Ano ang Ginharian sang Dios?

Ang panguna nga mensahe sang Biblia amo ang parte sa Ginharian sang Dios. Paagi sa sina nga Ginharian, himuon ni Jehova kon ano gid ang iya katuyuan para sa duta. Ano ang Ginharian? Ngaa masiling naton nga nagagahom na ini? Ano na ang nahimo sini? Kag ano ang himuon sini sa palaabuton? Ini nga mga pamangkot sabton sa sini nga leksion kag sa masunod nga duha ka leksion.

1. Ano ang Ginharian sang Dios, kag sin-o ang Hari sini?

Ang Ginharian isa ka gobierno nga ginhimo ni Jehova nga Dios. Ang Hari sini nga si Jesucristo, nagagahom sa langit. (Mateo 4:17; Juan 18:36) Ang Biblia nagsiling parte kay Jesus: “Magahari sia . . . sing dayon.” (Lucas 1:32, 33) Bilang Hari sang Ginharian sang Dios, pagagamhan ni Jesus ang tanan sa duta.

2. Sin-o ang kaupod ni Jesus nga magagahom?

Indi lang si Jesus ang magagahom. May kaupod sia nga “halin sa tagsa ka tribo kag hambal kag katawhan kag pungsod . . . kag magagahom sila sa duta subong mga hari.” (Bugna 5:9, 10) Pila ang kaupod sang Cristo nga magagahom? Halin sang nagkadto si Jesus sa duta, minilyon ka Cristiano ang nangin sumulunod niya. Pero 144,000 lang ang mapalangit kag magagahom kaupod ni Jesus. (Basaha ang Bugna 14:1-4.) Ang iban nga Cristiano sa duta mangin sakop sang Ginharian.—Salmo 37:29.

3. Ngaa ang Ginharian sang Dios mas maayo sangsa mga gobierno sang tawo?

Bisan pa ginatinguhaan sang mga tawo nga manuggahom nga himuon ang maayo, wala sila sing ikasarang nga himuon ang tanan nga gusto nila. Sa ulihi, buslan sila sang mga manuggahom nga mahimo wala nagaulikid sa ila mga sakop. Pero ang Manuggahom sang Ginharian sang Dios nga si Jesus, indi gid pagbuslan ni bisan sin-o. Ang Dios ‘nagtukod sing isa ka ginharian nga indi gid malaglag.’ (Daniel 2:44) Gamhan ni Jesus ang bilog nga duta, kag indi sia magpakita sing paboritismo. Mapinalanggaon sia, maayo, kag wala sing pinilian, kag tudluan niya ang mga tawo nga ipakita man ini sa iban.—Basaha ang Isaias 11:9.

4. Isa ka maayo gid nga gobierno nga magagahom sa duta

Si Jesucristo mas gamhanan sangsa kay bisan sin-o nga tawo nga naggahom. Basaha ang Mateo 28:18, dayon binagbinaga ini nga pamangkot:

• Ngaa mas daku ang awtoridad ni Jesus sangsa kay bisan sin-o nga tawo nga manuggahom?

Ang mga gobierno sang tawo pirme nagabag-o, kag ang kada isa nagagahom sa isa lang ka bahin sang duta. Amo man bala sini ang Ginharian sang Dios? Basaha ang Daniel 7:14, dayon binagbinaga ini nga mga pamangkot:

• Ngaa maayo gid nga ang Ginharian sang Dios “indi malaglag”?

• Ngaa maayo gid nga magagahom ini sa bilog nga duta?

5. Dapat buslan ang mga gobierno sang tawo

Ngaa dapat buslan sang Ginharian sang Dios ang mga gobierno sang tawo? Tan-awa ang VIDEO, dayon binagbinaga ang masunod nga pamangkot.

VIDEO: Ano ang Ginharian sang Dios?—Porsyon lang sang video (1:41)

• Ano ang resulta sang paggahom sang mga tawo?

Basaha ang Manugwali 8:9, dayon binagbinaga ini nga mga pamangkot:

• Sa banta mo, dapat bala buslan sang Ginharian sang Dios ang mga gobierno sang tawo? Ngaa?

6. Ang mga manuggahom sang Ginharian sang Dios nakaintiende sa aton

Bangod ang aton Hari nga si Jesus nagkabuhi bilang tawo, ‘makapakita sia sing kahanuklog [ukon, makaintiende sia] sa aton mga kaluyahon.’ (Hebreo 4:15) Ang 144,000 ka matutom nga lalaki kag babayi nga magagahom kaupod ni Jesus ginpili ni Jehova “halin sa tagsa ka tribo kag hambal kag katawhan kag pungsod.”—Bugna 5:9.

• Ngaa makapaumpaw mahibaluan nga si Jesus kag ang tanan nga kaupod niya nga manuggahom nagkabuhi bilang tawo?

7. Mas maayo ang mga kasuguan sang Ginharian sang Dios

Ang mga gobierno nagahimo sing mga kasuguan para sa kaayuhan sang ila mga sakop. Ang Ginharian sang Dios may mga kasuguan man nga dapat tumanon sang mga sakop sini. Basaha ang 1 Corinto 6:9-11, dayon binagbinaga ini nga mga pamangkot:

• Ano sa banta mo ang resulta kon sundon sang tanan ang mga kasuguan sang Dios?a

• Insakto bala nga magpaabot si Jehova nga tumanon sang tanan nga sakop sang Ginharian ini nga mga kasuguan? Ngaa?

• Posible bala magbag-o ang mga wala nagasunod sa sini nga mga kasuguan?—Tan-awa ang bersikulo 11.

SUMARYO

Ang Ginharian sang Dios isa ka matuod nga gobierno sa langit kag pagagamhan sini ang bilog nga duta.

Rebyu

• Sin-o ang mga manuggahom sang Ginharian sang Dios?

• Ngaa ang Ginharian sang Dios mas maayo sangsa bisan ano nga gobierno sang tawo?

• Ano ang ginapaabot ni Jehova nga himuon sang mga sakop sang Ginharian?

DUGANG NGA IMPORMASYON

Hibalua ang ginasiling ni Jesus kon diin ang Ginharian.

“Ang Ginharian sang Dios Ara Bala sa Imo Tagipusuon?” (Artikulo sa website)

Ngaa mas ginasuportahan sang mga Saksi ni Jehova ang Ginharian sang Dios sangsa gobierno sang tawo?

Ginharian sang Dios Lang Gid ang Ila Ginasuportahan (1:43)

Hibalua ang ginasiling sang Biblia parte sa 144,000 nga ginpili ni Jehova nga maggahom kaupod ni Jesus.

“Sin-o ang Mapalangit?” (Artikulo sa website)

Ano ang nagkumbinsi sa isa ka babayi nga napriso nga Dios lang ang makadula sang inhustisya sa kalibutan?

“Kon Paano Ko Nakita ang Sabat sa Inhustisya” (Magmata!, Nobiembre 2011)