Ang Kabudlayan: Indi Mabag-o nga Kahimtangan

MAY malubha ka bala nga balatian? ginbulagan? napatyan sing pinalangga? Kon matabo ang indi mabag-o nga kahimtangan, ayhan magabatyag ka nga wala ka na sing mahimo kundi maghandum na lang nga kuntani magbag-o ang imo sitwasyon. Paano mo makontrol liwat ang imo kabuhi?

Si apostol Pablo pirme nagalakbay subong makugi nga misyonero sang unang siglo. Pero nauntat ang iya paglakbay sang indi makatarunganon sia nga gin-aresto kag ginbilanggo sing duha ka tuig sa isa ka balay nga ginabantayan sang soldado. Imbes nga maluyahan sing buot, ginhimo ni Pablo ang masarangan pa niya himuon. Ginbuligan niya sa espirituwal kag ginlugpayan ang tanan nga nagabisita sa iya. Naghimo pa gani sia sing pila ka sulat nga bahin na subong sang Biblia.—Binuhatan 28:30, 31.

Subong sang ginsiling sa nagligad nga artikulo, si Anja nagatener na lang sa balay. “Apektado gid sang kanser ang akon pagsinalayo,” siling niya. “Indi ako dapat malatnan sing balatian karon, gani halos wala na ako nagaobra kag nagapakig-upod sa iban.” Ano ang ginhimo ni Anja sa iya indi mabag-o nga kahimtangan? “Ang paghimo sing bag-o nga rutina nakabulig gid sa akon,” siling niya. “Ginauna ko kon ano ang importante sa akon kag nagahimo ako sing iskedyul nga ginahunahuna ang masarangan ko pa himuon. Nagpabatyag ini sa akon nga may kontrol pa ako sa akon kabuhi.”

Kon ang indi mabag-o nga kahimtangan daw nagakontrol na sa imo kabuhi, tilawi ang masunod:

• Himua kon ano ang masarangan mo pa. Halimbawa, mahimo nga wala ka sing bug-os nga kontrol sa imo kapagros, apang makaehersisyo ka bala, makakaon sing masustansia nga pagkaon, kag makatulog sing bastante?

• Hibalua kon ano ang gusto mo himuon. Isaisaha kon ano ang mahimo mo agod malab-ot ina. Maghinguyang sing pila ka tion kada adlaw para malab-ot ang imo gusto himuon.

• Himua ang mga obra, bisan ang ginagmay lang, nga magapabatyag sa imo nga may kontrol ka sa imo kabuhi. Tinlui ang lamesa, kag hugasi ang mga pinggan. Mamayo sing mahipid. Unaha ang pinakaimportante nga obra sa aga.

• Hibalua ang posible nga mga kaayuhan sang imo kahimtangan. Halimbawa, ang imo bala sitwasyon nagahatag sa imo sing ihibalo kon paano maatubang ang mga kabudlayan? Magamit mo bala ini nga ihibalo sa pagbulig sa iban?

Ang Punto: Mahimo nga indi mo makontrol ang imo kahimtangan, apang makontrol mo ang imo reaksion sa sini.