Tan-awa! ang Kapawa Makatilingala!

KON naagihan mo na nga magpangapkap sa dulom, nahibaluan mo kon daw ano ini kabudlay. Ang kapawa daku gid nga bulig! Mahimo naagihan mo man anay nga mabutang sa isa ka sitwasyon nga ginpaanggid sa kadulom. Ayhan natabo ini sang indi mo malubad ang isa ka problema. Nian amat-amat ka nga nakakita sing kapawa—may solusyon gali. Ang solusyon sa isa ka problema daw subong sang pagkakita sing kapawa sang nagapangapkap ka sa dulom.

Sang unang siglo, ang kalabanan nga mga tawo yara sa espirituwal nga kadudulman. Si apostol Pedro nagsulat sa mga nagbiya sang ila anay mga pagtuluuhan kag nagbaton sang Cristianismo: “[Ang Dios] nagtawag sa inyo gikan sa kadudulman pakadto sa iya makatilingala nga kapawa.” (1 Pedro 2:9) Para sa ila, kaangay ini sang paghalin sa pitipit nga kadudulman pakadto sa masanag nga kapawa. Mapaanggid man ini sa pag-isahanon nga wala sing paglaum kag nian mangin katapo sang ulihi sang isa ka pamilya nga may malig-on nga palaabuton.—Efeso 5:11, 12.

“Ginbayaan Mo ang Imo Una nga Gugma”

Nakita sang unang mga Cristiano ang “kamatuoran”—ang matuod nga Cristianong pagtuluuhan. (Juan 18:37) Nakita nila ang makatilingala nga kapawa sang kamatuoran kag naghimo sing pagbag-o gikan sa espirituwal nga kadudulman pakadto sa masanag nga kapawa. Apang, sa paglipas sang tion, ang una nga kapagsik kag kakugi sang pila ka Cristiano nagbugnaw. Halimbawa, sa hingapusan nga bahin sang nahaunang siglo, nag-utwas ang mabug-at nga problema sa kongregasyon sa Efeso. Ginsugid sang ginbanhaw nga si Jesucristo ang problema, nga nagasiling: “Amo ini ang naindi-an ko sa imo, nga ginbayaan mo ang imo una nga gugma. Busa dumduma kon gikan sa ano ka nahulog, kag maghinulsol ka kag himua ang mga buluhaton sang una.” (Bugna 2:4, 5) Kinahanglan nga painiton liwat sang mga Cristiano sa Efeso ang ila gugma sa Dios kag sa kamatuoran.

Kamusta naman kita? Nalipay man kita sang makita naton ang kapawa, kag mahibaluan ang makatilingala nga kamatuoran sang Pulong sang Dios. Ginhigugma naton ang kamatuoran. Apang ang aton gugma sa kamatuoran mahimo magbugnaw bangod sang mga problema nga kinaandan sa katawhan. Idugang pa sa sini ang mga problema nga kinaandan sa “katapusan nga mga adlaw.” Nagakabuhi kita sa kalibutan nga maeksperiensiahan naton ang “makahalanguyos nga mga tion nga mabudlay atubangon”—ang kalibutan nga ginapuy-an sang mga tawo nga “mahigugmaon sa kaugalingon, mahigugmaon sa kuarta, nagapabugal sang kaugalingon, matinaastaason, mapasipalahon, di-matinumanon sa mga ginikanan, di-mapinasalamaton, di-mainunungon.” (2 Timoteo 3:1, 2) Ang ila impluwensia mahimo magpaugdaw sang aton kakugi kag magpabugnaw sang aton gugma kay Jehova.

Kon ginbiyaan naton ang aton una nga gugma, dapat naton ‘dumdumon kon gikan sa ano kita nahulog kag maghinulsol.’ Dapat magbalik kita sa aton anay espirituwal nga kahimtangan. Dugang pa, dapat maghalong kita nga wala nagabugnaw ang aton gugma sa kamatuoran. Daw ano gid ka importante nga magpabilin kita nga malaumon kag malipayon sing pagtamod kag huptan nga mainit ang aton gugma kay Jehova kag sa iya kamatuoran!

‘Ang Kamatuoran nga Nagahilway sa Aton’

Makatilingala ang kapawa sang kamatuoran gikan sa Kasulatan bangod ginasabat sang Biblia ang importante nga mga pamangkot nga ginpaligban sang mga tawo sa sulod sang linibo ka tuig. Lakip sa sini nga mga pamangkot amo ang: Ngaa yari kita diri? Ano ang katuyuan sang kabuhi? Ngaa nagaluntad ang kalainan? May kabuhi pa bala sa tapos sang kamatayon? Ginhatagan kita ni Jehova sing kasanagan sa makatilingala nga mga kamatuoran sang mga doktrina sang Biblia. Indi bala dapat nga magpasalamat kita sing tudok? Kabay nga indi naton pagbalewalaon ang aton natun-an!

Si Jesus nagsiling sa iya mga disipulo: “Mahibaluan ninyo ang kamatuoran, kag ang kamatuoran magahilway sa inyo.” (Juan 8:32) Ang halad gawad ni Jesus naghilway sa aton gikan sa sala kag kamatayon. Apang ining hamili nga mga kamatuoran naghilway man sa aton gikan sa pagkawalay nahibaluan kag pagkawalay kapat-uran sang kalibutan nga naligom sa kadulom. Ang mapasalamaton nga pagpamalandong tuhoy sa aton natun-an magapabakod sang aton gugma kay Jehova kag sa iya Pulong.

Si apostol Pablo nagsulat sa mga Cristiano sa Tesalonica: “Sang ginbaton ninyo ang pulong sang Dios nga nabatian ninyo sa amon, ginbaton ninyo ini, indi subong pulong sang mga tawo, kundi, kon ano gid ini sa pagkamatuod, subong pulong sang Dios, nga nagapanghikot man sa inyo nga mga tumuluo.” (1 Tesalonica 2:13) Ang mga taga-Tesalonica nagpamati kag ‘nagbaton sang pulong [sang Dios] nga may kalipay.’ Wala na sila “sa kadudulman.” Sa baylo, sila nangin “mga anak sang kapawa.” (1 Tesalonica 1:4-7; 5:4, 5) Natun-an sini nga mga Cristiano nga si Jehova amo ang Manunuga kag sia ang labing gamhanan, maalam, mahigugmaon, kag maluluy-on. Kaangay sang iban pa nga mga sumulunod ni Cristo, natun-an man nila nga si Jehova naghimo sing kahimusan sa pagdula sang ila mga sala paagi sa halad gawad sang iya Anak, si Jesucristo.—Binuhatan 3:19-21.

Bisan pa limitado lamang ang ihibalo sang mga taga-Tesalonica tuhoy sa kamatuoran sang Biblia, nakahibalo sila kon diin ini pangitaon. Ang inspirado nga Kasulatan nagabulig sa tawo sang Dios nga “may ikasarang gid, kag nasangkapan sing bug-os para sa tagsa ka maayong buhat.” (2 Timoteo 3:16, 17) Ang mga Cristiano sa Tesalonica makapadayon sa pagtuon, busa masami nila naeksperiensiahan nga ang kapawa gikan sa Dios makatilingala gid. May rason sila nga pirme magkasadya. (1 Tesalonica 5:16) Kag amo man kita.

Kapawa sa Aton Banas

Nagahatag sang rason kon ngaa ang kapawa makatilingala, ang salmista nag-amba: “Ang imo pulong suga sa akon tiil, kag kapawa sa akon banas.” (Salmo 119:105) Ang pagtuytoy nga nabaton naton gikan sa Pulong sang Dios magabulig sa aton nga matultulan ang husto nga dalan kag matigayon ang makaalayaw nga kabuhi. Indi kinahanglan nga mangin kaangay kita sang isa ka barko nga naanod. Ang pagtuon kag pag-aplikar sa kamatuoran nagaamlig sa aton nga indi ‘maanod sang mga balod kag paliron sang tagsa ka hangin sang panudlo.’—Efeso 4:14.

“Dili kamo magsalig sa mga dungganon, ukon sa anak sang dutan-on nga tawo, nga sa iya wala sing kaluwasan,” siling sang Biblia. “Malipayon sia nga ang iya kabulig amo ang Dios ni Jacob, nga ang iya paglaum yara kay Jehova nga iya Dios.” (Salmo 146:3, 5) Dugang pa, ang pagsalig kay Jehova nagabulig sa aton nga malandas ang kahadlok kag kabalaka. Si apostol Pablo nagsulat: “Indi kamo magkabalaka sa bisan ano nga butang, kundi sa tanan nga butang paagi sa pangamuyo kag pag-ampo nga may pagpasalamat ipahibalo sa Dios ang inyo mga pangabay; kag ang paghidait sang Dios nga nagalabaw sa tanan nga panghunahuna magabantay sang inyo tagipusuon kag sang inyo ikasarang sa paghunahuna paagi kay Cristo Jesus.” (Filipos 4:6, 7) Ang pagtuytoy sang kapawa sang Pulong sang Dios magabulig gid sa aton.

Mag-iwag Subong mga Sulo sa Kalibutan

Ang isa pa ka rason kon ngaa ang kapawa gikan sa Pulong sang Dios makatilingala amo nga ginabuksan sini sa mga tawo ang dalan padulong sa labing dungganon nga hilikuton. Ginsugo ni Jesus ang iya mga sumulunod: “Lakat kamo kag maghimo sang mga disipulo sa mga tawo sang tanan nga pungsod, nga nagabawtismo sa ila sa ngalan sang Amay kag sang Anak kag sang balaan nga espiritu, nga nagapanudlo sa ila nga tumanon ang tanan nga butang nga ginsugo ko sa inyo. Kag, yari karon! ako kaupod ninyo sa tanan nga adlaw tubtob sa katapusan sang sistema sang mga butang.” Ginsugdan niya ini nga sugo paagi sa pagsiling: “Ginhatag sa akon ang bug-os nga awtoridad sa langit kag sa duta.”—Mateo 28:18-20.

Binagbinaga kon sin-o ang nagabulig sa matuod nga mga Cristiano sa hilikuton nga pagbantala sing maayong balita kag pagtudlo sing mga kamatuoran sang Biblia sa mga tawo sang tanan nga pungsod. Nagsaad si Jesus sa iya mga sumulunod nga mangin kaupod nila sia. Ginbuligan kag ginsuportahan gid niya sila sa ila ministeryo samtang ‘ginapaiwag nila ang ila kapawa’ sa sini nga paagi kag sa iban pa nga “maayong mga buhat.” (Mateo 5:14-16) Ang mga anghel nagabulig man sa sining hilikuton sa pag-ebanghelyo. (Bugna 14:6) Kag nagabulig man bala si Jehova nga Dios? Si apostol Pablo nagsulat: “Ako ang nagtanom, si Apolos ang nagbunyag, apang ang Dios ang padayon nga nagapatubo sini.” Isa gid ka pribilehiyo ang malakip sa “mga masigkamanugpangabudlay sang Dios”!—1 Corinto 3:6, 9.

Hunahunaa man kon paano ginapakamaayo ang aton mga panikasog sa sining hatag-Dios nga hilikuton. Ang aton hatag-Dios nga pribilehiyo nga ‘magsiga subong mga suga sa kalibutan’ indi matupungan. Paagi sa pagpabanaag sang kapawa gikan sa Pulong sang Dios sa aton hambal kag buhat, ginabuligan naton ang bunayag sing tagipusuon nga mga indibiduwal. (Filipos 2:15) Kag mahimo kita magkasadya samtang makugi kita nga nagabantala kag nagapanudlo, ‘kay ang Dios indi di-matarong nga kalimtan ang aton binuhatan kag ang gugma nga ginpakita naton para sa iya ngalan.’—Hebreo 6:10.

‘Magbakal sing Inughaplas sa Imo Mata’

Sa isa ka mensahe sa unang-siglo nga kongregasyon sa Laodicea, si Jesus nagsiling: “Magbakal ka sa akon . . . sang inughaplas sa mata nga ihaplas sa imo mga mata agod makakita ka. Ginasabdong ko kag ginadisiplina ang tanan nga ginahigugma ko.” (Bugna 3:18, 19) Ang sigurado nga bulong para sa espirituwal nga pagkabulag amo ang “inughaplas sa mata”—ang mga panudlo kag disiplina ni Jesus. Kon luyag naton mahuptan ang maayo nga pagtamod tuhoy sa aton kahimtangan kag sa palaabuton, dapat naton batunon kag sundon ang iya laygay kag subong man ang panuytoy nga masapwan sa bug-os nga Biblia. Dapat man naton batunon ang panghunahuna nga kaangay sang iya ni Cristo kag ilugon ang iya halimbawa. (Filipos 2:5; 1 Pedro 2:21) Ang inughaplas sa mata indi libre. Nagsiling si Jesus: “Magbakal ka sa akon.” Ang bili nagadalahig sang aton tion kag panikasog.

Kon maghalin kita sa isa ka madulom nga duog kag magsulod sa isa ka masanag nga hulot, ayhan kinahanglan pa ang tion antes maanad sa sini ang aton mata. Sing kaanggid, kinahanglan ang tion agod matun-an ang Pulong sang Dios kag agod makita ang kapawa sang kamatuoran. Kinahanglan ang tion agod mapamalandungan ang aton natun-an kag mabinagbinag kon daw ano ka hamili ang kamatuoran. Apang, indi ini mahal. Ngaa? Bangod ang kapawa makatilingala!

[Piktyur sa pahina 14]

“Magbakal ka sa akon . . . sang inughaplas sa mata nga ihaplas sa imo mga mata agod makakita ka”