Si Jehova—Ang Aton Puluy-an

1, 2. Ano ang ginabatyag sang mga alagad sang Dios sa sining sistema sang mga butang, kag sa ano nga kahulugan may puluy-an sila?

NANAMIAN ka bala mag-istar sa kalibutan karon? Kon wala, pareho ang imo nabatyagan sa iban nga alagad ni Jehova. Sa bug-os nga kasaysayan, ang tanan nga nagahigugma gid kay Jehova nagabatyag nga mga estranghero sila ukon dumuluong sa sining sistema sang mga butang. Halimbawa, samtang nagasaylosaylo halin sa kampo pakadto sa isa ka kampo sa duta sang Canaan, ang matutom nga mga sumilimba sang Dios “dayag nga nagpahayag nga sila mga estranghero kag umalagi nga mga pumuluyo.”—Heb. 11:13.

² Ang hinaplas nga mga sumulunod sang Cristo, nga ang “pagkabanwahanon didto sa langit,” nagakabig man sang ila kaugalingon subong “mga dumuluong kag umalagi nga mga pumuluyo” sining sistema sang mga butang. (Fil. 3:20; 1 Ped. 2:11) Ang “iban nga mga karnero” sang Cristo “indi [man] bahin sang kalibutan, subong nga [si Jesus] indi bahin sang kalibutan.” (Juan 10:16; 17:16) Pero indi buot silingon nga ang katawhan sang Dios wala sing “puluy-an.” Ang matuod, naeksperiensiahan naton paagi sa mata sang pagtuo ang proteksion sang pinakamalig-on kag pinakamahigugmaon nga puluy-an. Si Moises nagsulat: “GINOO, ikaw nanginpuluy-an namon sa tanan nga kaliwatan.” (Sal. 90:1) Paano si Jehova “nanginpuluy-an” para sa iya matutom nga mga alagad sadto? Paano sia “nanginpuluy-an” para sa iya katawhan subong? Kag paano niya pamatud-an nga sia lamang ang malig-on nga puluy-an sa palaabuton?

 3. Ano ang topiko, larawan, kag pagpaanggid nga masapwan naton sa Salmo 90:1?

³ Pareho sa madamo nga paglaragway sa Biblia, ang Salmo 90:1 may topiko, larawan, kag pagpaanggid. Si Jehova amo ang topiko. Ang larawan amo ang puluy-an, ilistaran. Si Jehova kaanggid gid sa sini nga puluy-an. Halimbawa, si Jehova nagahatag sing proteksion sa iya katawhan. Nahisuno ini sa kamatuoran nga sia ang personipikasyon sang gugma. (1 Juan 4:8) Sia man ang Dios sang kalinong, nga “nagapapuyo sa [mga matutom sa iya] sa kalig-onan.” (Sal. 4:8) Halimbawa, binagbinaga ang iya pagpakig-angot sa matutom nga mga patriarka, nga nagsugod kay Abraham.

4, 5. Paano ang Dios “nanginpuluy-an” para kay Abraham?

⁴ Mahanduraw naton ang ginbatyag ni Abraham, Abram sadto, sang ginsilingan sia ni Jehova: “Halin ka sa imo duta kag sa imo kahimataan . . . pakadto sa duta nga akon igapakita sa imo.” Kon nabalaka gid man si Abraham, mahimo nadula ini bangod sa masunod nga ginsiling ni Jehova: “Himoon ko gikan sa imo ang isa ka pungsud nga daku, kag pakamaayohon ko ikaw, kag padakuon ang imo ngalan . . . Pakamaayohon ko ang mga nagapakamaayo sa imo, kag ang nagapakamalaut sa imo pakamalauton ko.”—Gen. 12:1-3.

⁵ Sa sini nga pinamulong, ginbaton ni Jehova nga mangin malig-on sia nga puluy-an para kay Abraham kag sa iya mga kaliwatan. (Gen. 26:1-6) Gintuman ni Jehova ang iya saad. Halimbawa, ginpunggan niya si Paraon sang Egipto kag si Hari Abimelec sang Gerar sa pagtandog kay Sara kag pagpatay kay Abraham. Ginproteksionan man Niya sanday Isaac kag Rebeca sa sini nga paagi. (Gen. 12:14-20; 20:1-14; 26:6-11) Mabasa naton: “Wala [si Jehova] magtugut sing tawo sa paghimo sing malain sa ila; ginsabdong niya ang mga hari tungud sa ila, nga nagasiling, ‘Dili pagtanduga ang akon mga hinaplas, dili paghaliti ang akon mga manalagna!’”—Sal. 105:14, 15.

 6. Ano ang ginsugo ni Isaac kay Jacob, kag ano ang mahimo nga ginbatyag ni Jacob?

⁶ Ini nga mga manalagna nagalakip sa apo ni Abraham nga si Jacob. Sang tion nga mangita na sia sing asawa, si Isaac nga iya amay nagsiling: “Dili ka magpangasawa sa isa ka Canaanhon. Tindug ka, kadto sa Padan-aram sa balay ni Betuel nga amay sang imo iloy; kag pangasawa ka gikan didto sa isa sang mga anak ni Laban.” (Gen. 28:1, 2) Gilayon nga gintuman ni Jacob si Isaac. Ginbiyaan ni Jacob ang kalig-unan upod sa iya suod nga pamilya, nga nagaistar sa Canaan, para maglakbay sing isahanon sing ginatos ka kilometro pakadto sa Haran. (Gen. 28:10) Mahimo nagpalibog sia: ‘Daw ano ayhan kadugay antes ako makapauli? Amumahon ayhan ako sang akon tiyo kag hatagan sing mahinadlukon sa Dios nga asawa?’ Kon nagakabalaka gid man sini si Jacob, mahimo nga nadula ini sang nakaabot sia sa Luz, mga 100 ka kilometro gikan sa Beer-seba. Ano ang natabo sa Luz?

 7. Paagi sa damgo, paano ginpasalig sang Dios si Jacob?

⁷ Sa Luz, nagpakita si Jehova kay Jacob sa isa ka damgo, nga nagasiling: “Nagaupud ako sa imo kag magabantay sa imo sa bisan diin ka magakadto, kag magapabalik sa imo sa sining duta; kay indi ako magbiya sa imo tubtub nga mahimo ko ang akon ginpamolong sa imo.” (Gen. 28:15) Ining mainayuhon nga pinamulong mahimo nagpasalig kag naglugpay kay Jacob! Mahanduraw mo bala sia pagkatapos sini nga nagadalidali kag nalangkag kon paano tumanon sang Dios ang Iya ginsiling? Kon nagbiya ka sa inyo balay, ayhan para mag-alagad sa iban nga lugar, mahimo nahangpan mo ang ginbatyag ni Jacob. Pero wala sing duhaduha nga napamatud-an mo ang pag-atipan ni Jehova sa imo.

8, 9. Paano si Jehova “nanginpuluy-an” para kay Jacob, kag ano ang aton matun-an sa sini?

⁸ Pag-abot ni Jacob sa Haran, ang iya tiyo nga si Laban nag-amuma gid sa iya kag sang ulihi naghatag kanday Lea kag Raquel subong iya asawa. Apang sang ulihi, gusto dayaan ni Laban si Jacob paagi sa pagbag-obag-o sang iya suhol sing napulo ka beses! (Gen. 31:41, 42) Pero ginbatas ni Jacob ini nga inhustisya, nga nagasalig nga si Jehova padayon nga magatatap sa iya. Gintatap gid sang Dios si Jacob kay sang ginsilingan sia sang Dios nga magpauli sa Canaan, ang patriarka may “madamung panong, mga alagad nga babayi kag mga alagad nga lalaki, kag mga camelyo kag mga asno.” (Gen. 30:43) Bangod sa iya tudok nga pagpasalamat, si Jacob nangamuyo: “Indi ako takus sang kubus gid sang tanan nga malig-on nga paghigugma kag sang tanan nga pagkatutum nga imo ginpakita sa imo alagad, kay upud sa akon sungkud lamang nagtabok ako sa sining Jordan; kag karon nagduha na ako ka hut-ong.”—Gen. 32:10.

⁹ Huo, nangin matuod gid ang pangamuyo ni Moises: “GINOO, ikaw nanginpuluy-an namon sa tanan nga kaliwatan.” (Sal. 90:1) Ini nga pinamulong maaplikar man sa karon, kay si Jehova nga sa iya “wala sing pagbag-o subong sang pagbag-obag-o sang landong,” padayon nga nangin mahigugmaon kag malig-on nga puluy-an sa mga matutom sa iya. (Sant. 1:17) Binagbinagon naton kon paano.

10. Ngaa mapat-od naton nga si Jehova nagapabilin nga malig-on nga puluy-an para sa iya mga alagad?

¹⁰ Hunahunaa nga nagatestigo ka batok sa isa ka bug-os kalibutan nga organisasyon sang mga kriminal. Ang ila lider tama ka alam, impluwensiado, kag wala sing kaluoy nga butigon kag manugpatay. Ano ang imo batyagon paggua mo sa korte pagkahapon? Luwas ka bala sa katalagman? Indi gid! May rason ka nga mangabay sing proteksion. Mapaanggid sa sini nga kahimtangan ang mga alagad ni Jehova, nga maisugon nga nagatestigo para kay Jehova kag wala kahadlok nga nagabuyagyag sa iya mapintas kag panguna nga kaaway, si Satanas! (Basaha ang Bugna 12:17.) Pero napahipos bala ni Satanas ang katawhan sang Dios? Wala gid! Ang matuod, padayon kita nga nagauswag, kag isa lang ang rason sini: Si Jehova nagapabilin nga aton dalangpan, ang aton “nanginpuluy-an,” ilabi na sining katapusan nga mga adlaw. (Basaha ang Isaias 54:14, 17.) Apang indi mangin malig-on nga puluy-an si Jehova para sa aton kon magpasulay kita kay Satanas nga ipalayo kita sa sini.

11. Ano ang matun-an naton sa mga patriarka?

¹¹ Binagbinagon naton kon ano pa ang aton matun-an sa mga patriarka. Bisan nagapuyo sila sa Canaan, nagpabilin sila nga nahamulag sa katawhan sa sina nga lugar, kag gindumtan nila ang malain kag imoral nga pagkabuhi sini. (Gen. 27:46) Mga tawo sila nga may prinsipio nga wala sa malaba nga listahan sang mga pagsulundan nga maggiya sa ila. Ang ila nahibaluan kay Jehova kag sa iya personalidad bastante na. Bangod sia ang ila puluy-an, indi nila gusto nga makigsuod sa kalibutan. Sa baylo, nagpalayo sila sa sini tubtob sa ila masarangan. Maayo gid sila nga halimbawa para sa aton! Ginatinguhaan mo bala nga mailog ang mga patriarka kon nagapili ka sing mga kaupdanan kag kalingawan? Makapasubo nga ang pila sa sulod sang Cristianong kongregasyon daw nanamian na sa kalibutan ni Satanas. Kon amo sini ang imo ginabatyag, ipangamuyo ini. Dumduma, si Satanas ang tag-iya sini nga kalibutan. Makita sa sini ang iya malain kag maiyaiyahon nga espiritu.—2 Cor. 4:4; Efe. 2:1, 2.

12. (a) Paano ginaamanan ni Jehova ang iya espirituwal nga panimalay? (b) Ano ang imo ginabatyag sa sini nga mga aman?

¹² Para mapamatukan ang mga pahito ni Satanas, dapat naton panginpuslan ang espirituwal nga mga aman ni Jehova para sa iya panimalay sang pagtuo, ukon sa mga nagahimo sa iya nga ila puluy-an. Ini nga mga aman nagalakip sang Cristianong mga miting, pangpamilya nga pagsimba, kag “dulot nga mga lalaki”—mga manugtatap nga gintangdo sang Dios sa paglugpay kag pagsuporta sa aton mga kabudlayan. (Efe. 4:8-12) Si Brother George Gangas, nga katapo anay sang Nagadumala nga Hubon sa sulod sang madamo nga tuig, nagsulat: “Kon kaupod ko [ang katawhan sang Dios] nagabatyag ako sing kalig-unan upod sa akon pamilya, sa espirituwal nga paraiso.” Amo man bala sini ang imo nabatyagan?

13. Anong importante nga leksion ang aton matun-an sa Hebreo 11:13?

¹³ Ang isa pa ka kinaiya sang mga patriarka nga takus ilugon amo ang ila kahanda nga mangin tuhay sa katawhan sa ila palibot. Subong sang ginsiling sa parapo 1, “dayag [sila] nga nagpahayag nga sila mga estranghero kag umalagi nga mga pumuluyo sa duta.” (Heb. 11:13) Determinado ka bala nga mangin tuhay sa iban? Matuod, ang paghimo sini indi mahapos. Pero sa bulig sang Dios kag sang mga masigka-Cristiano, magamadinalag-on ka. Dumduma, wala ka nagaisahanon. Ang tanan nga gusto mag-alagad kay Jehova nagapakig-away man! (Efe. 6:12) Pero magadaug kita kon magsalig kita kay Jehova kag himuon naton sia nga malig-on nga puluy-an.

14. Ano nga “siudad” ang ginahulat sang mga alagad ni Jehova?

¹⁴ Importante man nga ilugon naton si Abraham paagi sa pagtulok sa padya. (2 Cor. 4:18) Si apostol Pablo nagsulat nga “ginahulat [ni Abraham] ang siudad nga may matuod nga mga sadsaran, nga ang manunukod kag manugbuhat sini nga siudad amo ang (Heb. 11:10) Ina nga “siudad” amo ang Mesianikong Ginharian. Siempre kinahanglan hulaton ni Abraham ina nga “siudad.” Sa aton bahin, wala na kita nagahulat. Nagagahom na ini karon sa langit. Isa pa, madamo sing pamatuod nga sa indi madugay, magagahom na ini sing bug-os sa duta. Ini bala nga Ginharian matuod para sa imo? Nagaimpluwensia bala ini sa imo ginalauman, sa imo pagtamod sa sini nga kalibutan, kag sa imo mga prioridad?—Basaha ang 2 Pedro 3:11, 12.

15. Ano ang matabo sa mga nagasalig sa sini nga kalibutan?

¹⁵ Samtang nagahilapit ang katapusan sang kalibutan, ang “pagpasakit” sa sini magalala pa. (Mat. 24:7, 8) Ang mga hitabo magagrabe pa gid sa dakung kapipit-an. Ang mga tinukod marumpag kag ang mga tawo makugmat. (Hab. 3:16, 17) Bangod wala na sila sing pasingadtuan, magapanago sila “sa mga kueba kag sa mga igang sang mga bukid.” (Bug. 6:15-17) Apang wala sing literal nga mga kueba ukon tulad-bukid nga pulitikal kag komersial nga organisasyon ang makaamlig sa ila.

16. Paano naton dapat tamdon ang Cristianong kongregasyon, kag ngaa?

¹⁶ Pero ang katawhan ni Jehova padayon nga makaeksperiensia sing kalig-unan sa ila “nanginpuluy-an,” si Jehova nga Dios. Kaangay ni manalagna Habacuc, “magakasadya [sila] sa GINOO, magakalipay [sila] sa Dios sang [ila] kaluwasan.” (Hab. 3:18) Sa ano nga paagi “nanginpuluy-an” si Jehova sa sining magamo nga tion? Mahibaluan naton ina sa palaabuton. Pero amo ini ang aton masaligan: Pareho sa paggua sang mga Israelinhon sa Egipto, ang “dakung kadam-an” magapabilin nga organisado kag alisto sa panuytoy sang Dios. (Bug. 7:9; basaha ang Exodo 13:18.) Ina nga panuytoy ipaalinton sa aton sa teokratiko nga paagi, ayhan sa kahimusan sa kongregasyon. Ang linibo ka kongregasyon sa bilog nga kalibutan naangot sa nagaamlig nga “mga hulut” nga gintagna sa Isaias 26:20. (Basaha.) Ginapabaloran mo bala ang mga miting sa kongregasyon? Ginasunod mo bala gilayon ang panuytoy ni Jehova paagi sa kahimusan sa kongregasyon?—Heb. 13:17.

17. Sa ano nga paagi “nanginpuluy-an” si Jehova sang mga napatay nga matutom sa iya?

¹⁷ Si Jehova magapabilin nga ‘puluy-an’ bisan sa mga mapatay nga matutom antes sang dakung kapipit-an. Paano? Sang madugay na nga napatay ang mga patriarka, si Jehova nagsiling kay Moises: “Ako ang Dios . . . ni Abraham, ang Dios ni Isaac, kag ang Dios ni Jacob.” (Ex. 3:6) Pagkatapos ini makutlo ni Jesus, sia nagdugang: “Sia ang Dios, indi sang mga patay, kundi sang mga buhi, kay para sa iya buhi sila tanan.” (Luc. 20:38) Huo, para kay Jehova, buhi ang tanan nga napatay nga matutom sa iya; sigurado ang ila pagkabanhaw.—Man. 7:1.

18. Sa bag-o nga kalibutan, paano si Jehova mangin ‘puluy-an’ sang iya katawhan?

¹⁸ Sa bag-o nga kalibutan, si Jehova mangin ‘puluy-an’ para sa iya katawhan sa isa pa ka kahulugan. Ang Bugna 21:3 nagsiling: “Yari karon! Ang tolda sang Dios yara sa mga tawo, kag magapuyo sia kaupod nila.” Sa umpisa, si Jehova magapuyo sa iya mga sakop sa duta paagi sa iya representante nga si Cristo Jesus. Sa katapusan sang isa ka libo ka tuig, matuman na ang tanan nga katuyuan sang Dios para sa duta, gani ihatag ni Jesus ang Ginharian sa iya Amay. (1 Cor. 15:28) Dayon, indi na kinahanglan sang himpit nga katawhan si Jesus subong manugpatunga, kay si Jehova direkta nga magaupod sa ila. Isa gid ka dalayawon nga palaabuton para sa aton! Pero sa karon, panikasugan naton nga mailog ang matutom nga mga tawo sadto paagi sa paghimo kay Jehova nga aton ‘puluy-an.’