Isa Ka Tanhaga—Sin-o ang Makihilawason nga Babilonia nga Daku?

ANG isa ka babayi, isa ka makahuluya nga makihilawason, nga nag-impluwensia sa kabuhi sang binilyon ka tawo, ginpatay, ginlaglag. Apang indi ini ordinaryo nga paglaglag. Ano ang nagahimo sini nga tuhay? Ang nagpatay isa ka sapat, isa ka mapintas nga sapat nga naghubo sa iya, nagkaon sang iya unod, kag nagbilin sang iya bangkay agod sunugon sang kalayo. Sin-o ining daku sing impluwensia nga babayi? Ngaa gingus-ab sia sang isa ka sapat nga mapintas? Ano ang nahimo niya nga nangin takus sia sa sining mapintas nga katapusan?⁠a​—⁠Bugna 17:​16, 17.

Mahimo nga amo ini ang sadsaran sang isa ka makahalawathawat nga sugilanon tuhoy sa tanhaga​—⁠luwas nga ini indi isa ka plano para sa isa ka nobela. Isa ini ka maragtason nga katunayan nga nagakatuman. Kag importante ini sa imo bangod mahimo nga ining makahuluya nga makihilawason nagaimpluwensia sang imo kabuhi karon gid. Dugang pa, ang imo pag-upod ukon pagbulag sa iya magakahulugan sing kabuhi kag kamatayon. Gani sin-o sia?

Ang mga Kliyente sang Makatalanhaga nga Babayi

Ining nagapanulay nga babayi, ining wala sing huya nga manughaylo, ginlaragway ni Juan sa matagnaon nga tolon-an nga Bugna sang Biblia, nga sa diin aton mabasa: “Kag gindala ako [sang anghel] sa gahom sang espiritu pakadto sa kamingawan. Kag nakita ko ang babayi nga nagasakay sa sapat nga mapula nga nalipos sang mga ngalan sang pagpasipala kag may pito ka ulo kag napulo ka sungay. Kag ang babayi napanaptan sing purpura kag escarlata, kag napunihan sing bulawan kag mga uluyason kag mga mutya kag may tagayan nga bulawan sa iya kamot nga puno sing mga kangil-aran kag sang mga kahigkuan sang iya pagkamakihilawason. Kag sa iya agtang nasulat ang ngalan, isa ka tanhaga: ‘Babilonia nga Daku, iloy sang mga makihilawason kag sang mga kangil-aran sang duta.’ ”​—⁠Bugna 17:​3-5.

Mahimo gid nga ining “Babilonia nga Daku” isa ka makahaladlok nga babayi, kay suno sa rekord sa bersikulo 1 sia “nagalingkod sa madamo nga tubig.” Ano ang buot silingon sina? Ang anghel sang Dios nagpaathag kay Juan: “Ang mga tubig nga nakita mo, nga ginalingkuran sang makihilawason nga babayi, amo ang mga katawhan kag mga kadam-an kag mga pungsod kag mga hambal.” (Bugna 17:15) Sa wala sing duhaduha isa ini ka makihilawason nga may bug-os kalibutan nga impluwensia. Apang indi sia isa ka kinaandan nga makihilawason. Sia ang “iloy sang mga makihilawason,” ang pangulo sang institusyon. Kon tuhoy sa pagpakighilawas, sia ang nagamando. Apang may yara sia espesyal nga mga kliyente.

Ginbuyagyag sang anghel kon sin-o ining nahamut-an nga mga kliyente sang daku nga makihilawason. Paano niya ginpakilala sila? Sia nagsiling nga ang Babilonia nga Daku amo ang isa nga “sa iya nagapakighilawas ang mga hari sang duta, samtang ang mga nagapuyo sa duta nahubog sang alak sang iya pagkamakihilawason.” (Bugna 17:2) Pat-od nga isa gid ini ka makahalaylo nga makihilawason nga may maayong mga kaangtanan amo kon ngaa naganyat niya ang politikal nga mga manuggahom sang kalibutan, ang “mga hari sang duta”! Gani sin-o sia?

Ang anghel nagsiling nga may ngalan sia, isa ka makatalanhaga nga ngalan, “Babilonia nga Daku.” Yari karon ang duha ka ideya tuhoy sa iya identidad​—⁠ang isa amo ang mga kliyente nga iya nahamut-an kag ang isa amo ang iya ngalan, Babilonia nga Daku. Sa anong konklusyon nagadul-ong ining mga ideya?

[Footnote]