Mga Pamangkot Gikan sa mga Bumalasa

Ano ang “inaway . . . sang Dios nga Labing Gamhanan” sa Har–Magedon, kag ano ang mangin resulta sini?—Bugna 16:14, 16.

Sa simple nga hambal, ang Har–Magedon isa ka bug-os kalibutan nga inaway nga mahanabo sa palaabuton kag sa sini pagalaglagon sang gintangdo ni Jehova nga Hari, si Jesucristo, ang mga kaaway sang Dios. Ginapaathag sang Biblia nga ining mga kaaway, ang “mga hari sang bug-os napuy-an nga duta,” ginhanda sang ‘mga kapahayagan nga gin-inspirar sang mga demonyo’ kag gintipon sila “sa inaway sang daku nga adlaw sang Dios nga Labing Gamhanan . . . sa duog nga ginatawag sa Hebreo Har–Magedon.”—Bugna 16:14, 16.

Ang duog nga ginatipunan sang mga nagailinaway indi literal. Ang ngalan nga Har–Magedon, nga ginbadbad nga “Armagedon” sa pila ka bersion sang Biblia, nagakahulugan sing “Bukid sang Megido.” (Bugna 16:16) Wala sang bukid nga may amo sini nga ngalan. Isa pa, “ang mga hari sang duta kag ang ila mga kasuldadusan” indi mahimo nga magtipon sing literal sa isa ka duog. (Bugna 19:19) Sa pagkamatuod, “ang duog” nagapatuhoy sa kahimtangan nga sa sini ginatuytuyan ang mga manuggahom sa politika sang duta kag ang ila mga sumalakdag—ang kahimtangan nga nagapamatok kay Jehova kag sa “mga kasuldadusan sa langit” nga ginapangunahan sang “Hari sang mga hari kag Ginuo sang mga ginuo,” si Jesucristo.—Bugna 19:14, 16.

Talalupangdon nga ang termino nga “Har–Magedon” naangot sa dumaan nga siudad sang Israel nga Megiddo. Bangod nahamtang ini sing estratehiko sa sidlangan sang Bukid Carmel, kontrolado sang Megiddo ang mayor nga mga ruta sang negosyo kag militar sadto nga panahon. Ini man ang duog sang madamo nga inaway diin isa lang ang sigurado nga magadaug. Halimbawa, nalutos sadto ni Hukom Barak sang Israel ang gamhanan nga hangaway sang Canaan nga ginpangunahan ni Heneral Sisera sa “ubay sang mga tubig sang Megiddo.” (Hukom 4:12-24; 5:19, 20) Sa sini man nga duog nalutos ni Hukom Gideon ang mga Midianhon. (Hukom 7:1-22) Paagi sa pag-angot sang Megiddo sa nagahilapit nga inaway, ginapasalig kita sang Biblia nga laglagon sing bug-os sang Dios, paagi sa iya Anak, ang tanan nga kaaway.

Ano ang mangin resulta? Dulaon sang inaway sa Har–Magedon ang tanan nga kagarukan kag kalautan sa duta. Buksan sini ang dalan para sa labing mahimayaon nga dag-on sa bug-os nga maragtas sang tawo. (Bugna 21:1-4) Sa idalom sang mahigugmaon nga paggahom sang Ginharian sang Dios, ang duta mangin paraiso diin magapuyo sing dayon ang mga matarong.—Salmo 37:29.