Kapitulo Dies

Isa ka Ginharian nga “Indi Gid Malaglag”

 1. Ano nga kamatuoran ang ginapadaku sang mga hitabo sa kalibutan sa bug-os nga maragtas sang katawhan?

ANG mga hitabo sa kalibutan kada adlaw nagapadaku sang kamatuoran nga ang mga tawo wala makasapo sing kalipay bangod sang pagsikway sa pagkasoberano ni Jehova kag sang pagtinguha nga gamhan ang ila kaugalingon. Wala sing sistema sang tawhanon nga panguluhan ang nakahatag sing alalangay nga mga benepisyo sa katawhan. Bisan pa napauswag sang mga tawo ang ila ihibalo sa siensia sa di-matupungan nga kasangkaron, wala nila malandas ang balatian ukon madula ang kamatayon, wala bisan sa isa ka indibiduwal lamang. Wala madula sang tawhanon nga pagginahom ang inaway, kasingki, krimen, kagarukan, ukon kaimulon. Ginagamhan gihapon sang mapiguson nga mga panguluhan ang mga tawo sa madamo nga kadutaan. (Manugwali 8:9) Ang teknolohiya, kakagod, kag pagkaignorante nagadagta sang duta, tubig, kag hangin. Bangod sang indi maayo nga pagdumala sang mga opisyales sa ekonomiya, nabudlayan ang madamo sa pagtigayon sing mga kinahanglanon sa kabuhi. Maathag nga ginpakita sang linibo ka tuig nga paggahom sang tawo ini nga kamatuoran: “Ang dalanon sang tawo wala sa iya kaugalingon. Wala sa tawo nga nagalakat bisan ang pagtuytoy sa iya tikang.”​—Jeremias 10:23.

 2. Ano ang lamang nga solusyon sa mga problema sang katawhan?

² Ano ang solusyon? Amo ang Ginharian sang Dios, nga gintudlo ni Jesus nga ipangamuyo sang iya mga sumulunod: “Magkari ang imo ginharian. Paghimuon ang imo kabubut-on, kon paano sa langit, subong man sa duta.” (Mateo 6:​9, 10) Ang langitnon nga Ginharian sang Dios ginalaragway sa 2 Pedro 3:13 subong ang “bag-ong mga langit,” nga magagahom sa “bag-ong duta,” nga amo, ang matarong nga katilingban sang tawo. Tuman gid ka importante ang langitnon nga Ginharian sang Dios amo nga ginhimo ini ni Jesus nga sentro nga tema sang iya pagbantala. (Mateo 4:17) Ginpakita niya nga dapat naton ini unahon sa aton kabuhi, nga nagalaygay: “Padayon, nian, nga pangitaa anay ang ginharian kag ang iya pagkamatarong.”​—Mateo 6:33.

 3. Ngaa hilingagawon gid karon ang pagtuon tuhoy sa Ginharian sang Dios?

³ Hilingagawon gid karon ang pagtuon tuhoy sa Ginharian sang Dios, kay sa dili madugay buslan sing dayon sini nga Ginharian ang pagginahom sa sini nga duta. Ang Daniel 2:44 nagatagna: “Sa mga adlaw sadto nga mga hari [mga panguluhan nga nagagahom karon] ang Dios sang langit magapatindog sing ginharian [sa langit] nga indi gid malaglag. Kag ang ginharian mismo indi iliton sa iban nga katawhan [ang mga tawo indi na liwat magagahom sa duta]. Dugmukon sini kag papason ini tanan nga ginharian [karon], kag magapadayon ini tubtob sa walay katubtuban.” Sa amo tapuson sang Ginharian ining katapusan nga mga adlaw paagi sa paglaglag sa sining bug-os malauton nga sistema sang mga butang. Nian ang paggahom sa duta sang langitnon nga Ginharian indi masuay. Dapat gid kita magpasalamat nga tuman na karon kalapit ang paumpaw nga dala sini!

 4. May kaangtanan sa Ginharian, ano ang natabo sa langit sang 1914, kag ngaa importante ini sa aton?

⁴ Sang 1914, si Cristo Jesus ginpalingkod subong Hari kag ginhatagan sing awtoridad sa ‘pagpanglutos sa tunga sang iya mga kaaway.’ (Salmo 110:​1, 2) Sadto man nga tuig, ang “katapusan nga mga adlaw” sining karon malauton nga sistema sang mga butang nagsugod. (2 Timoteo 3:​1-5, 13) Sadto man nga tion, ang mga hitabo nga nakita ni Daniel sa matagnaon nga palanan-awon natabo gid sa langit. Ang “Dumaan sang mga Adlaw,” nga si Jehova nga Dios, naghatag sa Anak sang tawo, si Jesucristo, “sing pagbulut-an kag kadungganan kag ginharian, agod nga ang mga katawhan, mga pungsod kag mga hambal tanan mag-alagad sa iya.” Nagareport tuhoy sa palanan-awon, si Daniel nagsulat: “Ang iya pagbulut-an dayon nga pagbulut-an nga indi magataliwan, kag ang iya ginharian indi malaglag.” (Daniel 7:​13, 14) Paagi sa sining langitnon nga Ginharian sa mga kamot ni Cristo Jesus, himuon nga posible sang Dios nga maagom sang mga mahigugmaon sa pagkamatarong ang di-maisip nga maayong mga butang nga gintuyo niya sang ginbutang niya ang aton nahaunang tawhanon nga mga ginikanan sa Paraiso.

 5. Anong mga detalye tuhoy sa Ginharian ang interesado gid kita, kag ngaa?

⁵ Handum mo bala nga mangin mainunungon nga sakop sang Ginharian? Kon amo, mangin interesado gid ikaw sa kahimusan kag sa hilikuton sining langitnon nga panguluhan. Luyag mo mahibaluan kon ano ang ginahimo sini karon, kon ano ang himuon sini sa palaabuton, kag kon ano ang ginapatuman sini sa imo. Samtang ginausisa mo sing maayo ang Ginharian, ang imo apresasyon sa sini magadugang. Kon batunon mo ang pagginahom sini, dugang pa nga masangkapan ikaw sa pagsugid sa iban tuhoy sa makatilingala nga mga butang nga himuon sang Ginharian sang Dios para sa matinumanon nga katawhan.​—Salmo 48:​12, 13.

Ang mga Manuggahom Sang Ginharian Sang Dios

 6. (a) Paano ginapakita sang Kasulatan kon kay sin-o pagkasoberano ang ginapabutyag paagi sa Mesianikong Ginharian? (b) Paano kita dapat maapektuhan sang matun-an naton tuhoy sa Ginharian?

⁶ Ang isa sang nahaunang mga butang nga ginapahayag sini nga pag-usisa amo nga ining Mesianikong Ginharian isa ka pagpadayag sang pagkasoberano mismo ni Jehova. Si Jehova amo ang naghatag sing “pagbulut-an kag kadungganan kag ginharian” sa iya Anak. Sang ang Anak sang Dios ginhatagan sing awtoridad sa paggahom subong Hari, ang mga tingog sa langit nagakaigo nga nagpahayag: “Ang ginharian sang kalibutan nangin ginharian sang aton Ginuo [si Jehova nga Dios] kag sang iya Cristo, kag magagahom sia [si Jehova] subong hari sa walay katubtuban.” (Bugna 11:15) Gani ang tanan nga butang nga nakita naton tuhoy sining Ginharian kag kon ano ang ginahimo sini labi pa nga makapasuod sa aton kay Jehova. Ang matun-an naton dapat magpatudok sa aton sang handum nga magpasakop sing dayon sa iya pagkasoberano.

 7. Ngaa interesado gid kita nga si Jesucristo amo ang Deputado nga Manuggahom ni Jehova?

⁷ Binagbinaga man ang katunayan nga ginpalingkod ni Jehova si Jesucristo sa trono subong ang iya Deputado nga Manuggahom. Subong ang Batid nga Manugpangabudlay nga gingamit sang Dios sa paghimo sa duta kag sa mga tawo, mas nahibaluan ni Jesus ang aton mga kinahanglanon sangsa bisan sin-o sa aton. Dugang pa, sugod sa pamuno sang maragtas sang tawo, ginpakita niya ang iya ‘kahamuot sa mga anak sang tawo.’ (Hulubaton 8:​30, 31; Colosas 1:​15-​17) Daku gid ang iya gugma sa mga tawo amo nga personal sia nga nagkadto sa duta kag naghatag sang iya kabuhi subong gawad tungod sa aton. (Juan 3:16) Sa amo ginhatag niya sa aton ang paagi nga mahilway gikan sa sala kag kamatayon kag ang kahigayunan nga magkabuhi sing dayon.​​—Mateo 20:28.

 8. (a) Tuhay sa tawhanon nga mga pagginahom, ngaa ang panguluhan sang Dios magapadayon? (b) Ano ang kaangtanan sang “matutom kag mainandamon nga ulipon” sa langitnon nga panguluhan?

⁸ Ang Ginharian sang Dios isa ka malig-on kag dayon nga panguluhan. Ang dayon nga kinaiya sini ginapasalig sang kamatuoran nga si Jehova mismo indi mamalatyon. (Habacuc 1:12) Tuhay sa tawhanon nga mga hari, si Jesucristo, ang isa nga gintulinan sang Dios nga maghari, indi man mamalatyon. (Roma 6:9; 1 Timoteo 6:​15, 16) Ang kaupod ni Cristo sa langitnon nga mga trono amo ang 144,000 pa, ang mainunungon nga mga alagad sang Dios gikan sa “tagsa ka tribo kag hambal kag katawhan kag pungsod.” Ginhatagan man sila sing di-mamalatyon nga kabuhi. (Bugna 5:​9, 10; 14:​1-14; 1 Corinto 15:42-​44, 53) Ang kalabanan sa ila nakakayab na sa langit, kag ang nagkalabilin sa ila nga yari pa sa duta amo ang nagahuman sa karon nga “matutom kag mainandamon nga ulipon,” nga mainunungon nga nagapauswag sang mga intereses sini nga Ginharian diri.​—Mateo 24:45-​47.

9, 10. (a) Anong nagapabahinbahin, malain nga mga impluwensia ang dulaon sang Ginharian? (b) Kon indi naton luyag nga mangin mga kaaway sang Ginharian sang Dios, anong mga buhat ang dapat naton likawan?

⁹ Sa dili madugay, sa iya gintalana nga tion, ipadala kag pahikuton ni Jehova ang iya hubon nga manuglaglag agod tinluan ang duta. Laglagon nila sing dayon ang mga tawo nga sa kaugalingon nila nga desisyon wala magkilala sa iya pagkasoberano kag nagayaguta sa mahigugmaon nga mga kahimusan nga ginaaman niya paagi kay Jesucristo. (2 Tesalonica 1:​6-9) Mangin adlaw ni Jehova ini, ang tion nga madugay na ginahulat agod mabindikar sia subong Soberano sa Bug-os nga Uniberso. “Yari karon! Ang adlaw ni Jehova nagaabot, mapintas nga may kasingkal kag nagadabdab nga kaakig, . . . agod laglagon ang mga makasasala sang duta gikan sa sini.” (Isaias 13:9) “Ina nga adlaw isa ka adlaw sang kasingkal, isa ka adlaw sang kasisit-an kag sang kalisang, isa ka adlaw sang bagyo kag sang pagkahapay, isa ka adlaw sang kadulom kag sang kaguom, isa ka adlaw sang mga gal-um kag sang madamol nga kaguom.”​​—Sofonias 1:15.

¹⁰ Ang tanan nga butig nga relihion kag ang tanan nga tawhanon nga panguluhan kag ang ila mga hangaway, nga ginmaniobra sang di-kitaon nga malauton nga manuggahom sining kalibutan, laglagon sing dayon. Ang tanan nga nagapakilala sang ila kaugalingon kaupod sining kalibutan paagi sa maiyaiyahon, di-bunayag, imoral nga pagkabuhi pagalaglagon. Si Satanas kag ang iya mga demonyo indi na makapakig-angot sa mga pumuluyo sang duta, kag itagbong sila sa kadadalman sa isa ka libo ka tuig. Nian ang Ginharian sang Dios amo ang bug-os nga magakontrol sang tanan nga nagakatabo sa duta. Daw ano nga paumpaw ini para sa tanan nga nagahigugma sang pagkamatarong!​—Bugna 18:​21, 24; 19:11-​16, 19-​21; 20:​1, 2.

Ang mga Tulumuron Sang Ginharian—Kon Paano Matigayon

11. (a) Paano tumanon sang Mesianikong Ginharian ang katuyuan ni Jehova para sa duta? (b) Ano ang mangin kahulugan sang paggahom sang Ginharian para sa mga tawo nga nagakabuhi sa duta sa sina nga tion?

¹¹ Tumanon sing bug-os sang Mesianikong Ginharian ang orihinal nga katuyuan sang Dios para sa duta. (Genesis 1:​28; 2:​8, 9, 15) Tubtob karon, wala ginasakdag sang katawhan ini nga katuyuan. Apang, ang “maabot nga napuy-an nga duta” ipasakop sa Anak sang tawo, si Jesucristo. Ang tanan nga makalampuwas sa paghukom ni Jehova sa sining daan nga sistema magapanghikot sing nahiusa sa idalom ni Cristo nga Hari, malipayon nga nagahimo sang bisan ano man nga ginasugo niya, amo nga ang duta mangin isa ka tugob-globo nga paraiso. (Hebreo 2:​5-9) Ang tanan nga katawhan magakalipay sa binuhatan sang ila mga kamot kag magabenepisyo sing bug-os gikan sa bugana nga patubas sang duta.​​—Salmo 72:​1, 7, 8, 16-​19; Isaias 65:​21, 22.

12. Paano ihatag ang kahimpitan sa hunahuna kag lawas sa mga sakop sang Ginharian?

¹² Sang gintuga sanday Adan kag Eva, sila himpit, kag katuyuan sang Dios nga matugob ang duta sang ila mga anak, nga ang tanan himpit sa hunahuna kag lawas. Ini nga katuyuan matuman sing dalayawon sa idalom sang paggahom sang Ginharian. Magakinahanglan ini sang pagdula sa tanan nga epekto sang sala, kag sa sini nga katuyuan, si Cristo magaalagad indi lamang subong Hari kundi subong Mataas nga Saserdote man. Sing mapailubon, buligan niya ang iya matinumanon nga mga sakop nga makabenepisyo gikan sa nagatumbas-sa-sala nga balor sang iya mismo ginhalad nga tawhanon nga kabuhi.

13. Anong pisikal nga mga benepisyo ang matuman sa idalom sang paggahom sang Ginharian?

¹³ Sa idalom sang paggahom sang Ginharian, ang mga pumuluyo sang duta magaagom sing makatilingala nga pisikal nga mga benepisyo. “Sa sina nga tion ang mga mata sang mga bulag pamuklaton, kag ang mga igdulungog sang mga bungol mabuksan. Sa sina nga tion ang piang magataklad subong sang lalaki nga usa, kag ang dila sang apa magaamba sa kalipay.” (Isaias 35:​5, 6) Ang unod nga ginpalaw-ay sang katigulangon ukon balatian mangin lab-as pa sa unod sang bata, kag ang nagalukmatlukmat nga mga balatian pagabuslan sang mapagsik nga kapagros. “Ang iya unod mangin linghod pa sangsa pagkapamatan-on; magabalik sia sa mga adlaw sang iya batan-on nga kapagsik.” (Job 33:25) Magaabot ang adlaw nga ang isa wala sing rason sa pagsiling, “Nagamasakit ako.” Ngaa? Bangod ang mahinadlukon-sa-Dios nga mga tawo hilwayon sa lulan sang sala kag sa makapasubo nga mga epekto sini. (Isaias 33:24; Lucas 13:11-​13) Huo, “pahiran [sang Dios] ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.”​—Bugna 21:4.

14. Ano ang nalakip sa pagtigayon sing tawhanon nga kahimpitan?

¹⁴ Apang, indi lamang maayo nga lawas kag maligdong nga hunahuna ang nalakip sa pagtigayon sing kahimpitan. Nagalakip ini sang nagakaigo nga pagpabanaag sa mga kinaiya ni Jehova, kay ginhimo kita sa ‘dagway sang Dios, suno sa kaanggid niya.’ (Genesis 1:26) Agod matigayon ini, kinahanglan ang daku nga edukasyon. Sa bag-ong kalibutan, “magapuyo ang pagkamatarong.” Gani, subong sang gintagna ni Isaias, “ang pagkamatarong amo ang pat-od nga matun-an sang mga pumuluyo sang mabungahon nga duta.” (2 Pedro 3:​13; Isaias 26:9) Ini nga kinaiya nagadul-ong sa paghidait​—sa ulot sang mga tawo sang tanan nga rasa, sa tunga sang suod nga mga magkaupod, sa pamilya sang isa kag, labaw sa tanan, sa Dios mismo. (Salmo 85:10-​13; Isaias 32:17) Ang mga tawo nga nagatuon sang pagkamatarong amat-amat nga tudluan sang kabubut-on sang Dios para sa ila. Samtang ang gugma kay Jehova nagapanggamot sing madalom sa ila tagipusuon, sundon nila ang iya mga dalanon sa tanan nga bahin sang ila kabuhi. Makasiling sila kaangay ni Jesus, ‘Pirme ko himuon ang mga butang nga kalahamut-an sa akon Amay.’ (Juan 8:29) Daw mangin ano ka makalilipay ang kabuhi kon mahanabo ini sa tanan nga katawhan!

Mga Hinimuan nga Makita Na

15. Ginagamit ang mga pamangkot sa sining parapo, ipadaku ang mga hinimuan sang Ginharian kag ipakita kon ano dapat ang ginahimo naton karon.

¹⁵ Ang dalayawon nga mga hinimuan sang Ginharian sang Dios kag sang mga sakop sini makita. Ang masunod nga mga pamangkot kag mga kasulatan magapahanumdom sa imo sang pila sini nga mga hinimuan, subong man sang mga butang nga sarang kag dapat himuon karon sang tanan nga sakop sang Ginharian.

Batok kay sin-o una nga nagpanghikot ang Ginharian, kag ano ang resulta? (Bugna 12:​7-​10, 12)

Ang pagtipon sa nagkalabilin nga mga katapo sang anong grupo ang ginhatagan sing igtalupangod sugod sang naglingkod sa trono si Cristo? (Bugna 14:​1-3)

Ano nga hilikuton ang gintagna ni Jesus nga himuon niya sa tapos nagsugod ang dakung kapipit-an, subong sang narekord sa Mateo 25:31-​33?

Anong panguna nga hilikuton ang ginahimo karon? Sin-o ang nagapakigbahin sa sini? (Salmo 110:3; Mateo 24:14; Bugna 14:​6, 7)

Ngaa wala mapauntat sang nagapamatok nga mga politiko kag mga relihion ang hilikuton nga pagbantala? (Zacarias 4:6; Binuhatan 5:​38, 39)

Anong mga pagbalhin ang natabo sa kabuhi sadtong nagapasakop sa paggahom sang Ginharian? (Isaias 2:4; 1 Corinto 6:​9-​11)

Ang Ginharian sa Isa ka Libo ka Tuig

16. (a) Tubtob san-o magagahom si Cristo? (b) Anong makatilingala nga mga butang ang himuon sa tion kag sa tapos sina nga panahon?

¹⁶ Sa tapos matagbong si Satanas kag ang iya mga demonyo sa kadadalman, si Jesucristo kag ang iya 144,000 ka masigkamanunubli magagahom subong mga hari kag mga saserdote sa isa ka libo ka tuig. (Bugna 20:6) Sa sina nga tion, ang katawhan himpiton, kag ang sala kag Adamikong kamatayon dulaon sing dayon. Pagkatapos sang Isa ka Libo ka Tuig nga Paggahom, bangod natuman na sing madinalag-on ang iya hilikuton subong Mesianikong Hari-Saserdote, “itugyan [ni Jesus] ang ginharian” sa iya Amay, “agod ang Dios mangin tanan nga butang sa tagsatagsa.” (1 Corinto 15:24-​28) Sa sina nga tion, si Satanas buy-an sa makadali agod tilawan ang gingawad nga katawhan tuhoy sa pagsuporta nila sa bug-os uniberso nga pagkasoberano ni Jehova. Pagkatapos sinang katapusan nga pagtilaw, laglagon ni Jehova si Satanas kag ang mga rebelde nga nagdampig sa iya. (Bugna 20:​7-​10) Ang mga nagsakdag sang pagkasoberano ni Jehova​​—ang iya kinamatarong sa paggahom—​nakapasundayag na sing bug-os sang ila di-mationg nga pagkamainunungon. Nian matigayon nila ang nagakaigo nga kaangtanan kay Jehova, kay ginbaton niya sila subong iya mga anak nga lalaki kag babayi, nga ginakahamut-an sang Dios para sa kabuhi nga walay katapusan.​​—Roma 8:21.

17. (a) Ano ang mahanabo sa Ginharian sa katapusan sang isa ka libo ka tuig? (b) Sa anong kahulugan nga ang Ginharian “indi malaglag”?

¹⁷ Busa, ang katungdanan mismo ni Jesus kag sang 144,000 magabaylo may kaangtanan sa duta. Ano ang ila palaabuton nga hilikuton? Ang Biblia wala nagasugid. Apang kon matutom nga ginasakdag naton ang pagkasoberano ni Jehova, magakabuhi kita sa katapusan sang Isa ka Libo ka Tuig nga Paggahom agod mahibaluan kon ano ang katuyuan ni Jehova para sa ila kag para sa iya makahalawhaw nga uniberso. Walay sapayan sini, ang isa ka libo ka tuig nga paggahom ni Cristo mangin “dayon” kag ang iya Ginharian “indi malaglag.” (Daniel 7:14) Sa anong kahulugan? Ang isa ka butang amo nga ang awtoridad sa paggahom indi iliton sa kamot sang iban nga may tuhay nga mga tulumuron, kay si Jehova amo ang Manuggahom. Subong man, ang Ginharian “indi malaglag” bangod ang mga hinimuan sini magapadayon sa walay katubtuban. (Daniel 2:44) Kag ang Mesianikong Hari-Saserdote kag ang iya kaupod nga mga hari-saserdote padunggan sing dayon bangod sang ila matutom nga pag-alagad kay Jehova.

Repaso nga Paghinun-anon

• Ngaa ang Ginharian sang Dios amo lamang ang solusyon sa mga problema sang katawhan? San-o nagsugod sa paggahom ang Hari sang Ginharian sang Dios?

• Ano ang ilabi na nga makagalanyat sa imo tuhoy sa Ginharian sang Dios kag sa kon ano ang himuon sini?

• Anong mga hinimuan sang Ginharian ang nakita na naton, kag ano ang aton bahin sa sini?

[Kapsion sa pahina 92, 93]

Sa idalom sang Ginharian sang Dios, ang tanan nga tawo magatuon sing pagkamatarong