Ang Solusyon sa Problema sang Bilog nga Kalibutan

BISAN diin may nagaantos. Pero, may mga maluluy-on nga nagabulig sa ila. Halimbawa, ang mga nagaobra sa ospital nagapulaw para buligan ang mga nagamasakit kag nasamaran. Ang mga bombero, pulis, nagapang-rescue, kag ang mga nagapatuman sing kasuguan, nagabulig para mahaganhagan ukon malikawan ang pag-antos sang iban. Bisan daku ang nabulig sini nga mga tawo sa pila ka indibiduwal, indi nila madula ukon sang bisan ano nga organisasyon ang pag-antos sang bilog nga kalibutan. Pero, masarangan ini nga dulaon sang Dios.

Ginapasalig kita sang katapusan nga tulun-an sang Biblia: “Pahiran [sang Dios] ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa. Ang mga butang sang una nagtaliwan na.” (Bugna 21:4) Binagbinaga kon daw ano kadamo ang makabenepisyo sa sini nga promisa. Ginasugid sini nga teksto nga dulaon sang Dios ang tanan nga pag-antos. Paano? Dulaon niya sa duta ang inaway, gutom, balatian, inhustisya, kag ang mga malaut. Wala sing bisan sin-o nga tawo ang makahimo sini.

Ang Himuon sang Ginharian sang Dios

Tumanon sang Dios ang iya saad paagi kay Jesucristo, ang ikaduha sa pinakagamhanan nga persona sa uniberso. Maabot ang tion nga magagahom si Jesus subong Hari sa bug-os nga duta nga wala na sing may magpamatok. Ang magagahom sa mga tawo indi na hari, presidente, ukon pulitiko, kundi ang Ginharian sang Dios. Ini nga Ginharian may isa ka Hari kag may isa ka pagginahom.

Dulaon sini ang tanan nga gobierno sang tawo. Madugay na nga nagtagna ang Biblia: “Magapatindug ang Dios sang langit sing ginharian nga dili gid malaglag, ukon ang pagbulut-an sini ibilin sa iban nga katawohan. Kondi dugmokon sini kag papason ini tanan nga ginharian kag ini magapadayon sa gihapon.” (Daniel 2:44) Sa idalom sang matarong nga pagginahom sang Ginharian sang Dios, mahiusa ang mga tawo sa bug-os nga duta.

Sang ari si Jesus sa duta, madamo nga beses nga ginsambit niya ang parte sa Ginharian. Sang gintudluan niya ang iya mga disipulo sang modelo nga pangamuyo, nagsiling sia: “Magkari ang imo ginharian. Matuman ang imo kabubut-on sa duta, subong sang sa langit.” (Mateo 6:10) Talupangda nga ginpakita ni Jesus nga ang kabubut-on sang Dios matuman sa duta paagi sa Ginharian sang Dios. Dulaon sini ang tanan nga pag-antos sa bug-os nga duta.

Ang matarong nga pagginahom sang Dios magadala sing mga pagpakamaayo nga indi mahimo sang bisan ano nga gobierno sang tawo. Dumduma nga ginhatag ni Jehova ang iya Anak para maluwas ang mga tawo kag mabuhi sila sing walay katapusan. Sa idalom sini nga Ginharian, amat-amat nga mangin himpit ang mga tawo. Ano dayon ang matabo? “Dulaon sang Ginoong DIOS ang kamatayon kag pahiran niya ang mga luha sang tanan nga tawo.”—Isaias 25:8, APD.

Mahimo mamangkot ang iban: ‘Ti, ngaa wala pa ini ginhimo sang Dios? Ano pa ang iya ginahulat?’ Kon gustuhon ni Jehova, madugay na niya nga gindula ang tanan nga pag-antos. Pero gintugutan niya ini nga magpadayon para sa kaayuhan sang iya mga anak sa duta. Mahimo man tugutan sang mahigugmaon nga mga ginikanan nga mag-antos ang ila bata kon nahibaluan nila nga para ini sa iya kaayuhan sa ulihi. Sing kaanggid, may maayo nga mga rason si Jehova kon ngaa gintugutan niya nga mag-antos sing temporaryo ang mga tawo. Ginapakita sang Biblia nga nalakip sa sini ang kahilwayan sa pagpili, ang sala, kag ang kinamatarong ni Jehova sa paggahom. Ginapaathag man sini kon ngaa gintugutan sang Dios ang isa ka malaut nga espiritu nga maggahom sa kalibutan sa limitado lang nga tion.a

Bisan indi naton diri mabinagbinag ang tanan nga rason, may duha ka butang nga makahatag sa aton sing paglaum kag pagpalig-on. Una: Ang aton pag-antos subong, bale-wala sa mga pagpakamaayo nga ihatag ni Jehova sa aton. Ginapasalig niya kita: “Ang una nga mga butang indi na pagdumdumon ukon mag-abut sa painoino.” (Isaias 65:17) Dulaon gid sang Dios ang mga pag-antos kag kabudlayan nga resulta sang temporaryo nga kalautan.

Ikaduha: Ang Dios may gintalana nga tion kon san-o niya dulaon ang pag-antos. Dumduma nga namangkot si Habacuc kon asta san-o tugutan ni Jehova ang kapintas kag kagamo. Nagsabat si Jehova: “Wala pa mag-abot ang gintalana nga tion . . . Indi ini mapaslaw.” (Habacuc 2:3, APD) Mahibaluan naton sa masunod nga artikulo nga malapit na ining “gintalana nga tion.”

[Nota]

[Kahon sa pahina 7]

Mga Teksto nga Nagahatag sing Paglaum

WALA NA SING INAWAY:

“Dali, tan-awa ang mga binuhatan sang GINOO, ang makatilingala nga mga butang nga iya ginahimo sa kalibutan. Ginapauntat niya ang mga inaway sa bug-os nga kalibutan.”—Salmo 46:8, 9, APD.

BANHAWON ANG MGA PATAY:

“May pagkabanhaw sang mga matarong kag mga di-matarong.”—Binuhatan 24:15.

MAY PAGKAON PARA SA TANAN:

“May bugana nga uyas sa duta; sa putokputokan sang kabukiran magahapayhapay ini.”—Salmo 72:16.

WALA NA SING MAGAMASAKIT:

“Ang pumuluyo indi magsiling, ‘Nagamasakit ako.’”—Isaias 33:24.

WALA NA SING MALAUTON:

“Ang malauton utdon gikan sa duta, kag ang maluib gabuton sa sini.”—Hulubaton 2:22.

MAY ARA NA HUSTISYA:

“Yari karon, ang isa ka hari [si Jesucristo] magahari sa pagkamatarung, kag ang mga principe magagahum sa katarungan.”—Isaias 32:1.

[Mga Retrato sa pahina 7]

Dulaon sang Ginharian sang Dios ang tanan naton nga pag-antos