Kapitulo 43

Ang Nagabadlak nga Siudad

Palanan-awon 16​—Bugna 21:9–22:5

Tema: Ang paglaragway sa Bag-ong Jerusalem

Tion sang katumanan: Sa tapos sang dakung kapipit-an kag sang pagtagbong kay Satanas sa kadadalman

1, 2. (a) Diin gindala sang anghel si Juan agod makita niya ang Bag-ong Jerusalem, kag ano nga pagkatuhay ang matalupangdan naton diri? (b) Ngaa amo ini ang mahimayaon nga talipuspusan sang Bugna?

GINDALA sang anghel si Juan sa kahanayakan agod ipakita sa iya ang Babilonia nga Daku. Pagkatapos, gindala si Juan sang isa sa amo gihapon nga grupo sang mga anghel sa isa ka mataas nga bukid. Tuhay gid ang iya nakita! Nakita niya, indi ang isa ka mahigko, imoral nga siudad kaangay sang Babiloniko nga makihilawason nga babayi, kundi ang Bag-ong Jerusalem—putli, espirituwal, balaan—kag nagapanaug ini halin sa langit.—Bugna 17:1, 5.

² Bisan ang dutan-on nga Jerusalem wala makatigayon sing subong sini nga himaya. Ginasugiran kita ni Juan: “Kag nag-abot ang isa sa pito ka anghel nga may pito ka yahong nga puno sing pito ka katapusan nga kalalat-an, kag nagpakighambal sia sa akon kag nagsiling: ‘Kari ka, ipakita ko sa imo ang nobya, ang asawa sang Kordero.’ Gani paagi sa gahom sang espiritu gindala niya ako sa isa ka daku kag mataas nga bukid, kag ginpakita niya sa akon ang balaan nga siudad sang Jerusalem nga nagapanaug halin sa langit gikan sa Dios kag may himaya sang Dios.” (Bugna 21:9-11a) Gikan sa mataas nga bukid, gin-usisa ni Juan ang matahom nga mga detalye sang matahom nga siudad. Ang mga tawo sang pagtuo nalangkag sa pag-abot sini kutob sang mahulog ang katawhan sa sala kag kamatayon. Sa katapusan nag-abot na! (Roma 8:19; 1 Corinto 15:22, 23; Hebreo 11:39, 40) Amo ini ang halangdon nga espirituwal nga siudad, nga ginahuman sang 144,000 ka matutom nga mga manughupot sing integridad, nga nagabadlak sa pagkabalaan kag nagapabanaag sang himaya ni Jehova. Amo ini ang mahimayaon nga talipuspusan sang Bugna!

 3. Paano ginlaragway ni Juan ang katahom sang Bag-ong Jerusalem?

³ Katahom gid sang Bag-ong Jerusalem: “Ang badlak sini kaangay sa malahalon gid nga bato, subong sang nagainggat nga bato nga jaspe nga masinaw kaangay sang kristal. Ini may daku kag mataas nga pader kag may napulog-duha ka gawang, kag sa mga gawang may napulog-duha ka anghel, kag nasulat ang mga ngalan sang napulog-duha ka tribo sang mga anak ni Israel. Sa sidlangan may tatlo ka gawang, kag sa aminhan tatlo ka gawang, kag sa bagatnan tatlo ka gawang, kag sa katundan tatlo ka gawang. Ang pader sang siudad may napulog-duha man ka sadsaran nga bato, kag yara sa sini ang napulog-duha ka ngalan sang napulog-duha ka apostoles sang Kordero.” (Bugna 21:11b-14) Nagakaigo gid nga ang una nga impresyon nga ginsulat ni Juan amo ang nagabadlak nga kasanag sini! Makasililaw sa katahom subong sang isa ka babayi nga bag-o makasal, ang Bag-ong Jerusalem isa ka nagakabagay nga tiayon para kay Cristo. Nagabadlak gid ini, subong amo ang nagakabagay para sa isa ka tinuga sang “Amay sang langitnon nga mga kapawa.”—Santiago 1:17.

 4. Ano ang nagapakita nga ang Bag-ong Jerusalem indi ang undanon nga pungsod sang Israel?

⁴ Sa 12 ka gawang sini, nasulat ang mga ngalan sang 12 ka tribo sang Israel. Busa, ining simbuliko nga siudad ginahuman sang 144,000, nga ginpat-inan “gikan sa tagsa ka tribo sang mga anak ni Israel.” (Bugna 7:4-8) Nahisanto sa sini, nasulat sa sadsaran nga mga bato ang mga ngalan sang 12 ka apostoles sang Kordero. Huo, ang Bag-ong Jerusalem indi ang undanon nga pungsod sang Israel nga napasad sa 12 ka anak ni Jacob. Amo ini ang espirituwal nga Israel, nga napasad sa “mga apostoles kag mga manalagna.”—Efeso 2:20.

 5. Ano ang ginapakita sang “daku kag mataas nga pader” sang Bag-ong Jerusalem kag sang katunayan nga may mga anghel nga ginapabantay sa tagsa ka alagyan?

⁵ Ang simbuliko nga siudad may daku nga pader. Sang dumaan nga panahon, ginapaderan ang palibot sang siudad subong kalig-unan batok sa mga kaaway. Ang “daku kag mataas nga pader” sang Bag-ong Jerusalem nagapakita nga may kalig-unan sia sa espirituwal. Wala sing kaaway sang pagkamatarong, wala sing isa nga di-matinlo ukon di-bunayag, ang makasulod. (Bugna 21:27) Apang para sa mga makasulod, ang pagsulod sa sining matahom nga siudad daw subong sa pagsulod sa Paraiso. (Bugna 2:7) Sang gintabog si Adan, may mga kerubin nga ginpabantay sa orihinal nga Paraiso agod indi makasulod ang di-matinlo nga mga tawo. (Genesis 3:24) Sing kaanggid man, may mga anghel sa tagsa ka alagyan sang balaan nga siudad sang Jerusalem agod masigurado ang espirituwal nga kalig-unan sang siudad. Sa pagkamatuod, sa bug-os nga katapusan nga mga adlaw, ginabantayan sang mga anghel ang kongregasyon sang hinaplas nga mga Cristiano, nga nangin amo ang Bag-ong Jerusalem, batok sa Babiloniko nga kahigkuan.—Mateo 13:41.

Pagtakus sa Siudad

 6. (a) Paano ginlaragway ni Juan ang pagtakus sa siudad, kag ano ang ginapakita sini nga pagtakus? (b) Ano ayhan ang rason kon ngaa ang takus nga gingamit “suno sa takus sang tawo, nga takus man sang anghel”? (Tan-awa ang nota.)

⁶ Nagpadayon si Juan sa pagsaysay: “Karon ang isa nga nagapakighambal sa akon nagauyat sing inugtakus nga tabun-ak nga bulawan, agod matakus niya ang siudad kag ang mga gawang sini kag ang pader sini. Kag ang siudad kuadrado, kag ang kalabaon sini pareho sa kasangkaron sini. Kag gintakus niya sang tabun-ak ang siudad, napulog-duha ka libo ka estadio; pareho ang kalabaon kag kasangkaron kag kataason sini. Gintakus man niya ang pader sini, isa ka gatos kag kap-atan kag apat ka maniko, suno sa takus sang tawo, nga takus man sang anghel.” (Bugna 21:15-17) Sang matakus ang santuaryo sang templo, isa ini ka garantiya nga matuman ang mga katuyuan ni Jehova tuhoy sa sini. (Bugna 11:1) Ang pagtakus karon sang anghel sa Bag-ong Jerusalem nagapakita nga ang mga katuyuan ni Jehova indi gid mabag-o kon tuhoy sa sining mahimayaon nga siudad.a

 7. Ano ang talalupangdon tuhoy sa mga takus sang siudad?

⁷ Talalupangdon gid ini nga siudad! Isa ka himpit nga kubiko nga may takus nga 12,000 ka estadio (mga 2,220 kilometros) sa palibot, kag ginalibutan sing pader nga 144 ka maniko, ukon 64 metros, sa kataason. Wala sing literal nga siudad nga may subong sina nga takus. Magakobre ini sang isa ka duog nga mga 14 ka beses ang kadakuon sangsa Israel karon, kag magataas ini sing halos 560 kilometros sa kahawaan! Ginhatag ang Bugna paagi sa mga tanda. Gani, ano ang ginasugid sa aton sini nga mga takus tuhoy sa langitnon nga Bag-ong Jerusalem?

 8. Ano ang ginapahangop sang (a) mga pader sang siudad nga may kataason nga 144 ka maniko? (b) 12,000 ka estadio nga takus sang siudad? (c) himpit nga kubiko nga korte sang siudad?

⁸ Ang mga pader nga may kataason nga144 ka maniko nagapahanumdom sa aton nga ang siudad ginahuman sang 144,000 ka gin-adoptar sa espirituwal nga mga anak sang Dios. Ang numero nga 12 nga makita sa 12,000 ka estadio nga takus sang siudad—nga palareho ang kalabaon, kasangkaron, kag kataason—malaragwayon nga ginagamit sa tagna sang Biblia sa organisasyonal nga mga kahimusan. Busa, ang Bag-ong Jerusalem isa ka maayo gid nga organisasyonal nga kahimusan agod tumanon ang dayon nga katuyuan sang Dios. Ang Bag-ong Jerusalem, upod si Hari Jesucristo, amo ang organisasyon sang Ginharian ni Jehova. Ang korte sang siudad isa man ka himpit nga kubiko. Sa templo ni Solomon, ang Labing Balaan, nga nagaunod sang simbuliko nga representasyon sang presensia ni Jehova, isa ka himpit nga kubiko. (1 Hari 6:19, 20) Gani, nagakaigo gid nga ang Bag-ong Jerusalem, nga ginaiwagan sang himaya ni Jehova mismo, makita subong isa ka himpit kag daku nga kubiko! Balanse gid ang tanan nga takus sini. Isa ini ka siudad nga wala sing diperensia ukon depekto.— Bugna 21:22.

Malahalon nga mga Materyales sa Pagtukod

 9. Paano ginlaragway ni Juan ang mga materyales nga gingamit sa pagtukod sa siudad?

⁹ Ginpadayon ni Juan ang iya paglaragway: “Ang pader sini jaspe, kag ang siudad puro nga bulawan kaangay sa masinaw nga kristal. Ang mga sadsaran sang pader sang siudad napunihan sang tanan nga sahi sang malahalon nga bato: ang nahauna nga sadsaran jaspe, ang ikaduha sapiro, ang ikatlo kalsedonia, ang ikap-at esmeralda, ang ikalima sardonika, ang ikan-om kornalina, ang ikapito krisolito, ang ikawalo berilo, ang ikasiam topasio, ang ikanapulo krisopraso, ang ikanapulog-isa hasinto, ang ikanapulog-duha amatista. Subong man, ang napulog-duha ka gawang sini napulog-duha ka perlas; ang kada isa sa mga gawang human sa isa ka perlas. Kag ang malapad nga dalan sang siudad puro nga bulawan, subong sang masinaw nga kristal.”—Bugna 21:18-21.

10. Ano ang ginapahangop sang katunayan nga ang siudad nahuman sang jaspe, bulawan, kag sang “tanan nga sahi sang malahalon nga bato”?

¹⁰ Nagabadlak gid ang siudad. Sa baylo sang kinaandan nga dutan-on nga mga materyales sa pagtukod subong sang lunang ukon bato, mabasa naton ang tuhoy sa jaspe, puro nga bulawan, kag “tanan nga sahi sang malahalon nga bato.” Nagakaigo gid nga nagalaragway ini sa langitnon nga mga materyales sa pagtukod! Wala na sing matahom pa sa sini. Ang kaban sang katipan anay nabalawan sing puro nga bulawan, kag sa Biblia ini nga elemento masami nga nagalaragway sa mga butang nga maayo kag mapuslanon. (Exodo 25:11; Hulubaton 25:11; Isaias 60:6, 17) Apang ang bug-os nga Bag-ong Jerusalem, kag bisan ang malapad nga dalan sini, nahuman sang “puro nga bulawan kaangay sa masinaw nga kristal,” nga nagalaragway sang katahom kag duna nga balor nga indi mahanduraw.

11. Ano ang nagapasalig nga ang mga nagahuman sa Bag-ong Jerusalem magabadlak bangod sa pinakamataas nga sahi sang espirituwal nga kaputli?

¹¹ Wala sing platero nga makahimo sing subong sina kapuro nga bulawan. Apang si Jehova amo ang Batid nga Manugpapuro. Nagalingkod sia “subong manugpapuro kag manugtinlo sang pilak,” kag ginapapuro niya ang tagsa ka matutom nga mga katapo sang espirituwal nga Israel “kaangay sang bulawan kag kaangay sang pilak,” nga ginakuha gikan sa ila ang tanan nga higko. Ang mga indibiduwal lamang nga ginpapuro kag gintinluan ang magahuman sa ulihi sa Bag-ong Jerusalem, kag sa sini nga paagi ginatukod ni Jehova ang siudad paagi sa buhi nga mga materyales nga nagabadlak bangod sang pinakamataas nga sahi sang espirituwal nga kaputli.—Malaquias 3:3, 4.

12. Ano ang ginapahangop sang katunayan nga (a) ang mga sadsaran sang siudad napunihan sang 12 ka malahalon nga bato? (b) ang mga gawang sang siudad mga perlas?

¹² Bisan gani ang mga sadsaran sang siudad matahom, kay napunihan ini sang 12 ka malahalon nga bato. Ginapahanumdom kita sini tuhoy sa dumaan nga Judiyo nga mataas nga saserdote, nga sa tion sang mga adlaw nga may seremonya nagasuksok sia sing epod nga napunihan sing 12 ka nanuhaytuhay nga malahalon nga bato nga daw kaanggid sa ginlaragway diri. (Exodo 28:15-21) Sa pagkamatuod indi ini natabuan lamang! Sa baylo, ginapadaku sini ang katungdanan sang Bag-ong Jerusalem subong mga saserdote, nga sa sini si Jesus, ang daku nga Mataas nga Saserdote, amo ang “suga.” (Bugna 20:6; 21:23; Hebreo 8:1) Subong man, ang mga benepisyo sang pag-alagad ni Jesus subong mataas nga saserdote ipadangat sa katawhan paagi sa Bag-ong Jerusalem. (Bugna 22:1, 2) Ang 12 ka gawang sang siudad, nga ang tagsa isa ka matahom gid nga perlas, nagapahanumdom sang ilustrasyon ni Jesus nga nagpaanggid sang Ginharian sa isa ka perlas nga may daku nga bili. Ang tanan nga magasulod sa sining mga gawang nakapakita sing matuod nga apresasyon sa espirituwal nga mga butang.—Mateo 13:45, 46; ipaanggid ang Job 28:12, 17, 18.

Isa ka Siudad Sang Kapawa

13. Ano ang masunod nga ginsiling ni Juan tuhoy sa Bag-ong Jerusalem, kag ngaa ang siudad wala nagakinahanglan sing literal nga templo?

¹³ Sang panahon ni Solomon, kitaon gid sa Jerusalem ang templo nga ginpatindog sa pinakamataas nga duog sang siudad sa Bukid Moria sa aminhan. Apang kamusta ang Bag-ong Jerusalem? Nagsiling si Juan: “Kag wala ako sing nakita nga templo sa sini, kay si Jehova nga Dios nga Labing Gamhanan amo ang templo sini, subong man ang Kordero. Kag ang siudad wala nagakinahanglan sang adlaw ukon sang bulan nga magsilak sa sini, kay ang himaya sang Dios amo ang nagapasanag sini, kag ang suga sini amo ang Kordero.” (Bugna 21:22, 23) Ang matuod, indi na kinahanglan nga magtukod sing literal nga templo diri. Ang dumaan nga templo sang mga Judiyo daw isa ka padron lamang, kag ang katunayan sina nga padron, ang daku nga espirituwal nga templo, nagluntad na sugod sang ginhaplas ni Jehova si Jesus subong Mataas nga Saserdote sang 29 C.E. (Mateo 3:16, 17; Hebreo 9:11, 12, 23, 24) Ang templo nagapahangop man nga may yara isa ka klase sang mga saserdote nga nagahalad sing mga halad kay Jehova para sa katawhan. Apang ang tanan nga katapo sang Bag-ong Jerusalem mga saserdote. (Bugna 20:6) Kag ang daku nga halad, ang himpit nga tawhanon nga kabuhi ni Jesus, ginhalad sing makaisa lang. (Hebreo 9:27, 28) Dugang pa, mahimo mapalapitan sing personal si Jehova sang bisan sin-o nga nagakabuhi sa siudad.

14. (a) Ngaa indi kinahanglan sang Bag-ong Jerusalem ang adlaw kag ang bulan nga magsilak sa sini? (b) Ano ang gintagna ni Isaias tuhoy sa bug-os uniberso nga organisasyon ni Jehova, kag paano ang Bag-ong Jerusalem nadalahig sa sini?

¹⁴ Sang maglabay ang himaya ni Jehova kay Moises sa Bukid Sinai, ginpasilak sini ang nawong ni Moises sing tuman kasanag amo kon ngaa gintabunan niya ini gikan sa iya mga masigka-Israelinhon. (Exodo 34:4-7, 29, 30, 33) Mahanduraw mo bala, nian, ang kasanag sang siudad nga dalayon nga ginaiwagan sang himaya ni Jehova? Wala sing gab-i sa sina nga siudad. Wala ini nagakinahanglan sing literal nga adlaw ukon bulan. Magaiwag ini sing dayon. (Ipaanggid ang 1 Timoteo 6:16.) Ini nga kasanag nagahil-ob sa Bag-ong Jerusalem. Sa pagkamatuod, ining nobya kag ang iya Nobyo nga Hari amo ang kapital sang bug-os uniberso nga organisasyon ni Jehova—ang iya “babayi,” “ang Jerusalem sa ibabaw”—nga tuhoy sini nagtagna si Isaias: “Ang adlaw indi na mangin kapawa sa imo sa adlaw, kag ang bulan indi na maghatag sa imo sing kasanag. Kag si Jehova mangin dayon nga kapawa para sa imo, kag ang imo Dios ang mangin imo katahom. Ang imo adlaw indi na magtunod, kag ang imo bulan indi na maggamay kay si Jehova mangin imo dayon nga kapawa, kag ang mga adlaw sang imo kalisod matapos na.”—Isaias 60:1, 19, 20; Galacia 4:26.

Isa ka Kapawa Para sa mga Pungsod

15. Ano nga mga pulong sang Bugna tuhoy sa Bag-ong Jerusalem ang kaanggid sa gintagna ni Isaias?

¹⁵ Ang amo man gihapon nga tagna nagtagna man: “Kag ang mga pungsod pat-od nga magakadto sa imo kapawa, kag ang mga hari sa kasanag sang imo pagsilak.” (Isaias 60:3) Ginapakita sang Bugna nga ini nga mga pulong magalakip sa Bag-ong Jerusalem: “Kag ang mga pungsod magalakat paagi sa kasanag sini, kag ang mga hari sang duta magadala sang ila himaya sa sulod sini. Kag ang mga gawang sini indi gid pag-isira sa adlaw, kay wala na sing gab-i didto. Kag dalhon nila ang himaya kag ang dungog sang mga pungsod sa sulod sini.”—Bugna 21:24-26.

16. Sin-o “ang mga pungsod” nga magalakat paagi sa kapawa sang Bag-ong Jerusalem?

¹⁶ Sin-o ining “mga pungsod” nga nagalakat paagi sa kapawa sang Bag-ong Jerusalem? Sila ang mga tawo, nga sang una bahin sang mga pungsod sining malaut nga kalibutan, apang nagalakat karon paagi sa kapawa nga ginapasilak sining mahimayaon nga langitnon nga siudad. Ang nagapanguna sa ila amo ang dakung kadam-an, nga naggua na gikan sa “tanan nga pungsod kag tribo kag katawhan kag hambal” kag nagasimba sa Dios sa adlaw kag gab-i kaupod sa Juan nga klase. (Bugna 7:9, 15) Kon manaug na ang Bag-ong Jerusalem halin sa langit kag nagamit na ni Jesus ang mga yabi sang kamatayon kag sang Hades sa pagbanhaw sa mga patay, buylugan sila sang minilyon pa, gikan sa “mga pungsod,” nga nagahigugma kay Jehova kag sa iya Anak, ang tulad-Kordero nga Bana sang Bag-ong Jerusalem.—Bugna 1:18.

17. Sin-o “ang mga hari sang duta” nga “magadala sang ila himaya” sa Bag-ong Jerusalem?

¹⁷ Sin-o, kon amo, “ang mga hari sang duta” nga ‘nagadala sang ila himaya sa sulod sini’? Indi sila literal nga mga hari sang duta subong isa ka grupo, kay malaglag sila samtang nagapakig-away batok sa Ginharian sang Dios sa Armagedon. (Bugna 16:14, 16; 19:17, 18) Mahimo bala nga ang mga hari amo ang pila sang mataas sing posisyon nga mga tawo sang mga pungsod nga nangin bahin sang dakung kadam-an, ukon sila bala binanhaw nga mga hari nga nagapasakop sa Ginharian sang Dios sa bag-ong kalibutan? (Mateo 12:42) Indi mahimo, kay ang himaya sini nga mga hari masami nga kalibutanon kag madugay na nadula. Kon amo, “ang mga hari sang duta,” nga nagadala sang ila himaya sa Bag-ong Jerusalem mahimo gid nga amo ang 144,000 nga “ginbakal . . . gikan sa tagsa ka tribo kag hambal kag katawhan kag pungsod” agod maggahom subong mga hari upod sa Kordero, si Jesucristo. (Bugna 5:9, 10; 22:5) Ginadala nila sa siudad ang ila himaya halin sa Dios agod magdugang sing kasanag sa sini.

18. (a) Sin-o ang indi pagpasudlon sa Bag-ong Jerusalem? (b) Sin-o lamang ang tugutan sa pagsulod sa siudad?

¹⁸ Nagpadayon si Juan: “Apang ang bisan ano nga indi sagrado kag ang bisan sin-o nga nagahimo sing makangilil-ad nga butang kag nagabinutig indi gid makasulod sa sini; ang mga nasulat lamang sa linukot sang kabuhi nga iya sang Kordero.” (Bugna 21:27) Wala sing bisan ano nga nadagtaan sang sistema sang mga butang ni Satanas ang mangin bahin sang Bag-ong Jerusalem. Bisan pa ang mga gawang sini pirme abierto, wala sing bisan sin-o nga “nagahimo sing makangilil-ad nga butang kag nagabinutig” ang tugutan sa pagsulod. Wala sing mga apostata sa sina nga siudad ukon bisan sin-o nga mga katapo sang Babilonia nga Daku. Kag kon may magtinguha sa paghigko sa siudad paagi sa pagpalain sa palaabuton nga mga katapo samtang yari pa sila sa duta, indi sila magmadinalag-on. (Mateo 13:41-43) Ang “mga nasulat [lamang] sa linukot sang kabuhi nga iya sang Kordero,” ang 144,000, ang makasulod sa ulihi sa Bag-ong Jerusalem.b—Bugna 13:8; Daniel 12:3.

Ang Suba Sang Tubig Sang Kabuhi

19. (a) Paano ginlaragway ni Juan ang Bag-ong Jerusalem subong nagapadala sing mga pagpakamaayo sa katawhan? (b) San-o magailig ang “suba sang tubig sang kabuhi,” kag paano naton nahibal-an?

¹⁹ Ang nagabadlak nga Bag-ong Jerusalem magapadala sing daku nga mga pagpakamaayo sa katawhan sa duta. Amo sini ang masunod nga nahibaluan ni Juan: “Kag ginpakita niya sa akon ang suba sang tubig sang kabuhi, nga matin-aw subong sang kristal, nga nagailig gikan sa trono sang Dios kag sang Kordero sa tunga sang malapad nga dalan sini.” (Bugna 22:1, 2a) San-o magailig ini nga “suba”? Sanglit nagailig ini “gikan sa trono sang Dios kag sang Kordero,” natabo lamang ini sang nagsugod na ang adlaw sang Ginuo sang 1914. Sadto natabo ang ginpahibalo sang pagpatunog sa ikapito nga trumpeta kag ang matahom nga balita: “Karon nag-abot na ang kaluwasan kag ang gahom kag ang ginharian sang aton Dios kag ang awtoridad sang iya Cristo.” (Bugna 11:15; 12:10) Sa panahon sang katapusan, ginaagda sang espiritu kag sang nobya ang mga may huyog sa pagkamatarong nga magkuha sing tubig sang kabuhi nga walay bayad. Ang tubig gikan sa sini nga suba padayon nga matigayon sina nga sahi sang mga tawo tubtob sa katapusan sining sistema sang mga butang kag, padayon sa bag-ong kalibutan, kon ang Bag-ong Jerusalem ‘manaug na halin sa langit gikan sa Dios.’—Bugna 21:2.

20. Ano ang nagapakita nga matigayon na ang isa ka bahin sang tubig sang kabuhi?

²⁰ Indi ini ang una nga tion nga ang nagahatag-kabuhi nga tubig gintanyag sa katawhan. Sang si Jesus yari sa duta, ginsambit niya ang tubig nga nagahatag sing kabuhi nga walay katapusan. (Juan 4:10-14; 7:37, 38) Dugang pa, buot na mabatian ni Juan ang mahigugmaon nga imbitasyon: “Ang espiritu kag ang nobya padayon nga nagasiling: ‘Kari!’ Kag ang bisan sin-o nga nagapamati magsiling: ‘Kari!’ Kag ang bisan sin-o nga ginauhaw magkari; ang bisan sin-o nga may luyag, magkuha sing tubig sang kabuhi nga walay bayad.” (Bugna 22:17) Ining imbitasyon ginapalanog bisan sa karon, nga nagapakita nga matigayon na ang isa ka bahin sang tubig sang kabuhi. Apang sa bag-ong kalibutan, ina nga mga tubig magailig gikan sa trono sang Dios kag paagi sa Bag-ong Jerusalem nga daw subong gid sang isa ka suba.

21. Ano ang ginalaragway sang “suba sang tubig sang kabuhi,” kag paano ang palanan-awon ni Ezequiel tuhoy sa sini nga suba nagabulig sa aton agod mahangpan ini?

²¹ Ano ining “suba sang tubig sang kabuhi”? Importante sa kabuhi ang literal nga tubig. Mabuhi ang tawo bisan indi sia makakaon sing pila ka semana, apang mapatay sia kon indi sia makainom sing tubig sa mga isa ka semana lang. Ang tubig inugtinlo man kag importante sa kapagros. Sa amo, ang tubig sang kabuhi nagalaragway sa isa ka butang nga kinahanglanon para sa kabuhi kag kapagros sang katawhan. Ginhatagan man si manalagna Ezequiel sing isa ka palanan-awon tuhoy sa sini nga “suba sang tubig sang kabuhi,” kag sa iya palanan-awon, nag-ilig ang suba gikan sa templo pakadto sa Patay nga Dagat. Nian, may daku gid nga milagro nga natabo! Ang patay kag nalatom sang kemikal nga tubig nangin tab-ang nga tubig kag madamo gid sing isda! (Ezequiel 47:1-12) Huo, ginbuhi sang suba sa palanan-awon ang butang nga patay na, subong pamatuod nga ang suba sang tubig sang kabuhi nagalaragway sa aman sang Dios paagi kay Jesucristo agod ipasag-uli ang “patay” nga kaliwatan sang tawo sa himpit nga kabuhi. Ini nga suba “matin-aw subong sang kristal,” nga nagapakita sang pagkaputli kag pagkabalaan sang mga aman sang Dios. Indi ini kaangay sang nadagtaan sing dugo kag makamamatay nga “mga tubig” sang Cristiandad.—Bugna 8:10, 11.

22. (a) Diin nagahalin ining suba, kag ngaa nagakaigo ini? (b) Ano ang nadalahig sa tubig sang kabuhi, kag ano ang ginalakip sining simbuliko nga tubig?

²² Ang suba nagahalin sa “trono sang Dios kag sang Kordero.” Nagakaigo ini, kay ang sadsaran sang nagahatag-kabuhi nga mga aman ni Jehova amo ang halad nga gawad, kag gin-aman ini bangod ‘ginhigugma gid ni Jehova ang kalibutan amo nga ginhatag niya ang iya bugtong nga Anak, agod nga ang tagsatagsa nga nagatuo sa iya indi malaglag kundi makatigayon sing kabuhi nga walay katapusan.’ (Juan 3:16) Ang tubig sang kabuhi nagadalahig man sa Pulong sang Dios, nga ginapatuhuyan sa Biblia subong tubig. (Efeso 5:26) Apang, ang suba sang tubig sang kabuhi nagalakip indi lamang sang kamatuoran kundi sang tanan nga aman ni Jehova, pasad sa halad ni Jesus, agod matubos ang matinumanon nga mga tawo gikan sa sala kag kamatayon kag hatagan sila sing kabuhi nga walay katapusan.—Juan 1:29; 1 Juan 2:1, 2.

23. (a) Ngaa nagakaigo nga ang suba sang tubig sang kabuhi nagailig sa tunga sang malapad nga dalan sang Bag-ong Jerusalem? (b) Ano nga saad sang Dios kay Abraham ang matuman kon ang tubig sang kabuhi magailig sing bugana?

²³ Sa tion sang Isa ka Libo ka Tuig nga Paggahom, ang mga benepisyo sang gawad iaplikar sing bug-os paagi sa pagkasaserdote ni Jesus kag sang iya 144,000 ka kabulig nga saserdote. Gani, nagakaigo nga ang suba sang tubig sang kabuhi nagailig sa tunga sang malapad nga dalan sang Bag-ong Jerusalem. Ginahuman ini sang espirituwal nga Israel, nga upod kay Jesus nagahuman sa matuod nga binhi ni Abraham. (Galacia 3:16, 29) Busa, kon ang tubig sang kabuhi mag-ilig na sing bugana sa tunga sang malapad nga dalan sang simbuliko nga siudad, “ang tanan nga pungsod sang duta” makatigayon sing bug-os nga kahigayunan nga pakamaayuhon ang ila kaugalingon paagi sa binhi ni Abraham. Ang saad ni Jehova kay Abraham matuman sing bug-os.—Genesis 22:17, 18.

Mga Kahoy Sang Kabuhi

24. Ano ang nakita ni Juan sa magtimbang nga pangpang sang suba sang tubig sang kabuhi, kag ano ang ginalaragway sini?

²⁴ Sa palanan-awon ni Ezequiel, ang suba nagsulog pa gani, kag nakita sang manalagna nga nagtubo sa magtimbang nga pangpang sini ang tanan nga sahi sang hamunga nga mga kahoy. (Ezequiel 47:12) Apang ano ang nakita ni Juan? Amo ini: “Kag sa sini nga pangpang sang suba kag sa sina nga pangpang may mga kahoy sang kabuhi nga nagapamunga sing napulog-duha ka beses kada tuig, nga nagapamunga kada bulan. Kag ang mga dahon sang mga kahoy bulong sa mga pungsod.” (Bugna 22:2b) Pat-od man nga ining “mga kahoy sang kabuhi” nagalaragway sa bahin sang aman ni Jehova sa paghatag sing dayon nga kabuhi sa matinumanon nga katawhan.

25. Ano nga bugana nga aman ang ginahimo ni Jehova para sa matinumanon nga mga tawo sa bug-os kalibutan nga Paraiso?

²⁵ Bugana gid ang ginaaman ni Jehova para sa matinumanon nga mga tawo! Indi lamang sila makaambit sa makaparepresko nga tubig kundi mahimo man sila manguha gikan sa mga kahoy sing walay untat kag sarisari nga mga prutas nga makapabaskog sa lawas. Kon nangin kontento lamang kuntani ang aton una nga mga ginikanan sa kaanggid man nga “matahom” nga aman sa Paraiso sang Eden! (Genesis 2:9) Apang nag-abot na karon ang bug-os kalibutan nga Paraiso, kag paagi sa mga dahon sang simbuliko nga mga kahoy ‘bulngon ni Jehova ang mga pungsod.’c Labaw sa bisan ano nga bulong, herbal ukon indi, nga ginagamit karon, ang paggamit sining makapaalibyo nga simbuliko nga mga kahoy magahimo sa tumuluo nga katawhan nga mangin himpit sa espirituwal kag pisikal.

26. Ano ang mahimo nalakip sa mga kahoy sang kabuhi, kag ngaa?

²⁶ Ang mga kahoy, nga bugana nga ginabunyagan sang suba, mahimo nga nagalakip man sa 144,000 ka katapo sang asawa sang Kordero. Samtang yari pa sila sa duta, magainom man sila gikan sa aman sang Dios para sa kabuhi paagi kay Jesucristo. Talalupangdon nga ining ginpanganak sang espiritu nga mga kauturan ni Jesus matagnaon nga ginatawag nga “dalagku nga mga kahoy sang pagkamatarong.” (Isaias 61:1-3; Bugna 21:6) Nakapatubas na sila sing bugana nga espirituwal nga bunga sa kadayawan ni Jehova. (Mateo 21:43) Kag sa tion sang Isa ka Libo ka Tuig nga Paggahom, makigbahin sila sa pagpadapat sang mga aman sang gawad nga ‘magabulong sa mga pungsod’ gikan sa sala kag kamatayon.—Ipaanggid ang 1 Juan 1:7.

Wala Na Sing Gab-i

27. Ano nga dugang pa nga mga pagpakamaayo ang ginsambit ni Juan para sa mga may pribilehiyo nga makasulod sa Bag-ong Jerusalem, kag ngaa ginasiling nga “wala na sing bisan ano nga pagpakamalaut”?

²⁷ Pagsulod sa Bag-ong Jerusalem—sa pagkamatuod, wala na sing pribilehiyo nga mas matahom pa sa sini! Hunahunaa lamang—ang kubos kag di-himpit anay nga mga tawo magasunod kay Jesus sa langit agod mangin bahin sang isa ka mahimayaon gid nga kahimusan! (Juan 14:2) Naghatag si Juan sing ideya kon ano nga mga pagpakamaayo ang maagom nila, nga nagasiling: “Kag wala na sing bisan ano nga pagpakamalaut. Kundi ang trono sang Dios kag sang Kordero mangin sa siudad, kag ang iya mga ulipon magahimo sing sagrado nga pag-alagad sa iya; kag makita nila ang iya nawong, kag ang iya ngalan mangin sa ila agtang.” (Bugna 22:3, 4) Sang maglain ang mga saserdote sa Israel, ginpakamalaut sila ni Jehova. (Malaquias 2:2) Nagsiling si Jesus nga ginpabay-an ang walay pagtuo nga “balay” sang Jerusalem. (Mateo 23:37-39) Apang sa Bag-ong Jerusalem, “wala na sing bisan ano nga pagpakamalaut.” (Ipaanggid ang Zacarias 14:11.) Ang tanan nga pumuluyo sini nakatilaw na sang kalayuhon nga mga pagtilaw diri sa duta, kag bangod nagdaug sila, ‘isuklob nila ang pagkadimadinulunton kag pagkadimamalatyon.’ Tuhoy sa ila, nahibaluan ni Jehova, subong sang nahibaluan man niya tuhoy kay Jesus, nga indi gid sila magtalikod. (1 Corinto 15:53, 57) Dugang pa, “ang trono sang Dios kag sang Kordero” mangin didto, agod nga may kalig-unan ang nahamtangan sang siudad tubtob sa walay katubtuban.

28. Ngaa nasulat ang ngalan sang Dios sa agtang sang mga katapo sang Bag-ong Jerusalem, kag ano ang ila makakulunyag nga palaabuton?

²⁸ Kaangay ni Juan, ang tanan nga palaabuton nga mga katapo sinang langitnon nga siudad “mga ulipon” sang Dios. Subong amo sina, ang ngalan sang Dios kitaon nga nasulat sa ila agtang, nga nagapakilala sa iya subong Tag-iya nila. (Bugna 1:1; 3:12) Kabigon nila nga isa ka daku gid nga pribilehiyo ang paghalad sa iya sing sagrado nga pag-alagad subong bahin sang Bag-ong Jerusalem. Sang yari si Jesus sa duta, naghatag sia sing makakulunyag nga saad sa sinang palaabuton nga mga manuggahom, nga nagasiling: “Malipayon ang mga putli sing tagipusuon, kay makita nila ang Dios.” (Mateo 5:8) Pat-od nga malipay gid ining mga ulipon nga sa ila pagsimba kay Jehova makita nila mismo si Jehova!

29. Ngaa nagsiling si Juan nga “wala na sing gab-i” sa langitnon nga Bag-ong Jerusalem?

²⁹ Nagpadayon si Juan: “Subong man, wala na sing gab-i, kag wala sila nagakinahanglan sing kasanag sang suga ukon kasanag sang adlaw, bangod si Jehova nga Dios magahatag sing kasanag sa ila.” (Bugna 22:5a) Ang dumaan nga Jerusalem, kaangay sang bisan ano nga siudad sa duta, nagasandig sa adlaw para sa kapawa kon adlaw kag sa kapawa sang bulan kag sang artipisyal nga suga kon gab-i. Apang sa langitnon nga Bag-ong Jerusalem, indi na kinahanglanon ina nga kapawa. Ang mangin suga sang siudad amo mismo si Jehova. Ang “gab-i” mahimo man gamiton sa malaragwayon nga kahulugan, agod magpatuhoy sa kalamidad ukon pagbulag gikan kay Jehova. (Miqueas 3:6; Juan 9:4; Roma 13:11, 12) Indi gid matabo ina nga sahi sang gab-i sa mahimayaon kag masanag nga presensia sang labing gamhanan nga Dios.

30. Paano ginhinakpan ni Juan ang halangdon nga palanan-awon, kag ano ang ginapasalig sa aton sang Bugna?

³⁰ Ginhinakpan ni Juan ining halangdon nga palanan-awon paagi sa pagsiling tuhoy sa sining mga ulipon sang Dios: “Kag magagahom sila subong mga hari tubtob sa walay katubtuban.” (Bugna 22:5b) Matuod, sa katapusan sang isa ka libo ka tuig, ang mga benepisyo sang gawad mapadapat na sing bug-os, kag ipresentar ni Jesus ang nahimpit nga kaliwatan sang tawo sa iya Amay. (1 Corinto 15:25-28) Kon ano ang ginahunahuna ni Jehova para kay Jesus kag sa 144,000 sa tapos sina, wala kita makahibalo. Apang ginapasalig kita sang Bugna nga ang ila pinasahi nga sagrado nga pag-alagad kay Jehova magapadayon tubtob sa walay katubtuban.

Ang Makalilipay nga Talipuspusan Sang Bugna

31. (a) Ano ang talipuspusan sang palanan-awon tuhoy sa Bag-ong Jerusalem? (b) Ano ang himuon sang Bag-ong Jerusalem para sa iban pa nga matutom nga katawhan?

³¹ Ang katumanan sining palanan-awon tuhoy sa Bag-ong Jerusalem, ang nobya sang Kordero, amo ang makalilipay nga talipuspusan nga ginapatuhuyan sang Bugna, kag nagakaigo gid ini. Ang tanan nga masigka-Cristiano ni Juan sang nahauna nga siglo nga amo ang una nga ginapatuhuyan sang tulun-an nagpaabot sa pagsulod sa sina nga siudad subong di-mamalatyon nga espiritu nga kaupod nga mga manuggahom ni Jesucristo. Amo man ang ginalauman sang nagkalabilin sang hinaplas nga mga Cristiano nga buhi pa karon sa duta. Sa amo ang Bugna nagapadulong sa mahimayaon nga talipuspusan sini, sa paghiusa sang nakompleto na nga nobya sa Kordero. Masunod, paagi sa Bag-ong Jerusalem, ang mga kaayuhan sang halad nga gawad ni Jesus ipadapat sa katawhan, agod nga sa ulihi ang tanan nga matutom makatigayon sing kabuhi nga walay katapusan. Sa sini nga paagi ang nobya, ang Bag-ong Jerusalem, subong matutom nga kabulig sang iya Nobyo nga Hari, magabulig sa pagtukod sing matarong nga bag-ong duta tubtob sa walay katubtuban—tanan sa himaya sang aton Soberano nga Ginuong Jehova.—Mateo 20:28; Juan 10:10, 16; Roma 16:27.

32, 33. Ano ang natun-an naton gikan sa Bugna, kag ano ang dapat mangin determinasyon naton sing tinagipusuon?

³² Gani, malipayon gid kita, samtang nagahingapos ang aton pagbinagbinag sa tulun-an sang Bugna! Nakita naton nga napaslawan gid ang katapusan nga mga panikasog ni Satanas kag sang iya binhi kag ginhimo sing bug-os ang matarong nga mga paghukom ni Jehova. Ang Babilonia nga Daku dapat madula na, nga sundan sang tanan nga malaut gid nga mga bahin sang kalibutan ni Satanas. Si Satanas mismo kag ang iya mga demonyo itagbong sa kadadalman kag laglagon sa ulihi. Ang Bag-ong Jerusalem magagahom upod kay Cristo gikan sa mga langit samtang nagakatabo ang pagkabanhaw kag paghukom, kag ang nahimpit nga katawhan makaagom sa ulihi sing kabuhi nga walay katapusan sa Paraiso nga duta. Maathag gid nga ginalaragway sang Bugna ining tanan nga butang! Ginapalig-on gid sini ang aton determinasyon nga ‘ipahayag ining walay katapusan nga maayong balita subong makalilipay nga balita sa tagsa ka pungsod kag tribo kag hambal kag katawhan’ sa duta karon! (Bugna 14:6, 7) Nagapanikasog ka gid bala sa sining daku nga hilikuton?

³³ Upod ang mapinasalamaton gid nga tagipusuon, talupangdon naton ang nagahinakop nga mga pulong sang Bugna.

[Mga nota]