Anghelikong mga Mensahe Para sa Aton Adlaw

‘Ang Dios . . . nagpadala sang iya anghel kag nagpakilala sini sa mga tanda.’​—⁠BUGNA 1:⁠1.

 1. Ano ang sayop nga paghangop nahanungod sa ngalan nga Apokalipsis, kag ano ang ginapakita sang Bugna nahanungod sa palaabuton?

APOKALIPSIS. Daw ano kasunson nga inang ngalan nabatian sa sining ika-20 ka siglo​—⁠apang daw ano kasubo nga ginhangop sing sayop! Sa kahulugan sang Biblia, wala ini nagapatuhoy sa pagpapas sa tanan nga katawhan sa isa ka nuklear nga kalaglagan. Sa baylo, ining Griegong tinaga nagakahulugan sing “pagbuyagyag.” Paagi sa matagnaon nga mga laragway, ang tolon-an nga Apokalipsis, ukon Bugna sa Biblia, nagabuyagyag sang mga hitabo nga ang katapusan amo ang ginsuguran sang dag-on sang dayon nga kalipay para sa katawhan. Busa, ang apostol ni Jesus nga si Juan nagaumpisa sang Bugna paagi sa mga pulong: “Malipayon ang nagabasa sing mabaskog kag ang mga nagapamati sang mga pulong sang tagna, kag nagabantay sang mga butang nga nasulat sa sini; kay malapit na ang tion.”​—⁠Bugna 1:⁠3.

 2, 3. Ngaa isa ini ka dimalipayon nga kalibutan, kag ano ang tuyo ni Jehova nga himuon?

² Ang kalibutan karon indi malipayon. Ang rason sang pagkadimalipayon sini ginsambit sa ambahanon nga ginkomposo ni Moises sang nagligad nga mga 3,460 ka tuig: “Nahimoan nila sia sing malaut; sila indi mga anak [sang Dios], kasawayan nila ini. Sila balingag kag tiko nga kaliwatan!” (Deuteronomio 32:⁠5) Nahisanto gid ina nga mga pulong sa moderno nga kaliwatan, nga ang mga kabilihanan balingag kag tiko katama! Halimbawa, ang introduksion sang World Military and Social Expenditures 1987-88 nagasiling sing prangka: “Ang kabuhi sang tanan nga mga pungsod ginpatiko sang mga palumba sa hinganiban. Ang Estados Unidos kag Unyon Sobyet nagagasto sing mga $1.5 ka bilyon kada adlaw sa depensa militar. Apang ang Estados Unidos amo ang ikanapulog-walo sa tunga sang tanan nga mga pungsod sa kadamuon sang nagakapatay nga lapsag, ang USSR ikakap-atan kag anum. Ang nagatin-ad nga mga pungsod nagagasto sing halos apat ka beses ka daku sa mga hinganiban sang sa pag-atipan sa kapagros sang ila katawhan. Apang ginatos ka milyonmilyon sa sinang mga pungsod ang ginagutom; 20 porsiento sang ila kabataan ang nagakapatay sa wala pa ang ikalima nga kumpleanyo.”

³ Ang iban pa nga mga rason nagadugang sa sining malaglagon nga dalanon​—⁠ang pagkabungkag sang mga moral kag sang pamilya, ang krimen kag kahadlok nga nagapahog sa duta, ang pagkawalay gugma kag pagkamalinapason sang karon nga kaliwatan. Daku gid ang aton kalipay nga tuyo ni Jehova nga ‘laglagon ang mga nagalaglag sang duta’! (Bugna 11:18) Sa makakulunyag nga detalye, ang tolon-an nga Bugna sa Biblia, sa serye sang 16 ka palanan-awon, nagalaragway sa kon paano niya ini himuon.

“Mga Anghel” kag “mga Tanda”

 4. Paano nadalahig ang mga anghel sa Bugna, kag paano ginalaragway sang mga palanan-awon ang labing bantog nga anghel?

⁴ Ang Bugna nagahatag sing kapawa sa una nga tagna sang Biblia, sa Genesis 3:​15, nagapakita kon paano ang kaawayon sa ulot ni Satanas kag sang babayi nga organisasyon sang Dios, kag sa ulot sang ila duha ka ‘binhi,’ ginlubad. Nagapakita ini sang paghukom ni Jehova sa iya mga kaaway kag sa mga nagahigugma sa iya kag nagasakdag sa iya pagkasoberano. Ang Bugna ginpaalinton kay Juan “sa mga tanda” sang isa ka anghel. Ang iban nga mga anghel, ukon mga mensahero, nakigbahin sa pagpahibalo kag sa pagtuman sina nga mga tanda. Ang labing kilala nga anghel ginpakilala sa Bugna 1:5 subong “si Jesucristo, ‘ang Matutom nga Saksi,’ ‘Ang panganay gikan sa patay,’ kag ‘Ang Gumalahom sang mga hari sang duta.’ ” Ang “mga tanda,” ukon mga palanan-awon, nagalaragway man sa iya subong ang “Leon,” subong ang “Kordero,” subong “si Miguel,” kag madamong beses subong ang gamhanan nga anghel.​—⁠Bugna 5:​5, 13; 9:​1, 11; 10:1; 12:7; 18:⁠1.

 5. Ano ang makita sa unang palanan-awon sa Bugna, kag paano ini nagadalahig sa aton?

⁵ Ang una nga palanan-awon, sa Bugna 1:10–3:​22, nagapresentar sa makapulukaw nga mga mensahe nga ginpaalinton sang ginhimaya nga si Jesus sa “mga anghel,” ukon mga manugtatap, sang pito ka kongregasyon sa Asia nga nagalaragway sa tugob-globo nga kongregasyon sang mga Saksi ni Jehova sa “adlaw sang Ginuo.” Gani para sa aton ang mga mensahe karon! Dapat kita “magpamati [sing maayo] sa ginasiling sang espiritu sa mga kongregasyon,” kay ining mga paandam kag mga pahanumdom para sa aton kalig-onan, agod nga kita mangin matutom​—⁠kalahamut-an bangod sang aton mga buhat kag sang aton “gugma kag pagtuo kag pag-alagad kag pagbatas.”​—⁠Bugna 1:10; 2:​7, 10, 19.

 6. Paano kita makabenepisyo gikan sa tagsa sang mga mensahe nga ginpadala sa pito ka mga kongregasyon sa Asia?

⁶ Subong sang kongregasyon sa Efeso, mahimo nga kita nagpangabudlay sing matutom kag nagdumot sa mga buhat sang sektaryan nga mga apostata, apang kon ang aton kaugalingon nga gugma nag-ugdaw sa bisan anong paagi, magbalik kita sing mahinulsulon sa aton nahauna nga gugma, upod ang tanan nga kapagsik sang entusiasmo sini! Subong sang manggaranon sa espirituwal nga mga Cristiano sa Smirna, walay kahadlok kita nga magpanikasog para sa padya, nagapamatuod sang aton kaugalingon nga “matutom tubtob sa kamatayon,” kon ina kinahanglanon. Subong sadtong gintilawan ni Satanas sa Pergamo, dapat kita maghinulsol sa bisan anong nagligad nga idolatriya, imoralidad, ukon sektaryanismo. Ang mga taga-Tiatira ginpangabay nga magbantay batok sa kaanggid nga mga sulay, labi na sa katulad kay Jezebel nga mga impluensia. Dapat man kita magbantay! Ang bisan sin-o nga nangin patay sa espirituwal, subong sang mga Cristiano sa Sardis, dapat magbugtaw sa wala pa mangin ulihi ang tanan. Ang bukas nga ganhaan sa pag-alagad ginpahamtang sa atubangan naton, subong sang ginpahamtang anay sa atubangan sang mga taga-Filadelfia; kabay nga may ikasarang kita sa paglandas sa oras sang pagtilaw, subong sang ginhimo nila! Kon ang bisan sin-o sa aton mangin alabaab subong sang mga taga-Laodicea, dapat kita magbugtaw sa aton espirituwal nga pagkahubo kag maghinulsol. Si Jesus nagatindog nga nagapanuktok sa ganhaan. Kabay nga ang tanan sa aton magaabiabi sa iya kag magasalo sa espirituwal nga pagkaon upod sa iya sa aton 55,000 ka kongregasyon sa palibot sang globo!​—⁠Bugna 1:11; 2:​7, 10, 11, 17, 29; 3:​6, 13, 22.

Trono sang Dios, Linukot, kag Pamangkot

 7. Anong mga pagdayaw ang gin-amba sa ikaduha nga palanan-awon, kag ano ang reaksion mo?

⁷ Sa ikaduha nga palanan-awon nakita ni Juan ang mahimayaon nga trono ni Jehova sa langit. Ang aton halangdon nga Dios makita sa tunga sang tumalagsahon nga himaya, nga ginaalagaran sang apat ka kerubin, mga hubon sang mga anghel, kag sang ginbanhaw nga Cristianong mga mandadaug. Daw ano ka makapulukaw sa balatyagon ang ila ambahanon sang pagdayaw: “Takus ka, Jehova, kag Dios namon, sa pagbaton sang himaya kag dungog kag gahom, kay ikaw ang nagtuga sang tanan nga butang, kag bangod sang imo kabubut-on nangin amo kag gintuga sila”! Gindaho ni Jehova ang linukot sa Isa nga takus sa pagbukad sini​—⁠ang Leon sang tribo ni Juda, ang ginpatay nga Kordero nga nangin ang aton Manunubos. Ang tanan nga tinuga nagadayaw kay Jehova kag sa Kordero.​—⁠Bugna 4:11; 5:​2-5, 11-14.

 8. Ano ang makita naton sa ikatlo nga palanan-awon sa Bugna, kag paano ini nagahilabot sa aton adlaw?

⁸ Karon para sa ikatlo nga palanan-awon! Ginbuksan sang Kordero ang pito ka pat-in sang linukot. Ano ang nakita naton? Una, ang bag-ong napurongpurongan nga si Jesus nagasakay sa mga langit sa puti nga kabayo, nagalaragway sa matarong nga inaway. Masunod, ang nagasakay sa kabayo nga pula nga luto nagaulamid sa duta sa bug-os nga inaway. Nian yara ang kabayo nga maitom sang tiggulutom, kag nagasunod sa sini ang kabayo nga maluspad sang kamatay, nga ang nagasakay sa sini ginahingalanan Kamatayon! Nagasunod ang Hades, sa paglamon sa minilyonmilyon ka biktima. Ini tanan ginasugdan sang “kasakit” nga nagsalakay sa katawhan sang 1914-18 kag nga madumduman sing maayo sang nakalampuwas nga mga tigulang sina nga kaliwatan. (Mateo 24:​3-8) Inang mga manugkabayo padayon nga nagasakay! Kag sa pagbukas sa ikalima kag ikaanum nga pat-in, ang mga hitabo nagapadulong sa ‘dakung adlaw sang kasingkal ni Jehova kag sang Kordero.’ Ang pamangkot amo: “Sin-o bala ang sarang nga makabatas sini?”​—⁠Bugna 6:​1-17.

Yadtong “Sarang Makabatas”

 9. Anong makakulunyag nga pagpahayag ang ginhimo sa ikap-at nga palanan-awon?

⁹ Ang ikaapat nga palanan-awon ginabuksan, nagapakita kon sin-o ang makalampuwas sa adlaw sang kasingkal sang Dios, kag kon ngaa. Ginapunggan sang mga anghel ang apat ka hangin sang kalaglagan gikan sa duta agod ang pagpat-in sa espirituwal nga Israel​—⁠ang 144,000​—⁠matapos. “Sa tapos sini,” ang palanan-awon naglab-ot sa makahalawhaw nga talan-awon: “Yari karon! ang dakung kadam-an nga walay tawo nga makaisip, gikan sa tagsa ka pungsod kag gikan sa tanan nga kabikahan kag katawhan kag hambal, nga nagatindog sa atubangan sang trono [sang Dios] kag sang Kordero, nga napanaptan sing malaba nga panapton nga maputi; kag nga may mga paklang sa ila mga kamot. Kag nagasinggit sila sa mabaskog nga tingog, nga nagasiling: ‘Ang kaluwasan iya sang aton Dios, nga nagalingkod sa trono, kag sang Kordero.’ ” (Bugna 7:​1-10) Nakita mo bala mismo ining laragway?

10. (a) Ano ang ginapakita sang pagpaanggid sa mga report sang Memoryal para sa 1935 kag 1987 tuhoy sa katumanan sang ikap-at nga palanan-awon? (b) Anong pamangkot karon ang nagadalahig sa kada isa sa aton, kag ngaa?

¹⁰ Sang 1935 ang nagtambong sa bug-os nga kalibutan sa pagsaulog sang Memoryal sang kamatayon ni Jesus amo ang 32,795. Sa sini, 27,006 ang nagpakigbahin sa mga emblema subong ang mga nagkalabilin sa duta sang 144,000, nga ang paglaum langitnon. Sang ulihi sadto nga tuig, ang pagkilala sa dakung kadam-an maathag nga nakita. Ining mahagop nga mga tawo, nga nagapaabot nga magkabuhi sing dayon sa paraiso nga duta, nagatuo man sa ginpatulo nga dugo ni Jesus; nagdedikar sila kay Jehova, nagpasakop sa bawtismo, kag nagaalagad sa Dios sing makugi upod ang makalilipay nga paglaum nga makalampuwas nga buhi sa “dakung kadam-an.” Sa Memoryal sang 1987, ang nagtambong amo ang 8,965,221, kag 8,808 lamang ang nagpakigbahin. Nagapakita ini nga minilyonmilyon karon ang dakung kadam-an ukon interesado nga mangin kaupod sina nga kadamuon. “Sarang [ka bala] makabatas” subong isa sa ila sa ‘dakung adlaw sang kasingkal ni Jehova kag sang Kordero’? Nagakahulugan ini sang imo kaluwasan sa paghimo sing mga tikang sa sina nga katuyuan.​—⁠Bugna 6:​15-17; 7:​14-17.

Pagbudyong sa mga Paghukom sang Dios

11. Anong mga paghukom ang ginapalanog sa ikalima nga palanan-awon, kag paano ini nagahilabot sa aton adlaw?

¹¹ Ang ikapito nga pat-in ginbuksan! Makita ang ikalima nga palanan-awon sang Bugna. Ang pito ka anghel nagatindog sa atubangan sang Dios. Ginhatagan sila sing pito ka budyong, kag paagi sini ginapahibalo nila ang mga proklamasyon nga ginpalanog sa bug-os nga kalibutan sang katawhan ni Jehova kutob sang 1922. Ang nauna nga apat nagapahibalo sang mga paghukom sa “ikatlo” sang katawhan, sing maathag sa mga nagapuyo sa Cristiandad. Ining “mga budyong” nagapakita nga ang bahin sang Cristiandad sa “duta” (ang ayhan permanente nga sistema sang mga butang ni Satanas) kag sa “dagat” (ang dimahim-ong nga kadam-an sang katawhan), subong man sa iya ‘mga suba kag mga tuburan sang tubig’ (ang mga doktrina kag mga pilosopiya sang Cristiandad) kag sa iya madulom nga suga (ang klero, nga wala sing espirituwal nga kapawa), puntariya tanan sang kasingkal sang Dios. Ang nagalupad nga “agila,” nagalaragway sa anghel, masunod nga naglupad sa tunga sang langit, nagapahibalo nga ang tatlo ka budyong nga patunggon magakahulugan sing “kailo, kailo, kailo sa mga nagapuyo sa duta.”​—⁠Bugna 8:​1-13.

12. Sin-o ang nagabukas sang mga buho sa kadadalman, kag paano nga sa modernong tion may panong sang “mga apan” nga nagakagat sa klero?

¹² Gani ginpatunog sang ikalima nga anghel ang iya budyong. Toloka! “Ang bituon”​—⁠si Ginuong Jesus​—⁠nagabukas sang maaso nga buho sang kadadalman, kag nagguwa ang panong sang mga apan. Sing talalupangdon, nagalaragway ini sa paghilway ni Jesus sa hinaplas nga mga saksi sang Dios gikan sa pagkawala sing nahimo sang 1919. Upod ang balaan nga awtoridad, ginhapay nila ang mga halalban sang klero, nagbuyagyag sang ila dimatuod nga mga panudlo kag salimpapaw nga “lima ka bulan”​—⁠ang normal nga kalawigon sang kabuhi sang apan. Nagapalig-on ini nga ang kaliwatan sang modernong-adlaw nga mga apan “indi nga mas-a magataliwan” tubtob matapos hukman ni Jehova kag ni Cristo ang mga pungsod. Ang hubon sang mga apan nakabilin na sa katawhan sang linibo ka milyonmilyon ka napasad sa Biblia nga mga publikasyon, nga may kalayuhon nga mga mensahe nga nagakutot subong sang ikog sang iwiiwi. Si Juan nagakomento: “Ang nahaunang kailo nagligad. Yari karon! Duha pa ka kailo ang magaabot.”​—⁠Bugna 9:​1-12; Mateo 24:34; 25:​31-33.

13. (a) Sin-o ang ginalaragway sang apat ka anghel nga ginhubaran gikan sa Suba Eufrates, kag ano ang hilikuton nila? (b) Sin-o ang dimaisip nga kabalyero, kag paano nga ang ila awtoridad “yara sa ila mga baba kag yara sa ila mga ikog”?

¹³ Ang ikan-um nga budyong nagtunog, nagapakilala sa ikaduha nga “kailo.” Ginhubaran ang apat ka anghel gikan sa Suba Eufrates, nagakaigo nga nagalaragway sa paghilway sang 1919 sa hinaplas nga mga saksi sang Dios gikan sa pagkaulipon sa Babilonia. Ginhanda sila sa “pagpatay sang ikatlong bahin sang mga tawo,” nagapahibalo nga ang klero sang Cristiandad patay gikan sa pagtamod ni Jehova. Apang kinahanglan ang bulig agod pasangkaron ining panaksi nga hilikuton, kag ginaaman ini ni Jehova paagi sa pagpakilala sa dakung kadam-an sang mga masigkamanugpangabudlay. Ang hinaplas nga mga saksi kag ining mga kabulig nagasalakay sing tingob subong sang dimaisip nga kabalyero, “duha ka gatos ka milyon.” Ang ila awtoridad yara “sa ila mga baba” sa bagay nga ginapamulong nila ang mga mensahe sang paghukom ni Jehova sa mga balay sang katawhan, kag “sa ila mga ikog” sa bagay nga ginabilin nila sa ila ang literatura sa Biblia nga nagapahayag sining nagahilapit sing madasig nga adlaw sang pagtimalus.​—⁠Bugna 9:​13-21; Binuhatan 20:​20, 21.

14. (a) Sin-o ang “makusog nga anghel” sa ikan-um nga palanan-awon, kag ano ang ginahimo kag ginasiling niya? (b) Ano ang kahulugan sang pagpanabor sa diutay nga tolon-an nga linukot nga “matam-is subong sang dugos” apang ‘mapait sa tiyan’?

¹⁴ Karon ang ikan-um nga palanan-awon ginbuksan. Nakita naton ang “makusog nga anghel,” ayhan si Ginuong Jesus sa isa ka pinasahi nga katungdanan. May diutay nga tolon-an nga linukot sia sa iya kamot. Ang mga tingog kag daguob mabatian, kag nian ang anghel nagsumpa sa aton Dakung Manunuga: “Wala na sing pagpalantang pa; kundi nga sa mga adlaw sang pagtawag sang budyong nga patunggon sang ikapitong anghel, ang balaan nga tinago sang Dios . . . matuman.” Ginsilingan si Juan nga kuhaon ang diutay nga tolon-an nga linukot kag kaunon. Sa iya baba “matam-is ini subong sang dugos,” subong nga ang mensahe sang Ginharian, upod ang ginsaad nga mga pagpakamaayo sini tuhoy sa “bag-ong langit kag bag-ong duta,” manamit sa hinaplas nga Juan nga klase kag sa iya mga kaupdanan karon. Apang, sa kabaliskaran, ang komisyon nga pagbantala sang adlaw sang pagtimalus sang Dios “sa madamong katawhan kag pungsod kag hambal kag hari” mabudlay para sa iban nga batunon. Apang, magpakaisog! Magmabakud sa pagtuo nga si Jehova magaaman sing kinahanglanon nga kusog samtang ginabantala ninyo ang iya adlaw sang pagtimalus.​—⁠Bugna 10:​1-11; 21:​1, 4; 1 Juan 5:4; Isaias 40:​29-31; 61:​1, 2.

Ang Ikapito nga Budyong kag ang Ikatlo nga Kailo

15. (a) Ano ang natabo sang ang ikatlong kailo ginpahibalo kag ginpatunog sang ikapito nga anghel ang iya budyong? (b) Sa anong paagi nga ang pagbantala sang Ginharian isa ka kailo?

¹⁵ Sa tapos matagna ang panikasog sang kaaway sang 1918 nga “patyon” ang mga saksi ni Jehova, kag sa tapos malaragway kon daw ano ka tumalagsahon ang “espiritu sang kabuhi gikan sa Dios” nagbuhi liwat sa ila sang 1919 sa paghatag sing tugob-globo nga panaksi, si Juan nagasulat: “Nagligad ang ikaduhang kailo. Yari karon! Ang ikatlong kailo magaabot sing madali.” Sa anong paagi? Ang rekord nagapadayon: “Nian ang ikapitong anghel nagpatunog sang iya budyong.” Gani ang ikatlong kailo gin-angot sa pagpatunog sa sinang katapusan nga budyong. Kag pamatii! “May dalagkung mga tingog sa langit, nga nagasiling: ‘Ang ginharian sang kalibutan nangin iya sang aton Ginuo [nga si Jehova] kag sang iya Cristo, kag magahari sia sa katuigan kag katuigan.’ ” Amo ini ang Ginharian sang Dios paagi kay Cristo Jesus, nga upod sa iya 144,000 ka kaupod nga manunubli nagatapos sang balaan nga tinago sang Dios, nagabindikar sa dayon nga pagkasoberano ni Jehova nga Dios, ang Labing Gamhanan. Ang pagbantala sa Ginharian isa bala ka kailo? Sa malauton, huo! Kay ginapakita sini kon paano “laglagon [sang Dios] ang mga nagalaglag sang duta.”​—⁠Bugna 11:​1-19.

16. Anong dramatiko nga mga pagpahayag ang ginhimo sa ikapito nga palanan-awon?

¹⁶ Ang ikapito nga palanan-awon makita na karon! Tan-awa, didto, ang matutom nga langitnon nga organisasyon sang Dios, ang iya “babayi.” Nagamabdos sia kag ginasakitan sa pagbun-ag sa madugay na ginahulat nga bata. Sa una nga tion​—⁠apang indi ang katapusan​—⁠sa Bugna, ang pula nga luto nga dragon, “ang dumaan nga man-ug, nga ginatawag nga Yawa kag Satanas, nga nagadaya sa bug-os napuy-an nga duta,” nagguwa, nga handa sa paglamon sa bata pagkabun-ag. Ang gintagna nga “kaawayon sa ulot [sang man-ug] kag sang babayi” nagapadulong sa komprontasyon! Ang babayi nagbun-ag sang “lalaki,” nga gilayon nga ginsagmit pakadto sa trono sang Dios.​—⁠Bugna 12:​1-6, 9; Genesis 3:15; Daniel 2:44; 7:​13, 14.

17. (a) Sin-o si Miguel, kag paano sia nagpanghikot nahisuno sa iya ngalan kutob sang 1914? (b) Ipaanggid ang ‘tatlo ka kailo’ kag ang “kailo para sa duta” sa Bugna 12:⁠12.

¹⁷ Amo ini ang bata nga lalaki nga Ginharian, nga gintukod sa mga langit sang maragtason nga tuig sang 1914. Ang Hari sini, si Cristo Jesus, gintawag man nga si Miguel, nga nagakahulugan sing “Sin-o ang Kaangay sang Dios?” Ginasabat niya inang pamangkot nga walay nagapalantang paagi sa pagpakig-away kay Satanas kag pagtagbong sa sinang dumaan nga man-ug kag sa iya mga demonyo sa duta. Kutob sang 1914, nangin “kailo sa duta kag sa dagat, kay ang Yawa nagpanaug sa inyo sa dakung kasingkal, bangod nga nakahibalo sia nga may malip-ot lamang sia nga tion.” Gani ining kailo, nga makita sa makaluluoy nga kahimtangan sang katawhan karon, indi dapat igumon sa ‘tatlo ka kailo’ nga ginadala ni Jehova sa malauton sa paghukom sa ila.​—⁠Bugna 12:​7-12.

18. (a) Anong kailo ang ginatinguhaan ni Satanas nga Yawa nga himuon para sa matutom nga mga alagad ni Jehova sa wala pa kag sa tion sang Inaway Kalibutanon II? (b) Ano ang determinado gihapon nga himuon sang Yawa, kag ano ang ipahayag sang nabilin nga mga palanan-awon?

¹⁸ Ang Yawa nagpanikasog sa paghimo sing kailo para man sa matutom nga mga ulipon ni Jehova sa duta. Sa wala pa kag sa tion sang Inaway Kalibutanon II, nagbuga sia sing nagabaha nga paghingabot sa panikasog nga lumsan ang buluhaton sang “mga nagkalabilin” sang katulad-babayi nga organisasyon sang Dios​—⁠yadtong bahin sang 144,000 nga nagaalagad gihapon sa tunga sang katawhan. Pat-uron ni Jehova nga ang duta, ang sistema mismo sang mga butang ni Satanas, pagalumsan sina nga baha. Apang, ang akig nga si Satanas nagapanikasog gihapon sa pagpakig-away batok sa mga Saksi ni Jehova. (Bugna 12:​13-17) Mangin ano ang katapusan nga resulta? May siam pa ka palanan-awon, kag ini magasugid sa aton!​—⁠Habacuc 2:⁠3.

MGA PAMANGKOT SA REPASO

□ Paano ginagamit ni Jehova ang mga anghel may kahilabtanan sa tolon-an sang Bugna?

□ Paano kita dapat naapektuhan sang mga mensahe ni Jesus sa pito ka mga kongregasyon?

□ Ano ang nagresulta gikan sa pagpatunog sa pito ka mga budyong?

□ Ano ang ginalaragway sang panong sang mga apan kag sang dimaisip nga kabalyero?

□ Ngaa ang pagkabun-ag sang Ginharian sang Dios gin-angot sa “ikatlo nga kailo”?

[Kahon sa pahina 14]

MGA KAPITULO KAG MGA BERSIKULO SANG TAGSA KA PALANAN-AWON:

□ UNA NGA PALANAN-AWON 1:10–3:⁠22

□ IKA-2 NGA PALANAN-AWON 4:1–5:⁠14

□ IKA-3 NGA PALANAN-AWON 6:1-17

□ IKA-4 NGA PALANAN-AWON 7:​1-17

□ IKA-5 NGA PALANAN-AWON 8:1–9:⁠21

□ IKA-6 NGA PALANAN-AWON 10:1–11:⁠19

□ IKA-7 NGA PALANAN-AWON 12:​1-17

□ IKA-8 NGA PALANAN-AWON 13:​1-18

□ IKA-9 NGA PALANAN-AWON 14:​1-20

□ IKA-10 NGA PALANAN-AWON 15:1–16:⁠21

□ IKA-11 NGA PALANAN-AWON 17:​1-18

□ IKA-12 NGA PALANAN-AWON 18:1–19:⁠10

□ IKA-13 NGA PALANAN-AWON 19:​11-21

□ IKA-14 NGA PALANAN-AWON 20:​1-10

□ IKA-15 NGA PALANAN-AWON 20:11–21:8

□ IKA-16 NGA PALANAN-AWON 21:9–22:5

[Kahon/Laragway sa pahina 15-18]

ANG 16 KA PALANAN-AWON SA APOKALIPSIS​—⁠PILA SANG DALAGKU NGA PUNTO

1 Si Jesus sa tunga sang pito ka kandelero sang kongregasyon, nagapadala sang mahigugmaon nga mga mensahe paagi sa pito ka bituon, ang hinaplas nga mga manugtatap

2 Sa atubangan sang langitnon nga trono ni Jehova ang madaugon nga Kordero nagabaton sang linukot sang mga mensahe sang paghukom

3 Si Cristo Jesus nagasakay sa pagpangdaug, samtang ang iban nga mga manugkabayo nagahalit sa katawhan kag ang adlaw sang kasingkal sang Dios nagahinampot

4 Samtang ginapunggan sang mga anghel ang dakung kapipit-an, ang pagtipon sa 144,000 kag sa dakung kadam-an gintapos

5 Ang mga anghel nagapalanog sang mga mensahe sang paghukom, kag ang mga Saksi ni Jehova nagasalakay subong sang mga apan sa pagbuyagyag sa butig nga relihion

6 Sa pagpatunog sa ikapito nga budyong, ang “mga saksi” sang Dios ginbuhi liwat sa pagpahibalo sa nagapakari nga Ginharian ni Jehova kag sang iya Cristo

7 Pagkatapos sang pagkabun-ag sang Ginharian sang 1914, gintagbong ni Cristo si Satanas kag ang iya mga demonyo sa duta

8 Ang duha ka mapintas nga sapat nagguwa, kag ang ikaduhang politikal nga sapat nagahatag sang ginhawa sang kabuhi sa larawan sang una, ang NU sa kabilugan

9 Ang katawhan nga ‘nahadlok sa Dios kag nagahatag sa iya sing himaya’ gin-ani para sa kabuhi nga walay katapusan, ang iban para sa kalaglagan

10 Ang pagbubo sa pito ka mga yahong sang kaakig sang Dios nagatapos sa paglaglag sa tanan nga ginpahulag sang malaut nga “hangin” ni Satanas

11 Ang dakung makihilawason nga babayi, butig nga relihion, ginpahalin gikan sa politikal nga “sapat,” nga nagalaglag sang ulihi sa iya

12 Pagkatapos malaglag ang Babilonia nga Daku, ang mga paghanda ginpat-od para sa kasal sang Kordero kag sang iya nobya, ang 144,000

13 Pagkatapos sang kalaglagan sang dakung makihilawason nga babayi, ginapangunahan ni Jesus ang langitnon nga kasoldadosan sa paglaglag sa nabilin nga sistema ni Satanas sa duta

14 Ang pagtagbong sa kadadalman kay Satanas nagabukas sang dalan para sa Isa ka Libo ka Tuig nga Paggahom ni Cristo kag sang iya nobya, ang 144,000

15 Sa idalom sang “bag-ong langit” ni Cristo Jesus kag sang iya nobya, ang “bag-ong duta” nga katilingban sang katawhan magaagom sing dimaisip nga mga pagpakamaayo gikan kay Jehova

16 Ang mga aman sang Dios sa pagpang-ayo kag kabuhi para sa katawhan nagailig paagi sa mahimayaon nga Bag-ong Jerusalem