10. Ano nga pagpalig-on ang ginhatag ni Jesus sa kongregasyon sa Filadelfia?

¹⁰ Bangod naghalin sa isa nga may awtoridad, pat-od nga ang mga pulong ni Jesus sa mga Cristiano sa Filadelfia makalugpay gid! Naghatag sia sing komendasyon sa ila, nga nagasiling: “Nahibaluan ko ang imo mga buhat—yari karon! ginbutang ko sa imo atubangan ang bukas nga ganhaan, nga wala sing makasira—nga may diutay ka nga gahom, kag gintuman mo ang akon pulong kag wala ginhimutig ang akon ngalan.” (Bugna 3:8) Ang kongregasyon aktibo, kag may ganhaan nga nabuksan sa atubangan sini—walay duhaduha isa ka ganhaan sang kahigayunan para sa pag-alagad sa ministeryo. (Ipaanggid ang 1 Corinto 16:9; 2 Corinto 2:12.) Busa, ginapalig-on ni Jesus ang kongregasyon nga himuslan sing bug-os ang kahigayunan sa pagbantala. Nagbatas sila kag napakita nila nga may bastante sila nga kusog, sa bulig sang espiritu sang Dios, nga magpadayon sa paghimo sing dugang pa nga “mga buhat” sa pag-alagad kay Jehova. (2 Corinto 12:10; Zacarias 4:6) Gintuman nila ang mga sugo ni Jesus kag wala ginpanghiwala si Cristo, sa pulong ukon sa buhat.

14. Paano ang Isaias 49:23 kag Zacarias 8:23 talalupangdon nga natuman sa moderno nga mga tion?

¹⁴ Sa moderno nga mga tion, talalupangdon nga natuman ang mga tagna subong sang Isaias 49:23 kag Zacarias 8:23. Subong resulta sang pagbantala sang Juan nga klase, madamo nga tawo ang nagsulod sa nabuksan nga ganhaan padulong sa pag-alagad sa Ginharian.b Ang kalabanan sa ila naghalin sa Cristiandad, nga ang mga relihion sini butig nga nagapangangkon nga amo ang espirituwal nga Israel. (Ipaanggid ang Roma 9:6.) Subong isa ka dakung kadam-an, ginlabhan nila ang ila malaba nga mga panapton kag ginpaputi ini paagi sa pagtuo sa ginhalad nga dugo ni Jesus. (Bugna 7:9, 10, 14) Bangod nagapasakop sila sa paggahom ni Cristo sa Ginharian, nagalaum sila nga makapanubli sang mga pagpakamaayo sini diri sa duta. Nagkadto sila sa hinaplas nga kauturan ni Jesus kag “nagyaub” sa ila, sa espirituwal nga paghambal, bangod ‘nabatian nila nga ang Dios nagaupod sa ila.’ Nagapangalagad sila sa sining mga hinaplas, nga upod sa ila nahiusa sila sa isa ka bug-os kalibutan nga paghiliupod sang mga kauturan.—Mateo 25:34-40; 1 Pedro 5:9.