Ang Takna sang Paghukom sang Dios Nag-abot Na

“Kahadluki ang Dios kag hatagi sia sing himaya, kay nag-abot na ang takna sang iya paghukom.”​—⁠BUGNA 14:7.

 1. Ano ang ginalakip sang nagabukas nga mga kapitulo sang Bugna?

ANG tolon-an sang Bugna nagaunod sing makahalawathawat nga mga tagna nga nagakatuman sa aton adlaw. Ginbinagbinag sang nagligad nga artikulo ang pila sini, lakip ang pagbukas sang anom ka simbuliko nga pat-in. Ginbuyagyag sining nabuksan nga mga pat-in ang makahalapay nga pagpangabayo sang apat ka manugpangabayo sang apokalipsis sa sining “katapusan nga adlaw.” (2 Timoteo 3:​1; Bugna 6:​1-8) Ginsugid man sini ang mga magagahom upod kay Cristo sa langit kag ang mga makalampuwas sa “dakung kapipit-an” agod magkabuhi sa duta sing dayon. Ang anom ka pat-in nagapakita nga ang “gintangdo nga tion” sang Dios sa paghukom “malapit na.”​—⁠Bugna 1:​3; 7:​4, 9-17.

 2. Paano gamiton ang pito ka simbuliko nga budyong sang Bugna kapitulo 8?

² Apang may isa pa ka pat-in, ang ikapito. Ang Bugna 8:2 nagasugid sa aton kon ano ang ginbuyagyag sang mabuksan ini: “Kag nakita ko ang pito ka anghel nga nagatindog sa atubangan sang Dios, kag ginhatagan sila sing pito ka budyong.” Ang bersikulo 6 nagasiling: “Kag ang pito ka anghel nga may pito ka budyong naghanda sa pagpatunog sa ila.” Sa tion sang Biblia, ang mga budyong gingamit sa pagsinyales sing importante nga mga hitabo. Sa amo man nga paagi, ining pagtunog sang pito ka budyong nagapatalupangod sang mga butang nga nagakahulugan sing kabuhi kag kamatayon sa aton tion. Kag samtang ginapatunog sang mga anghel ang mga budyong, ang tawhanon nga mga Saksi sa duta nagasunod paagi sa pagpalapnag sang importante nga balita nga ginabantala sang tagsa ka tunog sang budyong.

Kon Ano ang Kahulugan sang mga Tunog sang Budyong

 3. Ano ang kahulugan sang pito ka tunog sang budyong?

³ Ining mga tunog sang budyong nagapahanumdom sa aton sang mga kalalat-an nga ginbubo ni Jehova sa dumaan nga Egipto. Yadtong mga kalalat-an mga ekspresyon sang paghukom ni Jehova sa nahauna nga kagamhanan sa kalibutan kag sa dimatuod nga relihion sini, apang ginbuksan man sini ang dalan sang kaluwasan para sa katawhan sang Dios. Sing kaanggid, ang mga tunog sang budyong sa Bugna modernong adlaw nga mga kalalat-an, sa sining tion sa bug-os nga kalibutan ni Satanas kag sa dimatuod nga relihion sini. Apang indi ini literal nga mga kalalat-an kundi tulad-kalalat-an nga mga mensahe sang paghukom ni Jehova. Ginapakita man sini ang dalan sang kaluwasan para sa katawhan sang Dios.

 4. Paano ang pito ka tunog sang budyong natuman sa aton tion?

⁴ Nahisanto sa sining pito ka tunog sang budyong, ang masakit nga mga resolusyon batok sa kalibutan ni Satanas ginpresentar sa pito ka pinasahi nga tuigan nga kombension sang katawhan ni Jehova kutob sang 1922 tubtob sang 1928. Ginatos ka milyon ka kopya sang mga resolusyon ang ginpanagtag. Apang, ang pagbudyong sadtong masakit nga mga mensahe indi lamang para sa sadtong mga tinuig, kundi nagpadayon ini sa bug-os nga katapusan nga adlaw. Kag karon ang pagbantala sini mas mabaskog sang sa bisan anong tion, kay minilyon sang “dakung kadam-an” ang nagdugang sang ila mga tingog sa diutay nga grupo sang mga hinaplas nga nag-umpisa sang pagbantala sa tapos sang Inaway Kalibutanon I. (Bugna 7:9) Tagsa ka tuig karon, upod ang nagadugang nga kusog kag kadamuon, ginawali sining minilyon nga ang kalibutan ni Satanas napamatbatan sing bug-os.

 5. Ano ang “ikatlo” sang kalibutan nga malaglagon nga ginhukman sing una, kag ngaa?

⁵ Sa Bugna 8:​6-12, ang nahauna sa apat ka budyong nagtunog. Ginbubo ang hielo, kalayo, kag dugo, nga nagresulta sa kahapayan sang “ikatlo” nga bahin sang kalibutan. Ngaa ginsambit ang “ikatlo” subong ang nakasala nga bahin sang kalibutan nga una nga ginhukman? Bangod samtang bug-os nga sistema ni Satanas ang salawayon sa Dios, mas daku ang sala sang isa ka bahin. Ano nga bahin? Ang bahin nga nagdala sang ngalan ni Cristo​—⁠ang Cristiandad. Kag sang ang nagahukom nga mga mensahe sang Dios nag-abot batok sa iya sa tapos sang Inaway Kalibutanon I, ang duog sang Cristiandad sadtong tion nagsakop sa mga ikatlo nga bahin sang katawhan.

 6. Ngaa ginbiyaan ni Jehova ang Cristiandad sa kalaglagan?

⁶ Ang relihion sang Cristiandad amo ang bunga sang 1,900-anyos nga apostasya gikan sa matuod nga Cristianismo nga gintagna ni Jesus kag sang iya mga disipulo. (Mateo 13:​24-30; Binuhatan 20:​29, 30) Ang mga klero sang Cristiandad naglaragway sang ila kaugalingon subong mga manunudlo sang Cristianismo, apang ang ila mga doktrina malayo gid sa kamatuoran sang Biblia, kag ang ila malaut nga mga buhat padayon nga nagadala sing kahuy-anan sa ngalan sang Dios. Ang ila sala sa dugo bangod sa pagsakdag sa mga inaway sining ika-20 nga siglo ginbuyagyag. Ang Cristiandad bahin gid sang sistema sang mga butang ni Satanas. Sa amo, nagabaton sia sing mabaskog kag tulad-kalalat-an nga mga mensahe gikan kay Jehova nga nagapakita nga indi gid sia takus sa kahamuot sang Dios. Ginbiyaan ni Jehova ang panimalay sang Cristiandad sa kalaglagan sing subong kapat-od sa ginhimo niya anay sa Judiyong panimalay sang nahaunang siglo!​—⁠Mateo 23:⁠38.

Ginpapagsik Liwat Para sa Pagbantala sa Bug-os nga Globo

 7, 8. (a) Sa Bugna kapitulo 9, ano ang ginapakita sang pagpatunog sa ikalima nga budyong? (b) Ano ang ginasimbulo sang mga apan?

⁷ Sa Bugna 9:1 ginpatunog sang ikalima nga anghel ang iya budyong, kag ang palanan-awon nagpakita sing bituon nga nagapanaug sa duta. Ining bituon may yabi sa iya kamot. Paagi sa sini ginbuksan niya ang boho sang kadadalman nga may mga apan. Ang bituon amo ang bag-o mapalingkod sa trono nga langitnon nga Hari ni Jehova, nga si Jesucristo. Ang mga apan amo ang mga alagad sang Dios, nga ginhingabot kag daw ginpadulog sang ang ila nagapanguna nga mga opisyal nabilanggo sang 1918. Apang si Cristo, nga nagagahom karon sa Ginharian sa langit, nagpaguwa sa ila agod nga padayunon nila liwat ang ila dayag nga pagbantala sa bug-os nga globo, sa daku nga kasubo sang mga klero, nga nagplano sa pagpatay sa ila hilikuton.​—⁠Mateo 24:⁠14.

⁸ Ang mga apan ginlaragway sa sining paagi sa Bugna 9:​7: “Ang dagway sang mga apan kaangay sang mga kabayo nga nahanda sa inaway; kag sa ila mga ulo may daw mga korona nga bulawan, kag ang ila mga nawong subong sang mga nawong sang tawo.” Ang bersikulo 10 nagdugang: “May mga ikog sila kaangay sang mga iwiiwi.” Ining mga apan nagakaigo gid nga nagalaragway sa ginpapagsik liwat nga mga nagkalabilin sang mga manunubli sang Ginharian nga nagkadto liwat sa espirituwal nga inaway kutob sang 1919 padayon. Upod ang bag-o nga kusog, ginwali nila ang masakit nga mga mensahe sang paghukom, batok sa malaut nga Cristiandad.

 9, 10. (a) Ano ang ginapahayag sang pagpatunog sa ikan-om nga budyong? (b) Sin-o ang nalakip sa linaksa ka makusog nga mga kabayo?

⁹ Masunod, ginhuyop sang ikan-om nga anghel ang iya budyong. (Bugna 9:13) Ginapakita sini ang pagbuhi sa hangaway sang mga manugkabayo. Ang bersikulo 16 nagasiling nga ang ila kadamuon “duha ka linaksa sang mga linaksa,” nga 200 ka milyon! Kag ginlaragway sila sa bersikulo 17 kag 19 subong sang masunod: “Ang mga ulo sang mga kabayo subong sang mga ulo sang mga leon, kag nagguwa sa mga baba nila ang kalayo kag aso kag asupre . . . . Ang ila mga ikog kaangay sa mga man-ug.” Ining mga hangaway nagadaguob sa idalom sang pagtuytoy sang Hari, nga si Cristo Jesus. Kag daw ano ka makahaladlok nga talan-awon sila!

¹⁰ Ano ang ginalaragway sining mabaskog nga mga kabayo? Sanglit minilyon ang ila kadamuon, indi mahimo nga sila ang hinaplas nga nagkalabilin lamang, nga karon mga 8,800 na lang sa duta. Ining linaksa sang mga kabayo dapat maglakip sa “dakung kadam-an” sang Bugna kapitulo 7, nga may paglaum nga mabuhi sing dayon sa duta. Sa Biblia, ang tinaga nga “linaksa” masami nga nagapatuhoy sa isa ka daku kag wala sing latid nga numero. Sa amo, ining simbuliko nga mga kabayo nagalakip indi lamang sa nagadiutay nga kadamuon sang mga hinaplas kundi sa nagadamo man kag nagabaskog nga tingog sang minilyon sang “dakung kadam-an” sang “iban nga mga karnero” nga nagapadayon sang pangpubliko nga hilikuton nga ginsugdan sang tulad-apan nga hinaplas nga mga nagkalabilin.​—⁠Juan 10:⁠16.

11. Ngaa ginasiling nga “ang gahom sang mga kabayo yara sa ila mga baba,” kag paano sila ‘nagapangsamad paagi sa ila mga ikog’?

¹¹ Ang Bugna 9:​19 nagasiling: “Ang gahom sang mga kabayo yara sa ila mga baba,” kag “paagi [sa ila mga ikog] nagapangsamad sila.” Sa anong paagi nga ang ila gahom yara sa ila mga baba? Bangod sa sulod sang mga dekada, paagi sa Teokratikong Eskwelahan sa Ministeryo kag iban pa nga mga miting, gintudluan ang mga alagad sang Dios sa pagbantala sang iya mga mensahe sang paghukom sing gamhanan paagi sa pulong sang baba. Kag sa anong paagi nagapangsamad sila paagi sa ila mga ikog? Bangod nagpalapnag sila sing binilyon ka napasad sa Biblia nga mga publikasyon sa bug-os nga kalibutan, sa amo nagbilin sila sing masakit nga mga mensahe batok sa kalibutan ni Satanas. Sa ila mga kasumpong, ining hangaway sang mga manugkabayo daw subong gid sa mga linaksa sang mga linaksa.

12. Ano ang padayon nga ginahimo sang simbuliko nga mga apan kag mga kabayo, kag ano ang epekto?

¹² Sa amo, dapat ipatunog sang simbuliko nga mga apan kag mga kabayo ang mga mensahe sang paghukom sang Dios sing kapin kaathag kag kapin kabaskog samtang nagahilapit ang iya adlaw sang paghukom. Para sa mga bunayag sing tagipusuon, ina nga mga mensahe amo ang labing maayong balita sa duta. Apang para sa mga nagapasulabi sa kalibutan ni Satanas, malain ini nga balita, kay nagakahulugan ini nga ang ila kalibutan pagalaglagon sa indi madugay.

13. “Ang ikatlo nga kailo” nga may kaangtanan sa pagtunog sang ikapito nga budyong nagadalahig sing ano, kag paano ini isa ka “kailo”?

¹³ Ang tulad kalalat-an nga mga apan kag hangaway sang mga manugkabayo ginlaragway subong ang nahauna kag ikaduha sang tatlo ka “kailo” nga ginpadala sang Dios. (Bugna 9:​12; 11:14) Ano ang “ikatlo nga kailo”? Sa Bugna 10:7 ginsugiran kita: “Sa mga adlaw sang pagpatunog sang ikapito nga anghel, . . . ang tinago sang Dios, suno sa ginpahibalo niya sa iya mga ulipon nga mga manalagna, natuman.” Ining balaan nga tinaga nagadalahig sa “binhi” nga una nga ginsaad sa Eden. (Genesis 3:15) Ina nga “binhi” amo si Jesus una sa tanan apang nagalakip man ini sa iya hinaplas nga mga kaupod nga magagahom kaupod niya sa langit. Gani ang balaan nga tinago may kaangtanan sa langitnon nga Ginharian sang Dios. Pahanabuon sining Ginharian ang ikatlo nga “kailo” nga gintuyo sang Dios, kay tapuson sini ang mga paghukom sang Dios batok sa kalibutan ni Satanas.

Natukod Na ang Ginharian

14. Ano ang ginpahibalo sang pagtunog sang ikapito nga budyong sang Bugna 11:​15?

¹⁴ Nian natabo ini! Ang Bugna 11:​15 nagasiling: “Kag ang ikapito nga anghel nagpatunog sang iya budyong. Kag may dalagku nga mga tingog sa langit, nga nagasiling: ‘Ang ginharian sang kalibutan nangin ginharian sang aton Ginuo [Jehova] kag sang iya Cristo, kag magahari sia tubtob sa walay katubtuban.’ ” Huo, ginbantala nga ang Ginharian sang Dios paagi kay Cristo gintukod sa langit sang tuig 1914. Kag sang ginpapagsik liwat ang mga nagkalabilin sa tapos sang Inaway Kalibutanon I, ginpatalupangod nila ining balita.

15. Sang 1922, anong hitabo ang nagsinyas sang bag-o nga pagbaskog sang pagbantala sang Ginharian?

¹⁵ Sa kombension sang mga alagad ni Jehova sang 1922 sa Cedar Point, Ohio, E.⁠U.⁠A., nabatian sang linibolibo nga nagtambong ang makalilipay nga pahibalo: “Amo ini ang adlaw sang mga adlaw. Toloka, ang Hari nagagahom! Kamo ang iya mga manugbantala. Busa ibantala, ibantala, ibantala, ang Hari kag ang iya ginharian.” Gin-umpisahan sadto ang daku nga pagbaskog sang pagbantala sang Ginharian sa publiko nga naglakip sing mga paghukom nga ginbantala sang pito ka anghel nga manugbudyong. Sa karon, mga tatlo kag tunga sa milyon ka alagad ni Jehova sa kapin sa 55,000 ka kongregasyon sa bug-os nga kalibutan ang nadalahig sa sining bug-os globo nga pagbantala sa Ginharian. Sa pagkamatuod linaksa gid!

16. Sa Bugna kapitulo 12, anong dugang pa nga hitabo nga nagadalahig sa langit kag sa duta ang ginpahayag sang pagtunog sang ikapito nga budyong?

¹⁶ Apang may dugang pa nga ipahayag ang ikapito nga anghel. Ang Bugna 12:7 nagasiling nga sadto “may inaway sa langit.” Ang bersikulo 9 nagahatag sa aton sining resulta sang paghikot ni Cristo nga Hari: “Gani ginhulog ang dakung dragon, yanang dumaan nga man-ug, nga ginatawag nga Yawa kag Satanas, nga nagadaya sa bug-os napuy-an nga duta; kag ginhulog sia sa duta, kag ang iya mga anghel ginhulog kaupod niya.” Ang bersikulo 12 nagadugang: “Bangod sini magkalipay, ka langit kag kamo nga nagapuyo sa sini!” Huo, ang langit natinluan gikan sa impluwensia ni Satanas, isa ka kabangdanan sang dakung hinugyaw sa tunga sang matutom nga mga anghel. Apang ano ang kahulugan sini sa katawhan? Ina gihapon nga bersikulo nagasabat: “Kailo sa duta kag sa dagat, kay ang Yawa nagpanaug sa inyo, nga may dakung kasingkal, bangod nakahibalo sia nga malip-ot na lamang ang iya tion.”

17. Ngaa nagakaigo ang paglaragway sa pangulohan sang kalibutan subong “sapat nga mapintas” sa Bugna kapitulo 13?

¹⁷ Ang Bugna 12:3 nagalaragway kay Satanas subong “isa ka dakung dragon, nga may pito ka ulo kag napulo ka sungay,” isa ka tulad-gadya nga sapat nga nagapanglaglag. Ginapakita sini nga sia ang desinyador sang dutan-on nga politikal nga “sapat nga mapintas” nga ginlaragway sa kapitulo 13, bersikulo 1 kag 2. Ina nga sapat may pito man ka ulo kag napulo ka sungay, sa pag-ilog kay Satanas. Ang bersikulo 2 nagasiling: “Ginhatag sang dragon [Satanas] sa sapat ang iya gahom kag ang iya trono kag dakung pagbulut-an.” Nagakaigo gid nga ilaragway ang politikal nga mga pangulohan subong sapat nga mapintas, kay sa sini lamang nga ika-20 nga siglo, kapin sa isa ka gatos ka milyon ka tawo ang napatay sa mga inaway sang mga pungsod.

18. Ano ang duha sing sungay nga sapat sa Bugna 13:​11, kag paano ang mga buhat sini nagabulig sa pagpakilala sini?

¹⁸ Ang masunod nga danyag sa Bugna 13 nagapahayag, kay ang bersikulo 11 nagasiling, “isa na man ka sapat ang nagguwa sa duta, kag may duha sia ka sungay kaangay sang sa kordero kag naghambal sia subong sang dragon.” Ining duha sing sungay nga sapat amo ang politikal nga pagtingob sang Anglo-Amerikano. Kaangay ini sa kordero bangod nagapakunokuno ini nga mahagop, ang labing nasanagan nga porma sang pangulohan. Apang nagahambal ini kaangay sang dragon, kaangay ni Satanas, kag ginatawag nga “isa na man ka sapat” bangod ang iya mga paggahom kaangay sa sapat. Nagapang-ipit ini kag nagapamahog kag nagagamit pa gani sing kasingki kon ang iya bersion sang paggahom indi pagbatunon. Ginapalig-on sini, indi ang pagpasakop sa Ginharian sang Dios, kundi, sa baylo, ang pagpasakop sa kalibutan ni Satanas. Amo kon ngaa ang bersikulo 14 nagasiling: “Ginapatalang sini ang mga nagapuyo sa duta.”

19, 20. (a) Ano ang ginapasundayag sang integridad sang mga alagad ni Jehova? (b) Paano naton mahibaluan nga ang hinaplas nga nagkalabilin pat-od nga magadaug batok sa kalibutan ni Satanas?

¹⁹ Ining kalibutan nga ginagamhan ni Satanas mabudlay puy-an sang mga tawo nga indi bahin sini bilang pagsunod sa sugo ni Jesus sa matuod nga mga Cristiano. (Juan 17:16) Sa amo, isa ka talalupangdon nga pasundayag sang gahom kag pagpakamaayo ni Jehova nga ang iya mga alagad sa bug-os nga kalibutan karon nagahupot sing integridad kag nahiusa nga nagapadayon sa pagpadaku sang ngalan ni Jehova kag sang iya matarong nga mga dalanon. Ginahimo nila ini sa atubangan sang mabaskog nga pagpamatok, paghingabot, kag bisan kamatayon.

²⁰ Ang hinaplas nga mga nagkalabilin labi na amo ang mga puntariya ni Satanas bangod magagahom sila kaupod ni Cristo. Apang ang Bugna kapitulo 14 nagapakita nga ang ila bug-os nga kadamuon, 144,000, madaugon nga gintipon upod kay Cristo sa paggahom sa Ginharian. Nag-unong sila sa ila Agalon, kay subong ginasiling sang bersikulo 4: “Ini amo ang nagasunod sa Kordero bisan diin sia nagakadto”​—⁠ginahimo ini walay sapayan sang mapintas nga paghingabot sa ila ni Satanas.

Ang Una nga Magabaton sang mga Paghukom sang Dios

21, 22. (a) Ano nga mga pahibalo ang ginhatag sang mga anghel sa Bugna 14:​7, 8? (b) Ngaa ginpahibalo sang anghel ang pagkapukan sang relihioso nga Babilonia samtang nagaluntad pa sia?

²¹ Sa Bugna 14:7 ang anghel nagsinggit: “Kahadluki ang Dios kag hatagi sia sing himaya, kay nag-abot na ang takna sang iya paghukom, kag simbaha sia nga naghimo sang langit kag duta, sang dagat kag mga tuburan sang tubig.” Sin-o ang una nga magabaton sang malaglagon nga paghukom sang Dios? Ang bersikulo 8 nagasabat: “Kag ang ikaduha na man nga anghel nagsunod, nga nagasiling: ‘Napukan sia! Napukan ang Babilonia nga Daku, nga nagpainom sang tanan nga pungsod sang alak sang kaakig sang iya pagkamakihilawason!’ ” Diri sa nahauna nga tion, apang indi ang katapusan, ang Bugna nagahambal tuhoy sa “Babilonia nga Daku,” ang bug-os globo nga emperyo sang dimatuod nga relihion.

²² Sanglit may impluwensia pa ang relihion sa nanuhaytuhay nga mga bahin sang duta, ngaa ginpahibalo sang anghel nga napukan na ang Babilonia nga Daku? Ano ang nagresulta sang 539 B.⁠C.⁠E. sang mapukan ang dumaan nga Babilonia apang wala pa malaglag sing bug-os? Ti, ang ginbihag nga mga alagad ni Jehova nagbalik sa ila dutang natawhan pagligad sang duha ka tuig kag ginpasag-uli ang matuod nga pagsimba! Sa amo man nga paagi, ang pagpasag-uli sa mga alagad sang Dios sa bag-o nga pagpanghikot kag espirituwal nga kabuganaan nga nagsugod sang 1919 isa ka maathag nga pamatuod nga sadto, sang 1919, ang Babilonia nga Daku napukan sa pagtamod ni Jehova. Ginpakamalaut niya sia didto para sa pagkalaglag sa ulihi.

23. (a) Paano ang dalan ginahanda para sa kalaglagan sang Babilonia nga Daku? (b) Anong dugang pa nga mga tagna ang pagabinagbinagon sa masunod nga guwa sang Ang Lalantawan?

²³ Subong pauna sa iya nagahilapit nga kalaglagan, ang modernong Babilonia yara karon sa daku nga kagamo. Ang iya kalautan, daku nga imoralidad, pagkadibunayag, kag ang pagpahilabot sa politika ginabuyagyag bisan diin. Sa daku nga bahin sang Europa, pila na lamang ang nagasimba. Sa madamo nga sosyalistiko nga mga pungsod, ang relihion ginakabig nga “opio sang katawhan.” Subong man, ang modernong Babilonia ginatamay sang tanan nga nagahigugma sa Pulong sang kamatuoran sang Dios. Gani sia karon nagahulat, kon sa aton pa, sa linya sang palatyon para sa iya takus nga kalaglagan. Huo, “ang gintangdo nga tion malapit na” para sa makatay-ug sa kalibutan nga mga hitabo! Kag sa masunod nga guwa sang Lalantawan, ipaathag sang dugang pa nga mga artikulo nga tolon-an ang mga tagna sa Bugna tuhoy sa nagahilapit nga kalaglagan sang relihioso nga “makihilawason,” subong man sang bug-os nga sistema sang mga butang ni Satanas.

Paano Mo Sabton?

◻ Ano ang kahulugan para sa aton karon sang pagtunog sang pito ka budyong nga nagsugod sa Bugna kapitulo 8?

◻ Ngaa Cristiandad ang unahon laglagon?

◻ Paano ginlaragway sa Bugna kapitulo 9 ang pagbantala sang hinaplas nga nagkalabilin kag sang “dakung kadam-an”?

◻ Ano ang kahulugan sang pahibalo sa Bugna 11:​15 para sa langit kag sa duta?

◻ Subong ginlaragway sa Bugna 14:​8, paano napukan ang relihioso nga Babilonia sang 1919, kag ano ang kahulugan sini para sa iya?