“Wala sing Isa nga May Gugma nga Daku Pa sa Sini”

1-4. (a) Ano ang natabo sang ginpresentar ni Pilato si Jesus sa akig nga mga tawo nga nagtipon sa gua sang palasyo sang gobernador? (b) Ano ang ginhimo ni Jesus sang ginpakahuy-an sia kag nag-antos, kag ano nga importante nga mga pamangkot ang ginapautwas sini?

“TAN-AWA! Ang tawo!” Paagi sa sini nga mga pulong, ginpresentar ni Poncio Pilato, nga gobernador sang Roma, si Jesucristo sa akig nga mga tawo nga nagtipon sa gua sang palasyo sang gobernador sang pamanagbanag sang Paskua sang 33 C.E. (Juan 19:5) Pila pa lang ka adlaw antes sini, gin-abiabi si Jesus sang mga tawo sang nagsulod sia sa Jerusalem subong ang Hari nga gintangdo sang Dios. Apang, karon nga gab-i, wala na sia ginakabig nga Hari sang akig nga mga tawo.

² Ang kunop ni Jesus purpura kaangay sang ginasuksok sang hari, kag may korona sia sa iya ulo. Apang ang kunop nga nagatabon sang iya pilason nga likod bangod sang mga lapdos, kag ang korona nga tunukon sa iya duguon nga ulo, isa ka pagyaguta sa iya pagkahari. Ginsikway sang mga tawo, nga ginsugyot sang puno nga mga saserdote, ang ginkastigo nga si Jesus nga nagatindog sa atubangan nila. Nagsinggit ang mga saserdote: “Ilansang sia sa usok! Ilansang sia sa usok!” Luyag nila nga patyon si Jesus, gani nagsininggit ang mga tawo: “Dapat sia mapatay.”​—Juan 19:1-7.

³ Maisugon kag may dignidad nga ginbatas ni Jesus ang pagpakahuya kag pagpaantos nga wala nagareklamo.a Handa sia nga mapatay. Sang ulihi pa sadto nga Adlaw sang Paskua, kinabubut-on nga ginbaton niya ang masakit nga kamatayon sa isa ka usok sang pag-antos.​—Juan 19:17, 18, 30.

⁴ Paagi sa paghatag sang iya kabuhi, ginpamatud-an ni Jesus nga isa sia ka matuod nga abyan sang iya mga sumulunod. “Wala sing isa nga may gugma nga daku pa sa sini,” siling niya, “nga ihatag sang isa ang iya kalag para sa iya mga abyan.” (Juan 15:13) Nagapautwas ini sing pila ka importante nga mga pamangkot. Kinahanglan gid bala nga antuson ina tanan ni Jesus kag pagkatapos mapatay? Ngaa handa sia nga himuon ina? Subong “iya mga abyan” kag mga sumulunod, paano naton mailog ang iya halimbawa?

 5. Paano nahibaluan ni Jesus ang espesipiko nga mga pagtilaw nga mahanabo sa iya?

⁵ Subong ang ginsaad nga Mesias, nahibaluan ni Jesus kon ano ang matabo sa iya. Nahibaluan niya ang madamo nga tagna sa Hebreo nga Kasulatan nga detalyado nga nagtagna sang pag-antos kag kamatayon sang Mesias. (Isaias 53:3-7, 12; Daniel 9:26) Indi lang makaisa nga ginhanda niya ang iya mga disipulo para sa mga pagtilaw nga atubangon niya. (Marcos 8:31; 9:31) Sang nagapakadto sa Jerusalem para sa iya hingapusan nga Paskua, ginsugiran gid niya ang iya mga apostoles: “Ang Anak sang tawo itugyan sa puno nga mga saserdote kag mga escriba, kag pamatbatan nila sia sing kamatayon kag itugyan sia sa mga tawo sang mga pungsod, kag uligyaton nila sia kag duplaan kag lapdusan kag patyon.” (Marcos 10:33, 34) Amo gid sini ang natabo. Subong sang nabinagbinag na naton, matuod gid nga si Jesus gin-uligyat, ginduplaan, ginlapdusan kag ginpatay.

 6. Ngaa kinahanglan nga mag-antos kag mapatay si Jesus?

⁶ Apang, ngaa kinahanglan nga mag-antos kag mapatay si Jesus? Bangod sa pila ka importante gid nga mga rason. Una, paagi sa pagpabilin nga matutom, mapamatud-an ni Jesus ang iya integridad kag masakdag ang pagkasoberano ni Jehova. Dumduma nga si Satanas binutig nga nagsiling nga ang mga tawo nagaalagad sa Dios bangod lamang sa makagod nga rason. (Job 2:1-5) Paagi sa pagpabilin nga matutom “tubtob sa kamatayon . . . sa usok sang pag-antos,” ginhatag ni Jesus ang pinakamabakod nga sabat sa wala sing basihan nga panumbungon ni Satanas. (Filipos 2:8; Hulubaton 27:11) Ikaduha, ang pag-antos kag kamatayon sang Mesias amo ang magatumbas sa mga sala sang iban. (Isaias 53:5, 10; Daniel 9:24) Ginhatag ni Jesus ang “iya kalag subong gawad nga kabaylo sang madamo,” agod makatigayon kita sing nahamut-an nga kaangtanan sa Dios. (Mateo 20:28) Ikatlo, paagi sa pagbatas sang tanan nga sahi sang kabudlayan kag pag-antos, “natilawan [si Jesus] sa tanan nga butang kaangay naton.” Gani isa sia ka maluluy-on nga Mataas nga Saserdote, nga “mahanuklog sa aton mga kaluyahon.”​—Hebreo 2:17, 18; 4:15.

 7. Ano ang ginbiyaan ni Jesus sang nagkari sia sa duta?

⁷ Agod mahangpan sing husto ang butang nga handa himuon ni Jesus, hunahunaa ini: Sin-o nga tawo ang mabiya sa iya pamilya kag puluy-an kag masaylo sa iban nga pungsod kon nahibaluan niya nga sikwayon sia sang kalabanan nga pumuluyo sini, pakahuy-an kag paantuson, kag patyon sa ulihi? Binagbinaga karon ang ginhimo ni Jesus. Antes magkari sa duta, maayo gid ang iya posisyon sa langit upod sa iya Amay. Apang, kinabubut-on nga ginbiyaan niya ang iya langitnon nga puluy-an kag nagkari sa duta subong isa ka tawo. Ginhimo niya ini, bisan pa nahibaluan niya nga sikwayon sia sang kalabanan kag mapintas nga pakahuy-an, paantuson, kag patilawon sing masakit nga kamatayon. (Filipos 2:5-7) Ano ang nagpahulag kay Jesus nga himuon ini nga sakripisyo?

8, 9. Ano ang nagpahulag kay Jesus nga ihalad ang iya kabuhi?

⁸ Labaw sa tanan, ginpahulag si Jesus sang tudok nga gugma sa iya Amay. Ang pagbatas ni Jesus nagapamatuod nga ginahigugma niya si Jehova. Amo ini ang kabangdanan kon ngaa nabalaka gid si Jesus sa ngalan kag dungog sang iya Amay. (Mateo 6:9; Juan 17:1-6, 26) Apang, labing importante, luyag ni Jesus makita nga matinluan ang ngalan sang iya Amay gikan sa tanan nga pagpakahuya sa sini. Gani, ginkabig ni Jesus nga isa ka daku gid nga kadungganan nga mag-antos tungod sa pagkamatarong, kay nahibaluan niya nga ang iya integridad makabulig sa pagpakabalaan sa dungganon nga ngalan sang iya Amay.​—1 Cronica 29:13.

⁹ May isa pa ka rason kon ngaa ginhalad ni Jesus ang iya kabuhi​—ang gugma sa katawhan. Ginahigugma na ni Jesus ang tawo halin sa ginsuguran. Madugay pa antes nagkari si Jesus sa duta, ginasugid sang Biblia nga amo sini ang ginabatyag niya: “Ang mga butang nga akon nahamut-an yara sa mga anak sang tawo.” (Hulubaton 8:30, 31) Dayag gid ini nga gugma sang yari si Jesus sa duta. Subong sang nabinagbinag naton sa nagligad nga tatlo ka kapitulo sini nga libro, sa madamo nga paagi ginpakita ni Jesus ang iya gugma para sa mga tawo sa kabilugan kag para sa iya mga sumulunod ilabi na. Apang sang Nisan 14, 33 C.E., kinabubut-on nga ginhatag niya ang iya kabuhi para sa aton. (Juan 10:11) Sa pagkamatuod, wala na sing maglabaw pa sa sini nga paagi agod mapakita niya ang iya gugma para sa aton. Dapat bala naton ilugon sia sa sini nga bahin? Huo. Ang matuod, amo sina ang ginapahimo sa aton.

10, 11. Ano ang bag-o nga sugo nga ginhatag ni Jesus sa iya mga sumulunod, ano ang nadalahig sa sini, kag ngaa importante nga tumanon naton ini?

¹⁰ Sang gab-i antes sia napatay, ginsingganan ni Jesus ang iya pinakasuod nga mga disipulo: “Nagahatag ako sa inyo sing isa ka bag-o nga sugo, nga maghigugmaanay kamo; subong sang paghigugma ko sa inyo, maghigugmaanay man kamo. Paagi sa sini ang tanan makahibalo nga kamo mga disipulo ko, kon nagahigugmaanay kamo.” (Juan 13:34, 35) “Maghigugmaanay kamo”​—ngaa isa ini ka “bag-o nga sugo”? Ang Mosaikong Kasuguan nagsugo na anay: “Higugmaon mo ang imo isigkatawo subong sang imo kaugalingon.” (Levitico 19:18) Apang ang bag-o nga sugo nagakinahanglan sing daku pa nga gugma, isa ka sahi sang gugma nga magapahulag sa aton nga ihatag ang aton kabuhi para sa iban. Maathag nga ginpakita ini ni Jesus mismo sang nagsiling sia: “Ini amo ang akon sugo, nga maghigugmaanay kamo subong sang paghigugma ko sa inyo. Wala sing isa nga may gugma nga daku pa sa sini, nga ihatag sang isa ang iya kalag para sa iya mga abyan.” (Juan 15:12, 13) Daw subong sini ang ginasiling sang bag-o nga sugo: “Higugmaa ang iban, indi subong sang imo kaugalingon, kundi labaw pa sa imo kaugalingon.” Paagi sa iya pagkabuhi kag kamatayon, ginpakita gid ni Jesus ini nga sahi sang gugma.

¹¹ Ngaa importante nga tumanon naton ang bag-o nga sugo? Dumduma nga nagsiling si Jesus: “Paagi sa sini [masinakripisyuhon nga gugma] ang tanan makahibalo nga kamo mga disipulo ko.” Huo, ang masinakripisyuhon nga gugma nagapakilala sa aton subong matuod nga mga Cristiano. Mapaanggid naton ini nga gugma sa isa ka identification badge. Ang mga delegado nga nagatambong sa tuigan nga mga kombension sang mga Saksi ni Jehova nagasuksok sing badge card. Ang kard nagapakilala kon sin-o ang nagasuksok sini, kay ginapakita sini ang iya ngalan kag kongregasyon. Ang masinakripisyuhon nga gugma para sa isa kag isa amo ang “badge” nga nagapakilala sa matuod nga mga Cristiano. Kon sa aton pa, dapat mangin talalupangdon gid ang aton pagpakita sing gugma para sa isa kag isa agod mangin isa ini ka tanda, ukon badge, nga magasugid sa mga nagatan-aw nga matuod gid kita nga mga sumulunod ni Cristo. Dapat pamangkuton naton ang aton kaugalingon, ‘Makita gid bala sa akon ang “badge” sang masinakripisyuhon nga gugma?’

12, 13. (a) Tubtob sa ano nga kasangkaron dapat handa kita nga magsakripisyo agod ipakita ang aton gugma para sa isa kag isa? (b) Ano ang buot silingon sang pagkamasinakripisyuhon?

¹² Subong mga sumulunod ni Jesus, dapat kita maghigugmaanay subong nga ginhigugma niya kita. Nagakahulugan ini nga handa kita sa pagsakripisyo para sa aton mga masigkatumuluo. Tubtob sa ano nga kasangkaron dapat handa kita nga magsakripisyo? Ginasugiran kita sang Biblia: “Paagi sini nakilala naton ang gugma, bangod ginhatag sinang isa ang iya kalag tungod sa aton; kag obligado kita nga ihatag ang aton kalag tungod sa aton mga kauturan.” (1 Juan 3:16) Kaangay ni Jesus, dapat kita handa nga mapatay para sa isa kag isa kon kinahanglanon. Sa tion sang paghingabot, pakamaayuhon pa naton nga mapatay sa baylo nga luiban ang aton espirituwal nga mga kauturan kag mabutang sa katalagman ang ila kabuhi. Sa kadutaan nga natunga sang pinuyas sa tunga sang mga rasa ukon etniko nga mga grupo, ginarisgo naton ang aton kabuhi agod proteksionan ang aton mga kauturan, bisan ano pa ang ila rasa ukon etniko nga grupo. Kon nagaguerra ang mga pungsod, mas pilion pa naton nga mabilanggo ukon mapatay pa gani sa baylo nga mag-uyat sing armas batok sa aton mga masigkatumuluo​—ukon kay bisan sin-o pa.​—Juan 17:14, 16; 1 Juan 3:10-12.

¹³ Indi lamang ang kahanda nga mapatay para sa aton mga kauturan ang paagi nga mapakita naton ang masinakripisyuhon nga gugma. Ang matuod, pila lamang sa aton ang mabutang sa kahimtangan nga himuon ining daku nga sakripisyo. Apang, kon ginahigugma naton ang aton mga kauturan amo nga handa kita nga mapatay para sa ila, indi bala nga dapat handa man kita nga maghimo sing diutay nga mga sakripisyo, paagi sa pagtinguha gid nga buligan sila karon? Ang pagkamasinakripisyuhon nagakahulugan nga handa kita nga unahon ang kaayuhan sang iban sa baylo sang aton kaugalingon nga kaayuhan ukon kasulhayan. Ginauna naton ang mga kinahanglanon kag kaayuhan sang iban bisan pa mabudlayan kita. (1 Corinto 10:24) Sa anong praktikal nga mga paagi mapakita naton ang masinakripisyuhon nga gugma?

14. (a) Ano nga mga sakripisyo ang ginapahimo sa mga gulang? (b) Paano ninyo ginatamod ang mapisan nga mga gulang sa inyo kongregasyon?

¹⁴ Ang mga gulang sa kongregasyon nagahimo sing madamo nga sakripisyo sa ‘pagbantay sa panong.’ (1 Pedro 5:2, 3) Dugang sa pag-atipan sa ila pamilya, mahimo nga kinahanglan sila maghinguyang sing tion sa gab-i ukon sa talipuspusan sang semana sa pag-atipan sa kongregasyon, lakip ang paghanda sing mga bahin sa miting, pagduaw sa mga kauturan, kag paghusay sa hudisyal nga mga kaso. Madamo nga mga gulang ang nagahimo sing dugang pa nga mga sakripisyo, paagi sa pagpangabudlay sing lakas sa mga asambleya kag mga kombension kag pag-alagad subong mga katapo sang Hospital Liaison Committee, Patient Visitation Group, kag Regional Building Committee. Mga gulang, indi gid pagkalipati nga paagi sa inyo kinabubut-on nga pag-alagad​—paghinguyang sang inyo tion, kusog kag manggad sa pagbantay sa panong—​nagapakita kamo sing masinakripisyuhon nga gugma. (2 Corinto 12:15) Ang inyo di-makagod nga mga panikasog ginaapresyar indi lamang ni Jehova kundi sang kongregasyon man nga inyo ginaatipan.​—Filipos 2:29; Hebreo 6:10.

15. (a) Ano ang pila ka sakripisyo nga ginahimo sang asawa sang mga gulang? (b) Paano mo ginatamod ang masinakdagon nga mga asawa nga nagapaumod agod maatipan sang ila bana ang inyo kongregasyon?

¹⁵ Apang, kamusta naman ang asawa sang mga gulang​—indi bala nga nagahimo man sing mga sakripisyo ining masinakdagon nga mga babayi agod maatipan sang ila bana ang panong? Isa gid ka sakripisyo para sa asawa kon ang tion nga mahinguyang kuntani sang iya bana para sa iya pamilya kinahanglan nga ihinguyang sang iya bana para sa mga alatipanon sa kongregasyon. Hunahunaa man ang asawa sang nagalakbay nga mga manugtatap kag ang mga sakripisyo nga ginahimo nila agod updan ang ila bana sa pagduaw sa lainlain nga mga kongregasyon kag lainlain nga mga sirkito. Wala sila sang ila kaugalingon nga balay kag ayhan lainlain nga katre ang ginatulugan nila kada semana. Ang mga asawa nga kinabubut-on nga nagauna sang kaayuhan sang kongregasyon sangsa ila kaugalingon dapat hatagan sing komendasyon bangod sang ila maalwan nga pagpakita sing masinakripisyuhon nga gugma.​—Filipos 2:3, 4.

16. Ano nga mga sakripisyo ang ginahimo sang Cristiano nga mga ginikanan para sa ila mga anak?

¹⁶ Paano naton mapakita ang masinakripisyuhon nga gugma sa pamilya? Mga ginikanan, nagahimo kamo sing madamo nga sakripisyo agod maatipan ang inyo mga anak kag agod mapadaku sila “sa disiplina kag nagatuytoy nga panghunahuna ni Jehova.” (Efeso 6:4) Mahimo nga dapat kamo magbakabaka agod lamang may ipakaon kamo sa inyo pamilya kag agod masigurado ninyo nga ang inyo mga anak may nagakaigo nga panapton kag puluy-an. Mahimo nga pid-an pa gani ninyo ang inyo kaugalingon sa baylo nga madingutan ang inyo mga anak sang kinahanglanon nga mga butang sa kabuhi. Nagapanikasog man kamo nga may pagtuon kamo sa Biblia upod sa inyo mga anak, ginapaupod sila sa Cristiano nga mga miting, kag nagagua kamo upod sa ila sa pagministeryo sa latagon. (Deuteronomio 6:6, 7) Ang inyo masinakripisyuhon nga gugma nagapahamuot sa Tagtukod sang pamilya kag mahimo nga magakahulugan sing kabuhi nga walay katapusan para sa inyo mga anak.​—Hulubaton 22:6; Efeso 3:14, 15.

17. Paano mailog sang Cristiano nga mga bana ang di-makagod nga panimuot ni Jesus?

¹⁷ Mga bana, paano ninyo mailog si Jesus sa pagpakita sing masinakripisyuhon nga gugma? Nagasabat ang Biblia: “Mga bana, padayon nga higugmaa ang inyo asawa, subong nga si Cristo naghigugma man sang kongregasyon kag nagtugyan sang iya kaugalingon tungod sa sini.” (Efeso 5:25) Nabinagbinag na naton nga ginhigugma gid ni Jesus ang iya mga sumulunod amo kon ngaa napatay sia para sa ila. Ginailog sang isa ka Cristiano nga bana ang di-makagod nga panimuot ni Jesus, nga “wala magpahamuot sa iya kaugalingon.” (Roma 15:3) Ginauna sini nga sahi sang bana ang mga kinahanglanon kag mga intereses sang iya asawa sangsa iya kaugalingon. Wala niya ginapilit kon ano ang iya gusto, kundi nagapasugot sia kon indi man lang ini supak sa prinsipio sang Biblia. Ginakahamut-an ni Jehova ang bana nga nagapakita sing masinakripisyuhon nga gugma kag ginahigugma man sia kag ginatahod sang iya asawa kag mga anak.

18. Ano ang rason kon ngaa dapat naton sundon ang bag-o nga sugo nga maghigugmaanay kita?

¹⁸ Indi mahapos tumanon ang bag-o nga sugo nga maghigugmaanay kita, apang may mabaskog nga rason kon ngaa dapat naton ini himuon. Nagsulat si Pablo: “Ang gugma ni Cristo nagapahulag sa amon, bangod amo ini ang amon ginhinakop, nga ang isa ka tawo napatay para sa tanan . . . , kag napatay sia para sa tanan agod ang mga nagakabuhi indi na magkabuhi para sa ila kaugalingon, kundi para sa iya nga napatay para sa ila kag ginbanhaw.” (2 Corinto 5:14, 15) Bangod napatay si Jesus para sa aton, indi bala nga dapat man kita magkabuhi para sa iya? Mahimo naton ini kon sundon naton ang iya halimbawa sa pagpakita sing masinakripisyuhon nga gugma.

19, 20. Ano nga hamili nga regalo ang ginhatag sa aton ni Jehova, kag paano naton mapakita nga ginabaton naton ini?

¹⁹ Wala nagapasobra si Jesus sang nagsiling sia: “Wala sing isa nga may gugma nga daku pa sa sini, nga ihatag sang isa ang iya kalag para sa iya mga abyan.” (Juan 15:13) Ang kinabubut-on niya nga paghatag sang iya kabuhi para sa aton amo ang labing daku nga ekspresyon sang iya gugma para sa aton. Apang, may isa pa nga nagpakita sa aton sing mas daku pa nga gugma. Nagpaathag si Jesus: “Ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tagsatagsa nga nagatuo sa iya indi malaglag kundi makatigayon sang kabuhi nga walay katapusan.” (Juan 3:16) Daku gid ang gugma sang Dios sa aton amo kon ngaa ginhatag niya ang iya Anak subong gawad, kag bangod sini mahimo kita maluwas gikan sa sala kag kamatayon. (Efeso 1:7) Ang gawad isa ka hamili nga regalo gikan kay Jehova, apang wala niya kita ginapilit nga batunon ini.

²⁰ Yara sa aton kon batunon naton ang regalo ni Jehova. Paano? Paagi sa ‘pagtuo’ sa iya Anak. Apang, ang pagtuo indi sa hambal lamang. Ginapamatud-an ini paagi sa mga buhat, kon paano kita nagakabuhi. (Santiago 2:26) Ginapamatud-an naton ang aton pagtuo kay Jesucristo paagi sa pag-ilog sa iya adlaw-adlaw. Kon himuon naton ini, makatigayon kita sing bugana nga mga pagpakamaayo karon kag sa palaabuton, nga amo ang ipaathag sang katapusan nga kapitulo sini nga libro.