Magpadayon sa Pagkabuhi Subong mga Anak sang Dios

“Ang bisan sin-o nga wala nagahimo sing matarong indi iya sang Dios, amo man ang wala nagahigugma sang iya utod.”—1 JUAN 3:10.

1, 2. Samtang padayon naton nga ginaton-an ang Nahaunang Juan, anong laygay ang pagabinagbinagon naton?

SI Jehova may bug-os uniberso nga panimalay, kag ang iban nga mga tawo karon bahin sini. Mga anak sila sang Dios. Apang paano sila tuhay gikan sa iban?

² Sa iya nahaunang gin-inspirar sang Dios nga sulat, si apostol Juan nagapakilala sining nahamut-an kaayo nga mga tawo. Nagahatag man sia sing laygay nga nagabulig sa ila sa paglakat sing padayon subong mga anak sang Dios. Kag ang ginasiling niya nagabenepisyo sa tanan nga dedikado nga mga saksi ni Jehova.

Daw Ano ka Daku ang Gugma sang Dios!

 3. Paano ang iban ginahimo nga “mga anak sang Dios,” kag paano sila ginatamod sang kalibutan?

³ Ginsitar ni Juan ang paglaum sang hinaplas nga mga Cristiano. (Basaha ang 1 Juan 3:1-3.) Daw ano ka daku nga gugma ang ginpakita ni Jehova sa pag-adoptar sa ila subong espirituwal nga mga anak, nagahimo sa ila nga “mga anak sang Dios”! (Roma 5:8-10) Ang ila diosnon nga espiritu, mga tulumuron, kag mga paglaum wala ginapaambitan sang “kalibutan”—ang dimatarong nga tawhanon nga katilingban. Inang kalibutanon nga katilingban nagadumut kay Cristo kag sa iya mga sumulunod kag sa Amay man. (Juan 15:17-25) Gani ginakilala sang kalibutan ang mga hinaplas subong mga indibiduwal kag indi subong mga anak sang Dios bangod “wala sini makilala” si Jehova.—1 Corinto 2:14.

 4. Ano ang dapat nga himuon sang bisan sin-o nga nagalaum sang langitnon nga kabuhi?

⁴ Sa karon, ang mga hinaplas mga anak sang Dios. “Apang,” siling ni Juan, “subong nga wala pa mapahayag kon mangin ano kita” sa tapos mapatay sa katutom kag mabanhaw pa langitnon nga kabuhi nga may espirituhanon nga lawas. (Filipos 3:20, 21) Apang, sang ang Dios “magpahayag,” sila mangin “kaangay niya” kag “makita sia nga subong sia gid,” subong “si Jehova nga Espiritu.” (2 Corinto 3:17, 18) Ang tagsatagsa nga may amo “sini nga paglaum” sang langitnon nga kabuhi mapahulag sa pagpaputli sang iya kaugalingon “subong nga sia [si Jehova] putli.” Bisan pa nga ang mga hinaplas indi karon himpit, dapat sila magkabuhi sing matinlo nga nahisuno sa ila paglaum nga makita ang putli, balaan nga Dios sa langitnon nga duog.—Salmo 99:5, 9; 2 Corinto 7:1.

Himoa ang Matarong

5, 6. Gikan sa pagtamod sang Dios ang tagsatagsa nga nagapakasala nagahimo sing ano, apang sa sini nga bahin, ano ang matuod sa sadtong nagapabilin nga “yara” kay Jesucristo?

⁵ Ang pagkabuhi subong mga anak sang Dios nagakahulugan man sang paghimo sing matarong. (Basaha ang 1 Juan 3:4, 5.) “Ang tagsatagsa nga nagapakasala nagalapas man” gikan sa punto-de-vista ni Jehova, nga ang mga sugo ginalapas sang makasasala. (Isaias 33:22; Santiago 4:12) Ang tanan nga “sala amo ang pagkamalinapason,” isa ka paglapas sa kasugoan sang Dios. Ang pagpakasala supak sa Cristianong espiritu, kag nagapasalamat kita nga si Jesucristo “nagpahayag” subong tawo “sa pagkuha sang aton mga sala.” Sanglit “walay sala sa iya,” sarang niya mapresentar sa Dios ang isa ka makaalayaw sing bug-os nga halad nga nagatumbas sa sala.—Isaias 53:11, 12; Hebreo 7:26-28; 1 Pedro 2:22-25.

⁶ “Ang bisan sin-o nga nagapabilin sa iya [sa Anak] wala nagapakasala.” (Basaha ang 1 Juan 3:6.) Subong dihimpit, makahimo kita sing sala kon kaisa. Apang ang paghimo sing sala indi kinabatasan na sa mga nagapabilin nga nahiusa sa Anak kag, sa amo, nahiusa sa Amay. Ang mga nagapakasala wala “makakita” kay Jesus paagi sa mata sang pagtuo; yadtong kinabatasan na nga mga makasasala wala “makakilala” kag makaapresyar kay Cristo subong ang nagatumbas sang sala nga “Kordero sang Dios.”—Juan 1:36.

7, 8. Suno sa 1 Juan 3:7, 8, ang hungod nga nagapakasala iya ni sin-o, apang ang Anak sang Dios “nagpahayag” sa paghimo sing ano?

⁷ Si Juan nagapaandam nga indi magpatalang. (Basaha ang 1 Juan 3:7, 8.) “Indi kamo pagpatalangon ni bisan sin-o,” siling sang apostol, nagadugang: “Ang nagahimo sing matarong [paagi sa pagtuman sa kasugoan sang Dios] amo ang matarong, subong nga sia [si Jesucristo] matarong.” Ang aton pagkamakasasala nagaupang sa aton nga mangin matarong nga pareho sa Daku nga Huwaran. Apang paagi sa dibagay nga kaluoy ni Jehova, ang hinaplas nga mga sumulunod ni Jesus karon makapadayon sa pagkabuhi subong mga anak sang Dios.

⁸ Ang hungod nga nagapakasala “iya sang Yawa,” nga nagpakasala “kutob sa ginsugoran” sang iya karera sang pagrebelde batok kay Jehova. Apang ang Anak sang Dios “nagpahayag” sa “paglaglag” sa “mga binuhatan” ni Satanas sa pagpauswag sang sala kag kalautan. Nagalakip ini sang pagdula sa epekto sang Adamiko nga kamatayon paagi sa pagtumbas sang sala paagi kay Cristo kag sa pagbanhaw sadtong yara sa Sheol (Hades), kag subong man sa pagdugmok sa ulo ni Satanas. (Genesis 3:15; 1 Corinto 15:26) Samtang, kita, ang hinaplas nga nagkalabilin kag ang “dakung kadam-an,” magbantay batok sa pagpakasala kag pagkadimatarong.

Tumana ang Kasugoan sang Dios

 9. Sa anong kahulugan nga ang ginpanganak sang espiritu nga Cristiano “wala nagapakasala,” kag ngaa?

⁹ Masunod nga ginapakilala ni Juan ang mga anak sang Dios kag yadtong iya sang Yawa. (Basaha ang 1 Juan 3:9-12.) Ang bisan sin-ong “natawo sa Dios wala nagapakasala,” ukon nagahimo sini nga batasan. Ang “binhi,” ukon balaan nga espiritu ni Jehova nga nagahatag sa isa sing “bag-ong pagkatawo” padulong sa langitnon nga paglaum, nagapabilin sa indibiduwal kon wala sia nagabato kag sa amo ‘nagakasubo’ sa espiritu, agod ang Dios magpahilayo sa sini. (1 Pedro 1:3, 4, 18, 19, 23; Efeso 4:30) Agod magpabilin nga isa sa mga anak sang Dios, ang ginpanganak sang espiritu nga Cristiano “indi makahimo sing sala.” Subong “bag-o nga tinuga” nga may “bag-o nga personalidad,” nagapanikasog sia batok sa sala. ‘Nakalikaw sia sa kaduluntan nga yara sa kalibutan bangod sang kailigbon,’ kag wala sa iya tagipusuon nga mangin batasan na nga nagahimo sing sala.—2 Corinto 5:16, 17; Colosas 3:5-11; 2 Pedro 1:4.

10. Ano ang isa ka paagi sa pagkilala sa mga anak sang Dios kag sa iya sang Yawa?

¹⁰ Ang isa ka paagi sa pagkilala sa mga anak sang Dios kag sa iya sang Yawa amo ini: “Ang bisan sin-o nga wala nagahimo sing matarong indi iya sang Dios.” Ang pagkadimatarong amo ang kinaiya sang mga anak sang Yawa amo kon ngaa sila “wala nagatulog kon indi sila makahimo sing malaut, makuha ang ila katulugon kon wala sila sing makuha nga mapukan,” nga amo ang luyag himuon sang mga apostata sa matutom nga mga Cristiano.—Hulubaton 4:14-16.

11. (a) Ano ang isa pa ka paagi sa pagkilala sa mga indi anak sang Dios? (b) Ang pagbinagbinag sa dalanon ni Cain magapahulag sa aton sa paghimo sing ano?

¹¹ Dugang pa, “amo man [indi iya sang Dios] ang wala nagahigugma sang iya utod.” Sa katunayan, ang “mensahe” nga aton nabatian “kutob sa ginsugoran” sang aton pagkabuhi subong mga Saksi ni Jehova amo nga “dapat kita maghigugmaanay sa isa kag isa.” (Juan 13:34) Gani kita “indi kaangay kay Cain,” nga nagpakita nga sia “iya sang malaut” paagi sa ‘pagpatay sa iya utod’ sa masingki nga paagi nga amo ang karakteristiko sang manugpatay sing tawo nga si Satanas. (Genesis 4:2-10; Juan 8:44) Ginpatay ni Cain si Abel “bangod ang iya mga binuhatan malaut, kag ang iya sang iya utod matarong.” Sa pagkamatuod, ang pagbinagbinag sa dalanon ni Cain magapahulag sa aton nga magbantay batok sa kaanggid nga pagdumut sa aton espirituwal nga mga kautoran.

Ang Gugma “sa Buhat kag Kamatuoran”

12. Paano “kita nakahibalo nga nagliton kita sa kamatayon pa kabuhi,” kag ano ang buot silingon sini?

¹² Kon ilugon naton si Cain, mangin patay kita sa espirituwal. (Basaha ang 1 Juan 3:13-15.) Gindumtan niya ang iya utod sing labi amo kon ngaa ginpatay niya sia, kag indi kita makibot nga sing kaanggid ginadumtan kita sang kalibutan, kay gintagna ini ni Jesus. (Marcos 13:13) Apang “nakahibalo kita [ukon, makasalig] nga nagliton kita sa [espirituwal nga] kamatayon pa kabuhi [nga dayon], bangod ginahigugma naton ang mga kautoran,” ang aton mga masigka saksi ni Jehova. Bangod sinang utudnon nga gugma, upod ang pagtuo kay Cristo, indi na kita ‘patay’ sa mga paglapas kag mga sala, kundi ginkuha sang Dios gikan sa aton ang Iya pagtagudili, kag ginbanhaw kita sa espirituwal nga kamatayon, kag ginhatagan sing kabuhi nga walay katapusan. (Juan 5:24; Efeso 2:1-7) Ang wala sing gugma nga mga apostata wala sina nga paglaum, kay “ang wala nagahigugma nagapabilin sa [espirituwal nga] kamatayon.”

13. Kon ginadumtan naton ang utod, ngaa dapat naton ini ipangamuyo?

¹³ Sa pagkamatuod, “ang bisan sin-o nga nagadumut sang iya utod manugpatay.” Ang pisikal nga pagpatay ayhan wala nahimo (subong sang ginpatay ni Cain si Abel bangod sang kahisa kag dumut), apang ang nagadumut nagapakamaayo nga ang iya espirituwal nga utod mapatay. Sanglit mabasa ni Jehova ang tagipusuon, ang tindog sang nagadumut ginapakamalaut. (Hulubaton 21:2; ipaanggid ang Mateo 5:21, 22.) Wala sing dimahinulsulon nga “manugpatay,” ukon nagadumut sang masigka tumuluo, “ang may kabuhi nga walay katapusan nga nagapabilin sa iya.” Gani kon ginadumtan naton ang aton masigka Saksi sing tago, indi bala kita dapat mangayo sing bulig kay Jehova paagi sa pangamuyo nga baylohan ang aton espiritu sa iya sang utudnon nga gugma?

14. Tubtob sa anong kasangkaron nga dapat naton ipakita ang utudnon nga gugma?

¹⁴ Agod magpadayon kita sa pagkabuhi subong mga anak sang Dios, dapat naton ipakita ang utudnon nga gugma sa pulong kag buhat. (Basaha ang 1 Juan 3:16-18.) Mangin posible ini, kay “nakilala ta ang iya gugma, kay ginhatag niya ang iya [Jesucristo] kalag [ukon, “kabuhi”] tungod sa aton.” Sanglit ginpakita ni Jesus ang gugma sa sinang kasangkaron, dapat man naton ipakita ang kaanggid nga may prinsipio nga gugma (Griego, a·gaʹpe) para sa masigka tumuluo. Sa panahon sang paghingabot, halimbawa, “dapat naton ihatag ang aton mga kalag tungod sa mga kautoran,” subong nga sanday Prisca kag Aquila “ginpakatalagman nila ang ila kaugalingon nga kabuhi tungod sa kalag [ni apostol Pablo].”—Roma 16:3, 4; Juan 15:12, 13.

15. Kon ang isa ka utod nagakinahanglan kag kita may “pangabuhian sang kalibutan,” ano ang ginakinahanglan sa aton sang gugma?

¹⁵ Agod mahatag naton ang aton kabuhi tungod sa aton mga kautoran, dapat man kita mangin handa sa paghimo sing magagmay nga mga butang tungod sa ila. Halimbawa may yara kita “pangabuhian sang kalibutan”—kuarta, kalan-on, panapton, kag iban pa, nga ginapaposible sang kalibutan. Ayhan ‘nakita’ naton ang isa ka utod nga nagakinahanglan, indi lamang nagatan-aw sa iya sing pasapayan kundi nagahimutad sang kahimtangan. Ang iya kahimtangan mahimo magabukas sang “ganhaan” sang aton “kaluoy,” ukon pinakatudok nga balatyagon. Apang kamusta kon aton takpan ina nga “ganhaan” paagi sa pagtugot sa kakagud nga magliso sang aton tinutuyo sa pagbulig sa iya? Nian “paano bala ang pagpabilin sang gugma sang Dios” sa aton? Indi bastante nga maghambal lamang nahanungod sa utudnon nga gugma. Subong mga anak sang Dios, dapat naton ini ipahayag “sa buhat kag kamatuoran.” Halimbawa, kon ang isa ka utod ginagutom, nagakinahanglan sia sing kalan-on, indi lamang sing pulong.—Santiago 2:14-17.

Mga Tagipusuon nga Wala Nagatagudili sa Aton

16. (a) Paano ang Dios “mas daku sang sa aton mga tagipusuon”? (b) Suno kay Juan, ngaa ginasabat ni Jehova ang aton mga pangamuyo?

¹⁶ Masunod nga ginahatag ni Juan ang mga pasalig nga kita mga anak ni Jehova. (Basaha ang 1 Juan 3:19-24.) “Makilala ta nga kita iya sang kamatuoran” kag indi mga biktima sang apostata nga pagpatalang “sa sini”—ang kamatuoran nga ginapakita naton ang utudnon nga gugma. Sa amo aton “mapalig-on ang aton tagipusuon” sa atubangan sang Dios. (Salmo 119:11) Kon ang mga tagipusuon nagatagudili sa aton, ayhan bangod nagabatyag kita nga wala naton mapakitai ang masigka sumilimba sing bastante nga gugma, dumduma nga “ang Dios daku pa sa aton mga tagipusuon kag nakakilala sia sang tanan nga mga butang.” Maluluy-on sia bangod nahibaloan niya ang aton “bunayag nga gugma sa aton mga kautoran,” ang pagpakig-away batok sa sala, kag ang aton mga panikasog nga magkabuhi sa dalanon nga kalahamut-an sa iya. (1 Pedro 1:22; Salmo 103:10-14) “Kon ang aton tagipusuon wala nagatagudili sa aton” bangod may mga buhat nga nagapamatuod sang aton utudnon nga gugma, kag wala kita makahimo sing tago nga sala, “may kahilwayan kita sa paghambal sa atubangan sang Dios” sa pangamuyo. (Salmo 19:12) Kag ginasabat niya ang aton mga pangamuyo “kay ginabantayan ta ang iya mga sugo kag nagahimo sang nahamut-an sang iya mga mata.”

17. Ang “sugo” sang Dios nagadalahig sang anong duha ka kinahanglanon?

¹⁷ Kon ginapaabot naton nga sabton ang aton mga pangamuyo, dapat naton tumanon ang “sugo” sang Dios nga nagadalahig sa sining duha ka kinahanglanon: (1) Dapat kita magtuo sa “ngalan” ni Jesus, magbaton sa gawad kag magkilala sa iya hatag-Dios nga awtoridad. (Filipos 2:9-11) (2) Dapat man kita “maghigugmaanay sa isa kag isa” subong sang ginsugo ni Jesus. (Juan 15:12, 17) Sa pagkamatuod, ang bisan sin-o nga may pagtuo sa ngalan ni Jesus dapat maghigugma sa tanan nga iban pa nga may amo sina nga pagtuo.

18. Paano naton nahibaloan nga ang Dios “nagapabilin nga yara sa aton”?

¹⁸ Ang isa nga nagatuman sang mga sugo sang Dios “nagapabilin sa iya,” nga nahiusa kay Jehova. (Ipaanggid ang 17:20, 21.) Apang paano “ta mahibaloan” nga ang Dios “nagapabilin sa aton”? Mahibaloan naton ini “bangod sang [balaan] nga espiritu nga ginahatag niya sa aton.” Ang pagpanag-iya sang balaan nga espiritu sang Dios kag ang ikasarang sa pagpasundayag sining bunga, lakip ang utudnon nga gugma, nagapamatuod nga kita nahiusa kay Jehova.—Galacia 5:22, 23.

Magbantay!

19, 20. Ngaa ‘tilawan ang inspirado nga ekspresyon,’ kag ano nga bulig ang ginahatag ni Juan nahanungod sini?

¹⁹ Masunod nga ginapakita ni Juan kon paano kita dapat magbantay. (Basaha ang 1 Juan 4:1.) Indi naton dapat patihan ang tagsa ka espiritu, ukon “inspirado nga ekspresyon,” kundi dapat kita ‘magtilaw sang inspirado nga ekspresyon kon sila iya sang Dios.’ Ngaa? “Kay madamo ang dimatuod nga mga manalagna nga naglapnag sa kalibutan.” Sa dili magkubos ang iban sining malimbungon nga mga manunudlo nagalakbay anay, nagapakig-upod sa lainlain nga mga kongregasyon, kag nagapanikasog sa “pagpasunod sa ila sang mga disipulo.” (Binuhatan 20:29, 30; 2 Juan 7) Gani ang matutom kinahanglan magbantay.

²⁰ Ang iban sang nahaunang-siglo nga mga Cristiano may “paghantop sa inspirado nga mga pinamulong,” isa ka milagruso nga dulot sang aktibo nga kusog sang Dios nga maathag nga nagahimo sa ila sa pagpat-od kon bala ang inspirado nga ekspresyon iya ni Jehova. (1 Corinto 12:4, 10) Apang ang paandam ni Juan maaplikar sa mga Cristiano sa kabilogan kag mabuligan sa karon nga ang mga apostata nagatinguha sa pagpaluya sa pagtuo sang mga Saksi ni Jehova. Bisan ang dulot sang espiritu nga “paghantup sa inspirado nga mga pinamulong” nadula na, ang pulong ni Juan nagahatag sing paagi sa pagpat-od kon bala ang mga manunudlo ginapahulag sang espiritu sang Dios ukon sang yawan-on nga mga impluensia.

21. Ano ang isa ka paagi sa pagtilaw sa “inspirado nga ekspresyon”?

²¹ Talupangda ang isa ka paagi sa pagtilaw. (Basaha ang 1 Juan 4:2, 3.) “Ang tagsa ka inspirado nga ekspresyon nga nagatu-ad nga si Jesucristo nakaabot sa unod iya sang Dios.” Nahibaloan naton nga si Jesus nagkabuhi anay subong tawo kag amo ang Anak sang Dios, kag ang aton pagtuo nagapahulag sa aton sa pagtudlo sa iban sina nga kamatuoran. (Mateo 3:16, 17; 17:5; 20:28; 28:19, 20) “Apang ang tagsa ka inspirado nga ekspresyon nga wala nagatu-ad kay Jesus indi iya sang Dios.” Sa baylo, “ini amo ang inspirado nga ekspresyon sang anticristo” batok kay Cristo kag batok sa Makasulatanhon nga mga panudlo nahanungod sa iya. Sing maathag, si Juan kag ang iban pa nga mga apostoles nagpaandam nga “ang inspirado nga ekspresyon sang anticristo” nagaabot. (2 Corinto 11:3, 4; 2 Pedro 2:1) Sanglit ang dimatuod nga mga manunudlo sadto nagabutang sa katalagman sa matuod nga mga Cristiano, si Juan makasiling, “Karon yari na ini sa kalibutan.”

22. Ano ang isa pa ka paagi sa pagtilaw sa “inspirado nga ekspresyon”?

²² Ang isa pa ka paagi sa pagtilaw sa “inspirado nga ekspresyon” amo ang pagtalupangod kon sin-o ang nagapamati sa ila. (Basaha ang 1 Juan 4:4-6.) Subong mga alagad ni Jehova, aton “nadaug,” ukon nalandas, ang dimatuod nga mga manunudlo, nagmadinalag-on sa ila mga panikasog nga ipahilayo kita gikan sa kamatuoran sang Dios. Ining espirituwal nga kadalag-an ginpaposible bangod ang Dios, nga “yara” sa matutom nga mga Cristiano, “mas daku sang sa iya [ang Yawa] nga nahiusa sa kalibutan,” ukon sa dimatarong nga tawhanon nga katilingban. (2 Corinto 4:4) Bangod ang mga apostata “iya sang kalibutan” kag may malaut nga espiritu, “nagahambal sila sang iya sang kalibutan kag ang kalibutan nagapamati sa ila.” Sanglit yara sa aton ang espiritu ni Jehova, mamutikan naton ang diespirituwal nga kinaugali sang ila “inspirado nga ekspresyon” kag sa amo ginasikway sila.

23. Sin-o ang nagapamati sa aton kag nagakilala nga kita ginatuytuyan sang espiritu sang Dios?

²³ Apang nahibaloan naton nga “kita iya sang Dios” bangod “ang nakakilala sa Dios nagapamati sa aton.” Ang mga katulad-karnero nakahibalo nga nagatudlo kita sang kamatuoran nga pasad sa Pulong sang Dios. (Ipaanggid ang Juan 10:4, 5, 16, 26, 27.) Sa pagkamatuod, “ang indi iya sang Dios wala nagapamati sa aton.” Ang dimatuod nga mga manalagna, ukon mga manunudlo, wala magpamati kay Juan ukon sa iban nga ‘iya sang Dios’ kag nagpaambit sang maayong instruksion sa espirituwal. Gani “bangod sini makilala ta ang inspirado nga ekspresyon sang kamatuoran kag ang inspirado nga ekspresyon sang kasaypanan.” Kita nga nagahuman sa panimalay sang mga sumilimba ni Jehova nagahambal sing “putli nga hambal” sang Makasulatanhon nga kamatuoran nga ginaaman paagi sa organisasyon sang Dios. (Sofonias 3:9) Kag gikan sa aton ginahambal, maathag sa mga katulad-karnero nga ginatuytuyan kita sang balaan nga espiritu sang Dios.

24. Ano ang masunod nga punto nga ginapakita ni Juan?

²⁴ Tubtob sa sini nga punto, si Juan naghatag sang pila ka sadsaran nga mga kinahanglanon nga dapat naton himuon agod magpadayon kita sa pagkabuhi subong mga anak sang Dios. Masunod niya nga ipakita kon ngaa dapat naton pirme ipakita ang gugma kag pagtuo.

Ano ang Imo Sabat?

◻ Paano ang iban ginahimo nga “mga anak sang Dios”?

◻ Paano naton makilala ang mga anak sang Dios kag ang iya sang Yawa?

◻ Ang pagbinagbinag sa dalanon ni Cain magapahulag sa aton sa paghimo sang ano?

◻ Tubtob sa anong kasangkaron nga ipakita naton ang utudnon nga gugma?

◻ Paano matilawan ang “inspirado nga ekspresyon”?

[Laragway sa pahina 18]

Ang pagbinagbinag sa dalanon ni Cain magapahulag sa aton nga magbantay batok sa pagdumut sa aton mga utod

[Laragway sa pahina 20]

Ang mga sumilimba ni Jehova nagahambal sang “putli nga hambal” sang Makasulatanhon nga kamatuoran nga ginaaman paagi sa organisasyon sang Dios