Samuela Iharuana

14 Seruia ena natuna Ioaba+ ia kamonai, king ia ura bada ena natuna Abesaloma ia itaia.+ 2 Vadaeni Ioaba ese Tekoa dekenai hereva ia siaia,+ bona unuseni amo aonega hahine ta ia boiria bona ia dekenai ia gwau: “Mani ia taitai hahine ta bamona oi kara, bona taitai dabua oi atoa, bona oi sibona dekenai dehoro oi dahua lasi.+ Nega daudau lalonai mase tauna ta totona ia taitai hahinena bamona oi kara. 3 Bena oi vareai lao bona king dekenai inai bamona oi hereva.” Vadaeni Ioaba be hahine ese do ia gwauraia herevadia be ia dekenai ia gwauraia.

4 Bena unai Tekoa hahine ia vareai lao bona king vairanai ia goru diho bona ena vairana be tano dekenai ia atoa diho bona ia gwau: “King e, mani lau oi durua!” 5 King ese ia haere henia, ia gwau: “Emu hekwakwanai be dahaka?” Unai neganai ia gwau: “Madi, lau be vabu bona egu adavana ia mase vadaeni. 6 Bona lau, emu hesiai hahine, be mai egu natudia memero rua, bona idia ruaosi be rei gabunai idia heatu heheni. Ta ia noho lasi idia ruaosi ia koua totona, bona ta ese ma ta ia botaia bona ia alaia mase. 7 Vadaeni hari egu ruma bese taudia ibounai be lau, emu hesiai hahine, dekenai idia badu bona idia gwau, ‘Ai dekenai ena tadikaka ia hamasea tauna oi henia, ena be ia be emu natuna tamona sibona,* to ena tadikaka ena mauri* dainai ia do ai hamasea!’+ Idia ura egu natuna, ia do mauri noho natuna, idia hamasea, unai be hegeregere ia araia noho gida be ta ese ia habodoa bamona. Bena tanobada ai egu adavana ena ladana do ia boio bona iena natuna ta be do ia mauri lasi.”

8 Bena king be hahine dekenai ia gwau: “Oiemu ruma dekenai oi lao, bona inai hekwakwanai do lau hamaoromaoroa.” 9 Unai neganai, Tekoa hahine be king dekenai ia gwau: “Egu lohia bona king e, namona be lau bona egu tamana ena bese taudia ese egu natuna ena kerere davana idia abia. To oi bona emu lohia besena be do umui kerere lasi.” 10 Bena king ia gwau: “Bema tau ta be oi dekenai hereva ma haida ia gwauraia, ia be lau dekenai oi mailaia bona oi do ia hahekwakwanaia lou lasi.” 11 To hahine ia gwau: “Mani king ese Iehova emu Dirava ia noinoi henia,* unai amo rara davana ia haloua tauna+ ese dika bada do ia havaraia lasi bona egu natuna do ia hamasea lasi.” Unai neganai king ia gwau: “Lau ese Iehova, ia mauri noho Diravana, ena ladana ai+ oi lau hamaoroa momokani, emu natuna ena huina ta be tano dekenai do ia moru lasi.” 12 Vadaeni hahine be ia gwau: “Mani lau, emu hesiai hahine, be egu lohia bona king dekenai ia hereva.” Bena king ia gwau: “Oi hereva!”

13 Vadaeni hahine ia gwau: “King e, dahaka dainai Dirava ena taunimanima oi hahisia totona inai bamona oi karaia?+ Oi ese emu natuna oi lulua bona ia oi abia giroa lasi, unai dainai oi gwauraia herevana dekenai oi kerere.+ 14 Ita ibounai do ita mase bona tano dekenai idia bubua ranuna bamona ai do ita lao, bona ta ese do ia abia lou lasi. To Dirava ese ta ena mauri* do ia kokia lasi. Bema idia ese ta idia lulua, vadaeni ia ese idia lulua tauna do ia mailaia lou ena badina ia laloa. 15 Lau be egu king bona lohia dekenai inai hereva gwauraia totona lau mai, badina taunimanima ese lau idia hagaria. Unai dainai lau, emu hesiai hahine, be sibona dekenai lau gwau, ‘Mani king dekenai lau hereva. Reana king ese ena hesiai hahine ena noinoi do ia abia dae. 16 Reana king do ia kamonai bona lau bona egu natuna tamona do ia hamauria, ai ia ura alaia tauna ena imana amo. Badina bema ai ia alaia, Dirava ese ai dekenai ia henia ahuna do ai abia lasi.’+ 17 Bena lau gwau, ‘Mani egu lohia bona king ena hereva ese lau dekenai laga-ani ia henia,’ badina egu king bona lohia be Dirava momokanina ena aneru ta bamona, kara namo bona kara dika edia idau ia gwauraia diba. Mani Iehova emu Dirava be oi ida ia noho.”

18 Vadaeni king ese hahine ia haere henia, ia gwau: “Oi lau nanadaia neganai, mani lau amo gau ta oi hunia lasi.” Hahine ia haere: “Lauegu lohia bona king e, mani oi hereva.” 19 Bena king ia henanadai: “Ioaba ese oi ia durua bona inai gaudia ibounai oi gwauraia, a?”+ Hahine ia haere: “Egu lohia bona king e, oi lau hamaoroa momokani, emu hereva be maoro, badina emu hesiai tauna Ioaba ese lau ia hadibaia unai hereva ibounai lau gwauraia totona. 20 Emu hesiai tauna Ioaba ese inai ia karaia, unai amo emu lalohadai Abesaloma dekenai do oi haidaua, to egu lohia ena aonega be Dirava momokanina ena aneru ena aonega bamona bona inai tano lalonai idia vara gaudia ibounai oi diba.”

21 Bena king be Ioaba dekenai ia gwau: “Ia namo, unai bamona do lau karaia.+ Oi lao bona egu natuna Abesaloma oi hakaua mai.”+ 22 Unai neganai Ioaba ia goru diho bona ena vairana be tano dekenai ia atoa diho bona king ia hanamoa, ia gwau: “Egu lohia bona king e, hari dina emu hesiai tauna ia diba, oi ese ia oi lalonamo henia, badina king ese ena hesiai tauna ena noinoi ia abia dae.” 23 Bena Ioaba ia toreisi bona Gesuru+ dekenai ia lao bona Abesaloma be Ierusalema dekenai ia hakaua mai. 24 To king ia gwau: “Namona be ena ruma dekenai ia giroa lou, to egu vairana do ia itaia lasi.” Unai dainai Abesaloma be ena ruma dekenai ia giroa lou bona ia ese king ena vairana ia itaia lasi.

25 Israela ibounai lalonai Abesaloma be ena hairai dainai idia hanamoa bada, ma ta be unai bamona idia hanamoa lasi. Iena aena amo ela bona ena kwarana dekenai dika ta be lasi. 26 Iena huina ia utua neganai, huina ena metau be 200 sikel.* (Ena huina be lagani ta ta ibounai edia dokonai idia utua, badina ia metau momokani.) 27 Abesaloma be mai ena natudia memero toi+ bona natuna kekeni tamona, iena ladana be Tamara. Bona ia be hairai momokani.

28 Bona Abesaloma be Ierusalema ai lagani rua ia noho, to king ena vairana ia itaia lasi.+ 29 Unai dainai Abesaloma ese Ioaba ia boiria king dekenai ia siaia lao totona, to Ioaba ia mai lasi. Bena Abesaloma be nega iharuana ia totona hereva ia siaia, to Ioaba ia ura lasi ia mai. 30 Dokonai, ena hesiai taudia dekenai ia gwau: “Ioaba ena tano be lauegu tano kahirakahira bona ena bali haida be unuseni idia noho. Umui lao bona lahi amo umui gabua.” Vadaeni Abesaloma ena hesiai taudia idia lao bona unai uma be lahi dekenai idia gabua. 31 Unai neganai Ioaba ia toreisi bona Abesaloma ena ruma dekenai ia lao bona ia gwau: “Dahaka dainai emu hesiai taudia ese egu uma be lahi dekenai idia gabua?” 32 Abesaloma ese Ioaba ia haere henia: “Itaia, lau ese oi dekenai inai hereva lau siaia, ‘Oi mai bona oi be king dekenai do lau siaia bona ia do oi nanadaia: “Dahaka dainai Gesuru amo lau mai?+ Do ia namo bema unuseni lau noho. Vadaeni namona be king ena vairana lau itaia, bona bema lau dekenai kerere ta ia noho, lau ia hamasea be namo.”’”

33 Unai dainai Ioaba be king dekenai ia lao bona unai gaudia ia gwauraia. Bena king ese Abesaloma ia boiria, vadaeni Abesaloma ia vareai lao bona king vairanai ia goru diho bona ena vairana be tano dekenai ia atoa diho. Bena king ese Abesaloma ia kisi henia.+