Kapitulo 21

Adlaw sang Paghukom kag sa Tapos Sini

1. Ano ang kinaandan nga pagpati sa Adlaw sang Paghukom?

ANO NGA LARAGWAY ang ginapahanumdom sa imo sang Adlaw sang Paghukom? Ginahanduraw sang iban ang isa ka daku nga trono, kag sa atubangan sini may malaba nga linya sang mga tawo nga ginbanhaw. Samtang nagalabay ang tagsa ka tawo sa atubangan sang trono, ginahukman sia suno sa nagligad nga binuhatan, nga nasulat tanan sa libro sang Hukom. Pasad sa iya mga binuhatan, ang tawo ginapadala sa langit ukon sa kalayuhon nga impierno.

2. (a) Sin-o ang naghimus para sa Adlaw sang Paghukom? (b) Sin-o ang iya gintangdo subong hukom?

² Apang tuhay nga laragway sang Adlaw sang Paghukom ang ginahatag sang Biblia. Indi ini isa ka adlaw nga kahadlokan. Talupangda ang ginasiling sang Biblia tuhoy sa Dios: “Nagtalana sia sing isa ka adlaw nga hukman niya ang napuy-an nga duta sa pagkamatarong paagi sa tawo nga iya gintangdo.” (Binuhatan 17:​31) Sa pagkamatuod, ining hukom nga gintangdo sang Dios amo si Jesucristo.

3. (a) Ngaa mapat-od naton nga si Cristo mangin makatarunganon sa iya paghukom? (b) Sa anong sadsaran pagahukman ang mga tawo?

³ Mapat-od naton nga si Jesus mangin makatarunganon sa iya paghukom. Ang tagna tuhoy sa iya sa Isaias 11:​3, 4 nagapasalig sa aton sini. Gani, supak sa kinaandan nga opinyon, indi niya paghukman ang mga tawo suno sa ila nagligad nga mga sala, nga ang madamu sini ginhimu sa pagkaignorante. Ginapaathag sang Biblia nga sa pagkapatay ang tawo ginahilway sa tanan nga sala nga iya nahimu. Ini nagasiling: “Ang napatay nahilway sa sala.” (Roma 6:7) Nagakahulugan ini nga kon banhawon ang isa ka tawo pagahukman sia suno sa iya himuon sa tion sang Adlaw sang Paghukom, indi suno sa iya nahimu anay sa wala pa sia mapatay.

4. (a) Daw ano kadugay ang Adlaw sang Paghukom? (b) Sin-o ang mangin mga hukom kaupod ni Cristo?

⁴ Ang Adlaw sang Paghukom, kon amo, indi isa ka literal nga 24-oras nga adlaw. Maathag nga ginapakita ini sang Biblia sang nagahambal ini tuhoy sa mga magaambit kay Jesucristo sa paghukom. (1 Corinto 6:​1-3) “Nakita ko ang mga trono,” siling sang manunulat sang Biblia, “kag may nagalingkod sa ila, kag ginhatagan sila sing gahom sa paghukom.” Ining mga hukom amo ang matutom hinaplas nga mga sumulunod ni Cristo nga, suno sa ginasiling pa sang Biblia, “nabuhi sila kag naghari kaupod kay Cristo sa isa ka libo ka tuig.” Gani ang Adlaw sang Paghukom magadugay sing 1,000 ka tuig. Amo man ini ang 1,000-ka tuig nga tion nga si Cristo kag ang iya 144,000 ka matutom hinaplas nga mga sumulunod magagahom subong “bag-ong mga langit” sa ibabaw sang “bag-ong duta.”​—⁠Bugna 20:​4, 6; 2 Pedro 3:13.

5, 6. (a) Paano ginlaragway sang isa ka salmista sa Biblia ang Adlaw sang Paghukom? (b) Ano ang mangin kabuhi sa duta sa tion sang Adlaw sang Paghukom?

⁵ Tan-awa ining mga pahina. Nagahatag ini sing ideya kon daw ano ka dalayawon ang Adlaw sang Paghukom para sa katawhan. Ang salmista sang Biblia nagsulat tuhoy sa sinang mahimayaon nga tion: “Maghinugyaw ang latagon kag ang tanan nga yara sa iya. Nian ang tanan nga kahoy sa kagulangan magaamba sa kalipay sa atubangan ni Jehova. Kay nagkari sia; kay nagkari sia sa paghukom sang duta. Hukman niya ang mabungahon nga duta sa pagkamatarong kag ang katawhan sa iya pagkatutom.”​—⁠Salmo 96:​12, 13.

⁶ Sa Adlaw sang Paghukom himuon sang mga makalampuwas sa Armagedon ang duta nga mangin paraiso. Diri sa sining paraiso nga abiabihon ang mga patay. (Lucas 23:​43) Daw ano ang kalipay kon ang mga pamilya nga ginpain sa madugay sang kamatayon magatingob liwat! Huo, daw ano katahom ang mabuhi sa paghidait, ang makatigayon sing mapagros nga lawas kag ang magbaton sing instruksion tuhoy sa mga katuyoan sang Dios! Ang Biblia nagasiling: “Kon may mga paghukom gikan sa imo para sa duta, ang pagkamatarong amo ang maton-an sang mga pumuluyo sang mabungahon nga duta.” (Isaias 26:9) Sa tion sang Adlaw sang Paghukom ang tanan nga tawo magatuon tuhoy kay Jehova, kag hatagan sila sing kahigayunan sa pagtuman kag sa pag-alagad sa iya.

7. Sa tion sang Adlaw sang Paghukom, ano ang matabo sa mga magapili sa pag-alagad sa Dios kag sa mga magadumili sa paghimu sini?

⁷ Sa idalom sang paraiso nga mga kahimtangan, hukman ni Jesucristo kag sang iya 144,000 ka kaupod nga mga hari ang katawhan. Ang mga tawo nga magapili sa pag-alagad kay Jehova magabaton sing kabuhi nga walay katapusan. Apang, bisan sa idalom sang labing maayo nga kahimtangan, ang iban magadumili sa pag-alagad sa Dios. Subong ginasiling sang Kasulatan: “Bisan pa pakitaan sing kahamuot ang malauton, indi gid sia makatuon sing pagkamatarong. Sa duta sang pagkatadlong magahikot sia sing dimakatarunganon.” (Isaias 26:​10) Gani sa tapos mahatagan sing bug-os nga kahigayunan sa pagbag-o sang ila dalanon kag sa pagtuon sing pagkamatarong, ina nga mga malauton pagalaglagon. Ang iban patyon bisan sa wala pa matapos ang Adlaw sang Paghukom. (Isaias 65:​20) Indi sila pagtugutan nga magpabilin agod gamuhon ukon higkuan ang paraiso nga duta.

8. Paano ginpakita ni Jesus nga sa tion sang Adlaw sang Paghukom mas mabudlayan ang iban sa paghimu sing pagkamatarong sang sa iban?

⁸ Mangin mabudlay bala para sa iban nga banhawon ang magtuon kag magbuhat sing pagkamatarong sang sa iban? Sang si Jesucristo yari sa duta, ginpakita niya nga mangin subong sini. Wala mamati ang kalabanan nga tawo sa pagwali niya kag sang iya mga disipulo. Ginsikway nila si Jesus subong Mesias, bisan sa tapos mabatian ang iya pagwali kag makita ang iya milagro. Sang ginpadala niya ang iya mga disipulo sa pagwali, si Jesus nagsiling tuhoy sa isa ka siudad nga nagsikway sa ila mensahe: “Sa pagkamatuod nagasiling ako sa inyo, magahaganhagan pa sa duta sang Sodoma kag Gomorra sa Adlaw sang Paghukom sang sa sadtong siudad.”​—⁠Mateo 10:15.

9, 10. (a) Sin-o nga dimatarong nga mga tawo ang banhawon sa tion sang Adlaw sang Paghukom? (b) Ngaa mas mabudlayan ang iban nga mga dimatarong sang sa iban nga mga dimatarong?

⁹ Sa pagsiling sini, ginpakita ni Jesus nga ang pila sa dimatarong nga mga taga-Sodoma kag Gomorra mangin didto sa duta sa Adlaw sang Paghukom. Bisan pa nangin tuman sa ila ka imoral, mapaabot naton nga ang iban sa ila banhawon. (Genesis 19:​1-26) Bangod sang kaluoy ni Jehova, banhawon niya sila agod mahatagan sing kahigayunan sa pagtuon sang iya mga katuyoan. Apang ginpakita man sang mga pulong ni Jesus nga ang iban sa mga dimatarong nga ginwalihan niya kag sang iya mga disipulo mangin didto sa Adlaw sang Paghukom. Banhawon man sila kag hatagan sing kahigayunan sa pagtuon sang mga katuyoan sang Dios. Sin-o ang mabudlayan sa pagbaton kay Cristo subong hari sa sadtong tion? Ang mga taga-Sodoma bala anay ukon ang mga nagsikway sa pagbantala ni Jesus kag sang iya mga disipulo?

¹⁰ Mas mabudlayan ang mga tawo nga personal nga nagsikway kay Jesus. Tuhoy sa Capernaum, isa sang mga siudad nga sa diin naghimu sia sing mga milagro, si Jesus nagsiling: “Kay kon sa Sodoma nahimu ang mga buhat nga gamhanan nga ginhimu sa imo, nabilin kuntani sia tubtob karon nga adlaw. Busa nagasiling ako sa inyo, Magahaganhagan pa sa duta sang Sodoma sa Adlaw sang Paghukom sang sa imo.” (Mateo 11:​22-24) Huo, sa Adlaw sang Paghukom mas mabudlayan ang mga taga-Capernaum sa pagbaton sa ila mga sala kag dayon batunon kag alagdon si Cristo subong hari sang sa mga taga-Sodoma anay nga magtuon sing pagkamatarong.

11. Ngaa mangin mas mahapos sa Adlaw sang Paghukom para sa mga “matarong” sang sa mga “dimatarong”?

¹¹ Gani mas mahapos para sa pila ka “dimatarong” nga banhawon ang magtuon nahanungod sa Dios kag alagdon sia sang sa iban nga mga “dimatarong.” (Mateo 12:​41, 42) Apang, kamusta ang mga “matarong” nga banhawon​—⁠ang mga tawo subong nanday Abraham, Isaac, Job, Debora, Rut, Daniel kag iban pa? Sa wala pa sila mapatay ginpaabot nila tanan ang pagkari sang Mesias. Malipay gid sila sa tion sang Adlaw sang Paghukom nga makilala sia, kag mahibaloan nga nagagahom na sia sa langit! Gani mas mahapos para sa sining “matarong” nga mga tawo ang magbuhat sing pagkamatarong sa sadtong tion sang sa bisan sin-o nga “dimatarong.”​—⁠Binuhatan 24:15.

MGA PAGKABANHAW SA “KABUHI” KAG SA “PAGHUKOM”

12. Suno sa Juan 5:​28-30, sin-o ang magabaton sing “pagkabanhaw sa kabuhi,” kag sin-o ang magabaton sing “pagkabanhaw sa paghukom”?

¹² Sa paglaragway sang kahimtangan sa Adlaw sang Paghukom, si Jesus nagsiling: “Ang mga yara sa lulubngan magapamati sang iya tingog kag magaguwa, ang mga nakahimu sing maayo, sa pagkabanhaw sa kabuhi, kag ang mga nakahimu sing malaut, sa pagkabanhaw sa paghukom. . . . suno sa ginapamatian ko, nagahukom ako; kag ang akon paghukom matarong, bangod nga wala ako nagatinguha sang akon kaugalingon nga kabubut-on kundi sang kabubut-on sang nagpadala sa akon.” (Juan 5:​28-30) Ano ining “pagkabanhaw sa kabuhi,” kag ano ang “pagkabanhaw sa paghukom”? Kag sin-o ang makabaton sini?

13. Ano ang kahulugan sang pagbaton sang isa ka tawo sing “pagkabanhaw sa kabuhi”?

¹³ Nakita naton sing maathag nga kon magguwa ang minatay gikan sa lulubngan, indi sila paghukman suno sa ila nagligad nga mga binuhatan. Sa baylo, hukman sila pasad sa ila himuon sa tion sang Adlaw sang Paghukom. Gani sang magsiling si Jesus “ang mga nakahimu sing maayo” kag “ang mga nakahimu sing malaut,” ginpatuhoyan niya ang maayo kag malaut nga mga butang nga ila himuon sa tion sang Adlaw sang Paghukom. Bangod sang maayong mga butang nga ila ginahimu, madamu sang ginbanhaw ang magauswag padulong sa pagkahimpit sa katapusan sang 1,000 ka tuig nga Adlaw sang Paghukom. Sa amo ang ila pagbalik gikan sa minatay mangin “pagkabanhaw sa kabuhi,” kag matigayon nila ang himpit nga kabuhi nga wala sing sala.

14. Ano ang kahulugan sang pagbaton sang isa ka tawo sing “pagkabanhaw sa paghukom”?

¹⁴ Sa pihak nga bahin, kamusta ‘ang mga nakahimu sing malaut ukon malain’ sa tion sang Adlaw sang Paghukom? Ang ila pagbalik gikan sa minatay mangin “pagkabanhaw sa paghukom.” Ano ang kahulugan sini? Nagakahulugan ini sing paghukom ukon pagpakamalaut sa kamatayon. Gani ining mga tawo laglagon sa tion ukon sa paghingapos sang Adlaw sang Paghukom. Ang rason amo nga naghimu sila sing malaut; matig-a sila nga nagdumili sa pagtuon kag sa paghimu sing pagkamatarong.

KON SAN-O MAGASUGOD ANG ADLAW SANG PAGHUKOM

15. Ano ang matabo sa wala pa ang Adlaw sang Paghukom?

¹⁵ Nakita ni apostol Juan sa palanan-awon kon ano ang matabo sa tapos gid sang Adlaw sang Paghukom. Sia nagsulat: “Nakita ko ang dakung trono nga maputi kag sia nga nagalingkod sa sini. Gikan sa iya atubangan ang duta kag langit nagpalagyo, . . . Kag nakita ko ang mga patay, ang dalagku kag magamay, nga nagatindog sa atubangan sang trono . . . Kag ang mga patay ginhukman.” (Bugna 20:​11, 12) Gani sa indi pa magsugod ang Adlaw sang Paghukom, ang karon nga sistema sang mga butang nga ginahuman sang “duta kag langit” magataliwan. Ang mga nagaalagad lamang sa Dios ang maluwas, samtang ang tanan nga malauton laglagon sa Armagedon.​—⁠1 Juan 2:17.

16. (a) Sin-o pa luwas sa mga patay ang pagahukman sa tion sang Adlaw sang Paghukom? (b) Suno sa ano sila pagahukman?

¹⁶ Sa amo, indi lamang ang ginbanhaw nga mga “patay” ang pagahukman sa Adlaw sang Paghukom. Pagahukman man ang mga “buhi” nga makalampuwas sa Armagedon, pati ang ila mga anak. (2 Timoteo 4:1) Nakita ni Juan sa iya palanan-awon kon paano sila ginahukman. “Kag ang mga linukot ginbukad,” sulat niya. “Kag ang mga patay ginhukman suno sa mga butang nga nasulat sa mga linukot suno sa ila binuhatan. Kag ginhatag sang dagat ang mga patay nga yara sa iya, kag ginhatag sang kamatayon kag Hades ang mga patay nga yara sa ila, kag ginhukman ang tagsa ka tawo suno sa iya binuhatan.”​—⁠Bugna 20:​12, 13.

17. Ano ang “mga linukot” nga gikan sa amo pagahukman ang “mga buhi” kag “mga patay”?

¹⁷ Ano ang “mga linukot” nga ginbuksan kag gikan sa sini ginhukman “ang mga patay” kag “ang mga buhi”? Maathag nga dugang ini sa aton karon Balaan nga Biblia. Mga inspirado nga sinulatan ini ukon mga tolon-an nga nagaunod sang kasugoan kag mga instruksion ni Jehova. Paagi sa pagbasa sini mahibaloan sang tanan nga katawhan sang duta ang kabubut-on sang Dios. Nian, pasad sa kasugoan kag mga instruksion sa sining “mga linukot” ang tanan sa duta pagahukman. Ang mga nagatuman sa mga butang nga nasulat sa sini magabenepisyo sa halad nga gawad ni Cristo, kag sila amat-amat nga mangin himpit.

18. (a) Ano ang mangin kahimtangan sa katapusan sang Adlaw sang Paghukom? (b) Sa anong paagi ang “mga patay” mabuhi liwat sa katapusan sang 1,000 ka tuig?

¹⁸ Sa katapusan sang 1,000 ka tuig nga Adlaw sang Paghukom wala na sing isa sa duta ang mapatay bangod sa sala ni Adan. Sa pagkamatuod, ang tanan mangin buhi sa bug-os nga kahulugan sini. Amo ini ang ginapatuhoyan sang Biblia nga nagasiling: “Ang nabilin nga mga patay [luwas sa 144,000 nga magakadto sa langit] wala mabuhi liwat tubtob nga matapos ang isa ka libo ka tuig.” (Bugna 20:5) Ang pagpatuhoy diri sa “nabilin nga mga patay” wala nagakahulugan nga ang iban banhawon sa katapusan sang 1,000 ka tuig nga Adlaw sang Paghukom. Sa baylo, nagakahulugan ini nga ang tanan nga tawo mabuhi bangod nalab-ot na nila sa ulihi ang kahimpitan. Mangin himpit sila subong anay nanday Adan kag Eva sa katamnan sang Eden. Ano dayon ang matabo?

SA TAPOS SANG ADLAW SANG PAGHUKOM

19. Ano ang himuon ni Cristo sa katapusan sang Adlaw sang Paghukom?

¹⁹ Bangod natapos na ang tanan nga ginpahimu sa iya sang Dios, ‘itugyan [ni Jesucristo] ang ginharian sa iya Dios kag Amay.’ Sa katapusan ini sang 1,000 ka tuig nga Adlaw sang Paghukom. Sa sadtong tion ang tanan nga kaaway nalaglag na. Ang katapusan sini amo ang kamatayon nga napanubli kay Adan. Laglagon ini! Nian ang Ginharian mangin iya ni Jehova nga Dios. Sia ang talangkod nga magagahom sa sini subong Hari.​—⁠1 Corinto 15:​24-28.

20. (a) Ano ang himuon ni Jehova sa pagpat-od kon kay sin-o mga ngalan ang isulat sa “tolon-an sang kabuhi”? (b) Ngaa nagakabagay ang katapusan nga pagtilaw sa katawhan?

²⁰ Paano mamat-od si Jehova kon kay sin-o ngalan ang isulat sa “linukot sang kabuhi,” ukon sa “tolon-an sang kabuhi”? (Bugna 20:​12, 15) Paagi sa pagtilaw sa katawhan. Dumduma kon paano napaslawan sanday Adan kag Eva sa amo nga pagtilaw, kag kon paano si Job, sang gintilawan, nagpabilin nga malig-on. Apang ang pagtuo sang kalabanan nga tawo nga mabuhi tubtob sa katapusan sang 1,000 ka tuig wala pa matilawi. Sa wala pa sila mabanhaw wala sila sing ihibalo sa mga katuyoan ni Jehova. Bahin sila sang malauton nga sistema sang mga butang ni Satanas; “dimatarong” sila. Nian, sa tapos sila mabanhaw, nangin mahapos para sa ila ang mag-alagad kay Jehova bangod nagapuyo sila sa Paraiso nga wala sing pagpamatok sang Yawa. Apang magaalagad pa ayhan kay Jehova ining binilyon ka mga tawo nga himpit na sa sadtong tion, kon hatagan si Satanas sing kahigayunan sa pag-upang sa ila? Mahimu ayhan ni Satanas sa ila ang nahimu niya sa himpit nga si Adan kag si Eva?

21. (a) Paano tilawan ni Jehova ang katawhan? (b) Kon matapos na ang pagtilaw, ano ang matabo sa tanan nga nadalahig?

²¹ Agod malubad ina nga mga pamangkot, buhian ni Jehova si Satanas kag ang iya mga demonyo gikan sa kadadalman nga sa diin nabilanggo sila sa 1,000 ka tuig. Ano ang resulta? Ginapakita sang Biblia nga si Satanas magamadinalag-on sa pagpatalikod sa pila ka mga tawo gikan sa pag-alagad kay Jehova. Mangin subong sila sa “balas sang dagat,” nga buot silingon indi mapat-od ang ila kadamuon. Sa tapos sining pagtilaw, si Satanas kag ang iya mga demonyo, kag ang mga napaslawan man sa pagtilaw, itagbong sa simbuliko nga “linaw nga kalayo,” nga amo ang ikaduha (dayon) nga kamatayon. (Bugna 20:​7-10, 15) Apang ang mga tawo nga ang ila mga ngalan masapwan nga nasulat sa “tolon-an sang kabuhi” magapabilin sa mahimayaon nga dutan-on nga paraiso. Ang pagkanasulat sang ila mga ngalan sa “tolon-an sang kabuhi” nagakahulugan nga sila nahukman ni Jehova nga himpit nga matarong sa tagipusuon, hunahuna kag lawas kag sa amo takus mabuhi sing dayon sa paraiso sa duta.

ANG ADLAW SANG PAGHUKOM SA KARON

22. Agod mabuhi tubtob sa Adlaw sang Paghukom kag sa katapusan nga pagtilaw sa katawhan, sa ano kita dapat makalampuwas karon?

²² Gani ginasambit sang Biblia ang mga matabo sa sulod sang palaabuton nga 1,000 ka tuig. Kag ginapakita sini nga wala sing dapat kahadlokan sa palaabuton. Apang ang pamangkot amo: Mangin didto ka ayhan sa pag-agom sa maayong mga butang nga ginaaman ni Jehova nga Dios? Nasandig ini sa kon bala makalampuwas ka sa nauna nga adlaw sang paghukom, nga amo, ang karon nga “adlaw sang paghukom kag kalaglagan sang mga tawo nga didiosnon.”​—⁠2 Pedro 3:7.

23. (a) Sa anong duha ka klase ginapain karon ang mga tawo? (b) Ano ang matabo sa tagsa ka klase, kag ngaa?

²³ Huo, sugod sang pagbalik ni Cristo kag paglingkod niya sa langitnon nga trono, ang tanan nga katawhan ginahukman na. Ining karon nga “adlaw sang paghukom” nauna sa 1,000 ka tuig nga Adlaw sang Paghukom. Sa tion sang karon nga paghukom ang katawhan ginapain subong “mga kanding” sa wala nga kamut ni Cristo ukon subong “mga karnero” sa tuohan niya. Ang “mga kanding” pagalaglagon bangod wala nila pagbuligi ang hinaplas nga “mga utod” ni Cristo sa ila pag-alagad sa Dios. Sa ulihi, ipakita sining “mga kanding” nga sila dimahinulsulon nga mga makasasala, malaut kag batinggilan na sa ila kalautan. Ang “mga karnero,” sa pihak nga bahin, pakamaayuhon sing kabuhi sa idalom sang paggahom sang Ginharian bangod ginsakdag nila ang “mga utod” ni Cristo sa tanan nga paagi.​—⁠Mateo 25:​31-46.

[Mga piktyur sa pahina 178]

Sin-o ang mas mabudlayan sa Adlaw sang Paghukom? Ang mga tawo nga nakabati kay Jesus ukon ang mga ginlaglag sa Sodoma kag Gomorra