Ang Pinakamaayo nga Paagi Agod Mapaayawan ang Imo Espirituwal nga mga kinahanglanon

NGAA KINAHANGLAN sang mga tawo ang relihion? Ang iban magasiling nga nagaliso ang mga tawo sa espirituwal nga mga butang agod makakita sing kalig-unan sa walay kalig-unan nga kalibutan. Apang kapin pa ang nadalahig. Ang artikulo sa magasin nga American Sociological Review nagsiling: “Ang kinahanglanon nga kalig-unan indi lamang ang pangganyat sang relihion. Pirme nagapangita ang mga tawo sing mga sabat sa mga pamangkot subong sang: Diin kita naghalin? Diin kita nagapadulong? Ngaa yari kita diri?”

Walay duhaduha nga magaugyon ka nga importante gid ini nga mga pamangkot. Bangod importante ini, indi bala nga kinahanglan sini ang masaligan nga mga sabat? Ini nga mga pamangkot tuman ka importante kag tuman ka serioso amo nga indi ini malubad paagi lamang sa pagpili sing relihioso nga mga pagtuluuhan halin sa lainlain nga mga tradisyon bangod nagustuhan naton ini. Agod matigayon naton ang mabakod kag masaligan nga mga sabat sa mas importante nga mga pamangkot sa kabuhi, kinahanglan gid naton ang mas maayo nga paagi.

May mas maayo bala nga paagi? Si Ferrar Fenton, isa ka manugbadbad sang Biblia, may ginsiling nga talalupangdon tuhoy sa sini nga libro. Gintawag niya ini subong ang lamang nga paagi “nga nagapahayag sang Tanhaga sang Uniberso sa Tawo, kag sang Tanhaga sang Tawo sa Iya Kaugalingon.” Huo, ginasabat sang Biblia ang mga pamangkot tuhoy sa nagligad, sa karon, kag sa palaabuton. Ginasugiran kita sini kon diin kita naghalin, kon ano ang kahulugan sang kabuhi, kon paano kita makasapo sing kalipay, kag kon ano ang yara sa palaabuton. Wala na sing iban pa nga libro sa maragtas nga subong ka maimpluwensia sa Biblia; kag wala man sing iban pa nga libro nga nakalampuwas sang tuman kadamo malaut nga pagsalakay. Apang, ngaa madamo ang nagasikway sa sining pinasahi nga libro sa pagpangita nila sing mga sabat sa mga pamangkot sa kabuhi?

Wala ginhatagan sing tion sang madamo nga tawo ang pagbinagbinag sa daku nga kinatuhayan sang Biblia sa mga relihion nga ila nahibaluan. Nakita nila kon paano nagpinatyanay ang nagapangangkon nga mga Cristiano sa ngalan sang Dios. Madamo ang nagareklamo, subong sang ginsiling sang The Guardian, nga “mas interesado ang mga pari karon sa pagkolekta sang kuwarta sa baylo sang pagduaw agod maghatag sing espirituwal nga panuytoy.” Ginahunahuna nila nga ayhan ginaaprobahan ukon ginakunsinti sang Biblia ini nga paggawi. Ang matuod, ang Biblia nagasugo sa mga Cristiano nga ‘higugmaon ang isa kag isa,’ kag nagasiling ini sa mga nagabantala sang pulong, “Ginbaton ninyo nga wala sing bayad, ihatag ninyo nga wala sing bayad.” (Juan 13:34; Mateo 10:⁠8) Gani, makatarunganon bala nga hukman ang Biblia pasad sa mga paggawi sang mga tawo nga nagapangangkon nga nagatahod sa sini apang wala nagasunod sa sini?

Madamo ang nagapati nga ang Biblia di-sientipiko, nagasumpakilay, kag kinaraan na. Apang kabaliskaran sini ang matuod kon usisaon ini sing maayo. Matuod, ang Biblia indi libro sa siensia. Apang, kon maghinambit ini sing mga topiko may kaangtanan sa siensia​—⁠subong sang pagpasunod sa pagluntad sang buhi nga mga butang sa duta, korte sang duta, ukon ang nagakaigo nga pagbulong sa makalalaton nga mga balatian⁠​—⁠​husto ang ginasiling sang Biblia. Nagaunod pa gani ini sang mga pinamulong nga abanse katama sangsa nahibaluan sa siensia sadto nga tion. Kag bisan pa may 66 ka tulun-an ang Biblia nga ginsulat sa sulod sang 1,600 ka tuig, tanan ini nagahisantuanay. Dugang pa, nagapakita ang Biblia sang tumalagsahon nga paghantop sa kinaugali sang tawo, kag wala gid ini nagalipas sa panahon.

May importante nga ginasiling ining tumalagsahon nga libro tuhoy sa pagsimba sa Dios. Ginasiling sini nga ini nga pagsimba dapat himuon, indi sa kondisyon sang tawo, kundi sa kondisyon sang Dios. (Juan 5:30; Santiago 4:13-15; 2 Pedro 1:21) Apang pila lamang ka tawo ang nagsunod gid sini nga prinsipio. Halin pa sang una, naghimuhimo ang mga tawo sing mga relihion suno sa ila kaugalingon nga katuyuan. Matuod ina sang gintigib sang mga tawo ang ila mga dios halin sa mga kahoy kag ginsimba ini. Matuod ina sang gintudlo sang relihioso nga mga institusyon ang mga doktrina nga ila gin-imbento. Kag indi bala matuod man ina sa mga indibiduwal nga naghimo sang ila kaugalingon nga relihion suno sa ila luyag?

Binagbinaga ang tuhay nga paagi. Ngaa indi mo himuon ang ginhimo sang pangulo nga huwes sang Korte Suprema sang Estados Unidos? Kaanggid sa pagkasaba niya sang mga kaso sa korte, walay pinasulabi nga gin-imbestigahan niya ang ebidensia pabor kag batok sa pagkamaminatud-on sang Biblia. Ano ang resulta? Sia nagsiling: “Naglab-ot ako sa desisyon nga ang Biblia isa ka tumalagsahon nga libro, nga naghalin ini sa Dios.”

Paano ka makapangusisa kaanggid sa sina? Subong panugda, mahimo tilawan mo ang sistematiko nga pagtuon sa Biblia, ginausisa ang mga sabat sini sa mga pamangkot nga ginpautwas sa umpisa sini nga artikulo. May mga anom ka milyon ka Saksi ni Jehova, sa 235 ka pungsod, nga nagtuon sa sini nga paagi. Gingamit nila sing boluntaryo ang ila tion agod ipaambit sa iban ang ila natun-an. Ang ginatanyag nila nga pagtuon sa Biblia nga wala sing bayad nakabulig na sa minilyon nga matigayon ang pagtuo nga indi umalagi lamang ukon depende lang sa luyag sang isa. Indi lang basta lain nga relihion ang matuod kag putli nga Cristianismo nga ginapresentar sa Biblia. Ginarepresentar sini ang kamatuoran tuhoy sa Dios kag sa iya mga katuyuan. Gani ngaa makontento sa isa ka butang nga kubos kon may yara man lang mas maayo?​—⁠Juan 17:17.

[Mga retrato sa pahina 10]

Ang pinakamaayo nga paagi nga mapaayawan mo ang imo espirituwal nga mga kinahanglanon amo ang pagtuon sa Biblia tuhoy sa Dios kag magpakig-upod sa matuod nga mga sumilimba