawo nga ini ang naghatag sa ila sing kabuhi kag nagaaman sang ila mga kinahanglanon. Napahulag si Pablo sa pagsiling: “Ang Dios nga naghimo sang kalibutan kag sang tanan nga butang sa sini . . . nagahatag sa tanan nga tawo sang kabuhi kag sang ginhawa kag sang tanan nga butang. . . . Paagi sa iya, may kabuhi kita kag nagahulag kag nagaluntad.” (Binu. 17:24, 25, 28) Huo, bangod ginahigugma kita ni Jehova, nag-aman sia “sang tanan nga butang” nga kinahanglanon para mabuhi kita. Hunahunaa kon ano ang nalakip sa sini.

 6. Paano ang gugma sang Dios sa aton makita sa pagtuga niya sang duta? (Tan-awa ang piktyur sa umpisa sini nga artikulo.)

⁶ Binagbinaga ang duta, nga “ginhatag” ni Jehova, ang Isa nga naghimo sini, “sa mga tawo.” (Sal. 115:15, 16) Daku ang ginagasto sang mga sientipiko para makakadto sa kahawaan kag mangita sing mga planeta nga pareho sa aton duta. Bisan pa ginatos na ka planeta ang nadiskobrehan, napaslawan gid ang mga sientipiko kay wala sing bisan isa sa sini ang may komplikado kag balanse nga kahimtangan para mabuhi ang tawo, pareho sang duta. Maathag nga pinasahi gid ang duta sa tanan nga tinuga sang Dios. Hunahunaa, sa tanan nga planeta nga ara sa Milky Way kag sa gua sini, gintuga ni Jehova ang duta indi lamang agod mapuy-an kundi komportable man ini, matahom, kag luwas sa katalagman para sa mga tawo nga iya gintuga! (Isa. 45:18) Ginapakita sini nga ginahigugma gid kita ni Jehova.​—Basaha ang Job 38:4, 7; Salmo 8:3-5.

 7. Paano kita gintuga sang Dios nga nagapamatuod nga ginahigugma niya kita?

⁷ Ginhatagan kita ni Jehova sing matahom nga puluy-an, pero nahibaluan niya nga para mangin malipayon kita kag kontento indi lang materyal nga mga butang ang kinahanglanon naton. Malipayon ang mga bata kon mabatyagan nila ang pagpalangga kag atension sang ila mga ginikanan. Gintuga ni Jehova ang mga tawo suno sa larawan niya, nga may ikasarang sa pagbatyag kag pagbalos sa iya pagpalangga kag pag-ulikid. (Gen. 1:27) Dugang pa, si Jesus nagsiling: “Malipayon ang mga mahunahunaon sa ila espirituwal nga kinahanglanon.” (Mat. 5:3) Bilang mahigugmaon nga Amay, si Jehova “bugana nga nagahatag sa aton sang tanan nga butang nga aton ginaagom,” sa pisikal kag espirituwal.​—1 Tim. 6:17; Sal. 145:16.

 8. Ngaa gusto naton magpatudlo kay Jehova?

⁸ Palangga gid sang mga amay ang ila kabataan kag gusto nila nga indi sila mapatalang ukon madayaan. Pero madamo nga ginikanan ang wala nagagiya sing nagakaigo sa ila kabataan kay sila mismo wala nagasunod sa mga talaksan sang Pulong sang Dios. Masami nga nagaresulta ini sa indi pag-intiendihanay kag kapaslawan. (Hulu. 14:12) Pero si Jehova “ang Dios sang kamatuoran.” (Sal. 31:5) Ginahigugma gid niya ang iya mga anak kag gusto niya tudluan sila sang kamatuoran para maggiya sa tagsa ka bahin sang ila kabuhi, ilabi na sa pagsimba. (Basaha ang Salmo 43:3.) Ano nga kamatuoran ang gintudlo ni Jehova, kag paano sini ginapakita nga ginahigugma niya kita?

9, 10. Paano ginpakita ni Jehova nga ginahigugma niya kita paagi sa pagsugid sa aton sang kamatuoran (a) parte sa iya? (b) parte sa aton?

⁹ Una sa tanan, ginsugid ni Jehova sa aton ang kamatuoran parte sa iya. Ginpakilala niya ang iya personal nga ngalan, nga ginsambit sa Biblia sing mas madamo nga beses sangsa bisan ano nga ngalan. Sa sini nga paagi, nagapalapit si Jehova sa aton para makilala naton sia. (Sant. 4:8) Ginpakita man niya ang iya mga kinaiya, kon ano sia nga klase sang Dios. Makita sa uniberso ang gahom kag kaalam ni Jehova, kag makita sa Kasulatan ang iya hustisya kag wala sing tupong nga gugma. (Roma 1:20) Isa sia ka amay nga indi lang makusog kag maalam kundi mahigugmaon man kag wala sing ginapasulabi, gani mahapos para sa iya mga anak nga mangin suod sa iya.

¹⁰ Para makabenepisyo kita, ginsugid man ni Jehova ang kamatuoran parte sa kon ano ang aton bahin sa iya kahimusan. Nakabulig ini para mangin mahidaiton kag maorganisar sing maayo ang iya pamilya sa bilog nga uniberso. Natun-an naton sa Biblia nga gintuga ang tawo nga wala sing kinamatarong sa pagpat-od kon ano ang husto ukon sala, ukon mangin independiente sa Dios, kag malain gid ang resulta kon supakon ini nga kamatuoran. (Jer. 10:23) Importante gid ini para sa aton kaayuhan. Matigayon lamang naton ang paghidait kag paghiusa kon kilalahon naton ang awtoridad sang Dios. Mahigugmaon gid si Jehova kay ginsugid niya sa aton ining importante nga kamatuoran!

11. Ano ang ginpromisa ni Jehova nga nagapakita sang iya gugma kag kabalaka sa aton?

¹¹ Ang mahigugmaon nga amay nabalaka gid sa palaabuton sang iya kabataan, kag luyag niya nga mangin malipayon kag may katuyuan ang ila kabuhi. Makapasubo nga madamo ang nabalaka sa palaabuton, ukon nagapanikasog gid sila nga matigayon ang mga butang nga wala sing dayon nga kaayuhan. (Sal. 90:10) Bilang mga anak sang Dios, nabatyagan gid naton ang gugma ni Jehova bangod nagpromisa sia sa aton sing matahom nga palaabuton. Gani may matuod gid nga kalipay kag katuyuan ang aton kabuhi.

12. Paano ang laygay kag panuytoy ni Jehova kay Cain kag kay Baruc nagpakita nga ginahigugma kag ginakabalak-an niya sila?

¹² “Ngaa akig gid ikaw kag ngaa nagakusmod ka? Kon himuon mo ang maayo, indi bala nga kahamut-an ka man? . . . Madaug mo bala [ang sala]?” (Gen. 4:6, 7) Nagakaigo gid ini nga laygay kag positibo nga panuytoy. Ginpaandaman ni Jehova si Cain sang nakita niya nga may huyog na ini sa paghimo sing malain. Makapasubo nga wala mamati si Cain, gani malain ang iya nadangatan. (Gen. 4:11-13) Sang ang sekretaryo ni Jeremias nga si Baruc ginkapoy kag ginluyahan, ginlaygayan sia ni Jehova para makita niya kon ano gid ang iya problema. Indi kaangay ni Cain, ginbaton ni Baruc ang laygay ni Jehova, gani naamligan niya ang iya kabuhi.​—Jer. 45:2-5.

13. Ngaa gintugutan ni Jehova ang mga pagtilaw sa mga matutom sa iya?

¹³ “Ang ginahigugma ni Jehova ginadisiplina niya, ang matuod, ginalapdusan niya ang kada isa nga ginabaton niya subong anak,” sulat ni Pablo. (Heb. 12:6) Pero ang pagdisiplina indi lamang pagsilot. May lainlain ini nga paagi. May madamo nga halimbawa sa Biblia sang matutom nga mga alagad nga nakaeksperiensia sing mga pagtilaw nga mahimo bahin sang pagdisiplina kag paghanas sa ila. Dumduma sanday Jose, Moises, kag David. Ang rekord sang ila kabuhi mas detalyado sangsa iban nga karakter sa Biblia. Kon basahon naton ang parte sa pagbulig ni Jehova sa ila sa tion sang mga pagtilaw kag paghatag sa ila ni Jehova sing dalagku nga mga responsibilidad, mabatyagan naton ang pag-ulikid kag paghigugma ni Jehova sa iya mga alagad.​—Basaha ang Hulubaton 3:11, 12.

14. Paano naton mabatyagan ang gugma ni Jehova kon ginadisiplina niya kita?

¹⁴ Paagi sa pagdisiplina ni Jehova, makita pa gid naton ang isa ka aspekto sang iya gugma. Kon ang mga nakasala gindisiplina ni Jehova kag mamati sila kag maghinulsol, ‘magapatawad sia sing bugana.’ (Isa. 55:7) Ano ang buot silingon sini? Makatalandog gid ang paglaragway ni David sa pagpatawad ni Jehova: “Ginapatawad niya ang tanan ko nga kasaypanan kag ginaayo niya ang tanan ko nga balatian; ginaluwas niya ang akon kabuhi sa buho, kag ginapakitaan niya ako sing mainunungon nga gugma kag kaluoy. Subong nga malayo ang sidlangan sa katundan, amo man sina kalayo ang pagpahilayo niya sa aton sang aton mga paglapas.” (Sal. 103:3, 4, 12) Kabay nga pamatian naton pirme ang laygay kag disiplina ni Jehova, dayon sundon ini, nga ginatamod ini nga pagpahayag sang iya wala tupong nga gugma.​—Sal. 30:5.

15. Ano ang nagapakita nga importante gid kay Jehova ang iya katawhan?

¹⁵ Pat-od gid nga ang isa sa mga prioridad sang mahigugmaon nga amay amo ang pag-amlig kag pagbantay sa iya pamilya sa bisan ano nga halit ukon katalagman. Amo man sini ang aton langitnon nga Amay nga si Jehova. Ang salmista nagsiling parte kay Jehova: “Ginaamligan niya ang kabuhi sang mga mainunungon sa iya; ginaluwas niya sila sa kamot sang malauton.” (Sal. 97:10) Binagbinaga ini nga halimbawa. Importante gid sa imo ang imo mata! Amo man sina ang nabatyagan ni Jehova sa iya katawhan. (Basaha ang Zacarias 2:8.) Importante gid sa Dios ang iya katawhan!

16, 17. Ilaragway kon paano ginaamligan kag ginabantayan ni Jehova ang iya katawhan, bisan sa aton tion.

¹⁶ Ang isa ka paagi nga ginaamligan ni Jehova ang iya katawhan amo ang paggamit sang iya mga anghel. (Sal. 91:11) Ginluwas sang isa ka anghel ang Jerusalem sa mga taga-Asiria, paagi sa pagpatay sa 185,000 ka soldado sa isa lang ka gab-i. (2 Hari 19:35) Naeksperiensiahan nanday apostol Pedro kag Pablo kag sang iban pa ang pagluwas sa ila sang mga anghel sa bilangguan. (Binu. 5:18-20; 12:6-11) Ginaamligan man kita ni Jehova subong. Ang isa ka tiglawas sang ulong talatapan nga nagduaw sa isa ka sanga talatapan sa Aprika nagreport nga nag-ilinaway sa amo nga pungsod bangod sang pulitika kag relihion. Nagkinagamo didto bangod sang pag-ilinaway, pagpangawat, pagpanglugos, kag pagpatyanay. Pero wala sing napatay nga utod bangod sini, bisan pa madamo sa ila ang nadulaan sing mga pagkabutang kag palangabuhian. Sang ginkamusta sila, ang tanan nagayuhum nga nagsabat: “Maayo man kami bangod kay Jehova!” Nabatyagan nila ang gugma sang Dios.

¹⁷ Kon kaisa, ginatugutan ni Jehova nga patyon sang mga kaaway ang matutom sa iya, pareho ni Esteban. Pero sa kabilugan, ginaamligan sang Dios ang iya katawhan paagi sa pagpaandam sa ila batok sa mga pahito ni Satanas. (Efe. 6:10-12) Paagi sa iya Pulong kag base sa Biblia nga mga publikasyon halin sa iya organisasyon, mabuligan kita nga makita ang katalagman sang malimbungon nga manggad, imoral kag bayolente nga kalingawan, indi nagakaigo nga paggamit sang Internet, kag iban pa. Maathag nga pareho sang mahigugmaon nga Amay, ginaamligan ni Jehova ang iya katawhan.

18. Ano ang ginabatyag mo sa gugma ni Jehova sa imo?

¹⁸ Pagkatapos naton mabinagbinag ang pila ka talalupangdon nga paagi nga ginapakita ni Jehova ang iya gugma sa aton, nabatyagan naton ang pareho sa ginbatyag ni Moises. Sang ginhunahuna ni Moises ang madugay na niya nga pag-alagad kay Jehova, nagsiling sia: “Busga kami sa aga sang imo mainunungon nga gugma, agod magsinggit kami sa kalipay kag magkasadya sa tanan namon nga adlaw.” (Sal. 90:14) Daku gid nga pribilehiyo kag pagpakamaayo sa aton subong nga mahangpan kag maeksperiensiahan ang gugma ni Jehova. Ang aton ginabatyag pareho man kay apostol Juan, nga nagsiling: “Hunahunaa kon daw ano kadaku ang gugma sang Amay sa aton!”​—1 Juan 3:1.