Mga Pamangkot Gikan sa mga Bumalasa

◼ Makalampuwas bala ang iban nga hinaplas nga mga Cristiano sa “dakung kapipit-an” agod magkabuhi sa duta sa bag-ong kalibutan antes sila dal-on sa langit?

Sing prangka, ang Biblia wala nagasiling.

Ang mga Cristiano interesado sa mga pribilehiyo nga mahimo ihatag sang Dios sa ila. (Binuhatan 1:⁠6) Matuod ina labi na sa aton tion kutob sang gintukod ang Ginharian. (Mateo 24:​3, 24, 34) Bangod ang katapusan sining malaut nga sistema magaabot sa panahon nila, ang mga Cristiano nagapalibog kon bala ang iban sa mga hinaplas-sang-espiritu makalampuwas nga buhi sa “inaway sang dakung adlaw sang Dios” kag magaalagad sa duta sa makadali antes nila mabaton ang ila langitnon nga padya. (Bugna 16:14) Ang Biblia wala nagasiling nga mahanabo ini, apang ang pila ka pagsulundan kag mga tagna gingamit sa pagpakita nga basi amo sina. Sa baylo nga mangin dogmatiko, matan-aw naton kon ano ang himuon sang Dios.

Ang iban nga mga hitabo sa Biblia may mga kaanggid sang ulihi sa tunga sang katawhan sang Dios. Halimbawa, nahibaluan naton nga si Jonas yara sa sulod sang daku nga isda sa sulod sang tatlo ka adlaw kag tatlo ka gab-i. Mahimo ini tamdon sang iban nga mga tawo nga isa lamang ka halimbawa sang balaan nga pagluwas, apang nagsiling si Jesus nga isa ini ka matagnaon nga sulundan sa kon paano sia mangin sa lulubngan sa kaanggid nga panag-on antes sang iya pagkabanhaw. (Jonas 1:17; Mateo 12:40) Huo, ang eksperiensia ni Jonas isa ka matagnaon nga tipo. Sing halangpunon, ginpaabot sang mga alagad sang Dios ang mga tagna kag ispisipiko nga mga kasaysayan sang Biblia sa pagtan-aw kon bala mahimo ini magpakita kon paano si Jehova makig-angot sa ila.

Subong halimbawa may kaangtanan sa tagna sa Biblia, ang The Watch Tower sang Disiembre 15, 1928, naghinun-anon sang Miqueas 5:​2-15. Ang tolon-an ni Miqueas naghinun-anon nahanungod sa paghapay sang ‘mga Asiriahanon’ sa Samaria kag sa pagpauli sang mga Judiyo halin sa pagkatapok sa Babilonia. (Miqueas 1:​1, 5-7; 4:10) Apang gintudlo sini ang ulihi nga mga hitabo, subong sang pagkabun-ag sang Mesias sa Betlehem. (Miqueas 5:⁠2) Gintagna ni Miqueas nga sa tapos sang pagluwas sa ila gikan “sa Asiriahanon,” “ang nabilin ni Jacob” mangin “subong sang tun-og gikan kay Jehova” kag “subong sang leon sa tunga sang mga panong nga mga karnero.” (Miqueas 5:​6-8) Ang The Watch Tower nagakomento: “Mahimo ini kabigon subong indikasyon nga ang iban nga nagkalabilin mangin sa duta bisan pa pagkatapos nga maaway ang Armagedon kag nian ang iban may daku pa nga buluhaton nga himuon sa ngalan sang Ginuo kag sa iya kadayawan kag himaya.” Talupangda ang maarang-arang kag rasonable nga pamulong nga gingamit sa pagpakilala sini nga posibilidad: “Mahimo ini kabigon subong indikasyon.”

Kamusta ang kasaysayan sang Biblia nga kaanggid sa sina nga paglampuwas sa duta? Ang isa ka halimbawa nga ginhatag nagahilabot kay Noe kag sa iya pamilya. Si Noe gintamod nga nagalaragway kay Jesus sa sining tion sang katapusan. (Genesis 6:​8-10; Mateo 24:37) Subong nga ginpangunahan ni Noe ang iya asawa kag ang ila tatlo ka anak nga lalaki kag tatlo ka umagad tubtob sa katapusan sinang dumaan nga sistema, si Cristo magapanguna sa nagkalabilin sang iya nobya nga klase kag sadtong mangin mga anak sang “Dayon nga Amay,” si Jesus. Ang asawa ni Noe nakalampuwas sa Anaw kag nakig-ambit sa pagbag-o sang matuod nga pagsimba sa natinluan nga duta. Ang kaanggid mahimo nga amo ang paglampuwas pasulod sa bag-ong kalibutan sang nagkalabilin sang nobya nga klase.​—⁠Isaias 9:6, 7; 2 Corinto 11:2; Bugna 21:​2, 9.a

Ang iban nga mga kasaysayan sa Biblia gintamod man subong nagapanugda nga ang iban sang mga hinaplas mahimo magkabuhi sa bag-ong kalibutan. Halimbawa, si Jeremias nakalampuwas sa pagkalaglag sang Jerusalem; “ang lalaki” nga may tintirohan sang manugsulat nagpabilin agod mahimo ang buhat sa pagpatay antes sia nagbalik sa paghatag sang iya report.​—⁠Ezequiel 9:​4, 8, 11.

Ang mga komento nahanungod sa posibilidad nga ang iban sang mga hinaplas mahimo makalampuwas pasulod sa bag-ong kalibutan ginhimo upod ang maayo nga mga tuyo kag sa kapawa sang naunang mga hitabo sa Biblia sa panikasog nga mahangpan ang mga tagna ukon mga sulundan nga mahimo may ulihi nga mga kaanggid. Kon matabo nga wala sing hinaplas nga mabilin sa duta, wala sing rason nga indi maayawan. Ginbaton na naton nga ang mga hitabo sa Biblia mahangpan sing labi sa pagligad sang tion. Halimbawa, ang The Watchtower sang Hulyo 15, 1981, naghinun-anon liwat sang Miqueas 5:​6-9 kag nagpaathag nga “ang nagkalabilin sang espirituwal nga mga Israelinhon indi kinahanglan maghulat tubtob pagkatapos sang . . . Har–Magedon agod mangin subong sang ‘tun-og’ sa kapagsik sang katawhan.” Ini nga paghinun-anon naghatag liwat sang posibilidad nga ang nagkalabilin mahimo makalampuwas sa dakung inaway sang Dios kag sa makadali “padayon nga mangin subong sang makapapagsik nga ‘tun-og’ sa ‘dakung kadam-an’ sa ‘iban nga mga karnero.’ ” Apang, makita naton nga ang pagligad sang tion kag ang pagdugang sang espirituwal nga kapawa sarang magpasangkad kag magbag-o sang aton paghangop sa tagna ukon sa mga drama sa Biblia.​—⁠Hulubaton 4:⁠18.

Nahibaluan naton nga ginaangot sang Biblia ang ‘pagkari sang Anak sang tawo’ sa ‘pagtipon sang mga pinili gikan sa apat ka hangin.’ (Mateo 24:29-31) Subong man, sa tion sang “presensia sang Ginuo” sa kagamhanan sa Ginharian, ang mga hinaplas nga napatay ginbanhaw pakadto sa kabuhi sa langit. (1 Tesalonica 4:​15, 16) Ining mga pinat-inan mangin bahin sang asawa sang Kordero. San-o ina natabo?

Sa tolon-an sang Bugna, sa gilayon pagkatapos ginsugid ni Juan ang nahanungod sa pagpatay sang Dios sa relihioso nga makihilawason, ang Babilonia nga Daku, ginlaragway niya “ang kasal sang Kordero.” Ang malaw-ay, imoral nga “babayi” gindula, kag makita naton “ang nobya, ang asawa sang Kordero” nga ‘napanaptan sing lino nga manipis, masiga kag lubus, nga amo ang mga buhat nga matarong sang mga balaan.’ (Bugna 18:10; 19:​2, 7, 8; 21:⁠9) Ang kalaglagan sang Babilonia nga Daku amo ang bahin sang dakung kapipit-an. (Mateo 24:21; Bugna 7:14) Gani mahimo irason nga ang iban nga nobya nga klase makalampuwas sa dakung kapipit-an subong pamatuod sang kahamuot kag proteksion ni Jehova. (Sofonias 2:⁠3; ipaanggid ang Mateo 24:22.) Busa kon amligan sila sa duta, mahimo sila magpabilin diri tubtob ginapakamaayo sang Dios nga dal-on sila sa langit.

Apang, ang presentasyon sa Bugna indi pasunod. Kag indi ini subong nga ang diutay nga nagkalabilin sang mga hinaplas kinahanglan agod ang bag-ong kalibutan magluntad, kay ginhanas na nila ang minilyon ka matutom nga mga Cristiano nga magakabuhi sing dayon sa duta. Sing nahisuno, sarang madala sang Dios ining mga hinaplas sa langit sa gilayon pagkalaglag sang Babilonia nga Daku, nagahanda para sa “kasal sang Kordero” nga mahanabo. Gani ang tanan nga mga balaan magapakigbahin kaupod ni Cristo sa ‘pagbantay sa mga pungsod sa bilugon nga salsalon’ sa nabilin nga bahin sang dakung kapipit-an. (Bugna 2:​26, 27; 19:​11-21) Kon amo sina ang himuon sang Dios, ang tanan nga 144,000 mangin kaupod ni Cristo sa ‘paggahom subong mga hari kaupod ni Cristo para sa bug-os nga isa ka libo ka tuig.’​—⁠Bugna 20:⁠4.

Maayo gid nga ang katawhan sang Dios interesado katama sa paghibalo kon paano niya tuytuyan kag padyaan ang iya mga alagad. (Ipaanggid ang 1 Pedro 1:⁠12.) Nagapabanaag ini sang ila pagsalig nga ang ila kabubut-on pagahimuon. Bisan indi kita kag indi dapat mangin dogmatiko nahanungod sa mga partikularmente, malangkagon naton nga mapaabot kon ano ang maha­nabo.

[Footnote]