Mangin Malapit sa Dios Paagi sa Pangamuyo

1, 2. (a) Ngaa dapat naton kabigon nga isa ka daku nga pribilehiyo ang pangamuyo? (b) Ngaa dapat naton mabal-an ang ginatudlo sang Biblia parte sa pangamuyo?

KON ikumparar sa malapad nga uniberso, kagamay gid sang duta. Ang matuod, para kay Jehova, “ang Isa nga naghimo sang langit kag duta,” ang mga pungsod sang katawhan pareho lang sa isa ka tulo sang tubig sa balde. (Salmo 115:15; Isaias 40:15) Pero, ang Biblia nagasiling: “Si Jehova malapit sa tanan nga nagapanawag sa iya, sa tanan nga nagapanawag sa iya sa kamatuoran. Ginahatag niya ang handum sang mga nagakahadlok sa iya; ginapamatian niya ang ila pagpangayo sing bulig.” (Salmo 145:18, 19) Hunahunaa ang buot silingon sini! Ang labing gamhanan nga Manunuga malapit sa aton kag pamatian niya kita kon ‘magpanawag kita sa iya sa kamatuoran.’ Pribilehiyo gid naton nga makapalapit sa Dios paagi sa pangamuyo!

² Pero, kon gusto naton nga pamatian ni Jehova ang aton pangamuyo, dapat nga mangamuyo kita sa iya sa paagi nga ginabaton niya. Pero paano naton ini mahimo kon wala kita makaintiende sang ginatudlo sang Biblia parte sa pangamuyo? Importante gid nga mabal-an naton ang ginasiling sang Biblia parte sa sini, kay ang pangamuyo nagabulig sa aton nga mangin malapit pa gid kay Jehova.

 3. Ano ang isa ka importante nga rason kon ngaa dapat kita mangamuyo kay Jehova?

³ Ang isa ka importante nga rason kon ngaa dapat kita mangamuyo kay Jehova amo nga sia mismo ang nagaagda sa aton nga himuon ini. Ang iya Pulong nagasiling sa aton: “Indi kamo magkabalaka sa bisan ano nga butang, kundi sa tanan nga butang paagi sa pangamuyo kag pag-ampo nga may pagpasalamat, ipahibalo sa Dios ang inyo mga pangabay; kag ang paghidait sang Dios nga labaw sa tanan nga paghangop magabantay sang inyo tagipusuon kag ikasarang sa paghunahuna paagi kay Cristo Jesus.” (Filipos 4:6, 7) Sigurado nga indi gid naton gusto nga balewalaon ining mapinalanggaon nga pangagda sa aton sang Supremo nga Manuggahom sang uniberso!

 4. Paano ginapabakod sang regular nga pangamuyo kay Jehova ang aton relasyon sa iya?

⁴ May isa pa ka rason kon ngaa dapat mangamuyo kay Jehova. Ang regular nga pagpangamuyo isa ka paagi para magbakod ang aton relasyon sa iya. Ang matuod nga mag-abyan wala lang nagaistoryahanay kon may kinahanglan sila. Kundi, interesado gid sila sa isa kag isa, kag ang ila pag-abyanay nagabakod samtang nagasugiray sila sang ila ginapensar, ginakabalak-an, kag ginabatyag. Daw amo man sini ang aton relasyon kay Jehova nga Dios. Sa bulig sini nga libro, madamo ka na sing natun-an sa Biblia parte kay Jehova, sa iya personalidad, kag sa iya mga katuyuan. Nakilala mo na sia bilang matuod nga Persona. Paagi sa pangamuyo, may kahigayunan ka nga isugid sa imo Amay sa langit ang imo ginapensar kag ginabatyag. Samtang ginahimo mo ini, mangin malapit ka pa gid kay Jehova.—Santiago 4:8.

 5. Ano ang ginasiling sang Biblia nga nagapakita nga may mga pangamuyo nga wala ginapamatian ni Jehova?

⁵ Ginapamatian bala ni Jehova ang tanan nga pangamuyo? Hunahunaa ang iya ginsiling sa rebelde nga mga Israelinhon sang panahon ni propeta Isaias: “Bisan ano kadamo ang inyo pangamuyo, indi ako magpamati; ang inyo mga kamot puno sing dugo.” (Isaias 1:15) Ginapakita sini nga may mga buhat nga mahimo mangin rason nga indi pagpamatian sang Dios ang aton pangamuyo. Gani para pamatian kita sang Dios, may kinahanglan kita himuon.

 6. Para pamatian sang Dios ang aton pangamuyo, ano ang una nga kinahanglan, kag paano naton ini mapakita?

⁶ Una, kinahanglan nga may pagtuo kita. (Basaha ang Marcos 11:24.) Si apostol Pablo nagsulat: “Kon wala sing pagtuo imposible nga mapahamut-an ang Dios, kay ang nagapalapit sa Dios dapat magpati nga nagaluntad sia kag nagapadya sa mga hanuot nga nagapangita sa iya.” (Hebreo 11:6) Ang isa nga may matuod nga pagtuo nagapati nga nagaluntad ang Dios. Nagapati man sia nga ginapamatian kag ginasabat sang Dios ang mga pangamuyo. Pero indi lang ini. Ang pagtuo makita man sa aton mga buhat. Dapat nga makita gid sa paagi sang aton pagkabuhi kada adlaw nga may pagtuo kita.—Santiago 2:26.

 7. (a) Ngaa dapat kita mangin matinahuron kon nagaistorya kay Jehova? (b) Kon nagapangamuyo sa Dios, paano naton mapakita nga nagapaubos kita kag sinsero?

⁷ Ginapatuman man ni Jehova nga dapat magpaubos kag sinsero ang mga nagapangamuyo sa iya. Indi bala nga dapat gid kita magpaubos kon mag-istorya kay Jehova? Kon ang mga tawo makig-istorya sa hari ukon presidente, masami nga matinahuron gid sila ukon may respeto, kay ginakilala nila ang mataas nga posisyon sini nga mga manuggahom. Mas kinahanglan naton nga mangin matinahuron kon nagaistorya kay Jehova! (Salmo 138:6) Kay man, sia ang “Dios nga Labing Gamhanan.” (Genesis 17:1) Ang aton paagi sang pagpalapit sa iya sa pangamuyo dapat nagapakita nga nabal-an naton nga gamay kita katama kon ikumparar sa iya. Ini nga pagpaubos magabulig sa aton nga magpangamuyo sing sinsero, nga ginalikawan ang ordinaryo kag sulitsulit nga mga pangamuyo.—Mateo 6:7, 8.

 8. Para ang aton ginahimo nagasantu sa aton pangamuyo, ano ang himuon naton?

⁸ May isa pa nga kinahanglan para pamatian kita sang Dios. Dapat nga ang aton ginahimo nagasantu sa aton pangamuyo. Ginapaabot ni Jehova nga himuon gid naton ang aton ginapangamuyo asta sa masarangan naton. Halimbawa, kon nagapangamuyo kita sing, “Hatagi kami sang amon pagkaon para sa sini nga adlaw,” dapat kita magpangabudlay sa bisan ano nga trabaho nga masarangan naton. (Mateo 6:11; 2 Tesalonica 3:10) Kon nagapangamuyo kita nga buligan kita nga madaug ang aton kaluyahon, dapat naton likawan ang mga sitwasyon nga mahimo magtentar sa aton. (Colosas 3:5) Luwas sining importante nga mga butang, may mga pamangkot pa parte sa pangamuyo nga dapat masabat.

 9. Kay sin-o kita dapat mangamuyo, kag paagi kay sin-o?

⁹ Kay sin-o kita dapat mangamuyo? Gintudluan ni Jesus ang iya mga sumulunod nga mangamuyo sa ‘Amay naton nga yara sa langit.’ (Mateo 6:9) Gani, dapat kay Jehova nga Dios lang kita mangamuyo. Pero, ginapatuman ni Jehova nga kilalahon naton ang posisyon sang iya bugtong nga Anak nga si Jesucristo. Pareho sang natun-an naton sa Kapitulo 5, ginpadala si Jesus sa duta bilang gawad para matubos kita sa sala kag kamatayon. (Juan 3:16; Roma 5:12) Sia ang ginhatagan sing awtoridad nga mangin Mataas nga Saserdote kag Hukom. (Juan 5:22; Hebreo 6:20) Gani ginasugo kita sang Biblia nga mangamuyo paagi kay Jesus. Sia mismo nagsiling: “Ako amo ang dalan kag ang kamatuoran kag ang kabuhi. Wala sing makakadto sa Amay kon indi paagi sa akon.” (Juan 14:6) Para pamatian ang aton pangamuyo, dapat kay Jehova lang kita mangamuyo paagi sa iya Anak.

10. Kon nagapangamuyo, ngaa wala sing ginapatuman nga eksakto gid nga posisyon?

¹⁰ May eksakto gid bala nga posisyon nga dapat himuon kon nagapangamuyo? Wala. Si Jehova wala sing ginapatuman nga eksakto gid nga posisyon, sang kamot man ukon sang bilog nga lawas. Ginatudlo sang Biblia nga makapangamuyo kita bisan ano man ang aton posisyon. Puede nga nagapungko, nagaduko, nagaluhod, kag nagatindog. (1 Cronica 17:16; Nehemias 8:6; Daniel 6:10; Marcos 11:25) Kon ang isa mangamuyo, indi importante kon ano ang iya posisyon nga mahimo makita sang iban, kundi kon bala sinsero gid sia. Bisan sa aton adlaw-adlaw nga mga hilikuton ukon kon may mga emerhensia, makapangamuyo kita sing mahipos bisan diin man kita. Ginapamatian ni Jehova ini nga mga pangamuyo, bisan pa halos wala ini natalupangdan sang iban.—Nehemias 2:1-6.

11. Ano ang pila ka butang nga puede naton ipangamuyo?

¹¹ Ano ang puede naton ipangamuyo? Ang Biblia nagapaathag: “Bisan ano ang ipangamuyo naton suno sa iya kabubut-on, magapamati [si Jehova] sa aton.” (1 Juan 5:14) Gani puede naton ipangamuyo ang bisan ano nga suno sa kabubut-on sang Dios. Suno bala sa iya kabubut-on nga ipangamuyo naton ang aton mga problema? Huo! Ang pagpangamuyo kay Jehova pareho gid sa pag-istorya sa imo malapit nga abyan. Masugid naton ang tanan sa Dios kag ‘mapautwas sa iya ang aton ginabatyag.’ (Salmo 62:8) Dapat kita mangayo sang iya balaan nga espiritu, kay makabulig ini para mahimo naton ang eksakto. (Lucas 11:13) Makapangabay man kita sing giya sa paghimo sing eksakto nga mga desisyon kag sing kusog sa pag-atubang sa mga problema. (Santiago 1:5) Kon makasala kita, dapat kita mangayo sing patawad base sa halad sang Cristo. (Efeso 1:3, 7) Siempre, ang aton ipangamuyo indi lang para sa aton kaugalingon. Dapat man naton ipangamuyo ang iban—ang mga miembro sang aton pamilya kag ang pareho naton nga mga sumilimba.—Binuhatan 12:5; Colosas 4:12.

12. Paano naton mapakita nga ginauna naton ang aton Amay sa langit kon nagapangamuyo kita?

¹² Ang mga butang nga parte kay Jehova nga Dios amo dapat ang unahon sa aton pangamuyo. Dapat naton ihambal sa iya nga ginadayaw gid naton kag ginapasalamatan ang iya kaayo. (1 Cronica 29:10-13) Ginhatag ni Jesus ang modelo nga pangamuyo nga nasulat sa Mateo 6:9-13, diin gintudluan niya kita nga ipangamuyo ang pagpakabalaan sa ngalan sang Dios, nga buot silingon, kabigon naton ini nga sagrado, ukon balaan. (Basaha.) Ang masunod nga ginsambit amo ang pagkari sang Ginharian sang Dios kag ang pagtuman sang iya kabubut-on sa duta subong sang sa langit. Ginhambal lang ni Jesus ang parte sa personal nga mga butang sang nahambal na niya ang importante nga mga butang parte kay Jehova. Kon unahon man naton ang Dios sa aton pangamuyo, mapakita naton nga indi lang ang aton kaugalingon ang aton ginapensar.

13. Sa Biblia, ano ang matun-an naton parte sa kalawigon sang pangamuyo nga ginapamatian sang Dios?

¹³ Daw ano dapat kalawig ang aton pangamuyo? Sa Biblia, wala sing limitasyon kon daw ano dapat kalawig ang pribado ukon publiko nga pangamuyo. Puede nga malip-ot lang ini antes magkaon, ukon malawig kon nagapangamuyo sing pribado diin ginasugid naton kay Jehova ang tanan naton nga ginabatyag. (1 Samuel 1:12, 15) Pero, ginhukman ni Jesus ang mga nagakabig sa ila kaugalingon nga matarong paagi sa ila malawig kag pakitakita nga pangamuyo. (Lucas 20:46, 47) Wala nalipay si Jehova sa sini nga klase sang pangamuyo. Ang importante, mangamuyo kita halin sa aton tagipusuon. Gani, ang kalawigon sang pangamuyo nga ginapamatian sang Dios nagadepende sa ginakinahanglan kag sitwasyon.

14. Ano ang buot silingon sang ginsiling sang Biblia nga ‘magpadayon sa pagpangamuyo,’ kag ngaa makalilipay ini?

¹⁴ Kada san-o kita dapat mangamuyo? Ginasilingan kita sang Biblia nga ‘magpadayon sa pagpangamuyo.’ (Roma 12:12; 1 Tesalonica 5:17) Siempre, indi buot silingon sini nga mangamuyo kita kay Jehova sa tanan gid nga tion. Kundi, ginasilingan kita sang Biblia nga regular nga mangamuyo, pasalamatan ang kaayo ni Jehova, kag mangabay nga giyahan kita, paumpawan, kag hatagan sing kusog. Indi bala makalilipay gid kay wala nagalimite si Jehova kon daw ano kalawig ukon kon kada san-o kita makapangamuyo sa iya? Kon ginaapresyar gid naton ini nga pribilehiyo, mangamuyo gid kita pirme sa aton Amay sa langit.

15. Kon matapos ang personal ukon publiko nga mga pangamuyo, ngaa dapat kita maghambal sing “Amen”?

¹⁵ Ngaa dapat kita maghambal sing “Amen” kon matapos ang pangamuyo? Ang “amen” nagakahulugan sing “pat-od gid,” ukon “kabay pa.” Ginapakita sang mga halimbawa sa Biblia nga dapat gid kita maghambal sing “Amen” sa katapusan sang personal ukon publiko nga mga pangamuyo. (1 Cronica 16:36; Salmo 41:13) Paagi sa pagsiling sing “Amen” kon matapos ang aton pangamuyo, ginapakita naton nga sinsero kita sa aton ginpangamuyo. Kon magsiling kita sing “Amen”—mabatian man ukon indi—pagkatapos sang publiko nga pangamuyo, ginapakita naton nga ugyon kita sa ginpangamuyo.—1 Corinto 14:16.

16. Kon parte sa pangamuyo, ano ang masaligan gid naton?

¹⁶ Ginasabat gid bala ni Jehova ang mga pangamuyo? Huo! May mabakod kita nga basihan sa pagsalig nga ginasabat sang “Manugpamati sang pangamuyo” ang sinsero nga mga pangamuyo sang madamo gid nga tawo. (Salmo 65:2) Mahimo nga sarisari ang paagi ni Jehova sa pagsabat sa aton pangamuyo.

17. Ngaa makasiling kita nga ginagamit sang Dios ang mga anghel kag ang iya mga alagad sa duta sa pagsabat sa aton mga pangamuyo?

¹⁷ Ginagamit ni Jehova ang iya mga anghel kag ang iya mga alagad sa duta sa pagsabat sa mga pangamuyo. (Hebreo 1:13, 14) Madamo na ang nagsugid sang ila mga inagihan parte sa pagpangayo nila sing bulig sa Dios para maintiendihan ang Biblia, kag wala madugay, may nagkadto sa ila nga isa sa mga alagad ni Jehova. Mga ebidensia ini nga ginagiyahan sang mga anghel ang pagwali sang Ginharian. (Bugna 14:6) Bilang sabat sa aton pangamuyo kon may problema kita, mahimo pahulagon ni Jehova ang isa ka Cristiano nga magbulig sa aton.—Hulubaton 12:25; Santiago 2:16.

18. Sa pagsabat sa mga pangamuyo sang iya mga alagad, paano ginagamit ni Jehova ang iya balaan nga espiritu kag ang Biblia?

¹⁸ Ginagamit man ni Jehova nga Dios ang iya balaan nga espiritu kag ang iya Pulong, ang Biblia, sa pagsabat sa mga pangamuyo sang iya mga alagad. Mahimo niya sabton ang aton pangamuyo nga buligan kita sa aton mga kabudlayan. Puede niya kita hatagan sing giya kag kusog paagi sa iya balaan nga espiritu. (2 Corinto 4:7) Pirme ginasabat ni Jehova paagi sa Biblia ang aton pangamuyo nga giyahan kita, kay ang Biblia nagabulig sa aton nga maghimo sing eksakto nga mga desisyon. Samtang nagatuon kita sang Biblia kag nagabasa sang mga balasahon nga base sa Biblia pareho sini nga libro, mahimo may makita kita nga mga bersikulo nga makabulig sa aton. Paagi sa pagtilipon sang mga Cristiano ukon paagi sa ginsiling sang isa ka nagakabalaka nga gulang sa kongregasyon, mahimo may makuha man kita nga mga punto sa Biblia nga dapat naton hunahunaon.—Galacia 6:1.

19. Kon daw kadugay sang sabat sa aton mga pangamuyo, ano ang dapat naton dumdumon?

¹⁹ Kon daw kadugay sang sabat ni Jehova sa aton mga pangamuyo, buot bala silingon, wala sia sing ikasarang sa pagsabat sini? Indi gid. Dapat naton dumdumon nga kon kabubut-on ni Jehova ang aton ginapangamuyo, sabton gid niya ini, kag kabalo sia sang eksakto nga tion. Mas nabal-an niya ang kinahanglan naton kag ginahatag niya ini sa mas maayo nga paagi. Pirme niya kita ginahatagan sing kahigayunan nga ‘magpadayon sa pagpangayo, pagpangita, kag pagpanuktok.’ (Lucas 11:5-10) Ginapakita sini nga gusto gid naton ang aton ginapangayo kag matuod gid ang aton pagtuo. Kon kaisa, ang sabat ni Jehova sa aton pangamuyo indi naton matalupangdan. Halimbawa, ginasabat niya ang aton pangamuyo parte sa isa ka problema, indi paagi sa pagdula sang problema, kundi paagi sa paghatag sa aton sing kusog para makabatas.—Basaha ang Filipos 4:13.

20. Ngaa dapat naton gamiton sing maayo ang hamili nga pribilehiyo nga makapangamuyo?

²⁰ Nagapasalamat gid kita kay ang Manunuga sining malapad katama nga uniberso malapit lang sa tanan nga nagapangamuyo sa iya sa eksakto nga paagi! (Basaha ang Salmo 145:18.) Kabay pa nga gamiton naton sing maayo ining hamili nga pribilehiyo nga makapangamuyo. Kon himuon naton ini, may makalilipay kita nga kahigayunan nga mangin malapit pa gid kay Jehova, ang Manugpamati sang pangamuyo.