“Mangin Sumulunod Ko”​—Ano ang Buot Silingon ni Jesus?

1, 2. Ano nga labing maayo nga pangagda ang mahimo mabaton sang isa ka tawo, kag ano ang mapamangkot naton sa aton kaugalingon?

ANO nga labing maayo nga pangagda ang nabaton mo na? Mahimo mahunahuna mo ang tion nga gin-agda ka sa pagtambong sa isa ka espesyal nga okasyon, ayhan sa kasal sang duha nga malapit gid sa imo. Ukon mahimo madumduman mo ang adlaw nga gin-agda ka sa paghimo sing isa ka importante nga trabaho. Pat-od gid nga malipay ka, kag mahamuot pa gani, kon makabaton ka sing amo sini nga mga pangagda. Apang, ang matuod, nakabaton ka na sing isa ka mas maayo pa nga pangagda. Ang kada isa sa aton nakabaton na sini. Kag ang aton desisyon kon bala batunon naton ini nga pangagda ukon indi nagaapektar sa aton sing daku. Amo ini ang labing importante nga desisyon nga pagahimuon naton sa kabuhi.

² Ano ini nga pangagda? Naghalin ini kay Jesucristo, ang bugtong nga Anak sang Labing Gamhanan nga Dios, si Jehova, kag narekord ini sa Biblia. Sa Marcos 10:21, mabasa naton ang ginsiling ni Jesus: “Kari ka mangin sumulunod ko.” Amo ini ang pangagda ni Jesus sa kada isa sa aton. Dapat naton pamangkuton ang aton kaugalingon, ‘Paano ko ini sabton?’ Mahimo magahunahuna ka: Sin-o ang makadis-ayri sa sining tumalagsahon nga pangagda? Sing makapakibot, ang kalabanan nga mga tawo nagadis-ayri. Ngaa?

3, 4. (a) Ano ang mahimo kabigon nga makahilisa sa tawo nga nagpalapit kag nagpamangkot kay Jesus tuhoy sa kabuhi nga walay katapusan? (b) Ano nga maayo nga mga kinaiya ang mahimo nga nakita ni Jesus sa manggaranon nga pamatan-on nga manugdumala?

³ Binagbinaga subong halimbawa ang isa ka tawo nga gin-agda mismo ni Jesus mga 2,000 ka tuig na ang nagligad. Isa sia ka respetado kaayo nga tawo. Nagapanag-iya sia sang di-magkubos tatlo ka butang nga ginakabig sang mga tawo nga halandumon, kag ginakahisaan pa gani​—pagkapamatan-on, manggad, kag gahom. Ginalaragway sia sang Biblia subong “pamatan-on nga lalaki,” subong “manggaranon gid,” kag subong “manugdumala.” (Mateo 19:20; Lucas 18:18, 23) Apang, ini nga pamatan-on may isa pa ka mas importante nga kinaiya. Nakabati sia tuhoy sa Daku nga Manunudlo, si Jesus, kag naluyagan niya ang iya nabatian.

⁴ Ang kalabanan nga mga manugdumala sadto wala maghatag kay Jesus sing pagtahod nga nagakaigo sa iya. (Juan 7:48; 12:42) Apang tuhay ini nga manugdumala. Ang Biblia nagasugid sa aton: “Samtang nagalakat [si Jesus], isa ka tawo ang nagdalagan kag nagluhod sa iya atubangan kag nagpamangkot sa iya: ‘Maayo nga Manunudlo, ano ang dapat ko himuon agod mapanubli ang kabuhi nga walay katapusan?’” (Marcos 10:17) Talupangda ang kalangkag sini nga tawo sa pagpakigsugilanon kay Jesus, kay nagdalagan sia sa iya nga madamo ang nakakita, subong sang mahimo himuon sang bisan sin-o nga imol kag kubos. Dugang pa, nagluhod sia sing matinahuron sa atubangan ni Jesus. Sa amo nagpakita sia sing pagkamapainubuson kag nakahibalo sia sang iya espirituwal nga kinahanglanon. Ginpabaloran ni Jesus ining maayo nga mga kinaiya. (Mateo 5:3; 18:4) Indi katingalahan, kon amo, nga “si Jesus nagtulok sa iya kag nakabatyag sing gugma sa iya.” (Marcos 10:21) Paano ginsabat ni Jesus ang pamangkot sang pamatan-on?

 5. Ano ang ginsabat ni Jesus sa manggaranon nga pamatan-on, kag paano naton nahibaluan nga ang kaimulon indi amo ang “isa ka butang” nga kulang sa iya? (Tan-awa man ang footnote.)

⁵ Ginpakita ni Jesus nga ang iya Amay naghatag na sing impormasyon sa importante nga pamangkot tuhoy sa pagtigayon sing kabuhi nga walay katapusan. Ginsambit niya ang Kasulatan, kag nagsabat ang pamatan-on nga matutom niya nga ginatuman ang Mosaikong Kasuguan. Apang, bangod may tumalagsahon nga paghantop, nakita ni Jesus ang butang nga mas madalom pa. (Juan 2:25) Nahantop niya ang espirituwal nga problema sini nga manugdumala​—isa nga mabug-at. Gani, si Jesus nagsiling: “Isa ka butang ang kulang sa imo.” Ano ining “isa ka butang”? Si Jesus nagsiling: “Lakat ka, ibaligya ang imo mga pagkabutang kag ihatag ini sa mga imol.” (Marcos 10:21) Buot silingon bala ni Jesus nga agod maalagad ang Dios, ang isa ka tawo dapat mangin imol? Indi.a Ginpahayag ni Cristo ang isa ka butang nga may daku nga importansia.

 6. Ano nga pangagda ang gintanyag ni Jesus, kag ano ang ginapakita sang sabat sang manggaranon nga manuggahom nga pamatan-on tuhoy sa iya tagipusuon?

⁶ Agod ipakita kon ano ang kulang sa iya, gintanyagan ni Jesus ang tawo sing isa ka tumalagsahon nga kahigayunan: “Kari ka mangin sumulunod ko.” Hunahunaa lamang​—gin-agda sang Anak mismo sang Labing Mataas nga Dios yadto nga tawo nga mangin sumulunod niya! Ginsaaran man sia ni Jesus sing isa ka padya nga labaw sangsa mahanduraw. Nagsiling sia: “Makatigayon ka sing bahandi sa langit.” Ginhimuslan bala sang pamatan-on nga manggaranon nga manugdumala ini nga kahigayunan, ining tumalagsahon nga pangagda? Ang rekord mabasa: “Nahanusbo sia sa ginhambal kag naglakat nga masinulub-on, kay may madamo sia nga pagkabutang.” (Marcos 10:21, 22) Gani nadayag ang problema sa tagipusuon sini nga tawo bangod sang wala ginapaabot nga pangabay ni Jesus. Ginhigugma gid niya ang iya mga pagkabutang kag, sa walay duhaduha, ang gahom kag kadungganan upod sini. Makapasubo nga mas ginhigugma niya ini nga mga butang sangsa kay Cristo. Kon amo, ang “isa ka butang” nga kulang sa iya amo ang bug-os tagipusuon kag masinakripisyuhon nga gugma kay Jesus kag kay Jehova. Bangod ang pamatan-on kulang sing amo nga gugma, gindis-ayrihan niya ang isa ka tumalagsahon nga pangagda! Apang, paano ka nadalahig?

 7. Ngaa makapat-od kita nga ang pangagda ni Jesus para man sa aton karon?

⁷ Ang pangagda ni Jesus indi lamang para sa sadto nga tawo; ni sa pila lamang ka tawo. Si Jesus nagsiling: “Kon ang bisan sin-o luyag magsunod sa akon, . . . padayon nga magsunod [sia] sa akon.” (Lucas 9:23) Talupangda nga ang “bisan sin-o” mahimo mangin sumulunod ni Cristo kon “luyag” gid niya. Ginabuyok sang Dios sa iya Anak ang mga bunayag sing tagipusuon. (Juan 6:44) Indi lamang ang mga manggaranon, indi lamang ang mga imol, indi lamang yadtong sa isa ka partikular nga rasa ukon pungsod, kag indi lamang yadtong nagakabuhi sadto nga tion kundi ang tanan ginahatagan sing kahigayunan nga batunon ang pangagda ni Jesus. Gani ang ginsiling ni Jesus nga “Kari ka mangin sumulunod ko” para man sa imo. Ngaa dapat ka mangin sumulunod ni Cristo? Kag ano gid ang nadalahig?

 8. Ano ang kinahanglan sang tanan nga tawo, kag ngaa?

⁸ Isa ka kamatuoran ang dapat naton batunon: Kinahanglan gid naton ang isa ka maayo nga lider. Indi tanan nga tawo nagabaton nga may amo sini nga kinahanglanon, apang walay sapayan sini, kinahanglan gid ini. Ang manalagna ni Jehova nga si Jeremias gin-inspirar sa pagsulat sining dayon nga kamatuoran: “Nahibaluan ko, O Jehova, nga ang dalanon sang tawo wala sa iya kaugalingon. Wala sa tawo nga nagalakat bisan ang pagtuytoy sa iya tikang.” (Jeremias 10:23) Ang mga tawo wala sing ikasarang ukon kinamatarong nga gamhan ang ila kaugalingon. Sa pagkamatuod, ang maragtas sang tawo halos isa lamang ka rekord sang indi madinalag-on nga pagpanguna. (Manugwali 8:9) Sang panahon ni Jesus, ginpigos, ginpintasan, kag ginpatalang sang mga lider ang katawhan. Nahantop ni Jesus nga ang mga tawo ‘subong sang mga karnero nga wala sing manugbantay.’ (Marcos 6:34) Amo man ang katawhan karon. Subong isa ka grupo kag subong mga indibiduwal, kinahanglan naton ang isa ka lider nga aton masaligan kag matahod. Nagakabagay bala si Jesus sa sini? Binagbinaga ang pila ka rason kon ngaa huo ang sabat.

 9. Ano ang kinatuhayan ni Jesus sa tanan nga iban pa nga mga lider?

⁹ Una, si Jesus ginpili ni Jehova nga Dios. Ang kalabanan nga tawhanon nga mga lider ginpili sang kaangay nila nga di-himpit nga mga tawo, nga masami nga nadaya kag nagasala sa pagdesisyon. Si Jesus tuhay nga sahi sang lider. Ang iya mismo titulo nagasugid sa aton sini. Ang tinaga nga “Cristo,” kaangay sang tinaga nga “Mesias,” nagakahulugan sing “Isa nga Hinaplas.” Huo, ang Soberano nga Ginuo mismo sang uniberso ang naghaplas, ukon nagtangdo sing pinasahi kay Jesus sa iya sagrado nga katungdanan. Si Jehova nga Dios nagsiling tuhoy sa iya Anak: “Yari karon! Ang akon alagad nga ginpili ko, ang akon hinigugma, nga nahamut-an sang akon kalag! Ibutang ko sa iya ang akon espiritu.” (Mateo 12:18) Ang aton lamang Manunuga ang nakahibalo kon ano nga sahi sang lider ang kinahanglan naton. Ang kaalam ni Jehova walay latid, gani may madamo kita nga rason agod magsalig sa iya ginpili.​—Hulubaton 3:5, 6.

10. Ngaa ang huwaran ni Jesus amo ang labing maayo nga dapat ilugon sang mga tawo?

¹⁰ Ikaduha, si Jesus nagpahamtang sing himpit kag nagapapagsik nga huwaran para sa aton. Ang labing maayo nga lider may mga kinaiya nga madayaw kag mailog sang iya mga sakop. Nagapanguna sia paagi sa huwaran, sa amo nagapapagsik sa iban nga mangin mas maayo nga mga tawo. Ano nga mga kinaiya ang ginadayaw mo gid sa isa ka lider? Kaisog? Kaalam? Kaawa? Ano naman ang pagbatas samtang nagaatubang sing kabudlayan? Samtang ginatun-an mo ang rekord tuhoy sa kabuhi ni Jesus sa duta, mahangpan mo nga indi lang amo sini nga mga kinaiya ang ginpakita niya. Subong himpit nga larawan sang iya langitnon nga Amay, ginpakita ni Jesus ang tanan nga kinaiya sang Dios. Isa sia ka himpit gid nga tawo. Gani sa tanan nga butang nga ginhimo niya, sa tanan nga tinaga nga ginbungat niya, sa tanan nga balatyagon nga ginpakita niya, makakita kita sing butang nga takus ilugon. Ang Biblia nagasiling nga naghatag sia sing “huwaran agod nga sundon ninyo sing maayo ang iya mga tikang.”​—1 Pedro 2:21.

11. Paano ginpamatud-an ni Jesus nga isa sia ka “maayo nga manugbantay”?

¹¹ Ikatlo, gintuman sing bug-os ni Cristo ang ginsiling niya: “Ako ang maayo nga manugbantay.” (Juan 10:14) Sang panahon sang Biblia, pamilyar ang mga tawo sa sini nga paglaragway. Ang mga manugbantay nagapangabudlay sing lakas agod maatipan ang ila ginabantayan nga mga karnero. Mas ginauna sang “maayo nga manugbantay” ang kaluwasan kag kaayuhan sang panong sangsa iya kaugalingon. Halimbawa, ang katigulangan ni Jesus nga si David isa anay ka manugbantay sang bata pa sia, kag indi lamang makaisa nga ginbutang niya sa katalagman ang iya kabuhi agod atubangon ang pagsalakay sang isa ka mabangis kag mapintas nga sapat sa iya mga karnero. (1 Samuel 17:34-36) Kapin pa sa sini ang ginhimo ni Jesus para sa iya tawhanon nga mga sumulunod. Ginhatag niya ang iya kabuhi para sa ila. (Juan 10:15) Pila ka lider ang may amo sini nga masinakripisyuhon nga espiritu?

12, 13. (a) Sa ano nga kahulugan kilala sang manugbantay ang iya mga karnero, kag sa ano nga paagi kilala nila sia? (b) Ngaa luyag mo nga magpasakop sa pagpanguna sang Maayo nga Manugbantay?

¹² Si Jesus “maayo nga manugbantay” sa isa pa ka kahulugan. Nagsiling sia: “Kilala ko ang akon mga karnero kag ang akon mga karnero nakakilala sa akon.” (Juan 10:14) Hunahunaa ang ilustrasyon nga ginhatag ni Jesus. Para sa isa ka wala sing pag-ulikid nga nagatan-aw, ang isa ka panong sang mga karnero daw subong lamang sang isa ka hubon sang madamol sing bulbol nga mga sapat. Apang, kilala sang manugbantay ang tagsa ka karnero. Kilala niya kon sin-o nga mga karnero nga babayi ang magakinahanglan sa dili madugay sang iya bulig sa ila pagpanganak, kon sin-o nga mga kordero ang kinahanglan pa nga kuguson bangod tuman pa sa ila kagamay kag kaluya sa paglakat sing malayolayo, kag kon sin-o nga mga karnero ang kasan-o lang nga nagmasakit ukon nasamaran. Kilala man sang mga karnero ang ila manugbantay. Kilala nila ang iya tingog, kag wala gid nila ini ginakasal-an nga iya sang iban nga manugbantay. Kon ang iya tingog daw may pagkahangawa ukon pagkahilingagawon, nagasunod sila gilayon. Kon diin sia magkadto, nagasunod sila. Kag nahibaluan gid niya kon diin sila pakadtuon. Nahibaluan niya kon diin makita ang matambok kag malagtom nga mga hilamon, kon diin ang matinlo kag matin-aw nga mga sapa, kon diin ang mga halalban nga luwas sa katalagman. Samtang ginabantayan niya sila, nakahibalo ang mga karnero nga luwas sila.​—Salmo 23.

¹³ Wala ka bala nagahandum sing kaangay sini nga lider? Amo gid sini ang ginahimo sang Maayo nga Manugbantay sa iya mga sumulunod. Nagasaad sia nga tuytuyan ka niya padulong sa isa ka malipayon kag makaalayaw nga kabuhi karon kag tubtob sa walay katapusan nga palaabuton! (Juan 10:10, 11; Bugna 7:16, 17) Kon amo, kinahanglan naton mahibaluan kon ano gid ang nadalahig sa pagsunod kay Cristo.

14, 15. Agod mangin sumulunod ni Cristo, ngaa indi tuman nga magpangangkon lamang nga isa ka Cristiano ukon magpalambo sing suod nga relasyon kay Jesus?

¹⁴ Minilyon ka tawo karon ang mahimo nagahunahuna nga ginbaton na nila ang pangagda ni Cristo. Sa katunayan, ginatawag nila ang ila kaugalingon nga mga Cristiano. Ayhan katapo sila sang relihion nga ginpabunyagan sa ila sang ila mga ginikanan. Ukon mahimo nagasiling sila nga may suod nga relasyon sila kay Jesus kag ginabaton sia subong ila personal nga Manunubos. Apang nagahimo bala ini sa ila nga mga sumulunod ni Cristo? Amo bala sina ang ginahunahuna ni Jesus sang gin-agda niya kita nga mangin mga sumulunod niya? Labi pa ang nadalahig sa sini.

¹⁵ Binagbinaga ang kalibutan sang Cristiandad​—ang mga pungsod nga ang ila kalabanan nga mga banwahanon nagapangangkon nga mga sumulunod ni Cristo. Ginapabanaag bala sang Cristiandad ang mga panudlo ni Jesucristo? Ukon makita bala naton sa sini nga kadutaan ang pagdumot, pagpigos, krimen, kag inhustisya kaangay gid sang makita sa bug-os nga kalibutan? Ang respetado nga lider sang mga Hindu nga si Mohandas Gandhi nagsiling anay: “Wala pa ako sing nakilala nga nakalabaw sa ginhimo ni Jesus sa katawhan. Sa katunayan, wala sing sayop sa Cristianismo.” Nagsiling pa sia: “Ang problema yara sa inyo nga mga Cristiano. Wala ninyo ginasunod ang inyo mga ginatudlo.”

16, 17. Ano sa masami ang kulang sa nagapangangkon nga mga Cristiano, kag ano ang nagapakilala sa matuod nga mga sumulunod ni Cristo?

¹⁶ Nagsiling si Jesus nga ang iya matuod nga mga sumulunod makilal-an indi lamang bangod sang ila ginapangangkon ukon sang ginatawag nila sa ila kaugalingon kundi bangod sang ila gid ginahimo. Halimbawa, nagsiling sia: “Indi ang tagsatagsa nga nagasiling sa akon, ‘Ginuo, Ginuo,’ makasulod sa ginharian sang langit, kundi ang isa nga nagahimo sang kabubut-on sang akon Amay nga yara sa langit.” (Mateo 7:21) Ngaa ang tuman kadamo nga nagasiling nga si Jesus ang ila Ginuo wala nagahimo sang kabubut-on sang iya Amay? Dumduma ang manggaranon nga pamatan-on nga manugdumala. Sa masami, “isa ka butang ang kulang” sa nagapangangkon nga mga Cristiano​—ang bug-os kalag nga gugma kay Jesus kag sa Isa nga nagpadala sa iya.

¹⁷ Paano ini natabo? Indi bala ang minilyon nga nagatawag sang ila kaugalingon nga mga Cristiano nagapangangkon man nga ginahigugma nila si Cristo? Huo. Apang ang gugma kay Jesus kag kay Jehova wala nagakahulugan sang pagpangangkon lamang nga ginahigugma mo sila. Si Jesus nagsiling: “Kon ang bisan sin-o nagahigugma sa akon, tumanon niya ang akon pulong.” (Juan 14:23) Kag sa liwat nagahambal subong isa ka manugbantay, nagsiling sia: “Ang akon mga karnero nagapamati sa akon tingog, kag kilala ko sila, kag nagasunod sila sa akon.” (Juan 10:27) Huo, mapamatud-an gid naton ang aton gugma kay Cristo indi lamang sa aton ginahambal ukon sa aton ginabatyag kundi ilabi na sa aton ginahimo.

18, 19. (a) Paano kita dapat maapektuhan sang pagtuon tuhoy kay Jesus? (b) Ano ang katuyuan sini nga libro, kag paano ini makabulig sa madugay na nga nagkabig sang ila kaugalingon nga mga sumulunod ni Cristo?

¹⁸ Apang, ang aton ginahimo dapat nga may yara gid ginhalinan. Nagapabanaag ini sang aton nasulod nga pagkatawo. Amo gid ini ang dapat naton pangabudlayan. Si Jesus nagsiling: “Ini nagakahulugan sing kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.” (Juan 17:3) Kon magkuha kita sing sibu nga ihibalo tuhoy kay Jesus kag pamalandungan ini, ang aton tagipusuon maapektuhan. Higugmaon naton sia sing labi pa gid, sa amo ginapabaskog sing labi pa ang aton handum nga sundon sia adlaw-adlaw.

¹⁹ Amo ini ang katuyuan sini nga libro. Ang katuyuan sini amo, indi agod ihatag ang kompleto nga sumaryo sang kabuhi kag ministeryo ni Jesus, kundi agod buligan kita nga mahangpan sing mas maathag kon paano naton sia sundon.b Gindesinyo ini agod buligan kita sa pagtan-aw sa salaming sang Kasulatan kag pamangkuton ang aton kaugalingon, ‘Ginasunod ko gid bala si Jesus?’ (Santiago 1:23-25) Ayhan madugay mo na ginakabig ang imo kaugalingon nga isa ka karnero nga ginatuytuyan sang Maayo nga Manugbantay. Apang, wala ka bala nagaugyon nga pirme kita makakita sing mga paagi agod mag-uswag? Ang Biblia nagalaygay sa aton: “Padayon nga tilawi kon yara kamo sa pagtuo, padayon nga pamatud-i kon ano kamo.” (2 Corinto 13:5) Takus gid nga pat-uron naton nga ginatuytuyan kita sang aton mahigugmaon nga Maayo nga Manugbantay, si Jesus, nga gintangdo mismo ni Jehova sa pagtuytoy sa aton.

20. Ano ang binagbinagon naton sa masunod nga kapitulo?

²⁰ Kabay nga ang imo pagtuon sa sini nga libro magapabakod sang imo gugma kay Jesus kag kay Jehova. Bangod ini nga gugma magatuytoy sa imo sa kabuhi, masapwan mo ang pinakadaku nga paghidait kag pagkakontento nga posible sa sining daan nga kalibutan, kag magakabuhi ka agod dayawon si Jehova sing dayon bangod sang paghatag niya sa aton sang Maayo nga Manugbantay. Siempre pa, ang aton pagtuon tuhoy kay Cristo dapat napasad sa husto nga sadsaran. Kon amo, nagakaigo nga usisaon naton sa Kapitulo 2 ang papel ni Jesus sa katuyuan ni Jehova para sa bug-os nga uniberso.