Ang Dios Indi Mahinay Tuhoy sa Iya Saad

“TUBTOB san-o, O Jehova, magapangayo ako sing bulig, kag indi ka magpamati?” Amo ini ang pinamulong sang Hebreong manalagna nga si Habacuc, nga nagkabuhi sang ikapito nga siglo B.C.E. Apang may pamilyar ini nga kamatuoran, indi bala? May kinaugali ang tawo nga luyag tigayunon sa gilayon ang mga butang nga ginahandum gid ukon sa pinakamadali nga mahimo. Kag ilabi na nga matuod ini sa aton dag-on sang gilayon nga pagpaayaw sa kaugalingon.—Habacuc 1:2.

Sang unang siglo, maathag nga ang iban nagbatyag nga dapat gintuman sang Dios ang iya mga saad sa labing madali. Nangin indi sila mapailubon amo nga ginkabig pa gani nila ang Dios nga mahinay ukon nagapalantang. Bangod sini, ginpahanumdom sila ni apostol Pedro nga ang pagtamod sang Dios sa tion tuhay gid sa aton. Si Pedro nagsulat: “Indi ninyo pagkalimtan ining katunayan, mga hinigugma, nga ang isa ka adlaw kay Jehova subong sang isa ka libo ka tuig kag ang isa ka libo ka tuig subong sang isa ka adlaw.”—2 Pedro 3:8.

Kon tamdon ang tion sa sining paagi, ang 80-anyos nga tawo nagakabuhi lamang sing mga duha ka oras, kag ang bug-os nga maragtas sang tawo nagalawig lamang sing mga anom ka adlaw. Kon tan-awon naton ang mga butang sa sining paagi, mas mahapos naton mahangpan ang paagi sang pagpakig-angot sang Dios sa aton.

Apang, wala ginapasapayanan sang Dios ang tion. Sa kabaliskaran, mabinantayon gid sia sa tion. (Binuhatan 1:7) Busa, si Pedro padayon nga nagasiling: “Si Jehova indi mahinay may kaangtanan sa iya saad, subong sang ginakabig sang iban nga kahinayon, kundi mapailubon sia sa inyo bangod indi niya luyag nga ang bisan sin-o sa inyo malaglag kundi luyag niya nga ang tanan makadangat sa paghinulsol.” (2 Pedro 3:9) Indi kaangay sang mga tawo, ang Dios wala nagabatyag nga ginaipit sa paghimo sing mga butang nga daw subong bala nga kulang sia sing tion. Subong “Hari sa walay katubtuban,” dalayawon gid nga nahibaluan niya ang kabilugan nga kahimtangan kag mapat-od niya kon san-o sa lakat sang tion nga ang iya mga buhat mangin maayo gid para sa tanan nga nadalahig.—1 Timoteo 1:17.

Sa tapos mapaathag ang rason sa daw pagkahinay sang Dios, si Pedro nagpaandam: “Ang adlaw ni Jehova magaabot subong sang makawat.” Buot silingon, ang adlaw sang paghusay magaabot sa tion nga wala ginapaabot sang mga tawo. Nian, sa masunod nga mga bersikulo, ginapatalupangod ni Pedro ang dalayawon nga paglaum para sa nagapadayag sing “balaan nga paggawi kag mga buhat sang diosnon nga debosyon,” nga amo, ang paglampuwas nila pasulod sa ginsaad sang Dios nga “bag-ong mga langit kag bag-ong duta.”—2 Pedro 3:10-13.

Labi pa nga nagapahangop ini sa aton kon ngaa wala pa mag-abot ang paghukom sang Dios. Bangod sang iya pagpailob nangin posible para sa aton nga mahibaluan ang iya katuyuan kag mapasibu ang aton kabuhi agod mabaton naton ang iya ginsaad nga mga pagpakamaayo. Indi bala dapat naton tamdon “ang pagpailob sang aton Ginuo subong kaluwasan,” suno sa ginapalig-on ni Pedro? (2 Pedro 3:15) Apang, may isa pa ka butang tuhoy sa pagpailob sang Dios.

Ang Kasangkaron sang Sala Pagapun-on

Paagi sa pagtuon tuhoy sa pagpakig-angot sang Dios sa katawhan sang una, matalupangdan naton nga masami niya ginapunggan ang iya paghukom tubtob nga wala na gid sing paglaum nga magbag-o. Halimbawa, may kaangtanan sa paghukom sang Dios sa mga Canaanhon, madugay na nga ginpatalupangod niya ang ila mga sala kay Abraham. Apang ang tion sang pagpatuman sang iya paghukom wala pa matabo sadtong tion. Ngaa? Ang Biblia nagasiling: “Bangod ang kasaypanan sang mga Amornon [Canaanhon] wala pa mapuno,” ukon suno sa badbad sang Knox nga bersion: “Ang kalautan sang mga Amornon wala pa mabug-os.”—Genesis 15:16.a

Apang, mga 400 ka tuig sang ulihi, nag-abot ang paghukom sang Dios, kag ang mga kaliwat ni Abraham, ang mga Israelinhon, nag-agaw sang duta. Pila lamang ka Canaanhon, subong ni Rahab kag sang mga Gabaonhon, ang naluwas bangod sang ila panimuot kag mga buhat, apang para sa kalabanan, nahimo nila ang tuman gid nga kahigkuan, subong ginapakita sang moderno nga mga kinutkutan sang arkeolohiya. Nagsimba sila sa mga simbulo sang kinatawo sang lalaki, nakighilawas sa templo, kag naghalad sing bata. Ang Halley’s Bible Handbook nagasiling: “Ang mga arkeologo nga nagkutkot sa kagulub-an sang mga siudad sang Canaan nagakatingala kon ngaa wala sila ginlaglag sang Dios sa gilayon sangsa ginhimo niya.” Sang ulihi, ang ‘kasangkaron sang sala [sang mga Canaanhon] napuno’; ang ila kalautan ‘nabug-os.’ Wala sing isa nga makasumbong sing makatarunganon nga ang Dios dimatarong sang gintugutan niya ang duta nga matinluan samtang ginluwas yadtong nagpakita sing nagakaigo nga panimuot.

Kaangay man sini ang natabo sang adlaw ni Noe. Walay sapayan nga ang katawhan antes sang Anaw malaut, maluluy-on nga namat-od ang Dios nga ang ila tion magapadayon sing 120 pa ka tuig. Sa bahin sadtong tion, si Noe nangin “manugbantala sang pagkamatarong.” (2 Pedro 2:5) Sa pagligad sang tion, ang ila kalautan maathag nga nagdugang gid. “Nakita sang Dios ang duta kag, yari karon! dunot ini, bangod ang tanan nga unod nagdunot sang ila dalanon sa duta.” (Genesis 6:3, 12) Ang ‘kasangkaron sang ila sala napuno’; ang pagligad sang tion nagdala sang ila sayop nga mga huyog sa putukputukan. Kon manghikot ang Dios makatarunganon gid sia. Walo lamang ka tawo ang napamatud-an nga matarong sa mga mata sang Dios, kag ginluwas niya sila.

Amo man ang makita sa pagpakig-angot sang Dios sa Israel. Walay sapayan nga indi sila matutom kag nangin mahigko, nagpailob ang Dios sa ila sa sulod sang ginatos ka tuig. Ang rekord nagasiling: “Si Jehova . . . padayon nga nagpadala . . . sang iya mga mensahero, nagapadala sing liwat kag liwat, bangod naawa sia sa iya katawhan . . . Apang padayon nila . . . nga gintamay ang iya mga pulong kag ginyubit ang iya mga manalagna, tubtob nga nag-ibwal ang kasingkal ni Jehova batok sa iya katawhan, tubtob nga wala na sing pag-ayo.” (2 Cronica 36:15,16) Ang katawhan naglab-ot sa punto nga ang pag-ayo indi na posible. Si Jeremias lamang kag ang pila pa ang mahimo maluwas. Indi gid matawag ang Dios nga dimatarong sang ginhukman niya ang iban sang ulihi.

Ang Tion sang Dios sa Paghikot Nag-abot Na

Gikan sa sining mga halimbawa makita naton nga ginapunggan sang Dios ang paghukom sa karon nga sistema sang mga butang tubtob lamang sa nagakaigo nga tion. Ginapakita ini sa mando nga ginhatag sa manuglaglag sang Dios: “‘Gamita ang imo garab nga matalom kag gutraba ang mga pinungpong sang ubas sang duta, kay luto na ang iya mga ubas.’ Kag ginhabyog sang anghel ang iya garab sa duta kag gintipon ang mga ubas sang duta, kag ginpilak niya ini sa dakung linasan sang kasingkal sang Dios.” Talupangda nga ang kalautan sang katawhan ‘naluto na,’ buot silingon nakalab-ot na sa punto nga wala na sing kahigayunan nga magbag-⁠o. Kon ipatuman na sang Dios ang paghukom, wala na sing duhaduha pa nga ang iya pagpasilabot makatarunganon.—Bugna 14:18, 19.

Ginabinagbinag ang yara sa ibabaw, maathag nga ang paghukom sang Dios batok sa kalibutan malapit na bangod yara na sa kalibutan ang mga kinaiya nga nagpakamatarong sang paghukom sang Dios sang nagligad. Bisan diin man kita magtulok, ang duta puno sing kasingki, kaangay sang tion antes sang Anaw sang adlaw ni Noe. Ang mga panimuot sang mga tawo dugang pa nga nagaanggid sa ginalaragway sang Genesis 6:5: “Ang tagsa ka huyog sang mga hunahuna sang tagipusuon [sang tawo] malaut gid sa tanan nga tion.” Bisan gani ang daku nga mga sala nga nagresulta sa paghukom sang Dios batok sa mga Canaanhon kinaandan karon.

Ilabi na kutob sang Bug-os Kalibutan nga Inaway I, naeksperiensiahan sang katawhan ang makakulugmat nga mga pagbag-o. Nakita sini ang duta nga nabulit sa dugo sang minilyon. Ang inaway, pagpapas sa rasa, terorismo, krimen, kag pagkamalinapason nagdabdab sa bug-os nga kalibutan. Ang gutom, balatian, kag imoralidad naghalit sing daku sa aton globo. Ginapakita sang tanan nga ebidensia nga nagakabuhi na kita karon sa tunga sinang malaut nga kaliwatan nga tuhoy sa ila si Jesus nagsiling: “Ining kaliwatan indi magtaliwan sa bisan anong paagi tubtob nga mahanabo ini tanan nga butang.” (Mateo 24:34) Ginapuno karon sang kalibutan ang “kasangkaron sang sala” sini. “Ang mga pinungpong sang ubas sang duta” naluto na para pupuon.

Tion Na Para Ikaw Maghikot

Si apostol Juan ginsugiran nga samtang ang tion sang paghukom nagahilapit, duha ka sahi sang pagkaluto ang mahanabo. Sa isa ka bahin, “sia nga nagahimo sing malaut, magahimo gihapon sing malaut; kag ang mahigko magahimo sa gihapon sing kahigkuan.” Apang sa pihak nga bahin, “ang matarong magahimo sa gihapon sing matarong, kag ang balaan mangin balaan sa gihapon.” (Bugna 22:10, 11) Ining naulihi nga hitabo nagakatabo may kaangtanan sa pagpanudlo sing Biblia nga hilikuton sa bug-os kalibutan nga ginahimo sang mga Saksi ni Jehova. Ang katuyuan sina nga hilikuton amo ang pagtudlo sa mga tawo sang ginapatuman sang Dios sa ila agod malakip sila subong takus sa pagbaton sing kabuhi nga walay katapusan. Ining hilikuton naglab-ot na karon sa 233 ka kadutaan paagi sa mga 87,000 ka kongregasyon.

Ang Dios indi mahinay. Mapailubon nga ginahatagan niya ang mga indibiduwal sing tion nga kinahanglanon sa ‘pagsuklob sing bag-o nga personalidad’ agod makatigayon sang iya mga saad. (Efeso 4:24) Sa karon, nagahulat gihapon ang Dios, walay sapayan sang padayon nga paglubha sang mga kahimtangan sa kalibutan. Ginahimo sang mga Saksi ni Jehova sa bug-os nga kalibutan ang tanan nga masarangan nila sa pagpaambit sa ila mga isigkatawo sing ihibalo nga nagadul-ong sa kabuhi nga dayon. (Juan 17:3,17) Makalilipay nga sa kada tuig kapin sa 300,000 ka tawo ang nagapamati kag nagapabawtismo.

Ginahunahuna ang walay katapusan nga kabuhi, karon na ang tion, indi sa paghulat, kundi sa paghikot. Kay sa indi madugay, makita naton ang katumanan sang saad ni Jesus: “Ang tanan nga nagakabuhi kag nagapakita sing pagtuo sa akon indi na gid mapatay.”—Juan 11:26.

[Footnote]

[Laragway sa pahina 6]

Ang manuglaglag nga gintangdo sang Dios ginsingganan nga ihabyog ang iya garab kon ang ubas sang duta maluto na

[Laragway sa pahina 7]

Ang mga Saksi ni Jehova sa bug-os nga kalibutan nagabulig sa mga tawo nga matigayon ang dayon nga mga pagpakamaayo sang Dios