Mangin Bunayag sa Tanan nga Butang

“Ginasaligan namon nga may bunayag kami nga konsiensia, nga nagahandum sa pagpangabuhi sing bunayag sa tanan nga butang.”—HEBREO 13:18.

 1, 2. (a) Ano ang natabo sa pagkabunayag sa tion naton? (b) Ano nga sahi sang mga tawo ang nadalahig sa pagkadibunayag?

ANG tigulang nga mga tawo makadumdum sang tion nga, sa madamong duog, ang mga tawo wala nagakandado sang ila mga ganhaan. Wala sila nagahunahuna nga kawatan ang iban ukon dayaan sila. Kon maghulam sila sing kuwarta, nagabatyag sila nga dapat nila ini bayaran. Kag ang ila ginasiling ‘daw kaangay sang bulawan.’ Matuod, may yara pagkadibunayag, apang indi ini lapnag. Apang, sa karon, ang pagpangawat, pagbutig, kag pagdaya kinaandan na sa bug-os nga kalibutan. Kag madamong dibunayag nga buhat ang naghalin sa ginatawag nga talahuron nga mga tawo nga nagakabuhi kag nagapangabudlay sa matahom nga kasilingan, nagapanapot sing maayo, may relihion, kag nagakabig sang ila kaugalingon nga maayong mga banwahanon. Sa pagkamatuod, ang pagkadibunayag lapnag na sa tunga sang mga opisyales sang pangulohan kag negosyo.

² Sa Estados Unidos kapin sa 11 ka milyon ka dalagku nga krimen nga may kahilabtanan sa pagkadibunayag ang ginareport kada tuig. Kag ang indi pagreport sa tanan bulohisan nga kita nagalab-ot sa kapin sa $250 ka bilyon kada tuig. Sa Siudad sang Nueva York mga isa ka gatos ka libo ka tawo ang wala nagabayad sing plete sa tren—kada adlaw. Ang isa ka opisyal nagsiling nga kon dakpon ining tanan nga nagadaya, “mahigot kami sa sistema sang hukmanan sing binulan.” Sa Japan ang surbey sa mga nagabayad sang buhis nagapakita nga 95 porsiento ang nagdaya sa tax returns, lakip ang 92 porsiento sang mga abogado. Sa isa ka bulan kapin sa 16,000 ka tawo ang nadakpan nga nagsakay nga wala nagaplete sa mga tren.

 3. Paano nangin labi ka lapnag ang pagkadibunayag sa pag-asawahay?

³ Ang pagkadibunayag nagdugang man sa kabuhi sang mag-asawa. Sang nagligad nga mga pila ka tuig ginapakita sang isa ka surbey nga 30 porsiento sang Amerikano nga mga asawa “ang nagaluib.” Sa pinakaulihi pa nga surbey sa kapin sa isa ka gatos ka libo ka minyo nga mga babayi, 50 porsiento ang nagbaton nga “nakahimo sing pagluib, sa dimagkubos sing makaisa.” Ang isa ka manugpanilag nagkomento nga ayhan “90 porsiento sang minyo nga mga lalaki” ang nagaluib man.

Bahin sang “Katapusan nga mga Adlaw”

 4. Ngaa wala kita makibot sa pagdugang sang pagkadibunayag?

⁴ Ang mga alagad ni Jehova wala makibot nga ang pagdibunayag nagdugang. Nahibaloan nila nga bahin ini sang tanda sining “katapusan nga mga adlaw.” Ang Pulong sang Dios nagatagna nga sa aton tion ang mga tawo mangin ‘mahigugmaon sang ila kaugalingon, mahigugmaon sang kuwarta, dimatutom, wala sing pagpugong sa kaugalingon, wala sing gugma sa kaayohan, may dagway sang diosnon nga debosyon apang nagapanghiwala sang iya gahom, kag nagalain pa gid.’ (2 Timoteo 3:1-5, 13) “Sing dugang pa,” siling sang isa ka grupo sang mga eksperto, ang mga tawo sa kalibutan “nagapahigad sang kinabatasan nga mga balor sang matarong kag sayop kag wala nagasapak sang konsiensia.”

 5. Ano ang natabo sang ang kahimtangan nga kaanggid sa karon nagluntad anay sa dumaan nga napulo ka tribo nga ginharian sang Israel?

⁵ Ang kahimtangan sang kalibutan karon mas malain sang sa tion antes gid lamang ginhukman ni Jehova ang dumaan nga napulo ka tribo nga ginharian sang Israel. Tuhoy sina nga tion ang Oseas 4:1-3 nagasiling: “Si Jehova may kasuayon sa mga pumuluyo sang duta, bangod nga wala sing kamatuoran ukon mahigugmaon nga kalulo ukon ihibalo sang Dios sa duta. Wala na gid kundi pagsumpa, pagbungkag sang pagtuo, pagpatay, pagpangawat, kag pagpanglahi, kag nagpamuyong sila kag ang dugo nagatandog sang dugo. Busa magalalaw ang duta kag ang tagsatagsa nga nagapuyo sa iya magakag-as.” Ang malaut nga paghukom ni Jehova ginhimo sang 740 B.C.E. sang gintugotan niya ang Asiria sa pagpierde sa Israel kag sa iya kapital nga Samaria kag sa pagdala sang iya mga pumuluyo nga tinapok.

 6. Ngaa hukman sang Dios ining karon nga sistema, kag daw ano ka pat-od ina nga paghukom?

⁶ Sing kaanggid, si Jehova may “kasuayon” sa sining dibunayag nga kalibutan. Ang Kasulatan nagaathag nga ginhukman ini ni Jehova kag “magakag-as” sa kalaglagan. “Ang mga langit kag ang duta nga amo karon gintigana sa kalayo, nga ginatipigan nga sa adlaw sang paghukom kag kalaglagan sang mga tawo nga didiosnon.” (2 Pedro 3:7) Tuman gid kapat-od ang katumanan sini nga ang Pulong sang Dios nagasiling nahanungod sini nga daw natabo na: “Yari karon! Nag-abot si Jehova upod ang linaksa sang iya mga balaan, kag sa pagsilot sang tanan nga didiosnon nahanungod sang tanan nila nga binuhatan sang pagkadidiosnon nga ginhimo nila sing didiosnon.”—Judas 14, 15.

 7. Tubtob wala pa ginatapos ni Jehova ining malaut nga kalibutan, ano nga mga hangkat ang ginaatubang sang iya mga alagad?

⁷ Apang, tubtob wala ginatapos sang Dios ining dibunayag nga kalibutan, ang iya mga alagad magapuyo sa sini. Ang mga Cristiano yara “sa kalibutan,” apang, subong sang ginasiling ni Jesus, “indi sila bahin sang kalibutan.” (Juan 17:11-14) Gani, sa adlaw-adlaw kinahanglan nga magahimo sila sing moral nga pamat-od may kahilabtanan sa pagkabunayag. Nagalakip ini sang mga kahimtangan sa trabaho, sa eskwelahan, sa pamilya, ukon upod sa mga abyan. Sa tanan nga mga hangkat sa ila nahanas sa Biblia nga konsiensia, ang mga alagad ni Jehova maluyag sa pagbatyag sang ginbatyag ni apostol Pablo sang magsiling sia: “Ginasaligan namon nga may bunayag kami nga konsiensia, nga nagahandum sa pagpangabuhi sing bunayag sa tanan nga butang.”—Hebreo 13:18.

Indi Lamang ‘ang Labing Maayo nga Pagsulondan’

 8. Ngaa ang pagkabunayag pagsulondan para sa mga alagad ni Jehova?

⁸ Ginasiling nga ang ‘pagkabunayag amo ang labing maayo nga pagsulondan,’ buot silingon nga ang pagkabunayag nagahatag sing praktikal nga mga resulta. Apang para sa mga Cristiano, labaw pa ini sa sina. Para sa ila, ang pagkabunayag amo lamang ang pagsulondan. Subong mga alagad ni Jehova, obligado sila nga indi pag-ilugon ining ginpakamalaut nga pagkadibunayag sang kalibutan—indi bangod sa bisan ano pa nga rason. Sa baylo, dapat nila himuon ang tanan nila nga hilikuton nahisuno sa kasugoan sang Dios. Kag ang iya mga kasugoan wala magbalhin may kahilabtanan sa sining bahin.

 9. Paano ginapadaku sang Kasugoan ni Jehova sa dumaan nga Israel ang pagkabunayag?

⁹ Halimbawa, si Jehova nagsiling sa dumaan nga Israel: “Dili ka magpanglahi. Dili ka magpangawat. Dili ka magsaksi sing dimatuod batok sa imo isigkatawo. Dili ka magkaibog . . . sa ano nga butang nga iya sang imo isigkatawo.” (Exodo 20:14-17) Sing kaanggid, ang Levitico 19:11, 12 nagasiling: “Dili kamo magpangawat, kag dili kamo maglinimbongay, kag dili kamo magbinutigay. Kag dili ka magsumpa sing dimatuod tungod sa akon ngalan, kag magpasipala sang ngalan sang imo Dios. Ako amo si Jehova.”

10. Paano ginapadaku sang Cristianismo ang pagkabunayag?

¹⁰ Ina nga kasugoan ginhambal liwat para sa mga Cristiano. Gani, ang Pulong sang Dios nagasiling: “Wala bala kamo makahibalo nga ang mga dimatarong indi makapanubli sang ginharian sang Dios? Dili kamo magtalang. Bisan ang makihilawason, ukon mga diwatahan, ukon mga makihilahion, ukon babayinhon, ukon sodomanhon, ukon mga makawat, ukon mga mahamkonon, ukon mga palahubog, ukon mga mapasipalahon, ukon mga malugus indi makapanubli sang ginharian sang Dios”; ukon ang bisan sin-o nga “nagahimo sang butig.” (1 Corinto 6:9, 10; Bugna 22:15) Ang tanan nga maluyag magpuyo sa bag-ong sistema sang Dios dapat magpabanaag sang iya mga kinaiya, ang isa sini amo nga ang “Dios . . . indi makabutig.” (Tito 1:2; Hebreo 6:18) Ang pagkadibunayag naghalin kay Satanas, “ang amay sang kabutigan.”—Juan 8:44.

11, 12. (a) Ngaa dapat naton ton-an karon ang pagkabunayag? (b) Ngaa nagabatyag kita sing kalig-onan sa makita nga organisasyon sang Dios?

¹¹ Sanglit “nagapuyo ang pagkamatarong” sa ginsaad sang Dios nga “bag-ong duta,” “ang mga pumuluyo sang mapatubason nga duta magatuon sing pagkamatarong.” (2 Pedro 3:13; Isaias 26:9) Amo kon ngaa ang madasig nagadamo nga palaabuton nga banwahanon sang Paraiso nga duta ‘ginatudloan [karon] sang dalanon ni Jehova,’ lakip ang pagkabunayag. (Isaias 2:3, 4) Gani, ang Pulong sang Dios nagalaygay sa aton: “Dili kamo magbinutigay. Ubaha ninyo ang daan nga personalidad upod ang mga buhat sini.” (Colosas 3:9) Ini man nagasiling: “Ang nagpangawat dili na magpangawat, kundi hinonoo magpangabudlay sia, nga nagabuhat sa iya mga kamut sang butang nga maayo, agod nga may ikahatag sia sa mga nawad-an.”—Efeso 4:28.

¹² Gani ang mga alagad ni Jehova dapat mangin bunayag sa tanan nga butang. Sanglit amo sina ang himuon sang tanan nga mangin yara sa bag-ong sistema, dapat nga amo sini ang dalanon sang katawhan sang Dios karon. Kag makalilipay gid ang makig-upod sa pungsodnon nga katilingban sang minilyon ka tawo nga nagapalambo sang pagkabunayag! Daw ano kalig-on ang batyagon naton sa sining espirituwal nga paraiso nga patubas sang gamhanan nga balaan nga espiritu sang Dios, “nga nahatag sang Dios sa mga nagatuman sa iya subong gumalahom.” (Binuhatan 5:32) Ipaanggid ina sa malain nga espiritu nga yari sa sining kalibutan sa idalom sang “dios sining sistema sang mga butang,” si Satanas nga Yawa.—2 Corinto 4:4; Galacia 5:19-24.

Ang Pagkabunayag nga Natalupangdan sang Iban

13, 14. Ano ang komento sang iban nahanungod sa pagkabunayag sang katawhan ni Jehova?

¹³ Ang pagkabunayag sang katawhan sang Dios masami natalupangdan sang iban. Halimbawa, ang Italyano nga pamantalaan Il Piccolo nagbalhag sang isa ka sulat gikan sa isa niya ka bumalasa nga nagsiling: “Ginapasalamatan ko ang babayi nga nagpakilala sang iya kaugalingon nga Saksi ni Jehova kag nagpakita sing pamatuod sang huaran nga pagkabunayag paagi sa pag-uli sa akon, paagi sa sining pamantalaan, sang dakudaku nga kantidad sang kuwarta nga nadula ko.” Sa Estados Unidos, ang The Indianapolis Star nagsulat nahanungod sa isa ka mag-asawa nga Saksi nga nakakita sing $4,000 kag nag-uli sini sa tag-iya. Ang pamantalaan nagsiling nga ang mag-asawa “wala magpangduhaduha kon ano ang ila himuon.” Ngaa wala? Sila nagsiling: “Indi namon ini matago. Kami mga Saksi ni Jehova.”

¹⁴ Sang ang isa ka Saksi sa Missouri nakakita sing $9,500 kag nag-uli sini sa polis, ginkutlo sang pamantalaan ang isa ka polis nga nagsiling: “Malaka katama para sa isa nga makakita sina kadaku nga kuwarta kag iuli ini. Wala gid kami sing nadumduman nga bisan sin-o nga naghimo sina anay. Makatilingala gid.” Ang artikulo nagsambit nga ang Saksi “wala gid maghunahuna nga taguon ang kuwarta.” Ang polis nga natungdan nagsiling nga ang Saksi “nagpasag-uli sang iya pagtuo nga may pila pa gihapon ka bunayag nga tawo sa tunga sang katawhan.” Ang Saksi nagsabat: “Ginapabugal namon ang amon kaugalingon nga bunayag sa tanan nga butang.”

15, 16. Ano nga mga eksperiensia ang nagapakita nga bisan sa magagmay nga mga butang ang pagkabunayag matalupangdan sang iban?

¹⁵ Indi lamang sa dalagku nga mga butang nga dapat kita mangin bunayag. Ang pagkabunayag kinahanglanon sa magagmay man nga mga butang. (Lucas 16:10) Halimbawa, sang ang isa ka panimalay nga Saksi nagdayon sa isa ka otel sa Florida, nadala sing indi hungod sang ila anak nga lalaki ang ponda, nasal-an ini nga iya kamiseta. Gin-uli ini sang pamilya sa otel paagi sa koreo, kag ang manedyer sang otel nagsulat: “Ginapasalamatan gid namon kamo tungod sang inyo pagkabunayag. Bisan pa nga ang pag-uli sang amon ponda ayhan amo ang kinaandan nga ginahimo ninyo adlaw-adlaw, para sa amon butang ini nga dalayawon.” Sing kaanggid, sang nadala sing dihungod sang isa ka mag-asawa nga Saksi ang ball pen halin sa isa ka otel sa Georgia kag nian gin-uli ini, ang manedyer nagsulat: “Ginapasalamatan ko kamo bangod sang paghinguyang sing tion nga mauli ang ball pen nga nadala ninyo sing dihungod. Makapapagsik gid ang makabaton sing sulat kaangay sang ginpadala ninyo gikan sa bunayag kag nagaulikid nga mga tawo!”

¹⁶ Ang isa ka Saksi nga bata nga lalaki nga yara sa ikalima nga grado naghampang sing base­ball sa eskwelahan. Halos patas ang hampang, apang nahibal-an niya nga “out” sia. Ang iya mga kaupod nagsiling nga nakainang sia. Apang ang isa ka miembro sang kontra nga team nagsiling nga may isa lamang ka sigurado nga paagi nga mahibal-an ang kamatuoran. Nagsiling sia: “Pamangkota sia kon out sia ukon indi. Isa sia ka Saksi, kag ang mga Saksi wala nagabutig.” Ang maayo nga paggawi sang bata sa adlaw-adlaw natalupangdan sang iban. Sa pagkamatuod, paagi sa pagkabuhi nahisuno sa mga talaksan sang Dios, bisan “gikan sa baba sang mga bata” ang pagdayaw magaabot kay Jehova.—Mateo 21:16.

17, 18. Ano ang maayong epekto sang mga prinsipio ni Jehova nahanungod sa pagkabunayag sa mga tawo nga may maayo sing tagipusuon?

¹⁷ Sa Nigeria, ang bana sang isa ka Saksi supak gid kaayo nga magkadto ang iya asawa sa sirkito nga asambleya. Gani ginsundan niya sia didto kag nagtinguha sa pagtuga sing gamo. Sang matapos ang sesyon, ang bana nagsiling: “Karon tilawan ko kamo nga mga Saksi.” Sang wala sing nakakita, nagkuot sia sing kuwarta sa iya bulsa, ginmarkahan ini, ginkumos, kag ginhulog sa duta. Sang ulihi, nagsiling sia nga nadulaan sia sing kuwarta. Apang, ginsilingan sia nga indi magpalibog bangod mauli ini. Nagbalik sia sa lugar nga ginhulogan niya sang kuwarta, apang wala na ini. “Ti,” siling niya, “nadakpan ko kamo nga nagabutig!” Nian ginsilingan sia nga ang kuwarta wala na dira kag mahimo nga gindala sa Lost and ­Found Department. Ang ginmarkahan nga kuwarta ato didto matuod sa sina nga departamento kag gin-uli sa iya. Ini nga eksperiensia nagpalig-on sa iya nga usisaon kon ano ang ginapatihan sang iya asawa, kag karon isa na sia ka Saksi ni Jehova.

¹⁸ Sa isa ka sulat nga ginpadala sa ulong talatapan sang mga Saksi ni Jehova sa Nueva York, isa ka babayi nga indi Saksi ang nagsiling nga luyag niya ipaambit ang isa ka hitabo nga natabo sa iya anak nga babayi sa eskwelahan. Isa ka adlaw ang iya anak nga babayi ginkawatan sing mahal kaayo nga kabisada sang kabayo. Duha ka tuig sang ulihi, ang anak nga babayi nakabaton sing sulat nga nagasiling: “Dear Lili, Yari ang imo kabisada nga ginkawat sa imo sang nagligad nga duha ka tuig. Ako ang nagkuha sini, apang isa na ako karon ka Saksi ni Jehova, kag ang akon bag-o nga konsiensia indi magtugot sa akon nga taguon pa ini. Ginakasubo ko gid. Palihug patawara ako.” Huo, yadtong maluyag alagaron si Jehova dapat magpalambo sang “bunayag nga konsiensia, nga nagahandum sa pagpangabuhi sing bunayag sa tanan nga butang.”—Hebreo 13:18.

Paghupot nga Matinlo sang Organisasyon

19. (a) Kon ang Cristiano nakahimo sing dibunayag nga buhat, ano ang dapat niya himuon? (b) Kon ang iban sa tunga naton nagapadayon sa paghimo sing dibunayag nga buhat, ano ang matabo sa ila, kag ngaa?

¹⁹ Kon ang alagad sang Dios dihungod nga nakahimo sing dibunayag nga buhat, nian dapat sia mangin maabtik sa paglubad sini sa gilayon nga mahibal-an niya ukon matawag sa iya igtalupangod. Kag kon ang pila ka indibiduwal sa tunga naton nadulaan sing apresasyon sa mga prinsipio sang Biblia kag magapadayon sa paghimo sing dibunayag nga mga buhat, indi sila pagpahanugotan nga malatnan ang katawhan sang Dios. Dapat sila i-dis­fellow­ship. (1 Corinto 5:11-13) Makasalig kita sa langitnon nga bulig, kay si Jesus nagtagna: “Magapadala ang Anak sang tawo sang iya mga anghel, kag kuhaon nila sa iya ginharian ang tanan nga butang nga nagapasandad kag ang nagahimo sing kalautan . . . Nian ang mga matarong magasidlak subong sang adlaw sa ginharian sang ila Amay.”—Mateo 13:41-43.

20, 21. (a) Ngaa masinaligon naton nga maagda ang mga mahagop sa pagsimba kay Jehova upod sa aton? (b) Ano nga bahin sang pagkabunayag ang pagahinun-anonan sa masunod nga artikulo?

²⁰ Sa amo, ang organisasyon ni Jehova ginahuptan nga matinlo. Subong resulta, ini ‘nagasidlak’ subong suga sa bunayag sing tagipusuon nga mga tawo. Amo kon ngaa masinaligon kita nga makasiling sa mga mahagop sang duta: “Kari kamo, kag magtukad kita sang bukid ni Jehova [ang mataas nga duog ukon kahimtangan sang matuod nga pagsimba] . . . kag tudloan kita niya sang iya mga dalanon, kag magalakat kita sa iya mga banas.”—Miqueas 4:2.

²¹ Sanglit ang mga alagad ni Jehova dapat mangin bunayag sa tanan nga butang, siempre pa, ini magalakip sang ila mga transaksion sa negosyo upod sa iban nga mga Saksi. Nagautwas man diri ang mga hangkat sa pagkabunayag. Ano ang iban sini? Paano naton ini atubangon? Ang masunod nga artikulo magahinun-anon sini nga bahin sang pagkabunayag.

Mga Pamangkot nga Repasuhon

◻ Ano ang natabo sa pagkabunayag sa tion naton? Ngaa?

◻ Ano ang ginasiling sang Pulong sang Dios tuhoy sa pagkakinahanglanon sang pagkabunayag?

◻ Ngaa dapat naton palambuon ang pagkabunayag bisan sa wala pa ang bag-ong sistema?

◻ Ano nga mga eksperiensia ang nagapakita sang balor sang pagkabunayag?

◻ Ano ang pasalig nga ang pagkabunayag pagahuptan sa tunga naton?

[Laragway sa pahina 13]

Karon mismo, ang palaabuton nga mga banwahanon sang bag-ong sistema sang Dios ginatudloan sang dalanon sang pagkabunayag ni Jehova