“Ang Adlaw sang Ginuo”

“SA PAGBUGNA ako sa adlaw sang Ginuo.” (Bugna 1:10) Amo sina ang ginsiling sang tigulang nga si apostol Juan, nga ginalarawan sa hitaas, sa nahaunang kapitulo sang tolon-an sang Bugna sa Biblia. Ang iya mga pulong nagabulig sa aton nga makita ang tion sang katumanan sang halangdon nga mga palanan-awon nga ginlaragway niya.

Apang, ang tanan wala nagaugyon sa sining pagbadbad sang Bugna 1:⁠10. Halimbawa, ang Aleman nga manugbadbad sang Biblia nga si Jörg Zink nagabadbad sini: “Napuno ako sang espiritu santo​—⁠Domingo sadto.” Apang, ang kalabanan nga mga badbad sang Biblia nagabadbad sang Griegong prase nga teiʹ ky·ri·a·keiʹ he·meʹrai subong “ang adlaw sang Ginuo.” Apang sa foot­note madamo ang nagaangkon nga nagapatuhoy ini sa Domingo. Husto bala ini?

Ang Aleman nga Herders Biblekommentar, isa ka Katolikong libro, nagapaathag sang rason sa likod sining panghunahuna sang nagsiling ini: “Ginhimo ang pagpatuhoy diri [sa Bugna 1:​10] indi sa Adlaw sang Katapusan nga Paghukom, nga kilala man subong ang ‘Adlaw sang Ginuo,’ kundi sa isa ka ispisipiko nga adlaw sang semana. Ang unang mga Cristiano nagsugod sa pagsaulog sang nahaunang adlaw sang semana subong ang adlaw sang ila pangunang mga serbisyo sa simbahan sadto pa sang tungatunga sang nahaunang siglo. (Binu. 20:​7; 1 Cor. 16:2)” Apang, ang duha ka kasulatan nga ginsambit sinang libro wala gid nagapamatuod nga gintamod sang unang-siglo nga mga Cristiano ang nahaunang adlaw sang semana subong “ang adlaw sang ila pangunang mga serbisyo sa simbahan.”

Ang nahaunang teksto, Binuhatan 20:​7, nagarekord lamang nga si Pablo, ang iya kaupod nga mga naglakbay, kag ang mga Cristiano sa Troas nagtipon sa nahaunang adlaw sang semana para sa panihapon. Bangod kay manuglakat si Pablo pagkadason nga adlaw kag indi niya sila liwat makita sa malawig nga tion, ginhimuslan niya ang okasyon nga masugilanon sila sing malawig.

Ang ikaduhang teksto, 1 Corinto 16:​2, nagpalig-on sa mga Cristiano sa Corinto sa pagsupot sing kuwarta “sa nahaunang adlaw sang tanan nga semana” agod may iamot sa mga nagakinahanglan sa Judea. Ang eskolar nga si Adolf Deiss­mann nagasiling nga ini nga adlaw mahimo nga adlaw sang suweldo. Walay sapayan, ang panugda ni Pablo praktikal, kay ang kuwarta mahimo maubos sa sulod sang semana.

Ang Biblia wala nagasiling nga ang mga Cristiano sadtong panahon sang mga apostoles nagtamod sang nahaunang adlaw sang semana, ginatawag karon nga Domingo, subong isa ka sahi sang Cristianong inugpahuway, isa ka adlaw nga ginapain para lamang sa ila regular nga miting sang pagsimba. Pagkatapos lamang napatay ang mga apostoles nga ang Domingo gintamod sa sining paagi kag gintawag nga “ang adlaw sang Ginuo.” Bahin ini sang apostasya nga gintagna ni Jesus kag sang mga apostoles mismo.​—⁠Mateo 13:​36-43; Binuhatan 20:​29, 30; 1 Juan 2:⁠18.

Ano, nian, ang “adlaw sang Ginuo”? Ginatudlo sang konteksto sang Bugna 1:​10 si Jesus subong ang Ginuo nga ini adlaw niya. Ang Pulong sang Dios nagapakilala sang mga ekspresyon subong sang “ang adlaw sang aton Ginuong Jesucristo” sa tion sang paghukom sa katawhan kag sa pagpasag-uli sang Paraiso.​—⁠1 Corinto 1:​8; 15:​24-26; Filipos 1:​6, 10; 2:⁠16.

Gani, si Hans Bruns, sa iya badbad nga may komentaryo, Das Neue Testament (Ang Bag-ong Katipan), husto sang nagsiling sia: “Ang iban nagasiling nga nagapamulong sia [Juan] diri sang tuhoy sa Domingo, apang mahimo gid nga ginapatuhuyan niya ang malaragwayon nga Adlaw sang Ginuo, nga amo gid ang ginapatuhuyan sang iya masunod nga paglaragway.” Si W. E. Vine nagasiling: “ ‘Ang Adlaw sang Ginuo’ . . . amo ang Adlaw sang Iya ginpadayag nga paghukom sa kalibutan.” Ang Lexikon zur Bibel (Lexicon of the Bible) ni Fritz Rienecker nagasiling nga “ang adlaw sang Ginuo” nagapatuhoy sa “adlaw sang paghukom.”

Ang husto nga paghangop sa ekspresyon nga “adlaw sang Ginuo” nagabulig sa aton sa paghangop sa bug-os nga tolon-an sang Bugna. Dugang pa, ang pamatuod amo nga ina nga adlaw nagsugod na. Daw ano ka importante, nian, nga aton ‘pamatian ang mga pulong sang tagna sang Bugna kag tumanon ang mga butang nga nasulat sa sini’!​—⁠Bugna 1:​3, 19.

[Laragway sa pahina 27]

Ang maathag kag bag-o nga paathag sa kada bersikulo sang tolon-an sang Bugna ginpresentar sa “Revelation​—⁠Its Grand Climax At Hand!” Ining makawiwili nga bulig sa pagtuon sang Biblia matigayon karon sa 33 ka hambal