Ang Mensahe nga Dapat Naton Ibantala

MADUGAY pa antes sang Cristianong dag-on, ginsilingan ni Jehova ang matutom nga si Abraham tuhoy sa kahimusan nga ang “tanan nga pungsod sang duta” magapakamaayo sang ila kaugalingon. (Gen. 22:18) Gin-inspirar man niya si Solomon sa pagsulat tuhoy sa sadsaran nga tulumanon sang tanan nga tawo: “Kahadluki ang matuod nga Dios kag tumana ang iya mga sugo. Kay amo ini ang bug-os nga katungdanan sang tawo.” (Manugw. 12:13) Apang paano matun-an sang mga tawo nga nagapuyo sa tanan nga kapungsuran ini nga mga butang?

Bisan pa may yara pirme mga tawo nga nagapati sa pulong sang Dios, ginapakita sang Biblia nga ang maid-id kag bug-os kalibutan nga pagpanaksi diin ang tanan nga kapungsuran malab-ot sing maayong balita gintigana sa “adlaw sang Ginuo.” Nagsugod ini sang 1914. (Bug. 1:10) Tuhoy sini nga tion, ang Bugna 14:​6, 7 nagtagna nga ang importante nga pagpahayag sa idalom sang panuytoy sang mga anghel pagahimuon “sa tagsa ka pungsod kag tribo kag hambal kag katawhan.” Palig-unon sila: “Kahadluki ninyo ang Dios kag hatagi sia sing himaya, kay nag-abot na ang oras sang iya paghukom, kag simbaha ang Isa nga naghimo sang langit kag duta kag dagat kag mga tuburan sang tubig.” Kabubut-on sang Dios nga ibantala ini nga mensahe. Pribilehiyo naton nga makapakigbahin sa sini nga hilikuton.

“Ang Matuod nga Dios.” Sang si Jehova nagsiling, “Kamo ang akon mga saksi,” sa isa yadto ka danyag nga ginabaisan ang hulusayon tuhoy sa pagka-Dios. (Isa. 43:10) Ang mensahe nga dapat ihatag indi lamang nga ang mga tawo dapat may relihion ukon nagapati sa isa ka dios. Sa baylo, dapat sila hatagan sing kahigayunan nga matun-an nga ang Manunuga sang langit kag duta amo ang lamang matuod nga Dios. (Isa. 45:​5, 18, 21, 22; Juan 17:3) Ang matuod nga Dios lamang ang masaligan nga makatagna sang palaabuton. Pribilehiyo naton nga ipatalupangod nga ang katumanan sang pulong ni Jehova sang nagligad nagahatag sing malig-on nga basihan sa pagsalig nga ang tanan nga ginsaad niya tuhoy sa palaabuton magamatuod.​—Jos. 23:14; Isa. 55:​10, 11.

Sa pagkamatuod, madamo sang aton ginapanaksihan ang nagasimba sa iban nga mga dios ukon nagapangangkon nga wala gid sing ginasimba nga dios. Agod magapamati sila, mahimo kinahanglan nga magsugod sa isa ka butang nga pareho kamo nga interesado. Makabenepisyo kita sa halimbawa nga ginsulat sa Binuhatan 17:22-31. Talupangda nga bisan pa mataktikanhon si apostol Pablo, maathag nga ginsambit niya ang salabton sang tanan nga tawo sa Dios nga amo ang Manunuga sang langit kag duta.

Pagpakilala sa Ngalan Sang Dios. Indi pagkalimti nga ipakilala ang ngalan sang matuod nga Dios. Ginahigugma ni Jehova ang iya ngalan. (Ex. 3:15; Isa. 42:8) Luyag niya nga makilala sang mga tawo ini nga ngalan. Ginpahanabo niya nga ang iya mahimayaon nga ngalan malakip sa Biblia sing kapin sa 7,000 ka beses. Responsabilidad naton nga ipakilala ini sa mga tawo.​—Deut. 4:35.

Ang paglaum nga kabuhi sa palaabuton sang tanan nga tawo nasandig sa pagkilala nila kay Jehova kag sa pagtawag sa iya sa pagtuo. (Joel 2:32; Mal. 3:16; 2 Tes. 1:8) Apang, ang kalabanan nga tawo wala makakilala kay Jehova. Nagalakip ini sa madamo nga tawo nga nagapangangkon nga nagasimba sa Dios sang Biblia. Bisan pa may Biblia sila kag nagabasa sini, mahimo nga wala gihapon nila makilala ang personal nga ngalan sang Dios bangod gindula ini sa madamo nga modernong badbad. Ang lamang nga nahibaluan sang pila ka tawo tuhoy sa ngalan nga Jehova amo nga ginsilingan sila sang ila relihioso nga mga lider nga indi ini paggamiton.

Paano naton mapakilala sa mga tawo ang ngalan sang Dios? Wala na sing mas epektibo pa sangsa ipakita ini sa ila sa Biblia​—sa ila mismo kopya kon posible. Sa pila ka badbad, ini nga ngalan makita sing linibo ka beses. Sa iban naman, makita lamang ini sa Salmo 83:18 ukon sa Exodo 6:​3-6, ukon mahimo ini makita sa footnote sa Exodo 3:​14, 15 ukon 6:3. Sa pila ka badbad, ang tal-us nga mga ekspresyon, subong sang “Ginuo” kag “Dios,” ginasulat sing tuhay kon ang teksto sa orihinal nga lenguahe nagaunod sang personal nga ngalan sang Dios. Kon gindula sing bug-os sang modernong adlaw nga mga manugbadbad ang personal nga ngalan sang Dios, mahimo kinahanglan mo nga gamiton ang mas daan nga badbad sang Biblia agod ipakita sa mga tawo kon ano ang ginhimo. Sa pila ka kadutaan mahimo mo ipatalupangod ang ngalan sang Dios sa relihioso nga mga kalantahon ukon sa isa ka inskripsion sa publiko nga tinukod.

Bisan sa mga nagasimba sa iban nga mga dios, ang Jeremias 10:10-13 sa New World Translation mahimo magamit sing epektibo. Wala lamang sini ginasugid ang ngalan sang Dios kundi ginapaathag man sing maayo kon sin-o sia.

Indi pag-isli ang ngalan nga Jehova sing mga titulo subong sang “Dios” kag “Ginuo,” subong sang ginahimo sang Cristiandad. Wala ini nagakahulugan nga ang ngalan dapat gamiton sa pagsugod sang tagsa ka paghambalanay. Bangod sang pagkamaynadampigan, mahimo nga untaton sang pila ka tawo ang paghambalanay. Apang sa tapos makapasad sing basihan sa paghambalanay, indi paglikawi ang paggamit sa ngalan sang Dios.

Talalupangdon nga ang Biblia nagagamit sang personal nga ngalan sang Dios sing kapin kasunson sangsa gintingob nga kadamuon sang paggamit sini sa mga titulo subong sang “Ginuo” kag “Dios.” Bisan pa subong sini, wala gintinguhaan sang mga manunulat sang Biblia nga ilakip ang ngalan sang Dios sa tagsa ka dinalan. Ginahimo nila ini sing natural, sing kinaandan, kag sing matinahuron. Maayo ini nga huwaran nga dapat sundon.

Ang Persona nga Ginapakilala Sini nga Ngalan. Bisan pa ang katunayan nga ang Dios may personal nga ngalan isa ka importante nga kamatuoran, una lamang ini nga tikang sa pagkilala sa iya.

Agod mahigugma si Jehova kag makapanawag sa iya nga may pagtuo, kinahanglan mahibaluan sang mga tawo kon ano sia nga sahi sang Dios. Sang ginpakilala ni Jehova ang iya ngalan kay Moises sa Bukid Sinai, wala lamang Niya ginsulit ang tinaga nga “Jehova.” Ginpatalupangod Niya ang Iya pila ka talalupangdon nga mga kinaiya. (Ex. 34:​6, 7) Isa ini ka halimbawa nga dapat naton ilugon.

Nagapanaksi ka man sa bag-uhan nga interesado nga mga tawo ukon nagapamulongpulong sa kongregasyon, kon nagahambal ka tuhoy sa mga pagpakamaayo sang Ginharian, ipatalupangod kon ano ang ginapakita sini tuhoy sa Dios nga naghimo sini nga mga saad. Kon nagapatuhoy sa iya mga sugo, ipadaku ang kaalam kag gugma nga ginapabanaag sini. Ipaathag nga ang mga ginapatuman sang Dios wala nagapabug-at sa aton kundi, sa baylo, gindesinyo agod makabenepisyo kita. (Isa. 48:​17, 18; Miq. 6:8) Ipakita kon paano ang tagsa ka pagpadayag ni Jehova sing gahom nagasugid sing pila ka butang tuhoy sa iya personalidad, sa iya mga talaksan, sa iya katuyuan. Ipatalupangod ang pagkabalanse sa pagpakita ni Jehova sang iya mga kinaiya. Ipabati sa mga tawo ang pagpabutyag mo sang imo mga balatyagon tuhoy kay Jehova. Ang imo gugma kay Jehova makabulig sa pagpukaw sini nga gugma sa iban.

Ang hilingagawon nga mensahe para sa aton adlaw nagapalig-on sa tanan nga tawo nga kahadlukan ang Dios. Paagi sa aton ginasiling, dapat tinguhaan naton nga palambuon ining diosnon nga kahadlok. Ini nga kahadlok isa ka mapuslanon nga kahadlok, pagkapunaw kay Jehova, isa ka tudok nga pagtahod sa iya. (Sal. 89:7) Nagalakip ini sang ihibalo nga si Jehova amo ang supremo nga Hukom kag nga ang aton paglaum nga kabuhi sa palaabuton nasandig sa pagtigayon naton sang iya kahamuot. (Luc. 12:5; Roma 14:12) Busa, ini nga kahadlok ginaupdan sang tudok nga gugma sa iya kag, subong resulta, sang hanuot nga handum nga pahamut-an sia. (Deut. 10:​12, 13) Ang diosnon nga kahadlok nagapahulag man sa aton nga dumtan ang malain, tumanon ang mga sugo sang Dios, kag simbahon sia sing bug-os tagipusuon. (Deut. 5:29; 1 Cron. 28:9; Hulu. 8:13) Nagaamlig ini sa aton batok sa pagtinguha nga alagaron ang Dios samtang ginahigugma ang mga butang sa kalibutan.​—1 Juan 2:15-17.

Ang Ngalan Sang Dios​—Isa ka “Torre nga Mabakod.” Ang mga tawo nga nakakilala gid kay Jehova nagaagom sing daku nga pangamlig. Indi lamang ini bangod ginagamit nila ang iya personal nga ngalan ukon mahingadlan ang pila niya ka kinaiya. Ini bangod nagasalig sila kay Jehova mismo. Tuhoy sa ila, ang Hulubaton 18:10 nagasiling: “Ang ngalan ni Jehova torre nga mabakod. Ang matarong nagadalagan pasulod sini kag ginahatagan sing pangamlig.”

Himusli sing maayo ang mga kahigayunan sa pagpalig-on sa iban nga magsalig kay Jehova. (Sal. 37:3; Hulu. 3:​5, 6) Ini nga pagsalig nagapakita sing pagtuo kay Jehova kag sa iya mga saad. (Heb. 11:6) Kon ang mga tawo “nagatawag sa ngalan ni Jehova” bangod nahibaluan nila nga sia ang Soberano sa Bug-os nga Uniberso, nagahigugma sang iya mga dalanon, kag nagapati sing bug-os nga ang matuod nga kaluwasan nagahalin lamang sa iya, nian​—ang Pulong sang Dios nagapasalig sa aton—​maluwas sila. (Roma 10:​13, 14) Samtang ginatudluan mo ang iban, buligi sila nga mapalambo ini nga sahi sang pagtuo may kaangtanan sa tagsa ka bahin sang ila kabuhi.

Madamo nga tawo ang nagaatubang sang nagalumapaw nga mga problema. Mahimo nga wala sila sing makita nga solusyon. Palig-una sila nga tun-an ang mga dalanon ni Jehova, magsalig sa iya, kag iaplikar ang ila matun-an. (Sal. 25:5) Palig-una sila nga mangamuyo sing hanuot para sa bulig sang Dios kag pasalamatan sia tungod sa mga pagpakamaayo niya. (Fil. 4:​6, 7) Kon makilala nila si Jehova, indi lamang paagi sa pagbasa sing pila ka dinalan sa Biblia kundi paagi man sa pag-eksperiensia sa katumanan sang iya mga saad sa ila mismo kabuhi, maagom nila ang kalig-unan nga resulta sang paghangop gid kon ano ang ginarepresentar sang ngalan ni Jehova.​—Sal. 34:8; Jer. 17:​7, 8.

Gamita sing maayo ang tagsa ka kahigayunan sa pagbulig sa mga tawo nga mahangpan ang kaalam sa pagkahadlok sa matuod nga Dios, si Jehova, kag sa pagtuman sang iya mga sugo.

PAGKATAPOS sang iya pagkabanhaw kag antes sang iya pagbalik sa langit, ginsugo ni Jesucristo ang iya mga disipulo, nga nagasiling: “Mangin saksi ko kamo . . . tubtob sa ukbong sang duta.” (Binu. 1:8) Ang matutom nga mga alagad sang Dios sa aton adlaw ginalaragway nga “may hilikuton sa pagpanaksi tuhoy kay Jesus.” (Bug. 12:17) Daw ano ikaw kaukod sa pagpanaksi?

Madamo nga tawo nga nagasiling sing sinsero nga nagatuo sila kay Jesus ang wala makahibalo sang iya pagluntad antes mangin tawo. Wala sila makahibalo nga sang yari sia sa duta tawo gid sia. Wala sila makahangop kon ano ang buot silingon sang iya pagka-Anak sang Dios. Halos wala sila sing nahibaluan tuhoy sa iya papel sa katumanan sang katuyuan sang Dios. Wala sila makahibalo kon ano ang iya ginahimo karon, kag wala nila marealisar kon paano ang ila kabuhi maapektuhan sang iya himuon sa palaabuton. Mahimo pa gani nila masal-an nga ang mga Saksi ni Jehova wala nagapati kay Jesus. Pribilehiyo naton nga manikasog sa pagpahibalo sing kamatuoran tuhoy sining mga butang.

Ang iban pa nga mga tawo wala nagapati nga ang isa nga kaangay ni Jesus nga ginalaragway sa Biblia nagkabuhi gid. Ginatamod sang iban si Jesus subong isa lamang ka bantog nga tawo. Madamo ang nagasikway sang ideya nga sia Anak sang Dios. Ang “pagpanaksi tuhoy kay Jesus” sa sining katawhan nagakinahanglan sing daku nga panikasog, pagpailob, kag pagkamataktikanhon.

Walay sapayan sang pagtamod sang imo mga tagpalamati, kinahanglan nga magkuha sila sing ihibalo tuhoy kay Jesucristo agod makabenepisyo sila sa kahimusan sang Dios para sa kabuhi nga dayon. (Juan 17:3) Ang ginpabutyag sing maathag nga kabubut-on sang Dios amo nga ang tanan nga nagakabuhi dapat “dayag nga magakilala nga si Jesucristo Ginuo” kag dapat magpasakop sa iya awtoridad. (Fil. 2:9-11) Sa amo, indi mahimo nga likawan lang naton ang hulusayon kon makasumalang kita sang mga tawo nga may malig-on apang sayop nga mga opinyon ukon maathag nga may ginadampigan. Samtang sa pila ka kahimtangan makahambal kita sing hilway tuhoy kay Jesucristo​—bisan sa aton una nga pagduaw—​sa iban, mahimo nga kinahanglan magkomento kita sing mainandamon nga nagabulig sa aton mga tagpalamati nga magsugod sa paghunahuna sing husto tuhoy sa iya. Mahimo nga maghunahuna man kita sing mga paagi agod mapaathag ang dugang pa nga mga bahin sang topiko sa masunod nga mga pagduaw liwat. Apang, mahimo nga indi posible nga hinun-anunan ang tanan nga nadalahig tubtob madumalahan naton ang isa sing pagtuon sa Biblia.​—1 Tim. 2:3-7.

Ang Importante nga Papel ni Jesus sa Katuyuan Sang Dios. Kinahanglan buligan naton ang mga tawo nga mahangpan nga bangod si Jesus amo ang “dalan” kag ‘wala sing makakadto sa Amay kundi paagi sa iya,’ imposible nga matigayon ang nahamut-an nga kaangtanan sa Dios nga wala sing pagtuo kay Jesucristo. (Juan 14:6) Tubtob indi marealisar sang isa ka tawo ang importante nga papel nga ginhatag ni Jehova sa iya panganay nga Anak, imposible nga mahangpan niya ang Biblia. Ngaa? Bangod ginhimo ni Jehova ini nga Anak nga amo ang yabi sa pagpatuman sang tanan Niya nga katuyuan. (Col. 1:17-20) Ang mga tagna sa Biblia nasentro sa sini nga katunayan. (Bug. 19:10) Si Jesucristo amo ang isa nga paagi sa iya ginhatag ang solusyon sa tanan nga problema nga resulta sang pagrebelde ni Satanas kag sang sala ni Adan.​—Heb. 2:5-9, 14, 15.

Agod mahangpan ang papel ni Cristo, dapat kilalahon sang isa nga ang mga tawo yara sa makaluluoy nga kahimtangan diin indi nila mahilway ang ila kaugalingon. Tanan kita natawo sa sala. Mahimo ini mag-apektar sa aton sa nanuhaytuhay nga paagi sa aton bug-os nga kabuhi. Apang, sa ulihi, nagaresulta ini sa kamatayon. (Roma 3:23; 5:12) Mangatarungan suno sa sining katunayan sa imo mga ginapanaksihan. Nian ipatalupangod nga paagi sa halad gawad ni Jesucristo, mahigugmaon nga ginpaposible ni Jehova ang kaluwasan gikan sa sala kag kamatayon para sa mga nagatuo sa sini nga aman. (Mar. 10:45; Heb. 2:9) Nagbukas ini sing dalan agod matigayon nila ang walay katapusan nga kabuhi sa kahimpitan. (Juan 3:​16, 36) Indi ini posible sa bisan anong iban pa nga paagi. (Binu. 4:12) Subong isa ka manunudlo, sa pribado man ukon sa kongregasyon, indi lamang pag-ihambal ini nga mga katunayan. Mainayuhon kag mapailubon nga palambua sa imo mga tagpalamati ang apresasyon sa papel ni Cristo subong aton Manunubos. Ang apresasyon sa sini nga aman may daku gid nga epekto sa panimuot, paggawi, kag mga tulumuron sa kabuhi sang isa ka tawo.​—2 Cor. 5:​14, 15.

Sa pagkamatuod, ginhalad ni Jesus ang iya kabuhi sing makaisa gid lang. (Heb. 9:28) Apang, nagapanghikot sia karon sing aktibo subong Mataas nga Saserdote. Buligi ang iban nga mahangpan kon ano ang kahulugan sini. Ginahul-an bala sila, nalugaw-an, nagaantos, ukon nagaproblema bangod sang pagkadimainayuhon sang mga tawo sa palibot nila? Sang tawo anay si Jesus, naeksperiensiahan niya ini tanan. Nahibaluan niya kon ano ang aton ginabatyag. Bangod sang pagkadihimpit, nagabatyag bala kita nga kinahanglan naton ang kaluoy sang Dios? Kon nagapangamuyo kita sa Dios para sa kapatawaran pasad sa halad ni Jesus, si Jesus nagapanghikot subong “kabulig sang Amay.” Sing maawaon, sia “nagapakitluoy para sa aton.” (1 Juan 2:​1, 2; Roma 8:34) Pasad sa halad ni Jesus kag paagi sa iya pag-alagad subong Mataas nga Saserdote, makapalapit kita sa “trono sang di-bagay nga kaayo” ni Jehova agod mabaton ang bulig sa nagakaigo nga tion. (Heb. 4:​15, 16) Bisan pa indi kita himpit, ang bulig nga ginahatag ni Jesus subong Mataas nga Saserdote nagabulig sa aton nga maalagad ang Dios upod ang matinlo nga konsiensia.​—Heb. 9:​13, 14.

Dugang pa, may daku nga awtoridad si Jesus subong ang isa nga gintangdo sang Dios nga mangin Ulo sang Cristianong kongregasyon. (Mat. 28:18; Efe. 1:​22, 23) Bangod sini, nagahatag sia sing kinahanglanon nga panuytoy suno sa kabubut-on sang Dios. Kon nagatudlo ka sa iban, buligi sila nga mahangpan nga si Jesucristo, kag indi tawo, ang Ulo sang kongregasyon. (Mat. 23:10) Sa imo una nga pagpakigsugilanon sa mga interesado, agdaha sila sa mga miting sang lokal nga kongregasyon, diin ginatun-an naton ang Biblia sa bulig sang materyal nga ginaaman paagi sa “matutom kag mainandamon nga ulipon.” Ipaathag sa ila indi lamang kon sin-o ang “ulipon” kundi kon sin-o man ang Agalon agod mahibaluan nila ang pagkaulo ni Jesus. (Mat. 24:45-​47) Ipakilala sila sa mga gulang, kag ipaathag ang Makasulatanhon nga mga kalipikasyon nga dapat malab-ot sining mga gulang. (1 Tim. 3:​1-7; Tito 1:​5-9) Ipaathag nga ang kongregasyon indi iya sang mga gulang kundi nagabulig sila sa aton nga masunod ang mga tikang ni Jesucristo. (Binu. 20:28; Efe. 4:​16; 1 Ped. 5:​2, 3) Buligi ining mga interesado nga mahangpan nga may isa ka organisado, bug-os kalibutan nga katilingban nga nagapanghikot sa idalom sang pagkaulo ni Cristo.

Gikan sa mga Ebanghelyo, natun-an naton nga sang magsulod si Jesus sa Jerusalem wala madugay antes sang iya kamatayon, gindayaw sia sang iya mga disipulo subong “ang Isa nga nagakari subong Hari sa ngalan ni Jehova!” (Luc. 19:38) Samtang nagadalom pa ang pagtuon sang mga tawo sa Biblia, matun-an nila nga si Jehova naghatag na karon kay Jesus sing awtoridad sa paggahom nga nagaapektar sa mga tawo sang tanan nga pungsod. (Dan. 7:​13, 14) Kon nagapamulongpulong ikaw sa kongregasyon ukon nagadumala sing mga pagtuon sa Biblia, ipahangop kon ano ang buot silingon sang paggahom ni Jesus para sa aton tanan.

Ipadaku nga ang dalanon naton sa pagkabuhi nagapakita kon bala nagapati gid kita nga si Jesucristo amo ang Hari kag kon bala kinabubut-on kita nga nagapasakop sa iya pagginahom. Ipatalupangod ang hilikuton nga ginpahimo ni Jesus sa iya mga disipulo pagkatapos nga mahaplas sia subong Hari. (Mat. 24:14; 28:18-​20) Ipaathag kon ano ang ginsiling ni Jesus, ang Makatilingala nga Manuglaygay, tuhoy sa kon ano ang dapat tamdon nga mas importante sa kabuhi. (Isa. 9:​6, 7; Mat. 6:​19-​34) Ipatuhoy ang igtalupangod sa panimuot nga ginsiling sang Prinsipe sang Paghidait nga dapat ipakita sang iya mga sumulunod. (Mat. 20:25-​27; Juan 13:35) Maghalong nga indi paghukman ang iban kon bala ginahimo nila ang dapat nila himuon, kundi palig-una sila nga binagbinagon kon ano ang ginapakita sang ila mga buhat tuhoy sa ila pagpasakop sa pagkahari ni Cristo. Samtang ginahimo mo ini, kilalaha ang kinahanglanon nga dapat mo man ini himuon.

Pagpahamtang kay Cristo Subong Sadsaran. Ginapaanggid sang Biblia ang hilikuton nga paghimo sing Cristianong disipulo sa pagtukod sing isa ka tinukod nga ang sadsaran amo si Jesucristo. (1 Cor. 3:​10-​15) Agod mahimo ini, buligi ang mga tawo nga makilala si Jesus suno sa paglaragway sa iya sa Biblia. Mangin mainandamon nga indi ka nila pagtamdon nga amo ang ila ginasunod. (1 Cor. 3:​4-7) Ipatuhoy ang ila igtalupangod kay Jesucristo.

Kon napasad sing maayo ang pundasyon, mahangpan sang mga estudyante nga nagbilin si Cristo sing isa ka huwaran agod nga ‘pagsundon naton sing maayo ang iya mga tikang.’ (1 Ped. 2:21) Agod makatukod sa sini, palig-una ang mga estudyante nga basahon ang mga Ebanghelyo indi lamang subong matuod nga kasaysayan kundi subong isa ka sulundan nga dapat sundon. Buligi sila nga madumduman kag masunod ang mga panimuot kag mga kinaiya ni Jesus. Palig-una sila nga talupangdon kon ano ang ginabatyag ni Jesus tuhoy sa iya Amay, kon paano niya gin-atubang ang mga pagsulay kag mga pagtilaw, kon paano sia nagpasakop sa Dios, kag kon paano niya ginpakig-angutan ang mga tawo sa nagkalainlain nga mga kahimtangan. Ipadaku ang hilikuton nga ginhimo ni Jesus sa iya bug-os nga kabuhi. Nian, kon nagaatubang sang mga desisyon kag mga pagtilaw sa kabuhi, ang isa ka estudyante magapamangkot sa iya kaugalingon: ‘Ano ang himuon ni Jesus sa sini nga kahimtangan? Ang akon bala nga himuon magapakita sing nagakaigo nga pagpasalamat sa iya ginhimo sa akon?’

Kon nagapamulongpulong ka sa kongregasyon, indi maghinakop nga bangod may pagtuo na ang imo mga kauturan kay Jesus, indi na kinahanglan nga patuhuyan pa sia sing pinasahi nga igtalupangod. Ang imo ginasiling may dugang pa nga kahulugan kon ipasad mo ini sa sini nga pagtuo. Kon nagahambal ikaw tuhoy sa mga miting, iangot ini sa papel ni Jesus subong Ulo sang kongregasyon. Kon ginahinun-anunan mo ang ministeryo sa latagon, ipatalupangod ang panimuot nga ginpakita ni Jesus sang ginhimo niya ang iya ministeryo, kag ipresentar ang ministeryo sa kapawa sang kon ano ang ginahimo ni Cristo subong Hari sa pagtipon sa mga tawo agod maluwas pakadto sa bag-ong kalibutan.

Maathag nga indi lamang ang pagtuon sa sadsaran nga mga katunayan tuhoy kay Jesus ang kinahanglan. Agod mangin matuod nga mga Cristiano, ang mga tawo dapat magtuo sa iya kag maghigugma gid sa iya. Ini nga gugma nagapahulag sang matutom nga pagtuman sa iya. (Juan 14:​15, 21) Nagabulig ini sa mga tawo nga magtindog sing malig-on sa pagtuo sa idalom sang kabudlayan, nga maglakat sing padayon suno sa mga tikang ni Cristo sa tanan nga adlaw sang ila pagkabuhi, nga pamatud-an ang ila kaugalingon nga hamtong nga mga Cristiano nga malig-on nga ‘nakapanggamot kag natukod sa sadsaran.’ (Efe. 3:17) Ini nga dalanon nagadala sing himaya kay Jehova, ang Dios kag Amay ni Jesucristo.

SANG nagahatag sing mga detalye tuhoy sa tanda sang iya presensia kag sa konklusion sang sistema sang mga butang, si Jesus nagtagna: “Ining maayong balita sang ginharian ibantala sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.”​—Mat. 24:14.

Ano gid bala ining mensahe nga dapat ipahibalo sing subong sini kalapnag? Tuhoy ini sa Ginharian nga gintudlo sa aton ni Jesus nga ipangamuyo sa Dios, nga nagasiling: “Magkari ang imo ginharian.” (Mat. 6:10) Ang Bugna 11:15 nagalaragway sini subong ang “ginharian sang aton Ginuo [Jehova] kag sang iya Cristo” bangod ang awtoridad sa paggahom naghalin kay Jehova kag ginhatag kay Cristo subong Hari. Apang, talupangda nga ang mensahe nga ginsiling ni Jesus nga ibantala sa aton adlaw labaw pa sa ginbantala sang iya mga sumulunod sang unang siglo. Ginsilingan nila ang mga tawo: “Ang ginharian sang Dios malapit na sa inyo.” (Luc. 10:9) Si Jesus, ang ginhaplas nga mangin Hari, yara sadto sa tunga nila. Apang subong sang ginsulat sa Mateo 24:​14, nagtagna si Jesus sang bug-os kalibutan nga pagpahibalo sing isa pa ka importante nga hitabo sa katumanan sang katuyuan sang Dios.

Si manalagna Daniel ginhatagan sing isa ka palanan-awon tuhoy sa sini nga hitabo. Nakita niya ang “isa nga kaangay sa anak sang tawo,” si Jesucristo, nga nagabaton gikan sa “Dumaan sang mga Adlaw,” si Jehova nga Dios, sang “pagbulut-an kag kadungganan kag ginharian, agod nga ang mga katawhan, mga pungsod kag mga hambal mag-alagad tanan sa iya.” (Dan. 7:​13, 14) Ining hitabo nga importante sa bug-os nga uniberso natabo sa langit sang tuig 1914. Pagkatapos sadto, gintagbong ang Yawa kag ang iya mga demonyo sa duta. (Bug. 12:​7-​10) Ang daan nga sistema sang mga butang nagsulod sa katapusan nga mga adlaw sini. Apang antes ini dulaon sing bug-os, ginahimo ang bug-os kalibutan nga pagbantala nga ang Mesianikong Hari ni Jehova nagagahom na karon gikan sa iya langitnon nga trono. Ginapahibalo ang mga tawo bisan diin. Ang ila sabat nagapamatuod sang ila panimuot sa Labing Mataas subong Gumalahom sa “ginharian sang mga tawo.”​—Dan. 4:32.

Matuod, madamo pa ang magaabot​—mas madamo pa! Nagapangamuyo gihapon kita, “Magkari ang imo ginharian,” apang indi buot silingon nga ang pagtukod sang Ginharian sang Dios sa palaabuton pa. Sa baylo, nagakahulugan ini nga ang langitnon nga Ginharian magapanghikot sing pat-od agod matuman ang mga tagna subong sang Daniel 2:44 kag Bugna 21:2-4. Himuon sini ang duta nga mangin isa ka paraiso nga puno sang mga tawo nga nagahigugma sa Dios kag sa ila isigkatawo. Samtang ginabantala naton “ining maayong balita sang ginharian,” ginatudlo naton ang mga ginalauman sa palaabuton. Apang ginapahibalo man naton sing masinaligon nga ginhatag na ni Jehova ang bug-os nga awtoridad sa paggahom sa iya Anak. Ginapadaku mo bala ining maayong balita kon nagapanaksi ikaw tuhoy sa Ginharian?

Nagapaathag Sang Ginharian. Paano naton matuman ang sugo sa aton nga ibantala ang Ginharian sang Dios? Mahimo naton mapukaw ang interes paagi sa pagsugod sing mga paghambalanay sa nanuhaytuhay nga mga topiko, apang dapat mangin maathag dayon nga ang aton mensahe tuhoy sa Ginharian sang Dios.

Ang isa ka importante nga bahin sini nga hilikuton nagalakip sang pagbasa ukon pagkutlo sa mga kasulatan nga nagapatuhoy sa Ginharian. Kon ginapatuhuyan mo ang Ginharian, pat-ura nga nahangpan sang imo ginasugilanon kon ano ini. Mahimo nga indi lamang ang paghambal nga ang Ginharian sang Dios isa ka panguluhan ang ginakinahanglan. Ang pila ka tawo mahimo mabudlayan sa paghunahuna tuhoy sa di-makita nga butang subong isa ka panguluhan. Mahimo ka makapangatarungan sa ila sa nanuhaytuhay nga paagi. Halimbawa, ang grabidad indi makita, apang may daku gid ini nga epekto sa aton kabuhi. Indi naton makita ang Isa nga naghimo sa kasuguan sang grabidad, apang maathag nga may daku sia nga gahom. Ginapatuhuyan sia sang Biblia subong “Hari nga walay katapusan.” (1 Tim. 1:17) Ukon mahimo ka mangatarungan nga sa isa ka daku nga pungsod, madamo nga tawo ang wala gid makakadto sa kapital nga siudad ukon makakita sing personal sa ila gumalahom. Nahibaluan nila ini paagi sa mga balita. Sing kaanggid, ang Biblia, nga ginbalhag sing kapin sa 2,200 ka lenguahe, nagasugid sa aton tuhoy sa Ginharian sang Dios; ginapahibalo kita sini kon sin-o ang ginhatagan sing awtoridad kag kon ano ang ginahimo sang Ginharian. Ang Lalantawan, nga ginbalhag sa mas madamo nga lenguahe sangsa bisan ano nga magasin, mahugod nga “Nagabantala Sang Ginharian ni Jehova,” subong sang ginasiling sa panghapin.

Agod mabuligan ang mga tawo nga mahangpan kon ano ang Ginharian, mahimo mo sambiton ang pila ka butang nga luyag nila nga ihatag sa ila sang mga panguluhan: kasiguruhan sa ekonomiya, paghidait, kahilwayan sa krimen, wala sing nadampigan nga pagtratar sa tanan nga etniko nga grupo, edukasyon, kag pag-atipan sa panglawas. Ipakita nga ini kag ang tanan iban pa nga maayo nga handum sang katawhan mapaayawan sing bug-os paagi lamang sa Ginharian sang Dios.​—Sal. 145:16.

Panikasugi nga mapalambo sa mga tawo ang handum nga mangin sakop sang Ginharian, diin si Jesucristo amo ang nagagahom subong Hari. Itudlo ang mga milagro nga ginhimo niya subong abanse nga pagpakita sang iya pagahimuon subong langitnon nga Hari. Ihambal pirme ang makagalanyat nga mga kinaiya nga ginpakita niya. (Mat. 8:​2, 3; 11:28-​30) Ipaathag nga ginhatag niya ang iya kabuhi para sa aton kag nga pagkatapos sadto ginbanhaw sia sang Dios pakadto sa di-mamalatyon nga kabuhi sa langit. Gikan didto nagagahom sia subong Hari.​—Binu. 2:​29-​35.

Ipadaku nga ang Ginharian sang Dios nagagahom na karon gikan sa langit. Apang, hisayri nga ang kalabanan nga tawo wala makaeksperiensia sang mga kahimtangan nga sa banta nila pamatuod sini nga paggahom. Kilalaha ini, kag magpamangkot kon bala nahibaluan nila ang ginsiling ni Jesucristo nga pamatuod sini. Ipadaku ang pila ka bahin sang kabilugan nga tanda nga masapwan sa Mateo kapitulo 24, Marcos kapitulo 13, ukon Lucas kapitulo 21. Nian ipamangkot kon ngaa ang pagpalingkod kay Cristo sa trono subong hari sa langit magaresulta sa sina nga mga kahimtangan sa duta. Ipatuhoy ang igtalupangod sa Bugna 12:​7-​10, 12.

Subong makita nga pamatuod sang ginahimo sang Ginharian sang Dios, basaha ang Mateo 24:​14, kag ilaragway ang bug-os kalibutan nga programa sang pagpanudlo sa Biblia nga nagakatabo karon. (Isa. 54:13) Sugiri ang mga tawo tuhoy sa nanuhaytuhay nga mga eskwelahan diin nagabenepisyo ang mga Saksi ni Jehova​—ang tanan napasad sa Biblia, ang tanan ginahiwat nga wala sing bayad. Ipaathag nga dugang pa sa aton pamalaybalay nga ministeryo, nagatanyag kita sing walay bayad nga pagtuon sing Biblia sa puluy-an sa mga indibiduwal kag mga pamilya sa kapin sa 230 ka kadutaan. Anong tawhanon nga panguluhan ang makasarang sa paghatag sining masangkad nga programa sang pagpanudlo indi lamang para sa mga sakop sini kundi para sa mga tawo sa bug-os nga duta? Agdaha ang mga tawo nga magkadto sa Kingdom Hall, magtambong sa mga asambleya kag mga kombension sang mga Saksi ni Jehova, agod makita ang pamatuod kon paano ini nga pagpanudlo nagaapektar sa kabuhi sang mga tawo.​—Isa. 2:​2-4; 32:​1, 17; Juan 13:35.

Apang marealisar bala sang tagbalay kon paano naapektuhan ang iya mismo kabuhi? Mahimo mo ipatalupangod sing mataktikanhon nga ang katuyuan sang imo pagduaw amo ang paghinun-anon sa kahigayunan nga bukas sa tanan sa pagpili sing kabuhi subong mga sakop sang Ginharian sang Dios. Paano? Paagi sa pagtuon kon ano ang ginapatuman sang Dios kag magkabuhi suno sa sini karon.​—Deut. 30:​19, 20; Bug. 22:17.

Pagbulig sa Iban sa Pag-una Sing Ginharian. Bisan pagkatapos nga mabaton sang isa ka tawo ang mensahe sang Ginharian, may mga desisyon nga dapat niya himuon. Daw ano ka importante ang Ginharian sang Dios sa iya kabuhi? Ginpalig-on ni Jesus ang iya mga disipulo nga ‘padayon nga pangitaon anay ang ginharian.’ (Mat. 6:33) Paano naton mabuligan ang mga masigka-Cristiano sa paghimo sini? Paagi sa pagpahamtang naton mismo sing maayo nga halimbawa kag paagi sa pagbinagbinag sing mga kahigayunan nga mahimo ini. Kon kaisa, paagi sa pagpamangkot kon bala nabinagbinag na sang isa ka tawo ang pila ka posibilidad kag paagi sa pagpaambit sing mga eksperiensia agod ipakita kon ano ang ginahimo sang iban. Paagi sa paghinun-anon sang mga hitabo sa Biblia sa paagi nga nagapadalom ini sa gugma sang isa para kay Jehova. Paagi sa pagpadaku nga matuod gid ang Ginharian. Paagi sa pagpadaku kon daw ano gid ka importante ang pagbantala sing Ginharian. Ang labing daku nga kaayuhan masami nga ginahimo, indi paagi sa pagsugid sa mga tawo kon ano ang dapat himuon, kundi paagi sa pagpalambo sa ila sing handum nga himuon ini.

Wala sing duhaduha, ang importante nga mensahe nga dapat naton ibantala panguna nga nasentro kay Jehova nga Dios, kay Jesucristo, kag sa Ginharian. Ang importante nga kamatuoran tuhoy sa sini dapat ipadaku sa aton pagpanaksi sa publiko, sa aton kongregasyon, kag sa aton personal nga pagkabuhi. Kon ginahimo naton ini, ginapakita naton nga nagabenepisyo gid kita gikan sa pagpanudlo sang Teokratikong Eskwelahan Para sa Ministeryo.