“Makig-away sing Lakas Para sa Pagtuo”!

“Makig-away sing lakas para sa pagtuo nga gintugyan sing makaisa gid lang sa mga balaan.”​—⁠JUDAS 3.

1. Sa anong kahulugan ang matuod nga mga Cristiano karon nagapakig-away?

ANG mga soldado nga nagapakig-away yara pirme sa idalom sang mabudlay nga pagkabuhi. Handurawa ang pagsuksok sing kompleto nga uniporme kag kagamitan sa inaway kag ang paglakat sing kinilometro sa tanan nga sahi sang panahon nga nagahanas sing lakas sa pag-uyat sing armas, ukon sa pagpangapin sa imo kaugalingon batok sa tanan nga sahi sang masingki nga katalagman nga mahimo tunaan sing kamatayon ukon kasamaran. Apang, ang matuod nga mga Cristiano wala nagapakigbahin sa mga inaway sang mga pungsod. (Isaias 2:​2-4; Juan 17:14) Apang, indi naton dapat pagkalimtan nga sa espirituwal nga kahulugan kita tanan nagapakig-away. Akig gid si Satanas kay Jesucristo kag sa iya mga sumulunod sa duta. (Bugna 12:17) Ang tanan nga nagapamat-od sa pag-alagad kay Jehova nga Dios, masiling nga nagasulod sa pagkasoldado agod makig-away sa espirituwal.​—⁠2 Corinto 10:⁠4.

2. Paano ginlaragway ni Judas ang Cristianong pagpakig-away, kag paano ang iya sulat makabulig sa aton nga mabatas ini?

² Sing nagakaigo, ang utod sa iloy ni Jesus nga si Judas nagsulat: “Mga hinigugma, walay sapayan nga ginahimo ko ang tanan nga panikasog nga isulat sa inyo ang tuhoy sa kaluwasan nga aton tanan ginahuptan, nasapwan ko nga kinahanglan kamo sulatan agod laygayan kamo sing hanuot nga makig-away sing lakas para sa pagtuo nga gintugyan sing makaisa gid lang sa mga balaan.” (Judas 3) Sang ginlaygayan ni Judas ang mga Cristiano nga “makig-away sing lakas,” gingamit niya ang tinaga nga naangot sa tinaga para sa “pag-antos.” Huo, mahimo nga mabudlay ini nga pagpakig-away, nagapaantos pa gani! Nabudlayan ka bala kon kaisa sa pagbatas sa sini nga inaway? Ang malip-ot apang puwersado nga sulat ni Judas makabulig sa aton. Ginapalig-on kita sini nga pamatukan ang imoralidad, nga tahuron ang ginpatok sang Dios nga awtoridad, kag huptan ang aton kaugalingon sa gugma sang Dios. Binagbinagon naton kon paano iaplikar ini nga laygay.

Pamatuki ang Imoralidad

3. Anong hilingagawon nga kahimtangan ang nagaatubang sa Cristianong kongregasyon sang mga adlaw ni Judas?

³ Nakita ni Judas nga indi tanan sang iya masigka-Cristiano nagadaug sa inaway batok kay Satanas. Isa ka hilingagawon nga kahimtangan ang nagaatubang sa panong. Ang malaut nga mga tawo ‘nakasulod,’ sulat ni Judas. Ining mga tawo malimbungon nga nagapasanyog sing imoralidad. Kag malalangon nga ginapakamatarong nila ang ila mga buhat, “nagahimo sang dibagay nga kaayo sang Dios nga balibad para sa lugak nga pagginawi.” (Judas 4) Ayhan, kaangay sang dumaan nga mga Gnostiko, nangatarungan sila nga kon labi nga nagapakasala ang isa ka tawo, labi nga mabaton niya ang dibagay nga kaayo sang Dios​—⁠gani, maayo pa nga magpakasala sing labi! Ukon ayhan naghunahuna sila nga ang maayo nga Dios indi magasilot sa ila. Bisan ano pa ang rason, nagsayop sila.​—⁠1 Corinto 3:⁠19.

4. Anong tatlo ka Makasulatanhon nga halimbawa sang paghukom ni Jehova sang nagligad ang ginsambit ni Judas?

⁴ Ginpamatud-an ni Judas nga sayop ang ila malaut nga mga pangatarungan paagi sa pagsambit sing tatlo ka halimbawa sang mga paghukom ni Jehova sang nagligad: batok sa mga Israelita nga “wala magpakita sing pagtuo”; batok sa “mga anghel nga . . . nagbiya sang ila kaugalingon nagakaigo nga puluy-an” agod magpakasala upod sa mga babayi; kag batok sa mga pumuluyo sang Sodoma kag Gomorra, nga “nagmakihilawason sing lakas kag nagpatuyang sa unod para sa dinagakaigo nga paggamit.” (Judas 5-7; Genesis 6:​2-4; 19:​4-25; Numeros 14:35) Sa tagsa ka hitabo, si Jehova nagpadapat sing nagakaigo nga paghukom batok sa mga makasasala.

5. Sin-o ang dumaan nga propeta nga ginkutlo ni Judas, kag paano ginpakita sadtong tagna ang pat-od nga katumanan sini?

⁵ Sang ulihi, ginpatuhuyan ni Judas ang mas masangkad pa nga paghukom. Ginkutlo niya ang tagna ni Enoc​—⁠isa ka tagna nga indi masapwan sa iban nga bahin sang inspirado nga Kasulatan.⁠a (Judas 14, 15) Si Enoc nagtagna sing isa ka tion nga pagahukman ni Jehova ang tanan nga didiosnon kag ang ila didiosnon nga mga buhat. Sing talalupangdon, si Enoc naghambal sa porma nga nakaligad na, kay ang mga paghukom sang Dios daw subong nga natabo na. Mahimo nga ginyaguta sang mga tawo si Enoc kag sang ulihi si Noe, apang ini tanan nga mga manugyaguta nalumos sa bug-os globo nga Anaw.

6. (a) Sa ano dapat pahanumdumon ang mga Cristiano sang mga adlaw ni Judas? (b) Ngaa dapat naton pamatian ang mga pahanumdom ni Judas?

⁶ Ngaa ginsulat ni Judas ining mga paghukom sang Dios? Bangod nahibaluan niya nga ang iban nga nagapakig-angot sa Cristianong mga kongregasyon sang iya mga adlaw nagapakasala sing subong kalain kag kalaut sadtong gintunaan anay sang nagligad nga mga paghukom. Sa amo, si Judas nagsulat nga ang mga kongregasyon dapat pahanumdumon tuhoy sa pila ka sadsaran espirituwal nga mga kamatuoran. (Judas 5) Maathag nga nalipatan nila nga nakita ni Jehova nga Dios ang ila ginahimo. Huo, kon hungod nga ginalapas sang iya mga alagad ang iya mga kasuguan, ginahigkuan ang ila kaugalingon kag ang iban, nakit-an niya ini. (Hulubaton 15:3) Ina nga mga buhat nagpalain gid sang iya buot. (Genesis 6:6 Salmo 78:40) Makahalawhaw gid hunahunaon nga kita nga mga tawo lamang makaapektar sa balatyagon sang Soberanong Ginuo sang bug-os nga uniberso. Ginabantayan niya kita adlaw-adlaw, kag kon ginahimo naton ang aton bug-os nga masarangan agod sundon ang mga tikang sang iya Anak, si Jesucristo, nian ang aton paggawi nagapahalipay sa iya tagipusuon. Busa, indi gid naton paglapason ina nga mga pahanumdom ni Judas kundi pamatian ini.​—⁠Hulubaton 27:​11; 1 Pedro 2:⁠21.

7. (a) Ngaa importante nga yadtong nadalahig sa serioso nga sala mangayo gilayon sing bulig? (b) Paano naton tanan malikawan ang imoralidad?

⁷ Wala lamang nagatulok si Jehova kundi nagahulag man sia. Subong Dios sang katarungan, ginasilutan niya ang mga malauton​—⁠sa iya natalana nga tion. (1 Timoteo 5:24) Yadtong nagasiling nga ang iya mga paghukom mga butang lamang sang nagligad kag nga wala sia nagasapak sa ginahimo nila nga kalautan nagadaya lamang sang ila kaugalingon. Daw ano ka importante para sa tanan karon nga nadalahig sa imoralidad nga magpangayo gilayon sing bulig sa Cristianong mga gulang! (Santiago 5:​14, 15) Tanan kita mahimo nga matahap sa ginadala nga katalagman sang imoralidad sa aton espirituwal nga pagpakig-away. Tagsa ka tuig may nagakahalitan​—⁠mga indibiduwal nga ginasikway sa tunga naton, kalabanan sa ila bangod sang dimahinulsulon nga paghimo sing imoral nga mga buhat. Dapat kita mamat-od sing malig-on nga pamatukan ang bisan anong mga pagsulay nga bisan nagasugod pa lamang sa pagdul-ong sa aton sa amo nga kahimtangan.​—⁠Ipaanggid ang Mateo 26:⁠41.

Tahura ang Ginpatok sang Dios nga Awtoridad

8. Sin-o ang “mga mahimayaon” nga ginsambit sa Judas 8?

⁸ Ang isa pa ka problema nga ginapatuhuyan ni Judas amo ang kakulang sing pagtahod sa ginpatok sang Dios nga awtoridad. Halimbawa, sa bersikulo 8 ginsumbong niya ang amo gihapon malauton nga mga tawo nga “nagapamulong sing may pag-abuso tuhoy sa mga mahimayaon.” Sin-o ining “mga mahimayaon”? Dihimpit sila nga mga tawo, apang may mga responsabilidad sila nga ginhatag sang balaan nga espiritu ni Jehova. Halimbawa, ang mga kongregasyon may mga gulang nga gintangdo sa pagbantay sa panong sang Dios. (1 Pedro 5:2) May yara man nagalakbay nga mga manugtatap, kaangay ni apostol Pablo. Kag ang hubon sang mga gulang sa Jerusalem nagpanghikot anay subong nagadumala nga hubon nga nagahimo sing mga desisyon para sa Cristianong kongregasyon sa kabilugan. (Binuhatan 15:6) Nabalaka gid si Judas bangod may pila sa kongregasyon nga nagahambal sing may pag-abuso, ukon sing mapasipalahon, sa sini nga mga tawo.

9. Anong mga halimbawa tuhoy sa dipagtahod sa awtoridad ang ginsambit ni Judas?

⁹ Agod pakamalauton yadtong dimatinahuron nga paghambal, ginsambit ni Judas sa bersikulo 11 ang tatlo pa ka halimbawa subong mga pahanumdom: sanday Cain, Balaam, kag Kore. Wala ginsapak ni Cain ang mahigugmaon nga laygay ni Jehova kag hungod nga ginpadayon ang iya makatalagam nga pagdumot. (Genesis 4:​4-8) Si Balaam sulitsulit nga ginpaandaman sa dikinaandan nga mga paagi​—⁠bisan gani ang iya asno nakighambal sa iya! Apang makagod nga ginpadayon ni Balaam ang iya buko batok sa katawhan sang Dios. (Numeros 22:​28, 32-34; Deuteronomio 23:5) Si Kore may kaugalingon nga katungdanan, apang indi sia kontento sa sini. Nagsugyot sia sing pagrebelde batok sa pinakamahagop nga tawo sa duta, si Moises.​—⁠Numeros 12:​3; 16:​1-3, 32.

10. Paano ang iban sa karon mahimo mahulog sa siod sang ‘paghambal nga may pag-abuso sa mga mahimayaon,’ kag ngaa dapat likawan ang amo nga sahi sang paghambal?

¹⁰ Maathag gid nga ginatudluan kita sining mga halimbawa nga pamatian ang laygay kag tahuron yadtong yara sa katungdanan nga ginagamit ni Jehova! (Hebreo 13:17) Mahapos lamang pangitaan sing sayop ang gintangdo nga mga gulang, kay dihimpit sila, subong nga kita tanan dihimpit. Apang kon ang ila lamang mga kasaypanan ang aton bantayan kag indi sila pagtahuron, indi ayhan nga kita “nagahambal sing may pag-abuso tuhoy sa mga mahimayaon”? Sa bersikulo 10, ginsambit ni Judas yadtong “nagapamulong sing maabusuhon tuhoy sa tanan nga butang nga wala gid nila mahibalui.” Kon kaisa, mahimo nga ginamulay sang iban ang isa ka desisyon nga ginhimo sang hubon sang mga gulang ukon sang hudisyal nga komite. Apang, wala nila mahibalui ang tanan nga detalye nga ginabinagbinag sang mga gulang sa paghimo sang isa ka desisyon. Gani ngaa maghambal sing maabusuhon tuhoy sa mga butang nga wala nila mahibalui sing tul-id? (Hulubaton 18:13) Yadtong padayon nga nagahambal sing negatibo makatuga sing pagbinahinbahin sa kongregasyon kag ayhan mapaanggid pa gani sa makatalagam nga “mga bato nga natago sa idalom sang tubig” sa pagtilipon sang mga masigkatumuluo. (Judas 12, 16, 19) Indi gid naton luyag nga ibutang sa espirituwal nga katalagman ang iban. Sa baylo, dapat mamat-od kita tanan nga pasalamatan ang responsable nga mga lalaki bangod sa ila lakas nga pagpangabudlay kag debosyon sa panong sang Dios.​—⁠1 Timoteo 5:⁠17.

11. Ngaa ginlikawan ni Miguel nga magpadapat sing paghukom sa maabusuhon nga paagi batok kay Satanas?

¹¹ Ginasambit ni Judas ang halimbawa sang isa nga nagtahod sa ginpatok nga awtoridad. Sia nagsulat: “Sang si Miguel nga arkanghel nagpakigsuay sa Yawa kag nagpakigbais nahanungod sa lawas ni Moises, wala sia magpangahas sa paghatag sing paghukom batok sa iya sa maabusuhon nga mga hambal, kundi nagsiling: ‘Kabay nga sawayon ka ni Jehova.’ ” (Judas 9) Ining makawiwili nga hitabo, nga si Judas lamang ang nagsulat sa inspirado nga Kasulatan, nagatudlo sing duha ka magkatuhay nga leksion. Sa isa ka bahin, ginatudluan kita sini nga itugyan ang paghukom kay Jehova. Maathag nga luyag gamiton sing sayop ni Satanas ang lawas sang matutom nga tawo nga si Moises agod pasanyugon ang butig nga pagsimba. Tuman gid kalaut! Apang, mapainubuson nga naglikaw si Miguel sa pagpadapat sing paghukom, kay si Jehova lamang ang may awtoridad sa paghimo sini. Labi na gid nga maglikaw kita sa paghukom sa matutom nga mga lalaki nga nagatinguha sa pag-alagad kay Jehova.

12. Ano ang matun-an sadtong may awtoridad sa Cristianong kongregasyon gikan sa halimbawa ni Miguel?

¹² Sa pihak nga bahin, yadtong may awtoridad sa kongregasyon makatuon man sing leksion gikan kay Miguel. Ti, walay sapayan nga si Miguel amo ang “arkanghel,” ang pangulo sang tanan nga anghel, wala niya pag-abusuhi ang iya awtoridad, bisan sa idalom sang pag-ipit. Mahalungon nga ginasunod sang matutom nga mga gulang ina nga halimbawa, nakahibalo nga ang pag-abuso sa ila awtoridad indi pagtahod sa soberanya ni Jehova. Ang sulat ni Judas madamo sing masiling tuhoy sa mga lalaki nga may talahuron nga katungdanan sa mga kongregasyon apang nag-abuso sang ila awtoridad. Halimbawa, sa bersikulo 12 tubtob 14, si Judas nagsulat sing masakit nga pagpakamalaut sa “mga manugpahalab nga walay kahadlok nga nagpakaon sa ila kaugalingon.” (Ipaanggid ang Ezequiel 34:​7-10.) Sa iban nga hambal, ang ila una nga gin-ulikdan amo ang ila kaugalingon nga kaayuhan, indi ang panong ni Jehova. Ang mga gulang sa karon may daku nga matun-an gikan sa sinang dimaayo nga mga halimbawa. Sa pagkamatuod, maathag nga ginalaragway diri sang mga pinamulong ni Judas kon ano ang indi naton luyag nga matigayon sa ulihi. Kon magpadaug kita sa kakagod, indi kita mangin mga soldado ni Cristo; tuman sa aton kasako sa personal nga mga interes. Sa baylo, maggawi kita suno sa mga pinamulong ni Jesus: “Mas daku ang kalipay sa paghatag sangsa pagbaton.”​—⁠Binuhatan 20:⁠35.

“Hupti ang Inyo Kaugalingon sa Gugma sang Dios”

13. Ngaa dapat gid naton handumon nga magpabilin sa gugma sang Dios?

¹³ Sa talipuspusan nga bahin sang iya sulat, si Judas naghatag sining makapapagsik nga laygay: “Hupti ang inyo kaugalingon sa gugma sang Dios.” (Judas 21) Ang lamang nga makabulig sa aton sing labi agod makapakig-away sa Cristianong pagpakig-away amo ang pagpabilin sa gugma ni Jehova nga Dios. Kon sa bagay, ang gugma amo ang panguna nga kinaiya ni Jehova. (1 Juan 4:8) Si Pablo nagsulat sa mga Cristiano sa Roma: “Kumbinsido ako nga bisan ang kamatayon bisan ang kabuhi bisan ang mga anghel bisan ang mga panguluhan bisan ang mga butang karon bisan ang mga butang nga magaabot bisan ang mga kagamhanan bisan ang kataason bisan ang kadalumon bisan ang tanan iban pa nga mga tinuga indi makabulag sa aton sa gugma sang Dios nga yara kay Cristo Jesus nga aton Ginuo.” (Roma 8:​38, 39) Apang, paano kita makapabilin sa sina nga gugma? Talupangda ang tatlo ka paagi nga aton mahimo, suno kay Judas.

14, 15. (a) Ano ang buot silingon sang pagpalig-on sang aton kaugalingon sa aton “labing balaan nga pagtuo”? (b) Paano naton mausisa ang kahimtangan sang aton espirituwal nga hinganib?

¹⁴ Una, ginasilingan kita ni Judas nga padayon nga palig-unon ang aton mga kaugalingon sa aton “labing balaan nga pagtuo.” (Judas 20) Subong sang nakita naton sa nagligad nga artikulo, isa ini ka nagapadayon nga proseso. Kaangay kita sa mga tinukod nga nagakinahanglan sing dugang kag dugang nga pamakod batok sa malain nga tiempo. (Ipaanggid ang Mateo 7:​24, 25.) Gani indi gid kita dapat magsalig sing sobra. Sa baylo, tan-awon naton kon diin naton matukod ang aton kaugalingon sa sadsaran sang aton pagtuo, nga mangin mas mabakod, mas matutom nga mga soldado ni Cristo. Halimbawa, mahimo naton binagbinagon ang mga bahin sang espirituwal nga hinganib nga ginlaragway sa Efeso 6:​11-18.

¹⁵ Kamusta ang aton espirituwal nga hinganib? Ang aton bala “daku nga taming sang pagtuo” mabakod gihapon? Kon balikan naton ang nagligad nga mga tuig, may makit-an bala kita nga mga tanda sang paghinay, subong sang ditayuyon nga pagtambong sa miting, pagkadula sing kakugi sa ministeryo, ukon pag-ugdaw sing gana sa personal nga pagtuon? Ina nga mga tanda makatalagam! Dapat kita maghulag karon agod pabakuron kag palig-unon ang aton mga kaugalingon sa kamatuoran.​—⁠1 Timoteo 4:​15; 2 Timoteo 4:​2; Hebreo 10:​24, 25.

16. Ano ang buot silingon sang pagpangamuyo nga may balaan nga espiritu, kag ano ang isa ka butang nga dapat naton pangabayon kay Jehova sing tayuyon?

¹⁶ Ang ikaduha nga paagi agod makapabilin sa gugma sang Dios amo ang magpadayon sa ‘pagpangamuyo nga may balaan nga espiritu.’ (Judas 20) Nagakahulugan ina sing pagpangamuyo sa idalom sang impluwensia sang espiritu ni Jehova kag nahisuno sa iya inspirado sang espiritu nga Pulong. Ang pangamuyo isa ka importante nga paagi agod mangin suod kay Jehova sing personal kag mapabutyag ang aton debosyon sa iya. Indi gid naton pagpabay-an ining tumalagsahon nga pribilehiyo! Kag kon nagapangamuyo kita, mahimo kita makapangabay​—⁠sa katunayan, padayon nga makapangabay​—⁠sing balaan nga espiritu. (Lucas 11:13) Amo ini ang pinakamabaskog nga puwersa nga matigayon naton. Paagi sina nga bulig, pirme kita makapabilin sa gugma sang Dios kag makabatas subong mga soldado ni Cristo.

17. (a) Ngaa ang halimbawa ni Judas tuhoy sa kaluoy tumalagsahon gid? (b) Paano kita tanan padayon nga makapakita sing kaluoy?

¹⁷ Ikatlo, ginasugo kita ni Judas nga padayon nga magpakita sing kaluoy. (Judas 22) Ang iya kaugalingon nga halimbawa sa sini nga bahin tumalagsahon. Kon sa bagay, nagakaigo lamang nga matublag sia sa kagarukan, imoralidad, kag apostasya nga nagsulod sa Cristianong kongregasyon. Apang, wala sia magsalasala, naghunahuna nga ang kahimtangan tuman ka makatalagam agod magpakita sing “malum-ok” nga kinaiya subong sang kaluoy. Wala, ginlaygayan niya ang iya mga kauturan nga padayon nga magpakita sing kaluoy kon posible, nagapangatarungan sing mainayuhon sa mga nagapangduhaduha kag ‘ginaagaw [pa gani] sa kalayo’ yadtong buot maghimo sing serioso nga sala. (Judas 23; Galacia 6:1) Daw ano nga pagpalig-on sa mga gulang sa sining magamo nga mga tion! Nagatinguha man sila nga magpakita sing kaluoy kon nagakaigo ini, samtang nagapabilin nga malig-on kon kinahanglanon. Kita tanan luyag man magpakita sing kaluoy sa isa kag isa. Halimbawa, sa baylo nga huptan ang mga dipaghangpanay sa magagmay nga mga butang, mahimo kita mangin mapinatawaron.​—⁠Colosas 3:⁠13.

18. Paano naton mapat-od ang kadalag-an sa aton espirituwal nga pagpakig-away?

¹⁸ Ang aton pagpakig-away indi mahapos. Subong sang ginsiling ni Judas, isa ini ka “lakas nga pagpakig-away.” (Judas 3) Ang aton mga kaaway gamhanan. Indi lamang si Satanas ang nagapakig-away sa aton kundi ang iya malauton nga kalibutan kag ang aton kaugalingon nga mga dikahimpitan. Apang, magamadinalag-on gid kita! Ngaa? Bangod dampig kita kay Jehova. Ginhinakpan ni Judas ang iya sulat paagi sa isa ka pahanumdom nga si Jehova nagakaigo hatagan sing “himaya, pagkahalangdon, kagamhanan kag awtoridad sa bug-os nga walay katubtuban nga nagligad kag karon kag sa bug-os nga walay katubtuban.” (Judas 25) Indi bala ina makahalawhaw hunahunaon? May pangduhaduha pa bala, nian, nga ini man nga Dios “sarang makabantay sa inyo gikan sa pagkasandad”? (Judas 24) Wala gid! Mangin determinado kita tanan nga padayon nga pamatukan ang imoralidad, nga tahuron ang ginpatok sang Dios nga awtoridad, kag huptan ang aton kaugalingon sa gugma sang Dios. Sa sina nga paagi, matigayon naton ang mahimayaon nga kadalag-an.

[Footnote]

Mga Pamangkot sa Repaso

◻ Paano ang sulat ni Judas nagatudlo sa aton nga pamatukan ang imoralidad?

◻ Ngaa importante gid nga tahuron ang ginpatok sang Dios nga awtoridad?

◻ Ano ang katalagman sa sayop nga paggamit sa awtoridad sa kongregasyon?

◻ Paano kita makapabilin sa gugma sang Dios?

[Retrato sa pahina 15]

Indi kaangay sa Romanong mga hangaway, ang mga Cristiano nagapakig-away sa espirituwal

[Retrato sa pahina 18]

Ang Cristianong mga manugbantay nagaalagad, indi bangod sa kakagod, kundi bangod sa gugma