Sin-o ang Manggaranon nga Tawo kag si Lazaro?

Ang manggaranon nga tawo kag si Lazaro mga karakter sa istorya nga ginsugid ni Jesus. (Lucas 16:19-31) Sa istorya, ini sila nagarepresentar sang duha ka grupo sang mga tawo: (1) ang bugalon nga Judiyo nga mga lider sang relihion sang panahon ni Jesus kag (2) ang ordinaryo kag sinsero nga mga tawo nga nagbaton sang mensahe ni Jesus.

Sa sini nga artikulo

• Ano ang ginsiling ni Jesus parte sa manggaranon nga tawo kag kay Lazaro?

• Matuod bala ini nga natabo?

• Ginasuportahan bala sini nga istorya ang doktrina sang impierno?

• Ano ang buot silingon sang istorya parte sa manggaranon nga tawo kag kay Lazaro?

Sa Lucas kapitulo 16, ginlaragway ni Jesus ang duha ka tawo nga nakaeksperiensia sang daku nga pagbag-o sang ila sitwasyon.

Amo ini ang sumaryo sang istorya ni Jesus: Ang manggaranon nga tawo nagakabuhi sing masulhay. Ang manugpakilimos nga si Lazaro ara sa geyt sang manggaranon nga tawo; nagapaabot sia nga makakaon sang usik nga nagakalahulog sa lamesa sang manggaranon nga tawo. Sang ulihi, napatay si Lazaro, kag gindala sia sang mga anghel sa tupad ni Abraham. Ang manggaranon nga tawo napatay man kag ginlubong. Suno sa istorya, ginlaragway sila nga duha nga nagakabuhi pagkatapos nga napatay. Ang manggaranon nga tawo nagaantos sa nagadabdab nga kalayo kag ginpangabay niya si Abraham nga suguon si Lazaro para pabugnawan ang iya dila paagi sa isa ka tulo sang tubig sa tudlo ni Lazaro. Wala ginpasugtan ni Abraham ang pangabay sang manggaranon nga tawo kag nagsiling pa sia nga nagbaliskad na ang kahimtangan nila nga duha kag may daku nga kadadalman sa tunga nila nga indi matabok.

Indi. Isa ini ka parabola ukon istorya nga ginsugid ni Jesus para magtudlo sing isa ka leksion. Ugyon man ang mga scholar nga isa ini ka parabola. Halimbawa, ang isa ka subheading sang 1912 nga edisyon sang Luther’s Bible nagsiling nga isa ini ka parabola. Kag sa footnote sang Catholic Jerusalem Bible, mabasa nga isa ini ka “parabola nga wala sing ginatumod nga tawo nga nagkabuhi.”

Ginatudlo bala ni Jesus nga may pihak nga kabuhi? Buot bala niya silingon nga may mga tawo nga nagaantos sa impierno kon mapatay sila kag nga si Abraham kag si Lazaro ato sa langit? May mga ebidensia nga indi amo sina ang ginatudlo ni Jesus.

Halimbawa:

• Kon ang manggaranon nga tawo nagaantos sa nagadabdab nga kalayo, indi bala nga magamala ang tubig sa punta sang tudlo ni Lazaro bangod sa kalayo?

• Bisan pa nga indi magmala ang tubig, mapaumpawan bala sang isa ka tulo nga tubig ang manggaranon nga tawo nga nagaantos sa nagadabdab nga kalayo?

• Paano natabo nga buhi si Abraham sa langit, kay maathag nga nagsiling si Jesus nga asta sang ginhambal niya ini nga parabola, wala pa sing nakakadto sa langit?—Juan 3:13.

Wala. Bisan pa nga indi ini literal nga istorya, ang pila nagabais nga ginasimbulo sini ukon nagakahulugan ini nga ang maayo nga mga tawo makadto sa langit kag ang malain nga mga tawo ginapaantos sa impierno.a

Husto bala ini nga argumento? Indi.

Ang panudlo parte sa impierno wala nagaugyon sa ginasiling sang Biblia parte sa sitwasyon sang mga patay. Halimbawa, wala ini nagsiling nga ang tanan nga maayo nga tawo nga napatay malipayon nga magakabuhi sa langit ukon ang malain nga mga tawo paantuson sa impierno. Kundi ang Biblia maathag nga nagasiling: “Ang mga buhi nakahibalo nga mapatay sila, apang ang mga patay wala gid sing nahibaluan.”—Manugwali 9:5.

Ginapakita sang istorya nga ang duha ka grupo sang mga tawo nakaeksperiensia sang daku nga pagbag-o sang ila sitwasyon.

Ang manggaranon nga tawo maathag nga nagasimbulo sa Judiyo nga mga lider sang relihion, nga ‘mahigugmaon sa kuarta.’ (Lucas 16:14) Namati sila kay Jesus, pero ginakontra nila ang iya mensahe. Ginapakanubo man nila ang ordinaryo nga mga tawo.—Juan 7:49.

Si Lazaro nagasimbulo sa ordinaryo nga mga tawo nga nagbaton sang mensahe ni Jesus kag ginapakanubo sang Judiyo nga mga lider sang relihion.

Ang pagbag-o sang sitwasyon daku gid sa kada grupo.

• Abi sang Judiyo nga mga lider sang relihion nalipay sa ila ang Dios. Pero pareho lang nga napatay sila, sang wala sila ginbaton sang Dios kag pati man ang ila paagi sa pagsimba kay ginkontra nila ang mensahe ni Jesus. Kag daw pareho lang nga nagaantos sila sa mensahe nga ginasugid ni Jesus kag sang iya mga sumulunod.—Mateo 23:29, 30; Binuhatan 5:29-33.

• Ang ordinaryo nga mga tawo, nga madugay na nga ginbalewala sang mga lider sang ila relihion, ginapaboran na subong. Madamo sa ila ang nagbaton sang gintudlo ni Jesus kag nakabenepisyo sila sa sini. Gani may kahigayunan na sila nga mabaton ang pabor sang Dios asta san-o.—Juan 17:3.