Kapitulo 10

Pagkangil-ad sa “Madalom nga mga Butang ni Satanas”

TIATIRA

 1. Daw ano kalayo ang nahamtangan sang Tiatira halin sa iban nga mga kongregasyon, kag ano ang relihioso nga kahimtangan didto?

MGA 65 kilometros pabagatnan-sidlangan gikan sa Bergama (Pergamo) amo ang mauswagon nga Turko nga banwa sang Akhisar. Sang nagligad nga mga 1,900 ka tuig, ini nga banwa amo ang nahamtangan sang Tiatira. Ang Tiatira mahapos nga kadtuan sang nagalakbay nga manugtatap paagi sa nasulod nga dalan gikan sa Pergamo kag dayon maglibot sa nabilin nga mga kongregasyon nga ginasambit sa Bugna kapitulo 3—Sardis, Filadelfia, kag Laodicea. Indi kaangay sang Pergamo, ang Tiatira daw indi nangin importante nga sentro sang pagsimba sa emperador, apang may mga altar ini kag mga templo nga nadedikar sa pagano nga mga dios. Nagbantog ang Tiatira subong sentro sang komersio.

2, 3. (a) Ano ang nauna nga ginrekord tuhoy sa isa ka taga-Tiatira nga nangin Cristiano? (b) Ano ang kahulugan para sa mga Cristiano sa Tiatira nga si Jesus “Anak sang Dios” kag nga sia may “mga mata kaangay sang nagadabdab nga kalayo”?

² Sang nagabantala si Pablo sa Macedonia, nakilala niya ang taga-Tiatira nga babayi nga si Lidia, nga manugbaligya sing purpura. Malipayon nga ginbaton ni Lidia kag sang iya bug-os nga panimalay ang mensahe nga ginbantala ni Pablo kag nagpakita sila sing tumalagsahon nga pagkamaabiabihon. (Binuhatan 16:14, 15) Sia ang una nga taga-Tiatira nga ginrekord nga nagbaton sang Cristianismo. Sa pagligad sang tion, isa ka kongregasyon sang mga Cristiano ang gintukod sa siudad. Ginpatuhoy ni Jesus ang iya pinakamalaba nga mensahe sa sini: “Kag sa anghel sang kongregasyon sa Tiatira isulat mo: Amo ini ang mga butang nga ginasiling sang Anak sang Dios, sia nga ang mga mata kaangay sang nagadabdab nga kalayo, kag ang iya mga tiil kaangay sang puro nga saway.”—Bugna 2:18.

³ Amo lamang ini ang kahigayunan nga ang mga pulong nga “Anak sang Dios” ginasambit sa Bugna, bisan pa sa iban nga mga teksto ginapatuhuyan ni Jesus si Jehova subong “Amay ko.” (Bugna 2:27; 3:5, 21) Ang paggamit sang titulo diri mahimo gid nga nagpahanumdom sa mga Cristiano sa Tiatira sang pagkasuod ni Jesus kay Jehova. Ini nga Anak may “mga mata kaangay sang nagadabdab nga kalayo”—isa ka paandam sa mga Cristiano sa Tiatira nga ang iya paghukom magadabdab batok sa bisan ano nga makita niya nga nagadagta sa kongregasyon. Sa ikaduha nga pagpatuhoy sa iya puro, tulad-saway nga mga tiil, ginpadaku niya ang iya nagasilak nga huwaran sa pagkatutom sang yari sia sa duta. Walay duhaduha nga ginpamatian sang mga Cristiano sa Tiatira ang iya laygay, kag gani dapat amo man ang himuon naton karon!—1 Pedro 2:21.

4, 5. (a) Ngaa ginhatagan ni Jesus sing komendasyon ang mga Cristiano sa Tiatira? (b) Paano ang kongregasyon sa Tiatira kaanggid sa mga kongregasyon sang mga Saksi ni Jehova karon?

⁴ Makalilipay nga ginhatagan ni Jesus sing komendasyon ang mga taga-Tiatira. Nagsiling sia: “Nahibaluan ko ang imo mga buhat, kag ang imo gugma kag pagtuo kag ministeryo kag pagbatas, kag ang imo mga buhat sining ulihi labaw pa sa mga nauna.” (Bugna 2:19) Indi kaangay sang mga taga-Efeso, wala madula sang hinaplas nga mga Cristiano didto ang ila una nga gugma kay Jehova. Malig-on ang ila pagtuo. Dugang pa, ang ila mga buhat labaw pa sa mga nauna, kag kaangay sang tatlo ka nauna nga kongregasyon, ang mga Cristiano sa Tiatira nagabatas. Kaanggid gid ini sa halos 100,000 ka kongregasyon sang mga Saksi ni Jehova sa bug-os nga duta karon! Ang gugma kay Jehova dayag gid, samtang ang espiritu sang kakugi sa ministeryo nagahil-ob sa organisasyon, nga nagapapagsik sa mga bata kag tigulang. Madamo ang nagapayunir, sa amo maalamon nga ginagamit nila ang nabilin nga tion agod ibantala ang makalilipay nga paglaum sa nagapakari nga Ginharian sang Dios!—Mateo 24:14; Marcos 13:10.

⁵ Sa sulod sang mga tinuig, madamo nga matutom, sang hinaplas nga nagkalabilin kag sang dakung kadam-an, ang nagapakita sing huwaran nga pagbatas sa pag-alagad sa Dios, samtang ang kalibutan sa palibot nila amat-amat nga nagakadulaan sing paglaum. Apang magpakaisog kita! Ginapamatud-an sang Bugna ang pamatuod sang nauna nga mga manalagna sang Dios. “Malapit na ang daku nga adlaw ni Jehova. Malapit na ini kag nagadalidali gid.”—Sofonias 1:14; Joel 2:1; Habacuc 2:3; Bugna 7:9; 22:12, 13.

“Ang Babayi nga si Jezebel”

 6. (a) Walay sapayan sang dalayawon nga mga bahin, ano nga problema ang natalupangdan ni Jesus sa kongregasyon sa Tiatira nga dapat atubangon gilayon? (b) Sin-o si Jezebel, kag may matuod bala nga basehan ang ginapangangkon niya nga isa sia ka manalagna?

⁶ Ang nagadabdab nga mga mata ni Jesus nagtulok sing dugang pa. Natalupangdan niya ang isa ka butang nga dapat atubangon gilayon. “Apang,” siling niya sa mga Cristiano sa Tiatira, “amo ini ang naindi-an ko sa imo, nga ginakunsinti mo ang babayi nga si Jezebel, nga nagatawag sa iya kaugalingon nga manalagna, kag nagatudlo sia kag nagapatalang sa akon mga ulipon nga magpakighilawas kag magkaon sing mga butang nga ginhalad sa mga idolo.” (Bugna 2:20) Sang ikanapulo nga siglo B.C.E., si Reyna Jezebel, ang nagasimba kay Baal nga asawa ni Hari Ahab sang Israel, nagbantog sa kalainan bangod sang iya mga pagpatay, panghilahi, kag pagkadominante. Ginpapatay sia ni Jehu nga hinaplas ni Jehova. (1 Hari 16:31; 18:4; 21:1-16; 2 Hari 9:1-7, 22, 30, 33) Ang idolatroso nga si Jezebel wala sing basehan sa iya ginpangangkon nga manalagna sia. Indi sia kaangay nanday Miriam kag Debora, nga nag-alagad subong matutom nga mga manalagna sa Israel. (Exodo 15:20, 21; Hukom 4:4; 5:1-31) Kag ang espiritu ni Jehova wala magpahulag sa iya sa pagpanagna subong sang pagpahulag sini sa tigulang na nga si Ana kag sa apat ka anak nga babayi ni Felipe nga ebanghelisador.—Lucas 2:36-38; Binuhatan 21:9.

 7. (a) Sa pagsambit sa “babayi nga si Jezebel,” ano nga impluwensia ang mahimo gid nga ginapatuhuyan ni Jesus? (b) Paano mahimo gid ginpakamatarong sang pila ka babayi nga mga katapo sang kongregasyon ang ila pagkabatinggilan?

⁷ Maathag, kon amo, nga nagapakunokuno lamang “ang babayi nga si Jezebel” nga nagapangangkon nga manalagna sa Tiatira. Wala sia ginasakdag sang espiritu sang Dios. Sin-o sia? Mahimo gid nga sia isa ka babayi ukon grupo sang mga babayi nga nagapanghikot subong wala sing huya kag malaut nga impluwensia sa kongregasyon. Mahimo nga ginadalahig sang pila ka babayi nga mga katapo sang kongregasyon ang iban sa imoralidad, samtang makahas nga ginapakamatarong ang ila pagkabatinggilan paagi sa pagpatiko sang kasulatan. Butig nga pagpanagna sa pagkamatuod! Ginaimpluwensiahan nila ang iban nga mahulog sa ila mga dalanon sang “pagpakighilawas, kahigkuan, kailigbon sang unod, makahalalit nga handum, kag pagkamahamkunon, nga isa ka idolatriya.” (Colosas 3:5) Luyag nila nga ang mga katapo sang kongregasyon magpatuyang man sa imoral kag maiyaiyahon nga estilo sang pagkabuhi nga ginatugutan karon, ukon ginapabulagbulagan, sa kalabanan nga relihion sang Cristiandad.

 8. (a) Ano ang ginsiling ni Jesus tuhoy kay “Jezebel” sa Tiatira? (b) Paano ang indi nagakaigo nga impluwensia sang babayi nabatyagan sa moderno nga mga tion?

⁸ Nagpadayon si Jesus sa pagsiling sa mga gulang sa Tiatira: “Kag ginhatagan ko sia sing tion sa paghinulsol, apang indi niya luyag maghinulsol sa iya pagpakighilawas. Yari karon! Pamasakiton ko sia sing malubha, kag ang mga nagapakighilahi upod sa iya paantuson ko sa dakung kapipit-an, luwas lamang kon maghinulsol sila sa mga buhat nga kaangay sang ginhimo niya.” (Bugna 2:21, 22) Subong nga gindominahan sang orihinal nga Jezebel si Ahab kag ginbatuan ang gintangdo sang Dios nga manuglaglag nga si Jehu, mahimo nga ini nga impluwensia sang babayi nagatinguha man nga maniobrahan ang mga bana kag mga gulang. Daw ginkunsinti sang mga gulang sa Tiatira ining indi mapainubuson nga impluwensia ni Jezebel. Naghatag diri si Jesus sing mabaskog nga paandam para sa ila, subong man para sa bug-os kalibutan nga kongregasyon sang katawhan ni Jehova karon. Sa moderno nga mga tion, ginhaylo sinang maisog nga mga babayi ang ila mga bana nga mangin mga apostata kag ginsugyot pa gani sila nga magpasaka sing panumbungon sa korte batok sa matutom nga mga alagad ni Jehova.—Ipaanggid ang Judas 5-8.

 9. (a) Ngaa ang ginsiling ni Jesus wala nagaguba sa reputasyon sang tanan nga babayi sa kongregasyon? (b) San-o lamang nagautwas ang impluwensia ni Jezebel?

⁹ Apang, wala gid sini ginaguba ang reputasyon sang matutom nga mga babayi sa Cristianong kongregasyon. Sa karon, daku nga bahin sang pagpanaksi ang ginahimo sang matutom nga mga utod nga babayi; paagi sa ila mga pagtuon sa Biblia sa mga puluy-an, madamo nga mga bag-uhan ang ginatuytuyan pasulod sa kongregasyon. Ginapakamaayo sang Dios ini nga kahimusan, subong sang ginapakita sang Salmo 68:11: “Si Jehova mismo nagasiling; ang mga babayi nga nagabantala sing maayong balita isa ka daku nga hangaway.” Mahimo nga maayo nga impluwensia ang mahatag sa mga bana sang malum-ok kag matinahuron nga paggawi sang mga asawa, nga “may daku gid nga balor sa mga mata sang Dios.” (1 Pedro 3:1-4) Gindayaw ni Hari Lemuel ang sangkol kag mapisan nga asawa. (Hulubaton 31:10-31) Nagautwas lamang ang impluwensia ni Jezebel kon ginahaylo sang mga babayi ang mga lalaki ukon kon ginaduhaduhaan ukon ginasikway ang prinsipio sang pagkaulo.—Efeso 5:22, 23; 1 Corinto 11:3.

10. (a) Ngaa si Jezebel kag ang iya mga anak nakabaton sing paghukom? (b) Ano ang makatalagam nga kahimtangan sang mga nangin anak ni Jezebel, kag ano ang dapat nila himuon?

¹⁰ Nagapatuhoy sa “babayi nga si Jezebel,” nagpadayon si Jesus: “Kag patyon ko ang iya mga anak paagi sa makamamatay nga salot, agod mahibaluan sang tanan nga kongregasyon nga ako amo ang nagausisa sang mga batobato kag mga tagipusuon, kag ihatag ko sa tagsatagsa sa inyo ang suno sa inyo mga buhat.” (Bugna 2:23) Ginhatagan ni Jesus sing tion si Jezebel kag ang iya mga anak sa paghinulsol, apang nagpadayon sila sa ila imoral nga mga dalanon kag busa dapat hukman. May yara mabaskog nga mensahe diri para sa mga Cristiano karon. Ang mga nagailog kay Jezebel, mga lalaki man ukon mga babayi, kag sa amo mangin mga anak niya paagi sa paglalis sa mga prinsipio sang Biblia tuhoy sa pagkaulo kag sa moralidad ukon paagi sa pagpakatig-a sang ila ulo nga ginasikway ang teokratiko nga kahimusan, may malala nga balatian sa espirituwal. Matuod, kon pangabayon niya ang mga gulang sa kongregasyon nga pangamuyuan sia, “ang pangamuyo sang pagtuo magaayo sa isa nga nagamasakit, kag si Jehova magabangon sa iya”—sa kondisyon nga sia mapainubuson nga magahulag nahisanto sa sina nga mga pangamuyo. Apang indi gid maghunahuna ang isa nga sarang niya madaya ang Dios ukon si Cristo paagi sa pagtago sang imoral nga mga buhat ukon pagpakitakita sing makugi nga pag-alagad.—Santiago 5:14, 15.

11. Paano ang mga kongregasyon karon ginabuligan nga mangin alisto sa pagsulod sang malain nga impluwensia sang babayi?

¹¹ Makalilipay nga ang kalabanan nga kongregasyon sang mga Saksi ni Jehova karon alisto sa sini nga katalagman. Ginabantayan sang mga gulang ang paglutaw sang huyog sa di-teokratiko nga mga panimuot kag sa pagpakasala. Ginatinguhaan nila nga buligan ang mga lalaki kag mga babayi nga yara sa katalagman agod nga magmalig-on sila sa espirituwal kag mapasibu samtang indi pa atrasado. (Galacia 5:16; 6:1) Sing mahigugmaon kag malig-on, ginabalabagan sining Cristiano nga mga manugtatap ang bisan anong pagtinguha sang mga babayi nga magporma sing mga grupo agod sakdagon ang mga lihok kaanggid sa women’s liberation. Dugang pa, ang sibu sa tion nga laygay pirme ginahatag sa mga publikasyon sang mga Saksi ni Jehova.a

12. Sa anong paagi ang Juan nga klase karon nagapakita sing kakugi nga kaanggid sang kay Jehu?

¹² Apang, sa kaso sang imoralidad, kag ilabi na kon nangin ugali na ini, ang di-mahinulsulon nga mga makasasala dapat i-disfellowship. Madumduman naton ang kakugi nga ginpakita ni Jehu sa pagdula sang tanan nga agi sang impluwensia ni Jezebel sa Israel. Nahisanto sa sini, ang Juan nga klase karon malig-on man nga nagapanghikot, subong huwaran para sa ila “Jehonadab” nga mga kaupod kag ginapakita nila nga tuhay gid sila sa kunsintidor nga mga ministro sang Cristiandad.—2 Hari 9:22, 30-37; 10:12-17.

13. Ano ang matabo sa mga nagapadaug sa malain nga impluwensia sang babayi?

¹³ Subong Mensahero kag Hukom ni Jehova, husto ang ginhimo sang Anak sang Dios nga ginbuyagyag niya ang moderno nga Jezebel kag pamasakiton sia sing malubha, kay ang iya espirituwal nga balatian madugay na. (Malaquias 3:1, 5) Ang mga nagapadala sa sining malain nga impluwensia sang babayi magaantos man sing daku nga kapiot—ang kasubo nga ma-disfellowship kag mahamulag sa Cristianong kongregasyon, nga daw patay na. Luwas kon maghinulsol sila, manumbalik, kag batunon liwat sa kongregasyon, nagaatubang man sila sing pisikal nga kamatayon paagi sa “makamamatay nga salot”—sa pinakamadugay, sa dakung kapipit-an. Samtang wala pa ina, mahimo sila makapanumbalik kon hinulsulan gid nila ang ila sayop nga mga buhat.—Mateo 24:21, 22; 2 Corinto 7:10.

14. (a) Paano ginagamit ni Jesus ang mga gulang sa paghusay sang pila ka mga problema, subong sang impluwensia ni Jezebel? (b) Paano dapat sakdagon sang kongregasyon ang mga gulang nga nagahusay sina nga mga problema?

¹⁴ Dapat mahibaluan sang “tanan nga kongregasyon” nga si Jesus nagausisa sang “mga batobato,” ang pinakatudok nga emosyon, kag sang “tagipusuon,” ang nasulod nga pagkatawo, lakip ang mga motibo. Sa sining katuyuan, ginagamit niya ang masaligan nga mga bituon, ukon mga gulang, sa paghusay sang pila ka problema nga mahimo mag-utwas, subong sang impluwensia ni Jezebel. (Bugna 1:20) Sa tapos mausisa sing maid-id sang mga gulang ini nga sahi sang problema kag nahatag na ang desisyon, wala sing kinamatarong ang bisan sin-o nga mag-usisa kon ngaa amo sina ang desisyon. Dapat mapainubuson nga batunon sang tanan ang desisyon sang mga gulang kag padayon nga sakdagon ining mga bituon sa kongregasyon. Ang katutom kay Jehova kag sa kahimusan sang iya organisasyon pagapadyaan. (Salmo 37:27-29; Hebreo 13:7, 17) Tuhoy sa imo, kabay nga ang imo bahin amo ang pagpakamaayo kon hukman na ni Jesus ang tagsatagsa suno sa iya mga binuhatan.—Galacia 5:19-24; 6:7-9.

“Hupti Ninyo Sing Malig-on ang Yara sa Inyo”

15. (a) Ano ang ginsiling ni Jesus sa mga wala maimpluwensiahan ni Jezebel? (b) Ano ang nagapakita nga indi tanan sang nagpangangkon nga mga Cristiano sang 1918 naimpluwensiahan sang apostata nga Cristiandad?

¹⁵ Ang masunod nga mga pulong ni Jesus nagahatag sing lugpay: “Apang, ginasiling ko sa iban pa sa inyo nga yara sa Tiatira, sa tanan nga wala sini nga panudlo, sa ila nga wala makahibalo sang ‘madalom nga mga butang ni Satanas,’ subong sang ila ginasiling: Indi ako magbutang sa inyo sing iban pa nga lulan. Apang, hupti ninyo sing malig-on ang yara sa inyo tubtob nga mag-abot ako.” (Bugna 2:24, 25) May yara matutom nga mga kalag sa Tiatira nga wala maimpluwensiahan ni Jezebel. Sing kaanggid man, sa sulod sang 40 ka tuig antes sang 1918 kag sugod sadto, indi tanan sang nagpangangkon nga mga Cristiano nagkunsinti sang imoral, malaut nga mga dalanon nga lapnag gid sa Cristiandad. Ang diutay nga grupo sang mga Estudyante sang Biblia, kilala karon subong mga Saksi ni Jehova, nga nagtinguha sa pagbulig sa mga katapo sang mga simbahan nga makita ang di-Cristiano nga ginhalinan sang madamo nga doktrina sang Cristiandad, naghulag agod sikwayon ang tanan nga Babiloniko nga mga pagtuluuhan kag mga buhat nga nabaton gikan sa apostata nga Cristiandad. Naglakip ini sa matinuguton nga panudlo sang “babayi nga si Jezebel.”

16. Bisan pa si Jesus kag ang Cristianong nagadumala nga hubon sang nahauna nga siglo wala magdugang sing bisan ano nga lulan, ano nga mga butang ang dapat likawan?

¹⁶ Ginpalig-on man sang Juan nga klase karon ang ila mga kaupod, ang dakung kadam-an, nga mag-andam batok sa imoral nga mga impluwensia, subong sang makita sa malaw-ay nga mga kalingawan. Indi na kinahanglan nga tan-awon ukon maeksperiensiahan ang kalautan subong pang-usyuso lamang ukon agod mahibal-an kon ano ang dapat likawan. Maalamon nga palayuan naton ang “madalom nga mga butang ni Satanas.” Subong sang ginsiling ni Jesus: “Indi ako magbutang sa inyo sing iban pa nga lulan.” Nagapahanumdom ini sa aton sang sugo sang Cristianong nagadumala nga hubon sang nahauna nga siglo: “Ginpakamaayo sang balaan nga espiritu kag namon man nga indi na kamo pagpabug-atan pa, luwas sa sining kinahanglanon nga mga butang, nga padayon kamo nga maglikaw sa mga butang nga ginhalad sa mga idolo kag sa dugo kag sa nakuga nga mga sapat kag sa pagpakighilawas. Kon maglikaw gid kamo sa sini nga mga butang, mangin maayo ang inyo kahimtangan.” (Binuhatan 15:28, 29) Agod mangin mapagros sa espirituwal, likawi ang butig nga relihion, sayop nga paggamit sang dugo (subong sang pagpatughong sing dugo), kag ang imoralidad! Kag maamligan man ang imo pisikal nga panglawas.

17. (a) Paano ginasulay ni Satanas ang katawhan karon paagi sa “madalom nga mga butang”? (b) Ano ang dapat mangin panimuot naton sa “madalom nga mga butang” sang masibod nga kalibutan ni Satanas?

¹⁷ May iban pa nga “madalom nga mga butang” si Satanas karon, subong sang komplikado nga mga espikulasyon kag mga pilosopiya nga ginapabugal sang mga maalam. Dugang pa sa matinuguton, imoral nga mga pangatarungan, nagalakip ini sa espiritismo kag sa teoriya sang ebolusyon. Paano ginatamod sang labing maalam nga Manunuga ining “madalom nga mga butang”? Ginbalikwat sia ni apostol Pablo subong nagasiling: “Laglagon ko ang kaalam sang mga tawo nga maalam.” Tuhay sa sini, “ang madalom nga mga butang sang Dios” simple, maathag, kag makalilipay. Ginalikawan sang maalamon nga mga Cristiano ang “madalom nga mga butang” sang masibod nga kalibutan ni Satanas. Dumduma, “ang kalibutan nagataliwan, kag amo man ang kailigbon sini, apang sia nga nagahimo sang kabubut-on sang Dios nagapabilin sing dayon.”—1 Corinto 1:19, Kingdom Interlinear; 2:10; 1 Juan 2:17.

18. Ano nga mga pagpakamaayo ang ginasaad ni Jesus sa hinaplas nga mga Cristiano nga magapabilin nga matutom tubtob sa katapusan, kag ano nga pribilehiyo ang matigayon sining mga banhawon sa Armagedon?

¹⁸ Sa mga Cristiano sa Tiatira, naghambal karon si Jesus sing makapahalipay nga mga pulong. Ginapalig-on man sini ang hinaplas nga mga Cristiano karon: “Sia nga nagadaug kag nagasunod sa akon mga buhat tubtob sa katapusan, hatagan ko sia sing awtoridad sa mga pungsod, kag bantayan niya ang katawhan paagi sa bilugon nga salsalon agod madugmok sila kaangay sang mga suludlan nga daga, subong sang nabaton ko gikan sa akon Amay.” (Bugna 2:26, 27) Isa gid ini ka dalayawon nga pribilehiyo! Ini nga awtoridad nga mabaton sang hinaplas nga mga mandadaug kon banhawon na sila amo ang pagpakigbahin upod kay Jesus sa paggamit sang “bilugon nga salsalon” sang paglaglag batok sa rebelyuso nga mga pungsod sa Armagedon. Ang nuklear nga mga hinganiban sang mga pungsod magasirit kaangay sang basa nga mga lebentador kon dugmukon na ni Cristo ang iya mga kaaway kaangay sang mga suludlan nga daga.—Salmo 2:8, 9; Bugna 16:14, 16; 19:11-13, 15.

19. (a) Sin-o ang “bituon sa kaagahon,” kag paano sia ihatag sa mga magadaug? (b) Ano nga pagpalig-on ang ginatan-ay sa dakung kadam-an?

¹⁹ Nagdugang si Jesus: “Kag ihatag ko sa iya ang bituon sa kaagahon.” (Bugna 2:28) Ginpaathag sang ulihi ni Jesus mismo kon ano ining “bituon,” sa pagsiling: “Ako ang gamot kag kaliwat ni David, kag ang masanag nga bituon sa kaagahon.” (Bugna 22:16) Huo, si Jesus amo ang magatuman sang tagna nga pilit nga ginpakawas ni Jehova gikan sa nagapamatok nga mga bibig ni Balaam: “Isa ka bituon ang pat-od nga magagua gikan kay Jacob, kag isa ka setro ang magatindog gid gikan sa Israel.” (Numeros 24:17) Paano ihatag ni Jesus ang “bituon sa kaagahon” sa mga nagadaug? Mahimo gid nga paagi sa paghatag sang iya kaugalingon sa ila, paagi sa pagbaton sa ila sa isa ka pinakamalapit kag pinakasuod nga kaangtanan sa iya. (Juan 14:2, 3) Isa gid ini ka mabaskog nga pangganyat sa pagbatas! Makapapagsik man nga mahibaluan sang dakung kadam-an nga ang “masanag nga bituon sa kaagahon” magagamit sa indi madugay sang iya awtoridad sa Ginharian agod ipasag-uli ang Paraiso diri sa duta!

Hupti ang Integridad

20. Ano nga mga hitabo sa Cristiandad ang nagapahanumdom sa aton sang pila ka kaluyahon sa kongregasyon sa Tiatira?

²⁰ Pat-od gid nga ini nga mensahe nagpalig-on sa mga Cristiano anay sa Tiatira. Hunahunaa lamang—ang ginhimaya nga Anak sang Dios sa langit personal nga nakighambal sa mga Cristiano sa Tiatira tuhoy sa ila pila ka problema! Walay duhaduha nga bisan paano ang pila sa kongregasyon nagsunod sa sining mahigugmaon nga pagbantay. Ining pinakamalaba sa pito ka mensahe nagabulig man sa aton nga makilala ang matuod nga Cristianong kongregasyon karon. Sang 1918 sang mag-abot si Jesus sa templo ni Jehova agod maghukom, ang kalabanan sang dalagku nga mga organisasyon nga nagpangangkon nga Cristiano nadagtaan sang idolatriya kag sang espirituwal nga imoralidad. (Santiago 4:4) Ginpasad sang iban ang ila mga pagtuluuhan sa mga panudlo sang dominante nga mga babayi sang ika-19 nga siglo, subong ni Ellen White sang Seventh-Day Adventists kag ni Mary Baker Eddy sang Christian Scientists, kag sining karon lang madamo nga babayi ang nagasermon gikan sa pulpito. (Ipaanggid ang 1 Timoteo 2:11, 12.) Sa nanuhaytuhay nga mga porma sang Katolisismo, masami nga ginapadunggan si Maria una sa Dios kag kay Cristo. Wala sia ginpadunggan ni Jesus sing subong sina. (Juan 2:4; 19:26) Makabig gid bala nga Cristiano ang mga organisasyon nga nagabaton sinang indi nagakaigo nga impluwensia sang babayi?

21. Ano ang mga leksion para sa mga indibiduwal sa mensahe ni Jesus sa Tiatira?

²¹ Maayo nga binagbinagon sang indibiduwal nga mga Cristiano, sang Juan nga klase ukon sang iban nga mga karnero, ini nga mensahe. (Juan 10:16) Mahimo nga para sa iban makasululay ang magpahapos lang, subong sang ginhimo sang mga disipulo ni Jezebel sa Tiatira. May pagsulay man nga magkompromiso. Sa karon, ang mga hulusayon subong sang pagkaon sing mga produkto nga may dugo ukon pagpatughong sing dugo dapat atubangon. Mahimo hunahunaon sang iban nga ang kakugi sa pag-alagad sa latagon ukon ang paghatag sing mga pamulongpulong nagahatag sa ila sing kahilwayan nga mangin indi tanto kaestrikto sa iban nga mga bahin, subong sang pagtan-aw sing masingki kag imoral nga mga pelikula kag mga video tape, ukon pagpatuyang sa makahulubog nga ilimnon. Ang paandam ni Jesus sa mga Cristiano sa Tiatira nagasugid sa aton nga indi naton dapat himuon ina nga mga kahilwayan. Luyag ni Jehova nga mangin matinlo kita, bug-os kalag, indi nabahin, subong amo anay ang madamo nga Cristiano sa Tiatira.

22. Paano ginapadaku ni Jesus ang pagkaimportante sang paghupot sing nagapamati nga dulunggan?

²² Sa katapusan, si Jesus nagsiling: “Ang isa nga may dulunggan magpamati sa ginasiling sang espiritu sa mga kongregasyon.” (Bugna 2:29) Sa ikap-at nga kahigayunan, ginsulit diri ni Jesus ining makapulukaw nga bahin, nga amo man ang gamiton sa katapusan sang tatlo pa ka mensahe. May yara ka bala nagapamati nga dulunggan? Kon amo, padayon nga magpamati sing maayo samtang ang Dios, paagi sa iya espiritu, nagapadayon sa paghatag sing laygay paagi sa alagyan nga ginagamit niya.

[Nota]

[Mga Retrato sa pahina 51]

Ang daku nga bahin sang pagpanaksi karon ginahimo sang matutom nga mga babayi nga mapainubuson nga nagasakdag sang teokratiko nga awtoridad