Ang Dakung Espirituwal nga Templo ni Jehova

“May amo kita nga pinakamataas nga saserdote, . . . alagad sang balaan nga duog kag sang matuod nga kayangkayang, nga ginpatindog ni Jehova, kag indi sang tawo.”​—⁠HEBREO 8:​1, 2.

 1. Anong mahigugmaon nga aman ang ginhimo ni Jehova sa makasasala nga katawhan?

BANGOD sang iya daku nga gugma sa katawhan, si Jehova nga Dios nag-aman sing isa ka halad sa pagdula sang mga sala sang kalibutan. (Juan 1:​29; 3:16) Nagkinahanglan ini sing pagliton sang kabuhi sang iya panganay nga Anak gikan sa langit padulong sa taguangkan sang isa ka Judiyong ulay nga si Maria. Ginpaathag sing maayo sang anghel ni Jehova kay Maria nga ang bata nga iya pagadalahon “pagatawgon nga balaan, Anak sang Dios.” (Lucas 1:​34, 35) Si Jose, nga nakagon kay Maria, ginsugiran tuhoy sa milagruso nga pagpanamkon kay Jesus kag nahibaluan niya nga ining isa “magaluwas sa iya katawhan sang ila mga sala.”​—⁠Mateo 1:​20, 21.

 2. Ano ang ginhimo ni Jesus sang mga 30 anyos na sia, kag ngaa?

² Samtang nagadaku si Jesus nahangpan niya ang pila sining mga katunayan tuhoy sa iya milagruso nga pagkabun-ag. Nahibaluan niya nga ginhatagan sia sang iya langitnon nga Amay sing makaluwas kabuhi nga hilikuton sa duta. Gani, subong isa ka hamtong nga tawo nga nagaedad sing mga 30 anyos, nagkadto si Jesus sa manalagna sang Dios nga si Juan agod magpabawtismo sa Suba sang Jordan.​—⁠Marcos 1:​9; Lucas 3:⁠23.

 3. (a) Ano ang buot silingon ni Jesus sa mga pinamulong, “Indi mo luyag ang mga halad kag mga dulot”? (b) Anong talalupangdon nga halimbawa ang ginpahamtang ni Jesus sa tanan nga luyag mangin disipulo niya?

³ Si Jesus nangamuyo sadtong tion sang iya pagpabawtismo. (Lucas 3:21) Sing maathag, sa sining tion sa iya kabuhi, natuman niya ang mga pinamulong sa Salmo 40:​6-8, subong ginpakita sang ulihi ni apostol Pablo: “Indi mo luyag ang mga halad kag mga dulot, kundi gin-amanan mo ako sing isa ka lawas.” (Hebreo 10:5) Sa amo ginpakita ni Jesus nga nahibaluan niya nga “indi luyag” sang Dios nga magpadayon ang paghalad sing halad nga mga sapat sa templo sa Jerusalem. Sa baylo, nahisayran niya nga ang Dios nag-aman sing isa ka himpit nga lawas para sa iya, si Jesus, agod idulot subong isa ka halad. Dulaon sini ang dugang pa nga pagkinahanglan sing paghalad sang sapat. Ginapakita ang iya tinagipusuon nga handum sa pagpasakop sa kabubut-on sang Dios, si Jesus padayon nga nangamuyo: “Yari karon! Nagaabot ako (sa linukot sang tulun-an nga ginsulat tuhoy sa akon) sa paghimo sang imo kabubut-on, O Dios.” (Hebreo 10:7) Daw ano ka dalayawon nga halimbawa sang kaisog kag dimakagod nga debosyon ang ginpakita sadto ni Jesus para sa tanan nga mangin disipulo niya sa ulihi!​—⁠Marcos 8:⁠34.

 4. Paano ginpakita sang Dios ang iya kahamuot sa paghalad ni Jesus sang iya kaugalingon?

⁴ Ginkahamut-an bala sang Dios ang pangamuyo ni Jesus sa bawtismo? Tuguti nga sabton kita sang isa sang pinili nga mga apostol ni Jesus: “Kag sang mabawtismuhan na si Jesus, sa gilayon nagtakas sia sa tubig, kag yari karon, nabuksan sa iya ang mga langit kag iya nakita ang espiritu sang Dios nga nagapanaug subong sang salampati, kag nagkunsad sa ibabaw niya. Yari karon! May isa ka tingog gikan sa langit nga nagasiling: ‘Ini amo ang akon hinigugma nga Anak, nga sa iya nahamuot ako.’ ”​—⁠Mateo 3:​16, 17; Lucas 3:​21, 22.

 5. Ano ang ginlaragway sang literal nga halaran sang templo?

⁵ Ang pagbaton sang Dios sa paghatag sang lawas ni Jesus subong halad nagakahulugan nga, sa espirituwal nga kahulugan, nagluntad na ang isa ka halaran nga daku pa sa sadtong halaran sa Jerusalem. Ang literal nga halaran nga ginhalaran sang mga sapat naglaragway sa espirituwal nga halaran, nga amo ang “kabubut-on” ukon kahimusan sang Dios sa pagbaton sa tawhanon nga kabuhi ni Jesus subong isa ka halad. (Hebreo 10:10) Amo sina kon ngaa si apostol Pablo nagsulat sa mga masigka-Cristiano: “May aton kita nga halaran nga sa sini walay kinamatarong sa pagkaon ang mga nagaalagad sa kayangkayang [ukon, templo].” (Hebreo 13:10) Sa iban nga pulong, ang matuod nga mga Cristiano nagabenepisyo sa superyor nagatubos sing sala nga halad, nga ginsikway sang kalabanan nga mga Judiyong saserdote.

 6. (a) Ano ang nagluntad sang panahon sang bawtismo ni Jesus? (b) Ano ang buot silingon sang titulo nga Mesias, ukon Cristo?

⁶ Ang paghaplas kay Jesus sang balaan nga espiritu nagakahulugan nga ginpakita na karon sang Dios ang iya bug-os nga kahimusan sang espirituwal nga templo, upod kay Jesus nga nagaalagad subong Mataas nga Saserdote. (Binuhatan 10:​38; Hebreo 5:5) Ang disipulo nga si Lucas gin-inspirar sa pagtudlo sang tuig sining importante nga hitabo subong ang “ikapulog-lima nga tuig sang paghari ni Tiberio Cesar.” (Lucas 3:​1-3) Nagtupa ina sa tuig 29 C.⁠E.​—⁠eksakto 69 ka semana sang mga tuig, ukon 483 ka tuig, kutob sang tion nga nagmando si Hari Artajerjes nga tukuron liwat ang mga pader sang Jerusalem. (Nehemias 2:​1, 5-8) Suno sa tagna, ang “Mesias nga Pangulo” magaabot sa sadtong gintagna nga tuig. (Daniel 9:25) Madamong Judiyo ang maathag nga nakahibalo sini. Si Lucas nagareport nga “ang katawhan nagapaabot” sa pagkari sang Mesias, ukon Cristo, mga titulo nga naghalin sa Hebreo kag Griegong mga tinaga nga may pareho nga kahulugan, “ang isa nga hinaplas.”​—⁠Lucas 3:⁠15.

 7. (a) San-o ginhaplasan sang Dios ang “Balaan sang mga Balaan,” kag ano ang buot silingon sini? (b) Ano pa ang natabo kay Jesus sa tion sang iya bawtismo?

⁷ Sang tion sang pagbawtismo kay Jesus, ang langitnon nga puluy-an sang Dios ginhaplas, ukon ginpain, subong “ang Balaan sang mga Balaan” sa dakung espirituwal nga templo nga kahimusan. (Daniel 9:24) “Ang matuod nga kayangkayang [ukon, templo], nga gintukod ni Jehova, kag indi sang tawo” nagpanghikot. (Hebreo 8:2) Subong man, paagi sa iya bawtismo sa tubig kag balaan nga espiritu, ang tawo nga si Jesucristo natawo liwat subong espirituwal nga Anak sang Dios. (Ipaanggid ang Juan 3:⁠3.) Nagakahulugan ini nga sa ulihi ibalik sang Dios ang iya Anak sa langitnon nga kabuhi, diin magaalagad sia sa natuo nga kamot sang iya Amay subong Hari kag Mataas nga Saserdote “suno sa paagi ni Melquisedec sing dayon.”​—⁠Hebreo 6:​20; Salmo 110:​1, 4.

Ang Langitnon nga Labing Balaan

 8. Ano karon ang bag-ong kahulugan sang trono sang Dios sa langit?

⁸ Sang adlaw nga ginbawtismuhan si Jesus, ang langitnon nga trono sang Dios nakatigayon sing bag-o nga kahulugan. Ang pagkilala sa isa ka himpit tawhanon nga halad agod tubson ang mga sala sang kalibutan nagpadaku sa pagkabalaan sang Dios sa kabaliskaran sang pagkamakasasala sang tawo. Ang kaluoy sang Dios ginpadaku man sa paagi nga ginpakita niya ang iya kahanda sa pagpatawad, ukon sa pagbaton sing pagtubos. Busa ang trono sang Dios sa langit nangin kaangay sang pinakasulod nga bahin sang templo, diin nagasulod ang mataas nga saserdote sing makaisa kada tuig upod ang dugo sang sapat sa pagtubos sang sala sa malaragwayon nga paagi.

 9. (a) Ano ang ginlaragway sang kumbong sa ulot sang Balaan kag sang Labing Balaan? (b) Paano nakasulod si Jesus sa kumbong sang espirituwal nga templo sang Dios?

⁹ Ang kumbong nga nagapain sang Balaan gikan sa Labing Balaan naglaragway sa undanon nga lawas ni Jesus. (Hebreo 10:​19, 20) Amo yadto ang balagbag nga nagaupang kay Jesus sa pagsulod sa presensia sang iya Amay samtang diri sia anay sa duta subong isa ka tawo. (1 Corinto 15:50) Sang napatay si Jesus, “ang kumbong sang santuaryo natunga sa duha ka bahin, halin sa ibabaw paidalom.” (Mateo 27:51) Maathag nga ginpakita sini nga ang balagbag nga nagaupang kay Jesus sa pagsulod sa langit ginkuha na. Tatlo ka adlaw sang ulihi, si Jehova nga Dios naghimo sing isa ka daku nga milagro. Ginbanhaw niya si Jesus gikan sa minatay, indi subong mamalatyon nga tawo nga may unod kag dugo, kundi subong isa ka mahimayaon nga espiritu nga tinuga nga “nagakabuhi sing dayon.” (Hebreo 7:24) Kap-atan ka adlaw sang ulihi, si Jesus nagkayab sa langit kag nagsulod sa matuod nga “Balaan sang mga Balaan,” “agod mag-atubang sa Dios para sa aton.”​—⁠Hebreo 9:​24.

10. (a) Ano ang natabo pagkatapos ginpresentar ni Jesus ang balor sang iya halad sa iya langitnon nga Amay? (b) Ano ang buot silingon sang paghaplas sang balaan nga espiritu para sa mga disipulo ni Cristo?

¹⁰ Ginbaton bala sang Dios ang balor sang ginpatulo nga dugo ni Jesus subong pangtubos para sa mga sala sang kalibutan? Huo ginbaton niya. Ang pamatuod sa sini natabo eksakto kalim-an ka adlaw pagkatapos nga nabanhaw si Jesus, sang adlaw sang piesta sang Pentecostes. Ang balaan nga espiritu sang Dios ginbubo sa 120 ka disipulo ni Jesus nga nagtipon sa Jerusalem. (Binuhatan 2:​1, 4, 33) Kaangay sang ila Mataas nga Saserdote, si Jesucristo, ginhaplasan sila sa pag-alagad subong “isa ka balaan nga pagkasaserdote, sa pagdulot sing espirituwal nga mga halad” sa idalom sang dakung espirituwal nga templo nga kahimusan sang Dios. (1 Pedro 2:5) Dugang pa, ginahuman sining mga hinaplas ang isa ka bag-ong pungsod, ang “balaan nga pungsod” sang Dios sang espirituwal nga Israel. Sa amo, ang tanan nga tagna sang maayong mga butang tuhoy sa Israel, subong sang “bag-ong katipan” nga saad nga narekord sa Jeremias 31:​31, naaplikar sa hinaplas nga Cristianong kongregasyon, ang matuod nga “Israel sang Dios.”​—⁠1 Pedro 2:​9; Galacia 6:⁠16.

Iban Pa nga Bahin sang Espirituwal nga Templo sang Dios

11, 12. (a) Ano ang ginlaragway sang luwang sang saserdote sa bahin ni Jesus, kag sa bahin sang iya hinaplas nga mga sumulunod? (b) Ano ang ginalaragway sang batya sang tubig, kag paano ini ginagamit?

¹¹ Walay sapayan nga ang Labing Balaan nagalaragway “sa langit mismo,” diin nagalingkod ang Dios, ang tanan iban pa nga bahin sang espirituwal nga templo sang Dios naangot sa mga butang sa duta. (Hebreo 9:24) Sa templo sa Jerusalem, may yara nasulod nga luwang sang mga saserdote nga may halaran kag isa ka daku nga batya sang tubig, nga ginapanghinawan sang mga saserdote antes ginahimo ang sagrado nga pag-alagad. Ano ang ginalaragway sining mga butang sa espirituwal nga templo nga kahimusan sang Dios?

¹² Sa bahin ni Jesucristo, ang nasulod nga luwang sang mga saserdote nagalaragway sa iya walay sala nga kahimtangan subong himpit tawhanon nga Anak sang Dios. Paagi sa pagtuo sa halad ni Jesus, ang hinaplas nga mga sumulunod ni Cristo ginkabig nga matarong. Busa, makatarunganon nga makapakig-angot sa ila ang Dios subong nga daw wala sila sing sala. (Roma 5:​1; 8:​1, 33) Busa, ginalaragway man sini nga luwang ang ginhatag nga matarong tawhanon nga kahimtangan nga natigayon sang indibiduwal nga mga katapo sang balaan nga pagkasaserdote sa atubangan sang Dios. Sa amo man nga tion, ang hinaplas nga mga Cristiano mga dihimpit sa gihapon kag may huyog sa paghimo sing sala. Ang batya sang tubig sa luwang nagalaragway sa Pulong sang Dios, nga ginagamit sang Mataas nga Saserdote sa pagtinlo sa balaan nga pagkasaserdote sing padayon. Paagi sa pagpasakop sa sining proseso sang pagtinlo, natigayon nila ang dungganon nga kahimtangan nga nagapadungog sa Dios kag nagaganyat sa mga tagaguwa sa iya putli nga pagsimba.​—⁠Efeso 5:​25, 26; ipaanggid ang Malaquias 3:​1-3.

Ang Balaan

13, 14. (a) Ano ang ginalaragway sang Balaan sang templo sa bahin ni Jesus kag sang iya hinaplas nga mga sumulunod? (b) Ano ang ginalaragway sang bulawan nga kandelero?

¹³ Ang una nga bahin sang templo nagalaragway sa kahimtangan nga labaw sangsa luwang. Sa bahin sang himpit nga tawo nga si Jesucristo, nagalaragway ini sa iya pagkatawo liwat subong espirituwal nga Anak sang Dios nga magabalik sa langitnon nga kabuhi. Sa tapos madeklarar nga matarong pasad sa ila pagtuo sa ginpatulo nga dugo ni Cristo, naeksperiensiahan man sining hinaplas nga mga sumulunod ang pinasahi nga pagpanghikot sang espiritu sang Dios. (Roma 8:​14-17) Paagi sa “tubig [nga amo ang ila bawtismo] kag sa espiritu,” “natawo [sila] liwat” subong espirituwal nga mga anak sang Dios. Bangod sina, may paglaum sila nga mabanhaw sa langitnon nga kabuhi subong espiritu nga mga anak sang Dios, kon magpabilin sila nga matutom tubtob sa kamatayon.​—⁠Juan 3:​5, 7; Bugna 2:⁠10.

¹⁴ Ang mga saserdote nga nag-alagad anay sa sulod sang Balaan sang dutan-on nga templo indi kitaon sa mga sumilimba sa guwa sang templo. Sing kaanggid, ang hinaplas nga mga Cristiano nakaeksperiensia sing espirituwal nga kahimtangan nga wala matigayon ukon nahangpan sing bug-os sang kalabanan nga mga sumilimba sang Dios, nga ang paglaum amo ang mabuhi sing dayon sa isa ka paraiso nga duta. Ang bulawan nga kandelero sang tabernakulo nagalaragway sa nasanagan nga kahimtangan sang hinaplas nga mga Cristiano. Ang pagpanghikot sang balaan nga espiritu sang Dios, kaangay sang lana sa mga suga, nagahatag sing kasanag tuhoy sa Biblia. Wala gintago sang mga Cristiano ang ihibalo nga ila natigayon. Sa baylo, ginsunod nila si Jesus, nga nagsiling: “Kamo ang kapawa sang kalibutan. . . . Iiwag ninyo ang inyo kapawa sa mga tawo, agod nga makita nila ang inyo maayong mga buhat kag himayaon nila ang inyo Amay nga yara sa mga langit.”​—⁠Mateo 5:​14, 16.

15. Ano ang ginalaragway sang tinapay sa latok sang tinapay sang pagpahayag?

¹⁵ Agod makapabilin sa sining nasanagan nga kahimtangan, ang hinaplas nga mga Cristiano dapat magkaon sing regular sa ginlaragway sang tinapay sa latok sang tinapay sang pagpahayag. Ang ila pangunang tuburan sang espirituwal nga pagkaon amo ang Pulong sang Dios, nga ginatinguhaan nila nga mabasa kag mapamalandungan adlaw-adlaw. Nanaad man si Jesus nga hatagan sila sing “pagkaon sa nagakaigo nga tion” paagi sa iya “matutom kag mainandamon nga ulipon.” (Mateo 24:45) Ining “ulipon” amo ang kabug-usan nga hubon sang hinaplas nga mga Cristiano sa duta sa isa ka partikular nga tion. Gingamit ni Cristo ining hinaplas nga hubon sa pagbalhag sing impormasyon tuhoy sa katumanan sang mga tagna sang Biblia kag sa paghatag sing sibu sa tion nga panuytoy sa pag-aplikar sang mga prinsipio sang Biblia sa modernong matag-adlaw nga pagkabuhi. Busa, mapinasalamaton nga ginakaon sang hinaplas nga mga Cristiano inang tanan espirituwal nga mga aman. Apang ang pagsakdag sa ila espirituwal nga kabuhi nasandig indi lamang sa pagpasulod sang ihibalo sang Dios sa ila mga hunahuna kag tagipusuon. Si Jesus nagsiling: “Ang akon pagkaon amo ang paghimo sang kabubut-on sang nagpadala sa akon kag sa pagtuman sang iya hilikuton.” (Juan 4:34) Sing kaanggid, ang hinaplas nga mga Cristiano nagabatyag sing kaayawan sa ila adlaw-adlaw nga paghimo sang ginpahayag nga kabubut-on sang Dios.

16. Ano ang ginalaragway sang pag-alagad sa halaran sang incienso?

¹⁶ Sa aga kag sa gab-i, ang saserdote nagahalad sing incienso sa Dios sa halaran sang incienso sa Balaan. Sa amo man nga tion, ang di-saserdotenhon nga mga sumilimba nagapangamuyo sa Dios samtang nagatindog sa guwa sang mga luwang sang iya templo. (Lucas 1:​8-10) “Ang incienso,” paathag sang Biblia, “nagakahulugan sing mga pangamuyo sang mga balaan.” (Bugna 5:⁠8) “Kabay nga ang akon pangamuyo ihanda subong incienso sa imo atubangan,” sulat ni Salmista David. (Salmo 141:2) Ginpakabahandi man sang hinaplas nga mga Cristiano ang ila pribilehiyo sa pagpalapit kay Jehova sa pangamuyo paagi kay Jesucristo. Ang hanuot nga mga pangamuyo gikan sa tagipusuon kaangay sang maamyon nga incienso. Ginadayaw man sang hinaplas nga mga Cristiano ang Dios sa iban nga paagi, nga ginagamit ang ila mga bibig sa pagtudlo sa iban. Ang ila pagbatas sa atubangan sang mga kabudlayan kag ang ila integridad sa idalom sang mga pagtilaw kalahamut-an gid sa Dios.​—⁠1 Pedro 2:​20, 21.

17. Ano ang nadalahig sa katumanan sang matagnaon nga laragway nga ginhatag sang una nga pagsulod sang mataas nga saserdote sa Labing Balaan sa Adlaw sang Katumbasan?

¹⁷ Sa Adlaw sang Katumbasan, ang mataas nga saserdote sang Israel nagasulod sa Labing Balaan kag nagasunog sing incienso sa bulawan nga incensario nga may nagakalayo nga mga baga. Ginahimo ini antes niya ginapasulod ang dugo sang mga halad para sa kasal-anan. Sa pagtuman sining matagnaon nga laragway, ang tawo nga si Jesus naghupot sing bug-os nga integridad kay Jehova nga Dios antes niya ginhalad ang iya kabuhi subong ang nagaisahanon mapinadayunon nga halad para sa aton mga kasal-anan. Sa amo ginlaragway niya nga ang isa ka himpit nga tawo sarang makahupot sang iya integridad sa Dios walay sapayan sang bisan anong pag-ipit ang dalhon sa iya ni Satanas. (Hulubaton 27:11) Sang mapaidalom sa pagtilaw, nangamuyo si Jesus “upod ang mabaskog nga pagsinggit kag mga luha, kag ginpamatian sia bangod sang iya diosnon nga kahadlok.” (Hebreo 5:7) Sa sining paagi ginhimaya niya si Jehova subong ang matarong kag may kinamatarong nga Soberano sang uniberso. Ginpadyaan sang Dios si Jesus paagi sa pagbanhaw sa iya gikan sa minatay padulong sa dimamalatyon nga kabuhi sa langit. Sa sining mataas nga posisyon, gintalupangod ni Jesus ang ikaduha nga rason sang iya pagkari sa duta, nga amo, ang pagpasag-uli sa mahinulsulon makasasala nga mga tawo sa Dios.​—⁠Hebreo 4:​14-16.

Ang Mas Daku Pa nga Himaya sang Espirituwal nga Templo sang Dios

18. Paano ginhimaya sing pinasahi ni Jehova ang iya espirituwal nga templo?

¹⁸ “Ang himaya sining ulihing balay mangin daku pa sa una,” siling ni Jehova. (Hageo 2:9) Paagi sa pagbanhaw kay Jesus subong dimamalatyon nga Hari kag Mataas nga Saserdote, ginhatagan ni Jehova sing pinasahi nga himaya ang iya espirituwal nga templo. Si Jesus yara na sa kahimtangan sa pagdala sing “walay katapusan nga kaluwasan sa tanan nga nagatuman sa iya.” (Hebreo 5:9) Ang una nga nagpakita sinang pagkamatinumanon amo ang 120 ka disipulo nga nakabaton sing balaan nga espiritu sang Pentecostes 33 C.E. Gintagna sang tulun-an sang Bugna nga ining espirituwal nga mga anak sang Israel magadamo sa ulihi sing 144,000. (Bugna 7:⁠4) Pagkatapos sang ila kamatayon, madamo sa ila ang nagpabilin nga wala sing pangalibutan sa kinaandan nga lulubngan sang katawhan, nga naghulat sang tion sang presensia ni Jesus sa harianon nga paggahom. Ang matagnaon nga kronolohiya sa Daniel 4:​10-17, 20-27 nagatudlo sa 1914 subong ang tion sang pagsugod sang paggahom ni Jesus sa tunga sang iya mga kaaway. (Salmo 110:2) Mga dekada sing abanse, malangkagon nga ginhulat sang hinaplas nga mga Cristiano ang amo nga tuig. Ang unang inaway kalibutanon kag ang kaupod nga mga kalalat-an sa katawhan naghatag sing pamatuod nga si Jesus ginpalingkod subong Hari sang 1914. (Mateo 24:​3, 7, 8) Wala madugay sang ulihi, bangod nag-abot na ang tion sa “pagsugod sang paghukom sa balay sang Dios,” pagatumanon ni Jesus ang saad sa iya hinaplas nga mga disipulo nga natulugan sa kamatayon: “Magakari ako liwat kag magahatag sa inyo sing puluy-an upod sa akon.”​—⁠1 Pedro 4:​17; Juan 14:⁠3.

19. Paano makasulod ang nagkalabilin sang 144,000 sa langitnon nga Labing Balaan?

¹⁹ Ang 144,000 nga katapo sang balaan nga pagkasaserdote wala pa tanan matandaan kag matipon sa ila langitnon nga puluy-an. May yara pa nagkalabilin sa ila nga nagakabuhi sa duta sa espirituwal nga kahimtangan nga ginlaragway sang Balaan, nga nahamulag gikan sa balaan nga presensia sang Dios paagi sa “kumbong,” ukon balagbag, sang ila dutan-on nga lawas. Kon mapatay sila nga matutom, sa gilayon pagabanhawon sila subong dimamalatyon nga espiritu nga mga tinuga agod magbuylog sa mga katapo sang 144,000 nga didto na sa langit.​—⁠1 Corinto 15:​51-53.

20. Anong importante nga hilikuton ang ginahimo karon sang nagkalabilin sang balaan nga pagkasaserdote, kag upod ang anong mga resulta?

²⁰ Bangod madamo ang saserdote nga nagaalagad upod sa Mataas nga Saserdote sa langit, ang espirituwal nga templo sang Dios nakatigayon sing dugang nga himaya. Sa wala pa, ang nagkalabilin sang balaan nga pagkasaserdote nagahimo sang importante nga hilikuton sa duta. Paagi sa ila pagbantala, ‘ginauyog [sang Dios] ang tanan nga pungsod’ paagi sa pagpatuman sang iya paghukom, subong sang gintagna sa Hageo 2:⁠7. Sa amo man nga tion, minilyon sang sumilimba nga ginlaragway subong “bilidhon nga mga butang sang tanan nga pungsod” ang nagatipon sa dutan-on nga mga luwang sang templo ni Jehova. Paano sila nakapasibu sa kahimusan ni Jehova sa pagsimba, kag anong himaya sa palaabuton ang mapaabot naton para sa iya dakung espirituwal nga templo? Ining mga pamangkot pagabinagbinagon sa masunod nga artikulo.

Ang Kadalag-an sang Matuod nga Pagsimba Malapit Na

“Si Jehova mangin hari sa bug-os nga duta.”​—⁠ZACARIAS 14:⁠9.

 1. Ano ang naeksperiensiahan sang hinaplas nga mga Cristiano sang panahon sang Inaway Kalibutanon I, kag paano ini gintagna?

SADTONG unang inaway kalibutanon, ang hinaplas nga mga Cristiano nag-antos sing madamong kabudlayan kag pagkabilanggo sa mga kamot sang nagainaway nga mga pungsod. Ang ila mga halad sang pagdayaw kay Jehova mapintas nga gindumilian, kag nahulog sila sa espirituwal nga kabihagan. Ining tanan gintagna sa Zacarias 14:​2, nga nagalaragway sa bug-os kalibutan nga pagsalakay sa Jerusalem. Ang siudad sa sining tagna amo ang “langitnon nga Jerusalem,” ang langitnon nga Ginharian sang Dios kag ang duog sang “trono sang Dios kag sang Kordero.” (Hebreo 12:​22, 28; 13:​14; Bugna 22:3) Ginatiglawas sang mga hinaplas sang Dios sa duta inang siudad. Nalampuwasan sang mga matutom sa ila ang pagsalakay, nagdumili nga matapok “palayo sa siudad.”⁠a

2, 3. (a) Paano nagmadinalag-on ang pagsimba kay Jehova kutob sang 1919? (b) Kutob sang 1935, anong mga hitabo ang nahanabo?

² Sang 1919 ang matutom nga mga hinaplas ginhilway gikan sa ila pagkabihag, kag gilayon nila nga ginhimuslan ang tion sang paghidait pagkatapos sang inaway. Subong mga embahador sang langitnon nga Jerusalem, ginhimuslan nila ang dakung kahigayunan sa pagbantala sing maayong balita sang Ginharian sang Dios kag sa pagbulig sa pagtipon sang katapusan nga mga katapo sang 144,000. (Mateo 24:​14; 2 Corinto 5:20) Sang 1931 ginbaton nila ang nagakaigo Makasulatanhon nga ngalan nga mga Saksi ni Jehova.​—⁠Isaias 43:​10, 12.

³ Kutob sadto, ang hinaplas nga mga Saksi nagpadayon sa pag-abante. Bisan si Hitler kag ang iya makinarya sa inaway wala makapahipos sa ila. Walay sapayan sang bug-os kalibutan nga paghingabot, ang ila hilikuton nagpamunga sa bug-os nga duta. Sang 1935 ilabi na, nagbuylog sa ila ang internasyonal nga “dakung kadam-an,” nga gintagna sa tulun-an sang Bugna. Sila man mga dedikado, bawtismado nga mga Cristiano kag ‘naglaba sang ila malaba nga mga panapton kag ginpaputi ini paagi sa dugo sang Kordero,’ si Jesucristo. (Bugna 7:​9, 14) Apang, indi sila mga hinaplas, nga may paglaum sa langitnon nga kabuhi. Ang ila paglaum amo ang pagpanubli sang nawasi nanday Adan kag Eva, nga amo, ang himpit tawhanon nga kabuhi sa isa ka paraiso nga duta. (Salmo 37:​29; Mateo 25:34) Sa karon, ang dakung kadam-an nagadamo sing kapin sa lima ka milyon. Ang matuod nga pagsimba kay Jehova nagamadinalag-on, apang ang katapusan nga kadalag-an sini magaabot pa.

Mga Dumuluong sa Espirituwal nga Templo sang Dios

4, 5. (a) Diin ginasimba sang dakung kadam-an si Jehova? (b) Anong mga pribilehiyo ang ila natigayon, kag sa katumanan sang anong tagna?

⁴ Subong sang gintagna, ang dakung kadam-an “nagasimba sa [Dios] sa adlaw kag gab-i sa iya templo.” (Bugna 7:​15, foot­note) Sanglit indi sila espirituwal, saserdotenhon nga mga Israelinhon, nakita sila ni Juan nga nagatindog sa templo sa naguwa nga luwang sang mga Gentil. (1 Pedro 2:5) Nangin mahimayaon gid ang espirituwal nga templo ni Jehova, ang iya mga luwang napuno sining dakung kadam-an nga, upod sa nagkalabilin sang espirituwal nga Israel, nagadayaw sa iya!

⁵ Ang dakung kadam-an wala nagaalagad sa Dios sa kahimtangan nga ginlaragway sang nasulod nga luwang sang mga saserdote. Wala sila ginapahayag nga matarong subong ginbaton, nga espirituwal nga mga anak sang Dios. (Roma 8:​1, 15) Apang, paagi sa pagtuo sa gawad ni Jesus, may matinlo sila nga tindog sa atubangan ni Jehova. Gindeklarar sila nga matarong upod sa katuyuan nga mangin iya mga abyan. (Ipaanggid ang Santiago 2:​21, 23.) Sila man may pribilehiyo sa paghalad sing kalahamut-an nga mga halad sa espirituwal nga halaran sang Dios. Busa, tuhoy sining dakung kadam-an, ang tagna sang Isaias 56:​6, 7 nakatigayon sing mahimayaon nga katumanan: “Ang mga dumuluong man nga nagbuylog kay Jehova sa pag-alagad sa iya kag sa paghigugma sa ngalan ni Jehova, . . . bisan sila dalhon ko sa akon balaan nga bukid kag lipayon sila sa akon balay sang pangamuyo. Ang ila mga halad nga sinunog kag ang ila mga halad batunon sa akon halaran. Kay ang akon balay tawgon nga balay nga palangamuyuan sang tanan nga katawhan.”

 6. (a) Anong sahi sang mga halad ang ginhalad sang mga dumuluong? (b) Ano ang ginapahanumdom sa ila sang batya sang tubig sa luwang sang mga saserdote?

⁶ Lakip sa mga halad nga ginahalad sining mga dumuluong amo “ang bunga sang mga bibig [kaangay sang ginhanda sing maayo nga mga halad nga kalan-on] nga nagatu-ad sang ngalan sang [Dios]” kag “ang paghimo sing maayo kag sa pagpaambit sang mga butang sa iban.” (Hebreo 13:​15, 16) Ang dakung batya sang tubig nga ginapanghinawan sang mga saserdote isa man ka importante nga pahanumdom sa sining mga dumuluong. Sila man dapat magpasakop sa espirituwal kag moral nga pagtinlo samtang ang Pulong sang Dios nagaathag sing progresibo sa ila.

Ang Balaan kag ang mga Galamiton sa Sini

 7. (a) Paano ginatamod sang dakung kadam-an ang mga pribilehiyo sang balaan nga pagkasaserdote? (b) Anong dugang nga mga pribilehiyo ang nabaton sang pila ka dumuluong?

⁷ May kahulugan bala ang Balaan kag ang mga galamiton sa sini para sa sining dakung kadam-an sang mga dumuluong? Ti, indi gid nila matigayon ang kahimtangan nga ginlaragway sang Balaan. Wala sila matawo liwat subong espirituwal nga mga anak sang Dios nga may langitnon nga banwahanon. Nagbatyag bala sila sing kahisa ukon sing pagkamahamkunon bangod sini? Wala. Sa baylo, nagkalipay sila sa ila pribilehiyo sa pagsakdag sa nagkalabilin sang 144,000, kag nagapakita sila sing hanuot nga pag-apresyar sa katuyuan sang Dios sa pagbaton sa sining espirituwal nga mga anak, nga magapakigbahin kay Cristo sa pagdala sa katawhan sa kahimpitan. Subong man, ginapakahamili sang dakung kadam-an sang mga dumuluong ang dakung dibagay nga kaluoy sang Dios sa paghatag sa ila sing dutan-on nga paglaum nga walay katapusan nga kabuhi sa Paraiso. Ang iban sining mga dumuluong, kaangay sadtong dumaan nga mga Netineo, ginhatagan sing mga pribilehiyo sang pagtatap sa pagbulig sa balaan nga pagkasaserdote.⁠b (Isaias 61:5) Gikan sa ila si Jesus nagtangdo sing “mga prinsipe sa bug-os nga duta.”​—⁠Salmo 45:⁠16.

8, 9. Anong mga benepisyo ang natigayon sang dakung kadam-an gikan sa pagbinagbinag sa mga galamiton sa Balaan?

⁸ Walay sapayan nga wala gid sila makasulod sa antitipiko nga Balaan, ang dakung kadam-an sang mga dumuluong nakatuon sing importante nga mga leksion gikan sa mga kagamitan sini. Subong nga ang kandelero nagakinahanglan sing dayon nga suplay sang lana, kinahanglan man sang mga dumuluong ang balaan nga espiritu sa pagbulig sa ila nga mahangpan ang progresibo nga mga kamatuoran gikan sa Pulong sang Dios, nga ginhatag paagi sa “matutom kag mainandamon nga ulipon.” (Mateo 24:​45-47) Dugang pa, ginabuligan sila sang espiritu sang Dios sa pagsabat sa sining pangagda: “Ang espiritu kag ang nobya [ang hinaplas nga nagkalabilin] padayon nga nagasiling: ‘Kari!’ Kag ang tanan nga nagapamati magsiling: ‘Kari!’ Kag ang tanan nga ginauhaw magkari; ang tanan nga buot magkuha sang tubig sang kabuhi sa walay bayad.” (Bugna 22:17) Busa, ang kandelero isa ka pahanumdom sa dakung kadam-an sang ila obligasyon sa pagsiga subong mga Cristiano kag likawan ang bisan anong panimuot, panghunahuna, tinaga, ukon buhat nga makapasubo sa balaan nga espiritu sang Dios.​—⁠Efeso 4:⁠30.

⁹ Ang latok sang tinapay sang pagpahayag nagapahanumdom sa dakung kadam-an nga agod makapabilin nga mapagros sa espirituwal, dapat sila magkaon sing regular sang espirituwal nga pagkaon gikan sa Biblia kag sa mga publikasyon sang “matutom kag mainandamon nga ulipon.” (Mateo 4:4) Ang halaran sang incienso nagapahanumdom sa ila sang importansia sang hanuot nga pagpangamuyo sang bulig ni Jehova agod mahuptan ang ila integridad. (Lucas 21:36) Ang ila mga pangamuyo dapat maglakip sing tinagipusuon nga mga ekspresyon sang pagdayaw kag pagpasalamat. (Salmo 106:1) Ang halaran sang incienso nagapahanumdom man sa ila sang kinahanglanon nga dayawon si Jehova sa iban pa nga paagi, subong sang ila tinagipusuon nga pag-amba sang mga ambahanon sang Ginharian sa Cristianong mga miting kag paagi sa ila paghanda sing maayo sa paghimo sing epektibo “publiko nga pagpahayag sang kaluwasan.”​—⁠Roma 10:⁠10.

Ang Bug-os nga Kadalag-an sang Matuod nga Pagsimba

10. (a) Anong dakung paglaum ang sarang naton mapaabot? (b) Anong mga hitabo ang dapat anay nga mahanabo?

¹⁰ Sa karon “madamo nga tawo” gikan sa tanan nga kapungsuran ang nagadugok sa balay sang pagsimba ni Jehova. (Isaias 2:​2, 3) Nagapamatuod sini, ang Bugna 15:​4 nagasiling: “Sin-o bala ang indi mahadlok sa imo, Jehova, kag maghimaya sang imo ngalan, kay ikaw lamang ang balaan? Kay ang tanan nga pungsod magakari kag magasimba sa imo, kay ang imo paghukom napahayag.” Ginalaragway sang Zacarias kapitulo 14 ang masunod. Sa indi madugay, ang malain nga panimuot sang kalabanan nga tawo sa duta matapos samtang nagatipon sila sa katapusan nga tion agod makig-away batok sa Jerusalem​—⁠ang dutan-on nga tiglawas sang langitnon nga Jerusalem. Nian magahulag si Jehova. Subong Hangaway nga Dios, “magapakig-away [sia] batok sa mga pungsod” nga nangahas sa pagsalakay.​—⁠Zacarias 14:​2, 3.

11, 12. (a) Paano magahulag si Jehova sa palaabuton nga bug-os globo nga pagsalakay sa mga sumilimba sa iya templo? (b) Ano ang mangin resulta sang inaway sang Dios?

¹¹ “Mangin amo sini ang kalalat-an nga pahanabuon ni Jehova sa tanan nga katawhan nga magasalakay sa Jerusalem: Ang ila unod mahagas, samtang nagatindog sila; ang ila mga mata mahagas sa ila mga buho, kag ang ila mga dila mahagas sa ila mga baba. Kag sa sadtong adlaw ang dakung kagahod gikan kay Jehova mangin sa tunga nila; kag magakapyot ang tagsatagsa sa kamot sang iya isigkatawo, kag ang iya kamot magabayaw batok sa kamot sang iya isigkatawo.”​—⁠Zacarias 14:​12, 13.

¹² Mangin literal man ukon malaragwayon ining kalalat-an, dapat kita magbantay. Apang, isa ka butang ang pat-od. Samtang nagahulag ang mga kaaway sang Dios sa paghimo sang ila bug-os globo nga pagsalakay sa mga alagad ni Jehova, pagapunggan sila sang dikinaandan nga pagpasundayag sang labing gamhanan nga kusog sang Dios. Ang ila mga baba magahipos. Subong bala nga ang ila matinamayon nga mga dila nagkalahagas. Ang ila nahiusa nga tulumuron magaburon sa ila panulok, subong bala nga ang ila mga mata nagkalahagas. Ang ila pisikal nga kusog, nga nagpahulag sa ila sa pagsalakay, mangin wala sing pulos. Sa kagumon, magaliso sila sa isa kag isa nga may daku nga pagpinatyanay. Sa amo ang tanan nga dutan-on nga kaaway sang pagsimba sa Dios madula. Sa katapusan, ang tanan nga kapungsuran mapilitan sa pagkilala sa bug-os uniberso nga pagkasoberano ni Jehova. Ang tagna matuman: “Si Jehova magahari sa bug-os nga duta.” (Zacarias 14:9) Pagkatapos, si Satanas kag ang iya mga demonyo pagagapuson sa pagsugod sang Isa ka Libo ka Tuig nga Paggahom ni Cristo upod ang dakung mga pagpakamaayo nga natigana para sa katawhan.​—⁠Bugna 20:​1, 2; 21:​3, 4.

Ang Dutan-on nga Pagkabanhaw

13. Sin-o ang mga “nabilin gikan sa tanan nga kapungsuran”?

¹³ Ang tagna ni Zacarias nagapadayon sa kapitulo 14, bersikulo 16: “Mahanabo nga, ang tagsa nga nabilin sang tanan nga kapungsuran nga nagaabot batok sa Jerusalem, magataklad man tuigtuig sa pagyaub sa Hari, si Jehova sang mga kasuldadusan, kag sa paghiwat sang piesta sang mga payagpayag.” Suno sa Biblia, ang tanan nga tawo nga nagakabuhi karon nga magapabilin nga buhi sa katapusan sining malauton nga sistema kag ginhukman subong kaaway sang matuod nga pagsimba magaagom sing “hudisyal nga silot nga walay katapusan nga kalaglagan.” (2 Tesalonica 1:​7-9; tan-awa man ang Mateo 25:​31-33, 46.) Indi sila pagbanhawon. Sing kaanggid, nian, ang mga “mabilin” magalakip sa mga katapo sang mga pungsod nga napatay antes ang katapusan nga inaway sang Dios kag may pasad sa Biblia nga paglaum sang pagkabanhaw. “Ang takna magaabot,” saad ni Jesus, “nga ang tanan sa handumanan nga lulubngan makabati sang iya tingog kag magaguwa, yadtong naghimo sing maayo sa pagkabanhaw sa kabuhi, kag yadtong naghimo sing malaut sa pagkabanhaw sa paghukom.”​—⁠Juan 5:​28, 29.

14. (a) Ano ang dapat himuon sang mga ginbanhaw agod matigayon ang walay katapusan nga kabuhi? (b) Ano ang matabo sa kay bisan sin-o nga magadumili sa pagdedikar sang ila kaugalingon kay Jehova kag sa pagbuhat sang matuod nga pagsimba?

¹⁴ Ining tanan nga mga ginbanhaw dapat maninguha agod ang ila pagkabanhaw mangin sa kabuhi kag indi sa masakit nga paghukom. Dapat sila magkari sa dutan-on nga luwang sang templo ni Jehova kag magyaub sa pagdedikar sa Dios paagi kay Jesucristo. Ang bisan sin-ong ginbanhaw nga magadumili sa paghimo sining kabubut-on magaantos sing kaanggid nga kalalat-an nga mahanabo sa karon nga mga pungsod. (Zacarias 14:18) May nakahibalo bala kon pila ang mabanhaw nga magabuylog sing malipayon sa dakung kadam-an sa pagsaulog sang antitipiko nga Piesta sang mga Payagpayag? Walay duhaduha, may madamo, kag subong resulta ang dakung espirituwal nga templo ni Jehova mangin labi ka mahimayaon!

Ang Antitipiko nga Piesta sang mga Payagpayag

15. (a) Ano ang pila ka talulupangdon nga bahin sang Piesta sang mga Payagpayag sang dumaan nga mga Israelinhon? (b) Ngaa 70 ka baka ang ginhalad sa tion sang piesta?

¹⁵ Kada tuig, ang dumaan nga Israel ginsugo sa pagsaulog sang Piesta sang mga Payagpayag. Nagalawig ini sing isa ka semana kag ginahiwat sa hingapusan sang pagtipon sang ila ani. Isa anay ini ka makalilipay nga tion sang pagpasalamat. Sa sulod sang isa ka semana, nagapuyo sila sa temporaryo nga mga payagpayag nga naatupan sing mga dahon sang kahoy, ilabi na sang mga paklang sang palma. Ini nga piesta nagapahanumdom sa Israel kon paano ginluwas sang Dios ang ila mga ginikanan paguwa sa Egipto kag kon paano niya sila gin-atipan sang nagpuyo sila sa mga payagpayag samtang nagapanglakatan sing mga 40 ka tuig sa kahanayakan tubtob nga nakalab-ot sila sa Ginsaad nga Duta. (Levitico 23:​39-43) Sa tion sang piesta, 70 ka baka ang ginahalad sa halaran sang templo. Suno sa pamatuod, ining bahin sang piesta nagtagna sa himpit kag bug-os nagaluwas-kabuhi nga hilikuton nga ginhimo ni Jesucristo. Ang mga benepisyo sang iya halad nga gawad magalab-ot sa ulihi sa dimaisip nga kaliwatan sang 70 ka pamilya sang katawhan nga naghalin kay Noe.​—⁠Genesis 10:​1-29; Numeros 29:​12-34; Mateo 20:⁠28.

16, 17. (a) San-o nagsugod ang antitipiko nga Piesta sang mga Payagpayag, kag paano ini nagpadayon? (b) Paano ang dakung kadam-an nakigbahin sa pagsaulog?

¹⁶ Sa amo ang dumaan nga Piesta sang mga Payagpayag nagatudlo sa malipayon nga pagtilipon sang gintubos nga mga makasasala pasulod sa dakung espirituwal nga templo ni Jehova. Ang katumanan sining piesta nagsugod sang Pentecostes 33 C.E. sang magsugod ang malipayon nga pagtipon sa espirituwal nga mga Israelinhon pasulod sa Cristianong kongregasyon. (Binuhatan 2:​41, 46, 47) Nahangpan sining mga hinaplas nga sila “temporaryo nga mga pumuluyo” sa kalibutan ni Satanas bangod ang ila matuod nga “pagkabanwahanon didto sa mga langit.” (1 Pedro 2:​11; Filipos 3:20) Ang malipayon nga piesta gindulman sing makadali sang apostasya nga nagresulta sa pagkahuman sang Cristiandad. (2 Tesalonica 2:​1-3) Apang, ang piesta liwat napasag-uli sang 1919 upod ang malipayon nga pagtipon sa ­nabilin nga mga katapo sang 144,000 ka espirituwal nga Israelinhon, nga ginsundan sang pagtipon sang internasyonal nga dakung kadam-an sang Bugna 7:⁠9.

¹⁷ Ang dakung kadam-an ginlaragway nga may mga paklang sang palma sa ila mga kamot, nga nagapakita nga sila man malipayon nga mga manugsaulog sang antitipiko nga Piesta sang mga Payagpayag. Subong dedikado nga mga Cristiano, malipayon sila nga nagapakigbahin sa hilikuton sang pagtipon sa dugang pa nga mga sumilimba pasulod sa templo ni Jehova. Dugang pa, subong mga makasasala, nahangpan nila nga wala sila sing dayon nga kinamatarong sa pagpuyo sa duta. Sila, upod sa mga pagabanhawon pa, dapat magtuo sing padayon sa halad-gawad ni Cristo tubtob nga matigayon nila ang tawhanon nga pagkahimpit sa hingapusan sang Isa ka Libo ka Tuig nga Paggahom ni Cristo.​—⁠Bugna 20:⁠5.

18. (a) Ano ang matabo sa katapusan sang Isa ka Libo ka Tuig nga Paggahom ni Jesucristo? (b) Paano ang matuod nga pagsimba ni Jehova magamadinalag-on sa ulihi?

¹⁸ Nian, ang mga sumilimba sang Dios sa duta magatindog sa atubangan niya subong himpit nga mga tawo nga wala nagakinahanglan sing langitnon nga pagkasaserdote. Ang tion magaabot nga si Jesucristo “magatugyan sang ginharian sa iya Dios kag Amay.” (1 Corinto 15:24) Pagabuhian “sing makadali” si Satanas agod tilawan ang nahimpit nga katawhan. Ang bisan sin-ong dimatutom pagalaglagon sing dayon, upod kay Satanas kag sang iya mga demonyo. Yadtong magapabilin nga matutom pagahatagan sing kabuhi nga walay katapusan. Mangin permanente sila nga mga pumuluyo sa dutan-on nga Paraiso. Busa ang antitipiko nga Piesta sang mga Payagpayag magadangat sa mahimayaon, madinalag-on nga katapusan. Ang matuod nga pagsimba magamadinalag-on sa dayon nga himaya ni Jehova kag sa dayon nga kalipay sang katawhan.​—⁠Bugna 20:​3, 7-10, 14, 15.