Ang “Hukom sang Bug-os nga Duta” Pirme Nagahimo sang Matarong

 1. Paano ginpakita ni Abraham nga nagasalig gid sia nga makatarunganon si Jehova? (Tan-awa ang piktyur sa umpisa sini nga artikulo.)

“INDI bala nga matarong lang ang himuon sang Hukom sang bug-os nga duta?” (Gen. 18:25) Paagi sa sini nga pamangkot, ginpakita ni Abraham nga nagasalig gid sia nga mangin makatarunganon si Jehova kon hukman niya ang Sodoma kag Gomorra. Kumbinsido si Abraham nga indi gid mahimo ni Jehova nga “patyon ang matarong nga tawo upod sa malauton.” Pagligad sang mga 400 ka tuig, ginlaragway ni Jehova ang iya kaugalingon: “Ang Igang, himpit ang iya hinimuan, matarong ang tanan niya nga ginahimo. Matutom sia nga Dios kag wala gid sing pagkadimatarong sa iya; matarong sia kag matadlong.”—Deut. 31:19; 32:4.

 2. Ngaa imposible nga mangin indi makatarunganon si Jehova?

² Ngaa nagasalig gid si Abraham nga matarong pirme ang paghukom ni Jehova? Bangod si Jehova ang pinakamaayo nga halimbawa kon parte sa hustisya kag pagkamatarong. Ang Hebreo nga mga tinaga nga ginbadbad “hustisya” ukon “katarungan” kag “pagkamatarong” masami dungan nga ginasambit sa Hebreong Kasulatan. Halos pareho ang kahulugan sang hustisya kag pagkamatarong. Gani bangod si Jehova ang naghatag sang basihan sang kon ano ang matarong, pirme gid matarong ang iya paghukom. Suno man sa iya Pulong, “ginahigugma niya ang pagkamatarong kag katarungan.”—Sal. 33:5.

 3. Maghatag sing halimbawa sang inhustisya sa kalibutan subong.

³ Mapalig-on ang sinsero nga mga tawo kon mabal-an nila nga ginahimo pirme ni Jehova ang matarong, kay lapnag sa kalibutan subong ang inhustisya. Nangin biktima sini kon kaisa ang iban. Halimbawa, may pila nga ginpriso bisan pa wala sila sing sala. Nahilway lang sila sang gintun-an liwat ang ila kaso base sa ebidensia sang DNA test, pero madugay na sila nga napriso bangod sang krimen nga wala nila ginhimo. Makapasubo gid kag makaulugot ining sala nga pagkapriso. Pero para sa mga Cristiano, may isa pa ka sahi sang inhustisya nga mas mabudlay batason.

 4. Paano matilawan ang pagtuo sang isa ka Cristiano?

⁴ Mapaabot sang mga Cristiano nga makaeksperiensia sila sang inhustisya sa gua sang kongregasyon. Pero mahimo matilawan ang aton pagtuo kon may makita kita ukon maeksperiensiahan nga inhustisya sa sulod sang kongregasyon. Ano ang reaksion mo kon matabo ini? Masandad ka bala?

 5. Ngaa indi kita matingala kon may makita ukon maeksperiensiahan nga inhustisya sa sulod sang kongregasyon ang isa ka Cristiano?

⁵ Bangod indi kita tanan himpit kag makahimo kita sing sala, posible nga makaeksperiensia kita sang inhustisya ukon ang iban sa kongregasyon makaeksperiensia sini bangod sa aton. (1 Juan 1:8) Bisan pa indi man ini pirme nagakatabo, ang matutom nga mga Cristiano indi matingala ukon masandad sa sini. Naghatag si Jehova sing laygay paagi sa iya Pulong para buligan kita nga magpabilin nga matutom bisan pa makasala sa aton ang aton mga kauturan.—Sal. 55:12-14.

6, 7. Ano nga inhustisya ang naeksperiensiahan sang isa ka utod, kag ano nga mga kinaiya ang nagbulig sa iya para maatubang ini?

⁶ Binagbinaga ang eksperiensia ni Willi Diehl. Sugod sang 1931, matutom nga nag-alagad si Utod Diehl sa Bethel sa Bern, Switzerland. Sang 1946, nag-eskwela sia sa ikawalo nga klase sang Gilead School sa New York, U.S.A. Pagkagradwar niya, gin-asayn sia nga mag-alagad sa sirkito sa Switzerland. Sa sugilanon sang kabuhi ni Utod Diehl, nagsiling sia: “Sang Mayo 1949, ginpahibalo ko ang ulong-talatapan sa Bern sang plano ko nga [magpangasawa].” Ano ang sabat sang opisina sa Bern? “Wala sing pribilehiyo luwas sa pagregular payunir.” Ginpaathag pa ni Utod Diehl: “Wala ako gintugutan sa paghatag sing mga pamulongpulong . . . Madamo ang wala na nagabugno sa amon, kag gintratar kami kaangay sang na-disfellowship.”

⁷ Ano ang ginhimo ni Utod Diehl sa sini nga sitwasyon? Nagsiling sia: “Apang, nahibaluan namon nga ang pagpakasal indi batok sa Kasulatan, gani nagdangop kami sa pangamuyo kag nagsalig kami kay Jehova.” Sang ulihi, gintadlong ang sala nga pagtamod sa pagpangasawa nga ginbangdan sang inhustisya, kag nabaton liwat ni Utod Diehl ang iya mga pribilehiyo sa pag-alagad. Ginpakamaayo sia bangod sang iya katutom kay Jehova.a Dapat naton pamangkuton ang aton kaugalingon: ‘Ipakita ko man bala ang husto nga panimuot kon makaeksperiensia ako sang inhustisya? Magahulat bala ako kay Jehova, ukon solbaron ko ini sa akon pamaagi?’—Hulu. 11:2; basaha ang Miqueas 7:7.

 8. Ngaa mahimo ka magsala sa pagsiling nga biktima ka ukon ang iban sang inhustisya?

⁸ Pero, mahimo ka man magsala sa pagsiling nga biktima ka ukon ang isa ka utod sang inhustisya. Mahimo ini matabo bangod indi naton nahangpan sing bug-os ang sitwasyon ukon bangod indi kompleto ang nabaton naton nga impormasyon. Husto man ukon sala ang aton paghangop, kon mangamuyo kita kag magsalig kay Jehova, kag mangin matutom sa iya, indi gid kita ‘maakig kay Jehova.’—Basaha ang Hulubaton 19:3.

 9. Ano nga mga halimbawa ang binagbinagon naton sa sini nga artikulo kag sa masunod?

⁹ Binagbinagon naton ang tatlo ka halimbawa sang inhustisya nga natabo sa katawhan ni Jehova sang panahon sang Biblia. Sa sini nga artikulo, binagbinagon naton ang apo sa tuhod ni Abraham nga si Jose kag ang ginhimo sa iya sang iya mga utod. Sa masunod nga artikulo, binagbinagon naton ang ginhimo ni Jehova kay Hari Ahab sang Israel kag ang natabo kay apostol Pedro sa Antioquia sa Siria. Samtang ginabinagbinag naton ini, hibalua kon ano ang makabulig nga mangin husto ang imo panimuot kag mangin suod ka gihapon kay Jehova, ilabi na kon nagapati ka nga nakaeksperiensia ka sang inhustisya.

10, 11. (a) Ano nga mga inhustisya ang naeksperiensiahan ni Jose? (b) May ano nga kahigayunan si Jose sang napriso sia?

¹⁰ Naeksperiensiahan sang matutom nga alagad ni Jehova nga si Jose ang inhustisya indi lamang bangod sang ginhimo sang iban nga tawo kundi sang iya mismo mga utod, kag mas masakit ini. Sang tin-edyer pa si Jose, ginbaligya sia sang iya mga utod bilang ulipon kag ginpuersa sia nga dalhon sa Egipto. (Gen. 37:23-28; 42:21) Sang ulihi, ginsumbong sia nga may tuyo sia kuno nga manglugos kag ginpriso sia gilayon. (Gen. 39:17-20) Nag-antos sia bilang ulipon kag bilang priso sing mga 13 ka tuig. Ano ang matun-an naton sa natabo kay Jose nga makabulig sa aton kon makaeksperiensia kita sang inhustisya bangod sang ginhimo sang isa ka Cristianong utod?

¹¹ May kahigayunan si Jose nga isugid ang iya sitwasyon sa isa man ka priso, ang pangulo nga manugtagay anay sang hari. Sang nangin kaupod ni Jose sa prisuhan ang manugtagay, nagdamgo ang manugtagay kag ginpaathag ni Jose ang kahulugan sang damgo. Ginpaathag ni Jose nga ibalik ang manugtagay sa iya palangakuan sa palasyo sang Paraon. Sang ginsugid ni Jose ang kahulugan nga ginpahibalo sa iya sang Dios, ginpaathag man niya ang iya sitwasyon. May matun-an kita sa ginhambal kag wala ginhambal ni Jose.—Gen. 40:5-13.

12, 13. (a) Base sa ginsiling ni Jose sa manugtagay, ginbaton na lang bala niya ang iya sitwasyon? Ipaathag. (b) Ano ang wala ginhambal ni Jose sa manugtagay?

¹² Basaha ang Genesis 40:14, 15. Talupangda ang ginsiling ni Jose nga “ginpuersa lang [sia] nga dalhon” sa Egipto. Ang termino sa orihinal nga lenguahe literal nga nagakahulugan sing “ginkawat.” Gani biktima sia sang inhustisya. Ginpaathag man ni Jose nga wala niya ginhimo ang sala nga ginpasibangod sa iya amo nga napriso sia. Gani ginpangabay niya ang manugtagay nga isugid ini sa Paraon. Ngaa? Nagsiling sia: “Agod paguaon ako sa sini nga bilangguan.”

¹³ Base sa ginsiling ni Jose, ginbaton na lang bala niya ang iya sitwasyon? Wala. Nahibaluan niya nga biktima sia sang madamo nga inhustisya. Ginpaathag niya ang iya sitwasyon sa manugtagay, nga mahimo makabulig sa iya. Pero indi naton mabasa sa Kasulatan nga ginsugiran ni Jose ang iban, bisan ang Paraon, nga ang mga utod niya amo ang nagpuersa sa iya. Ang matuod, sang nagkadto sa Egipto ang iya mga utod kag nakapasag-uli na sa iya, gin-abiabi sila sang Paraon kag gin-agda nga mag-istar sa Egipto kag tigayunon “ang pinakamaayo nga mga butang sa bug-os nga duta.”—Gen. 45:16-20.

14. Ano ang magabulig sa aton nga malikawan ang paghambal sang malain bisan pa makaeksperiensia kita sang inhustisya sa kongregasyon?

¹⁴ Kon nagapati ang isa ka Cristiano nga biktima sia sang inhustisya, indi gid niya ini dapat ikutsokutso sa iban. Siempre, dapat kita magpabulig sa mga gulang sa kongregasyon kag pahibaluon naton sila kon may utod nga nakahimo sang serioso nga sala. (Lev. 5:1) Pero sa indi serioso nga mga sala, mahimo masolbar ang problema nga indi na ini kinahanglan isugid sa iban, bisan sa mga gulang. (Basaha ang Mateo 5:23, 24; 18:15.) Kabay pa nga sundon gid naton ang mga prinsipio sa Biblia sa sini nga mga sitwasyon. Kon kaisa mahimo marealisar naton nga indi gali kita biktima sang inhustisya. Makapasalamat gid kita nga wala naton ginpakalain ang aton utod kag wala maglala ang sitwasyon! Dumdumon naton nga ang paghambal sing masakit sa iban indi gid makasolbar sang problema, husto man kita ukon indi. Malikawan naton ini kon ginaunungan naton si Jehova kag ang aton mga kauturan. Suno sa salmista, “ang isa nga nagakabuhi nga wala sing kasaypanan” “wala nagapasipala, wala nagahimo sing malain sa iya isigkatawo, kag wala nagapakahuya sa iya mga abyan.”—Sal. 15:2, 3; Sant. 3:5.

15. Paano ginpakamaayo si Jose bangod matutom sia kay Jehova?

¹⁵ May matun-an pa kita parte sa kaangtanan ni Jose kay Jehova. Sa 13 ka tuig nga pag-antos ni Jose, ginpakita niya nga pareho kay Jehova ang iya pagtamod. (Gen. 45:5-8) Wala gid niya ginbasol si Jehova sa natabo sa iya. Bisan pa wala niya malipatan ang iya gin-antos, wala sia maakig. Labaw sa tanan, wala niya gintugutan ang pagkadihimpit kag sala sang iban nga mangin rason nga magpahilayo sia kay Jehova. Bangod matutom si Jose, nakita niya kon paano ginsolbar ni Jehova ang inhustisya kag ang pagpakamaayo sang Dios sa iya kag sa iya pamilya.

16. Ngaa dapat kita magpalapit pa gid kay Jehova kon makaeksperiensia kita sang inhustisya?

¹⁶ Dapat man naton pabaloran kag amligan ang aton kaangtanan kay Jehova. Indi gid naton pagtugutan ang pagkadihimpit sang aton mga kauturan nga mangin rason nga magpahilayo kita sa Dios nga aton ginapalangga kag ginasimba. (Roma 8:38, 39) Sa baylo, kon makaeksperiensia kita sang inhustisya bangod sang aton utod, sundon naton si Jose kag magpalapit pa gid kita kay Jehova. Hibaluon naton ang pagtamod ni Jehova kag sundon ini. Kon nahimo na naton ang aton masarangan sa pagsolbar sa problema paagi sa pagsunod sang mga prinsipio sa Kasulatan, itugyan na naton ini kay Jehova, kag magsalig nga solbaron niya ini sa nagakaigo nga tion kag pamaagi.

17. Paano naton mapakita nga nagasalig kita sa “Hukom sang bug-os nga duta”?

¹⁷ Samtang nagakabuhi kita sa sini nga sistema, makaeksperiensia gid kita sang inhustisya. Kon kaisa, ikaw ukon ang kilala mo mahimo makaeksperiensia ukon makakita sang inhustisya sa kongregasyon. Indi magpasandad sa sini. (Sal. 119:165) Sa baylo, magpabilin kita nga matutom sa Dios, mangamuyo kita, kag magsalig sa iya. Dumdumon man naton nga mahimo indi kompleto ang nabaton naton nga impormasyon. Kag bangod indi kita himpit, mahimo nga indi naton nahangpan sing bug-os ang sitwasyon. Subong sang natun-an naton kay Jose, likawan naton ang paghambal sang malain, kay nagapalala lamang ini sang problema. Sa baylo nga solbaron ini sa aton pamaagi, mangin matutom kita kay Jehova kag maghulat sa iya sa pagsolbar sini. Mahamuot gid si Jehova kag pakamaayuhon niya kita, pareho sang natabo kay Jose. Sigurado gid nga pirme matarong ang himuon ni Jehova, ang “Hukom sang bug-os nga duta,” kay “matarong ang tanan niya nga ginahimo.”—Gen. 18:25; Deut. 32:4.

18. Ano ang binagbinagon naton sa masunod nga artikulo?

¹⁸ Sa masunod nga artikulo, binagbinagon naton ang duha pa ka halimbawa sang inhustisya nga natabo sa katawhan ni Jehova sang panahon sang Biblia. Buligan kita sini nga mahangpan nga importante ang pagpaubos kag ang kahanda sa pagpatawad para mangin makatarunganon kita pareho kay Jehova.