Kapitulo 41

Adlaw Sang Paghukom Sang Dios​—Ang Makalilipay nga Resulta Sini!

Palanan-awon 15​—Bugna 20:11–21:8

Tema: Ang kabilugan nga pagkabanhaw, Adlaw sang Paghukom, kag ang mga pagpakamaayo sang bag-ong langit kag bag-ong duta

Tion sang katumanan: Ang Isa ka Libo ka Tuig nga Paggahom

 1. (a) Ano ang nadula sang katawhan sang magpakasala si Adan kag si Eva? (b) Ano nga katuyuan sang Dios ang wala magbag-o, kag paano naton nahibaluan?

SUBONG mga tawo, gintuga kita agod mabuhi sing dayon. Kon gintuman lamang ni Adan kag ni Eva ang mga sugo sang Dios, wala sila kuntani napatay. (Genesis 1:28; 2:8, 16, 17; Manugwali 3:10, 11) Apang sang makasala sila, nadula nila ang kahimpitan kag kabuhi para sa ila kaugalingon kag para sa ila mga anak, kag naghari ang kamatayon sa katawhan subong isa ka mapintas nga kaaway. (Roma 5:12, 14; 1 Corinto 15:26) Apang, wala gihapon magbag-o ang katuyuan sang Dios nga ang himpit nga mga tawo magkabuhi sing dayon sa isa ka paraiso nga duta. Bangod sang iya daku nga gugma sa katawhan, ginpadala niya sa duta ang iya bugtong nga Anak nga si Jesus, nga naghatag sang iya himpit nga tawhanon nga kabuhi subong gawad para sa “madamo” sang mga anak ni Adan. (Mateo 20:28; Juan 3:16) Magamit na karon ni Jesus ining legal nga balor sang iya halad agod ipasag-uli ang nagatuo nga katawhan sa himpit nga kabuhi sa isa ka paraiso nga duta. (1 Pedro 3:18; 1 Juan 2:2) Daku gid ini nga rason nga ‘magkalipay kag magkasadya’ ang katawhan!—Isaias 25:8, 9.

 2. Ano ang ginasugid ni Juan sa Bugna 20:11, kag ano ang “daku kag puti nga trono”?

² Kon mabilanggo na si Satanas sa kadadalman, magasugod ang makalilipay nga Isa ka Libo ka Tuig nga Paggahom ni Jesus. Amo na ini ang “adlaw” nga ang Dios ‘nagatuyo nga hukman ang napuy-an nga duta sa pagkamatarong paagi sa isa ka tawo nga gintangdo niya.’ (Binuhatan 17:31; 2 Pedro 3:8) Nagsiling si Juan: “Kag nakita ko ang daku kag puti nga trono kag ang isa nga nagalingkod sa sini. Ang duta kag langit nagpalagyo gikan sa iya atubangan, kag wala na sing makita nga duog para sa ila.” (Bugna 20:11) Ano ining “daku kag puti nga trono”? Wala ini sing liwan kundi ang lingkuranan sang paghukom sang “Dios nga Hukom sang tanan.” (Hebreo 12:23) Hukman niya karon kon sin-o sa katawhan ang makabenepisyo gikan sa halad nga gawad ni Jesus.—Marcos 10:45.

 3. (a) Ano ang ginapakita sang katunayan nga ang trono sang Dios ginasiling nga “daku” kag “puti”? (b) Sin-o ang magahukom sa Adlaw sang Paghukom, kag ano ang basehan?

³ Ang trono sang Dios “daku,” nga nagapadaku sang pagkadalayawon ni Jehova subong Soberano nga Ginuo, kag “puti” ini, nga nagapatalupangod sang iya himpit nga pagkamatarong. Sia ang katapusan nga Hukom sang katawhan. (Salmo 19:7-11; Isaias 33:22; 51:5, 8) Apang, gintugyan niya ang paghukom kay Jesucristo: “Ang Amay wala gid sing ginahukman, kundi gintugyan niya sa Anak ang tanan nga paghukom.” (Juan 5:22) Kaupod ni Jesus ang 144,000 , nga ginhatagan man ‘sing gahom sa paghukom . . . sa sulod sang isa ka libo ka tuig.’ (Bugna 20:4) Apang, si Jehova gihapon ang magahatag sing talaksan nga mangin basehan kon ano ang matabo sa tagsa ka indibiduwal sa tion sang Adlaw sang Paghukom.

 4. Ano ang buot silingon nga “ang duta kag langit nagpalagyo”?

⁴ Paano nga “ang duta kag langit nagpalagyo”? Amo man ini ang langit nga nagtaliwan subong sang isa ka linukot sang ginhukas ang ikan-om nga pat-in—ang nagagahom nga mga tawo nga “ginatigana sa kalayo kag ginatipigan para sa adlaw sang paghukom kag sang kalaglagan sang mga tawo nga di-diosnon.” (Bugna 6:14; 2 Pedro 3:7) Ang duta amo ang organisado nga sistema sang mga butang sa idalom sini nga paggahom. (Bugna 8:7) Ang kalaglagan sang sapat nga mapintas kag sang mga hari sang duta kag sang ila mga kasuldadusan, upod sa mga nakabaton sang marka sang sapat nga mapintas kag sa mga nagasimba sa larawan sini, amo ang palatandaan sang pagpalagyo sini nga langit kag duta. (Bugna 19:19-21) Sa tapos malaglag ang duta kag langit ni Satanas, isa naman ka Adlaw sang Paghukom ang ipatuman sang Daku nga Hukom.

Ang Isa ka Libo ka Tuig nga Adlaw Sang Paghukom

 5. Sin-o ang mabilin nga hukman kon makapalagyo na ang daan nga duta kag daan nga langit?

⁵ Sin-o ang mabilin nga hukman kon makapalagyo na ang daan nga duta kag daan nga langit? Indi ang hinaplas nga nagkalabilin sang 144,000, kay nahukman na sila kag napat-inan. Kon may hinaplas nga buhi pa sa duta sa tapos sang Armagedon, mahimo gid nga indi madugay sa tapos sini, mapatay sila agod batunon ang ila langitnon nga padya paagi sa pagkabanhaw. (1 Pedro 4:17; Bugna 7:2-4) Apang, ang minilyon sang dakung kadam-an nga naggua karon gikan sa dakung kapipit-an kitaon nga nagatindog “sa atubangan sang trono.” Ginkabig na sila nga matarong para sa kaluwasan bangod sang ila pagtuo sa ginpaagay nga dugo ni Jesus, apang ang paghukom sa ila magapadayon pa tubtob sa isa ka libo ka tuig samtang padayon nga ginatuytuyan sila ni Jesus padulong sa “mga tuburan sang tubig sang kabuhi.” Nian, kon mapasag-uli na sila sa tawhanon nga pagkahimpit kag pagkatapos sini makapasar sa pagtilaw, ideklarar sila nga bug-os nga matarong. (Bugna 7:9, 10, 14, 17) Ang mga kabataan nga maluwas sa dakung kapipit-an kag ang mga anak nga matawo sa dakung kadam-an sa tion sang Milenyo dapat man hukman sa tion sang isa ka libo ka tuig.—Ipaanggid ang Genesis 1:28; 9:7; 1 Corinto 7:14.

 6. (a) Ano nga panong ang nakita ni Juan, kag ano ang ginapakita sang mga tinaga nga “mga kadalagkuan kag mga kubos”? (b) Paano ang indi maisip nga minilyon sa memorya sang Dios walay duhaduha nga banhawon?

⁶ Apang, may nakita si Juan nga isa ka panong nga mas madamo sa naluwas nga dakung kadam-an. Binilyon ang kadamuon nila! “Kag nakita ko ang mga patay, ang mga kadalagkuan kag mga kubos, nga nagatindog sa atubangan sang trono, kag ginbukad ang mga linukot.” (Bugna 20:12a) “Ang mga kadalagkuan kag mga kubos” nagalakip sa prominente kag indi prominente nga mga tawo nga nabuhi anay kag napatay sa duta sa tion sang nagligad nga 6,000 ka tuig. Sa Ebanghelyo nga ginsulat ni apostol Juan wala madugay pagkatapos sang Bugna, nagsiling si Jesus tuhoy sa Amay: “Ginhatagan niya sia [Jesus] sing awtoridad sa paghukom, bangod sia ang Anak sang tawo. Indi kamo matingala sa sini, bangod magaabot ang tion nga ang tanan nga yara sa handumanan nga mga lulubngan makabati sang iya tingog kag magagua.” (Juan 5:27-29) Daku gid ini nga proyekto—banhawon ang mga napatay sa bug-os nga maragtas! Walay duhaduha nga ang di-maisip nga minilyon nga yara sa memorya sang Dios banhawon sing amat-amat agod nga ang dakung kadam-an—nga diutay gid kon ipaanggid—makasarang sa pag-atubang sa mga problema nga mahimo mag-utwas kay mahimo nga ang mga banhawon magasunod pa sa primero sa ila daan nga estilo sang pagkabuhi, upod ang undanon nga mga kaluyahon kag mga panimuot sini.

Sin-o ang Banhawon kag Hukman?

7, 8. (a) Ano nga linukot ang ginbukad, kag ano ang natabo sa tapos sini? (b) Sin-o ang indi na pagbanhawon?

⁷ Nagdugang pa si Juan: “Apang isa pa ka linukot ang ginbukad; amo ini ang linukot sang kabuhi. Kag ang mga patay ginhukman pasad sa mga butang nga nasulat sa mga linukot suno sa ila mga buhat. Kag ginhatag sang dagat ang mga patay nga yara sa sini, kag ginhatag sang kamatayon kag Hades ang mga patay nga yara sa sini, kag ginhukman ang tagsatagsa sa ila suno sa ila mga buhat.” (Bugna 20:12b, 13) Makatilingala gid nga talan-awon! ‘Ang dagat, kamatayon, kag Hades’ may iya bahin, apang talupangda nga indi magkatuhay ini nga mga termino.a Si Jonas, sang yara sia sa sulod sang tiyan sang isda kag busa yara sa alibutod sang dagat, nagsiling nga yara sia sa Sheol, ukon Hades. (Jonas 2:2) Kon ang isa ka tawo ginahugakom sang Adamiko nga kamatayon, mahimo gid nga yara man sia sa Hades. Nagapasalig gid ining matagnaon nga mga pulong nga wala sing bisan sin-o nga malipatan.

⁸ Sa pagkamatuod, may yara indi mahibal-an nga kadamuon sang mga patay nga indi pagbanhawon. Lakip sa sini amo ang di-mahinulsulon nga mga escriba kag mga Fariseo nga nagsikway kay Jesus kag sa mga apostoles, ang relihioso nga “tawo nga malinapason,” kag ang hinaplas nga mga Cristiano “nga nagbiya.” (2 Tesalonica 2:3; Hebreo 6:4-6; Mateo 23:29-33) May ginhambal man si Jesus tuhoy sa katulad-kanding nga mga tawo sa katapusan sang kalibutan nga magakadto sa “kalayo nga walay katapusan nga gin-aman sa Yawa kag sa iya mga anghel,” nga amo ang, “kamatayon nga walay katapusan.” (Mateo 25:41, 46) Indi sila pagbanhawon!

 9. Paano ginpakita ni apostol Pablo nga ang iban hatagan sing pinasahi nga pabor sa pagkabanhaw, kag sin-o ang nalakip sa sini?

⁹ Sa pihak nga bahin, ang iban makabaton sing pinasahi nga pabor sa pagkabanhaw. Ginpakita ini ni apostol Pablo sang magsiling sia: “May paglaum ako sa Dios . . . nga may pagkabanhaw sang mga matarong kag mga di-matarong.” (Binuhatan 24:15) Tuhoy sa dutan-on nga pagkabanhaw, ang “mga matarong” magalakip sa matutom nga mga lalaki kag mga babayi sang dumaan nga panahon—sanday Abraham, Rahab, kag madamo pa—nga ginkabig nga matarong subong mga abyan sang Dios. (Santiago 2:21, 23, 25) Malakip man sa sini nga grupo ang matarong nga iban nga mga karnero nga napatay nga matutom kay Jehova sa moderno nga mga tion. Mahimo gid nga ini sila tanan nga nagtipig sang ila integridad amo ang unahon nga banhawon sa pagsugod sang Isa ka Libo ka Tuig nga Paggahom ni Jesus. (Job 14:13-15; 27:5; Daniel 12:13; Hebreo 11:35, 39, 40) Walay duhaduha nga madamo sining banhawon nga mga matutom ang hatagan sing pinasahi nga mga pribilehiyo nga magdumala sa daku nga hilikuton nga amo ang pagpasag-uli sang Paraiso.—Salmo 45:16; ipaanggid ang Isaias 32:1, 16-18; 61:5; 65:21-23.

10. Sa mga banhawon, sin-o ang “mga di-matarong”?

¹⁰ Apang, sin-o ang “mga di-matarong” nga ginasambit sa Binuhatan 24:15? Magalakip ini sa mga tawo nga napatay sa bug-os nga maragtas, ilabi na ang mga tawo nga nabuhi anay sa “tion nga wala sing nahibaluan ang mga tawo.” (Binuhatan 17:30) Bangod sang duog nga ila natawhan ukon sang tion nga ginkabuhian nila, wala sila makatigayon sing kahigayunan nga tun-an ang pagkamatinumanon sa kabubut-on ni Jehova. Dugang pa, mahimo nga nabatian sang iban ang mensahe tuhoy sa kaluwasan apang wala sila maghulag sadto ukon napatay sila antes sila mag-uswag padulong sa dedikasyon kag pagpabawtismo. Sa pagkabanhaw, dapat pa nila pasibuon ang ila panghunahuna kag dalanon sang kabuhi kon luyag nila makabenepisyo gikan sa sini nga kahigayunan agod makatigayon sing kabuhi nga walay katapusan.

Ang Linukot Sang Kabuhi

11. (a) Ano “ang linukot sang kabuhi,” kag kay sin-o mga ngalan ang nasulat sa sini nga linukot? (b) Ngaa bukaron ang linukot sang kabuhi sa tion sang Isa ka Libo ka Tuig nga Paggahom?

¹¹ Ginsambit ni Juan “ang linukot sang kabuhi.” Isa ini ka rekord sang mga tawo nga magabaton sing kabuhi nga walay katapusan gikan kay Jehova. Ang mga ngalan sang hinaplas nga mga kauturan ni Jesus, sang dakung kadam-an, kag sang matutom nga mga tawo sang dumaan nga panahon, kaangay ni Moises, nasulat sa sini nga linukot. (Exodo 32:32, 33; Daniel 12:1; Bugna 3:5) Tubtob sa karon, wala pa sing ngalan sang bisan sin-o sa “mga di-matarong” nga banhawon ang nasulat sa linukot sang kabuhi. Gani bukaron ang linukot sang kabuhi sa tion sang Isa ka Libo ka Tuig nga Paggahom agod isulat ang mga ngalan sang iban pa nga makalipikar sa sini. Sila nga ang ila mga ngalan indi masulat sa linukot, ukon libro, sang kabuhi ‘itagbong sa linaw nga kalayo.’—Bugna 20:15; ipaanggid ang Hebreo 3:19.

12. Ano ang basehan kon bala ang ngalan sang isa ka tawo masulat sa nabukad nga linukot sang kabuhi, kag paano ang Hukom nga gintangdo ni Jehova naghatag sing huwaran?

¹² Ano, nian, ang mangin basehan kon bala ang ngalan sang isa ka tawo masulat sa nabukad nga linukot sang kabuhi sa amo nga tion? Ang mangin basehan pareho gid sang panahon ni Adan kag ni Eva: ang pagtuman kay Jehova. Subong sang ginsulat ni apostol Juan sa hinigugma nga mga masigka-Cristiano: “Ang kalibutan nagataliwan kag amo man ang kailigbon sini, apang sia nga nagahimo sang kabubut-on sang Dios nagapabilin sing dayon.” (1 Juan 2:4-7, 17) Tuhoy sa pagkamatinumanon, ang gintangdo ni Jehova nga Hukom naghatag sing huwaran: “Bisan pa anak sia [Jesus], nakatuon sia sang pagkamatinumanon gikan sa mga butang nga gin-antos niya; kag sa tapos sia mahimpit nangin kabangdanan sia sang walay katapusan nga kaluwasan sang tanan nga nagatuman sa iya.”—Hebreo 5:8, 9.

Pagbukad sa Iban Pa nga mga Linukot

13. Paano dapat ipakita sang mga binanhaw ang ila pagkamatinumanon, kag ano nga mga prinsipio ang dapat nila sundon?

¹³ Paano ipakita sining mga binanhaw ang ila pagkamatinumanon? Gintudlo mismo ni Jesus ang duha ka daku nga sugo, nga nagasiling: “Ang nahauna amo, ‘Pamatii, O Israel, si Jehova nga aton Dios isa lamang nga Jehova, kag higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna kag sa bug-os mo nga kusog.’ Ang ikaduha amo ini, ‘Higugmaa ang imo isigkatawo subong sang imo kaugalingon.’” (Marcos 12:29-31) Yara man ang nagaluntad na nga daan nga mga prinsipio ni Jehova nga dapat nila sundon, subong sang paglikaw sa pagpangawat, pagbutig, pagpatay, kag imoralidad.—1 Timoteo 1:8-11; Bugna 21:8.

14. Ano nga iban pa nga mga linukot ang bukaron, kag ano ang ginaunod sini?

¹⁴ Apang, bag-o lang masambit ni Juan ang iban pa nga mga linukot nga bukaron sa tion sang Isa ka Libo ka Tuig nga Paggahom. (Bugna 20:12) Ano ini? Nagahatag kon kaisa si Jehova sing espesipiko nga mga instruksion para sa pinasahi nga mga kahimtangan. Halimbawa, sang panahon ni Moises naghatag sia sing detalyado nga mga kasuguan nga nagkahulugan sing kabuhi para sa mga Israelinhon kon nagtuman sila. (Deuteronomio 4:40; 32:45-47) Sang nahauna nga siglo, bag-o nga mga instruksion ang ginhatag agod buligan ang mga matutom sa pagsunod sa mga prinsipio ni Jehova sa idalom sang Cristiano nga sistema sang mga butang. (Mateo 28:19, 20; Juan 13:34; 15:9, 10) Nagsugid karon si Juan nga ang mga patay ‘hukman pasad sa mga butang nga nasulat sa mga linukot suno sa ila mga buhat.’ Gani, mahimo gid nga ang pagbukad sa sini nga mga linukot magapahibalo sang detalyado nga ipatuman ni Jehova para sa katawhan sa sulod sang isa ka libo ka tuig. Paagi sa pag-aplikar sang mga regulasyon kag mga sugo nga ginaunod sini nga mga linukot, mapalawig sang matinumanon nga mga tawo ang ila mga adlaw, kag sa ulihi matigayon nila ang kabuhi nga walay katapusan.

15. Ano nga sahi sang edukasyunal nga kampanya ang kinahanglan sa tion sang pagkabanhaw, kag paano mahimo gid matabo ang pagkabanhaw?

¹⁵ Daku gid nga kampanya para sa teokratiko nga edukasyon ang kinahanglan sa sina nga tion! Sang 2005, ang mga Saksi ni Jehova sa bug-os nga kalibutan naghiwat sa promedyo, sing 6,061,534 ka pagtuon sa Biblia sa nanuhaytuhay nga mga lokasyon. Apang sa tion sang pagkabanhaw, indi maisip nga minilyon ka pagtuon, pasad sa Biblia kag sa bag-o nga mga linukot, ang pat-od nga hiwaton! Dapat mangin mga manunudlo ang tanan nga katawhan sang Dios kag dapat sila magpanikasog. Walay duhaduha nga samtang nagauswag ang mga banhawon, magapakigbahin man sila sa sining masangkad nga programa sa pagtudlo. Mahimo gid nga ang pagkabanhaw matabo sa isa ka paagi nga ang mga buhi makaagom sing kalipay sa pag-abiabi kag sa pagtudlo sa mga katapo anay sang pamilya kag sa mga abyan, nga magaabiabi man kag magatudlo sa iban pa. (Ipaanggid ang 1 Corinto 15:19-28, 58.) Ang kapin sa anom ka milyon ka Saksi ni Jehova nga aktibo sa pagpalapnag sang kamatuoran karon nagapasad sing maayo nga sadsaran para sa mga pribilehiyo nga ginalauman nila nga matigayon sa tion sang pagkabanhaw.—Isaias 50:4; 54:13.

16. (a) Kay sin-o mga ngalan ang indi pag-isulat sa linukot, ukon libro, sang kabuhi? (b) Sin-o sila nga ang ila pagkabanhaw mangin sa “kabuhi”?

¹⁶ Tuhoy sa dutan-on nga pagkabanhaw, nagsiling si Jesus nga ‘ang mga nakahimo sing maayo nga mga butang magagua sa pagkabanhaw para sa kabuhi, kag ang mga nakahimo sing malaut nga mga butang sa pagkabanhaw para sa paghukom.’ Ang “kabuhi” kag “paghukom” nagasumpakilay diri, nga nagapakita nga ang mga banhawon nga ‘magahimo sing malaut nga mga butang’ sa tapos matudluan sang inspirado nga Kasulatan kag sang mga linukot, pagahukman nga indi takus sa kabuhi. Ang ila ngalan indi masulat sa linukot, ukon libro, sang kabuhi. (Juan 5:29) Amo man sini ang matabo sa bisan sin-o nga sang una matutom apang, bangod sa pila ka rason, nagtalikod sa sulod sang Isa ka Libo ka Tuig nga Paggahom. Ang mga ngalan mahimo panason. (Exodo 32:32, 33) Sa pihak nga bahin, ang matinumanon nga nagasunod sa mga butang nga nasulat sa mga linukot magahupot sang ila mga ngalan sa nasulat nga rekord, ang linukot sang kabuhi, kag padayon nga magakabuhi. Para sa ila, ang ila pagkabanhaw mangin sa “kabuhi.”

Ang Katapusan Sang Kamatayon kag Hades

17. (a) Ano nga dalayawon nga buhat ang ginlaragway ni Juan? (b) San-o mahaw-asan ang Hades? (c) San-o ang Adamiko nga kamatayon ‘itagbong sa linaw nga kalayo’?

¹⁷ Masunod, ginlaragway ni Juan ang butang nga dalayawon gid! “Kag ang kamatayon kag Hades gintagbong sa linaw nga kalayo. Ini nagakahulugan sang ikaduha nga kamatayon, ang linaw nga kalayo. Dugang pa, ang bisan sin-o nga wala masapwan nga nasulat sa libro sang kabuhi gintagbong sa linaw nga kalayo.” (Bugna 20:14, 15) Sa katapusan sang isa ka libo ka tuig nga Adlaw sang Paghukom, ang “kamatayon kag Hades” madula na sing bug-os. Ngaa isa ka libo ka tuig ang kinahanglan? Ang Hades, ang kabilugan nga lulubngan sang tanan nga katawhan, mahaw-asan kon ang katapusan nga patay sa memorya sang Dios mabanhaw na. Apang tubtob namusingan ang mga tawo sang napanubli nga sala, ang Adamiko nga kamatayon kaupod gihapon nila. Ang tanan nga banhawon sa duta, subong man ang dakung kadam-an nga makalampuwas sa Armagedon, kinahanglan nga magtuman sa nasulat sa mga linukot tubtob maaplikar sing bug-os ang balor sang gawad ni Jesus nga dulaon sing bug-os ang balatian, pagtigulang, kag iban pa nga napanubli nga mga kaluyahon. Nian ang Adamiko nga kamatayon, upod sa Hades, ‘itagbong sa linaw nga kalayo.’ Madula na sila sing dayon!

18. (a) Paano ginalaragway ni apostol Pablo ang kadalag-an sang paggahom ni Jesus subong Hari? (b) Ano ang himuon ni Jesus sa nahimpit nga pamilya sang tawo? (c) Ano nga iban pa nga mga butang ang mahanabo sa katapusan sang isa ka libo ka tuig?

¹⁸ Sa amo, ang programa nga ginalaragway ni apostol Pablo sa iya sulat sa mga taga-Corinto matapos: “Kay kinahanglan sia [Jesus] maggahom subong hari tubtob mabutang sang Dios ang tanan nga kaaway sa idalom sang iya mga tiil. Subong katapusan nga kaaway, ang [Adamiko] nga kamatayon dulaon.” Ano dayon ang matabo? “Kon mapasakop na ang tanan nga butang sa iya, nian ang Anak mismo magapasakop man sa Isa nga nagpasakop sang tanan nga butang sa iya, agod ang Dios mangin tanan nga butang sa tanan.” Sa iban nga pulong, ‘ihatag na ni Jesus ang ginharian sa iya Dios kag Amay.’ (1 Corinto 15:24-28) Huo, sa tapos madaug ni Jesus ang Adamiko nga kamatayon paagi sa balor sang iya halad nga gawad, ihatag na niya ang nahimpit nga pamilya sang tawo sa iya Amay, nga si Jehova. Mahimo gid nga sa sini nga punto, sa katapusan sang isa ka libo ka tuig, buy-an si Satanas kag mahanabo ang katapusan nga pagtilaw agod pat-uron kon kay sin-o mga ngalan ang magapabilin sing permanente nga nasulat sa linukot sang kabuhi. “Magpanikasog kamo sing lakas” agod nga ang inyo ngalan malakip sa sini!—Lucas 13:24; Bugna 20:5.

[Nota]

[Retrato sa pahina 298]

Mahimo nga masulat man sa linukot sang kabuhi ang ngalan sang mga “di-matarong” nga binanhaw nga magatuman sa mga linukot nga bukaron sa sulod sang Isa ka Libo ka Tuig nga Paggahom