Madumduman Mo Bala?

Nahunahuna mo bala sing maayo ang ulihi nga mga guwa sang Ang Lalantawan? Kon amo, ayhan madumduman mo ang masunod:

◻ Makalampuwas bala ang iban nga hinaplas nga mga Cristiano sa “dakung kapipit-an” kag magkabuhi sa duta sa pila ka tion antes dal-on sa langit?​—⁠Bugna 7:⁠14.

Ang Biblia indi maathag sa sini. Ang iban nga mga rekord sa Biblia daw nagapanugda nga ang mga hinaplas mahimo nga magkabuhi sa bag-ong kalibutan. Apang, minilyon sang nagalaum nga magkabuhi sing dayon sa duta ang ­nakabaton sing paghanas nga ki­nahanglanon agod ang bag-ong kalibutan mag-umpisa. Gani, ang diutay nga nagkalabilin indi kinahanglan para sa sini nga buluhaton, kag ang Dios mahimo magapakamaayo sa pagdala sa ila sa langit para ‘magpakasal sa Kordero’ pagkatapos nga malaglag ang relihioso nga makihilawason, ang “Babilonia nga Daku.” (Bugna 18:​2, 10; 19:​2, 7, 8)​—⁠8/15, pahina 31.

◻ Bangod sang anong motibo dapat ipahamtang sang isa ka tawo ang iya tagipusuon subong Cristianong manugtatap? (1 Timoteo 3:1)

Dapat himud-osan sang isa ka tawo ang katungdanan nga manugtatap, nagahimo sini sing mapainubuson bangod luyag niya alagaran ang iban. Busa kon ginapahulag sia bangod sang maayo nga mga motibo, ini nga buhat niya magaresulta sa espirituwal nga kabulahanan sa tanan nga nadalahig.​—⁠9/1, pahina 18.

◻ Ngaa wala magluya si apostol Pablo walay sapayan sang tanan nga ginbatas niya?

Si Pablo nagasiling: “Makahimo ako sang tanan nga butang sa iya nga nagapabakud sa akon.” (Filipos 4:13) Wala gid magtinguha si Pablo nga dalhon sing isahanon ang iya mga lulan. Sa baylo, nagsalig sia kay Jehova sa pagsakdag sa iya. (Salmo 55:22)​—⁠9/1, pahina 30.

◻ Ano ang kahulugan sang ginsiling ni Pablo sa Efeso 4:​26: “Magpangakig apang dili magpaka­sala”?

Ginabaton sini nga mga pulong nga ang isa mahimo nga makatarunganon nga magpangakig, apang kon matabo ini, indi dapat magpabilin ang isa nga ‘akig tubtob sa pagtunod sang adlaw.’ (Efeso 4:26) Ngaa? Bangod magahatag ini sa Yawa sing kahigayunan nga hingalitan sia, ayhan sulayon sia sa paghimo sing malaut, agod mangin dikalahamut-an sia sa Dios. (Salmo 37:​8, 9)​—⁠9/15, pahina 21.

◻ Ano ang daku nga kinatuhayan sa paagi sang mga Saksi ni Jehova sa pagtudlo kag sa paagi sang Cristiandad?

Ang mga Saksi ni Jehova nagatudlo paagi sa awtoridad sang Pulong sang Dios, samtang ang klero sang Cristiandad nagapasad sang ila panudlo sa paganong relihiosong tradisyon nga ginliton gikan sa Babilonia kag Egipto.​—⁠10/1, pahina 25.

◻ Bangod sang anong labing importante nga rason nga nagkari sa duta ang Anak sang Dios?

Nagkari si Jesus sa duta una bangod sa tuyo nga husayon ang hulusayon nga ginpautwas ni Satanas may kaangtanan sa pagkasoberano ni Jehova.​—⁠10/15, pahina 13.

◻ Sa pagtawag sa sekular nga mga awtoridad nga “superyor,” ginabuhinan bala naton ang kadungganan nga para kay Jehova? (Roma 13:1)

Wala, kay si Jehova labi pa sa “superyor” lamang. Sia ang “Soberanong Ginuo,” “ang Isa nga Supremo.” (Salmo 73:​28; Daniel 7:​18, 22) Ang sekular nga mga awtoridad superyor lamang may kaangtanan sa iban nga mga tawo kag sa ila kaugalingon nga kasangkaron sang ­hilikuton. Katungdanan nila nga gamhan kag amligan ang mga komunidad.​—⁠11/1, pahina 12.

◻ Ngaa ang gugma amo ang labing daku sa siam ka bunga sang espiritu sang Dios nga ginasambit sa Galacia 5:​22, 23?

Ang walo pa ka bunga sang espiritu sang Dios mga pagpadayag, ukon lainlain nga mga aspeto, sang gugma, nga ginsambit una. Ining tanan iban pa nga mga bunga sang espiritu kinahanglanon nga mga ki­naiya, apang indi kita makabe­nepisyo sa sini kon wala kita sing gugma. (1 Corinto 13:3)​—⁠11/15, pahina 14.

◻ Ano ang mga kaayuhan sang pagpangamuyo tungod sa mga masigkatumuluo?

Kon ginakabalak-an naton sa pangamuyo ang espirituwal nga kaayuhan sang iban, labi kita nga nagasuod sa ila sa utudnon nga gugma. May kahanuklog man kita sa ila, nagaambit sa ila mga interes kag mga kasubo. Busa, ang bisan ano nga kapait pagagabuton, nagahatag sing hulot para sa makapalig-on nga mga panghunahuna nga nagahimo sa aton nga mahigugmaon kag malipayon.​—⁠11/15, pahina 21-2.

◻ Ano ang nagapahulag nga mga rason sa pagsimba kay Jehova nga Dios?

Dapat naton simbahon si Jehova bangod sia ang Manunuga kag ang iya mga kinaiya nagapasuod sa aton sa iya. (Deuteronomio 32:​3, 4; 1 Juan 4:​8; Bugna 10:6) Ang Biblia nagasiling: “Ang diosnon nga debosyon mapuslanon sa tanan nga butang, nga may saad sang kabuhi karon kag sa palaabuton.” (1 Timoteo 4:8) Wala sing dios luwas kay Jehova ang makasaad sina nga palaabuton kag nian magatuman sang iya saad.​—⁠12/1, pahina 6-7.