King Taudia Iharuana

14 Israela ena king Iehoahasa ena natuna Iehoasa+ ena lohia lagani iharuana ai, Iuda ena king Iehoasa ena natuna Amasaia be king ai ia lao. 2 Iena mauri lagani be 25 neganai, king ai ia lao, bona lagani 29 lalonai Ierusalema ai ia lohia. Iena sinana ena ladana be Iehoadini, ia be Ierusalema amo.+ 3 Ia be Iehova ena vairanai kara maoromaoro ia badinaia noho, to iena sene tauna Davida bamona lasi.+ Ia karaia gaudia ibounai be iena tamana Iehoasa ese ia karaia bamona.+ 4 To, ataiai gabudia* idia kokia lasi,+ bona unuseniai taunimanima be boubou gaudia idia do bouboulaia bona gabua bouboudia edia kwalahu be edia dirava dekenai idia daekau noho.+ 5 Ia ese basileia ia biagua momokani neganai, iena hesiai taudia ia hamasedia, iena tamana, king idia hamasea taudia unai.+ 6 To unai ala-ala taudia edia natudia ia hamasedia lasi, unai be Mose ena Taravatu bukana lalonai Iehova ena oda hereva ia noho hegeregerena, ia gwau: “Namo lasi natudia edia kara dika dainai tamadia idia hamasea, bona namo lasi tamadia edia kara dika dainai natudia idia hamasea. Ta be sibona ena kara dika dainai idia hamasea be namo.”+ 7 Ia ese Damena Koura+ ai Edoma taudia+ 10,000 ia hamasea, bona tuari lalonai Sele siti ia abia,+ bona ena ladana ia hatoa Iokotele ema bona hari.

8 Bena Amasaia ese gwaukau taudia be Iehoasa dekenai ia siaia lao. Iehoasa be Iehoahasa ena natuna bona Israela ena king Iehu ena tubuna mero. Amasaia ia gwau: “Mai, ita tuari heheni.”+ 9 Israela ena king Iehoasa ese Iuda ena king Amasaia dekenai inai hereva ia siaia: “Lebanona ai ia noho ava ginigini ese Lebanona ai ia noho sida au dekenai hereva ta ia siaia, ia gwau, ‘Oiemu natuna kekeni be egu natuna mero dekenai oi henia, ia adavaia totona.’ To, Lebanona ena dagedage animal ia hanaia bona ava ginigini ia moia diho. 10 Momokani, oi ese Edoma oi hadikaia+ dainai oi hekokoroku. Oi kwalimu dainai oi moale, to emu ruma lalonai oi noho. Dahaka dainai oi ura dika oi havaraia bona oi bona Iuda besena oi hamorua?” 11 To Amasaia ia kamonai lasi.+

Vadaeni Israela ena king Iehoasa ia daekau lao, bona ia bona Iuda ena king Amasaia be Iuda ena siti ta,+ Bete-semese+ ai idia tuari. 12 Iuda taudia be Israela taudia ese idia halusia, bena idia ta ta be edia palai rumadia dekenai idia heau lao. 13 Israela ena king Iehoasa ese Bete-semese ai Iuda ena king Amasaia ia halusia. Amasaia be Iehoasa ena natuna, Iehoasa be Ahasaia ena natuna. Bena Ierusalema dekenai idia mai, bona King Iehoasa ese Ierusalema ena magu ia hadikaia, Eparaima Iduarana+ amo ela bona Kona Iduarana+ dekenai, unai be 400 kiubit.* 14 Ia ese Iehova ena ruma ai bona king ena ruma ai dava bada kohudia idia noho daiutudia lalonai golo, siliva bona dava bada kohudia ibounai bona lohia taudia edia natudia danu ia abia. Bena Samaria dekenai ia giroa lou.

15 Iehoasa ena sivarai ibounai, ia karaia gaudia bona iena siahu bona Iuda ena king Amasaia ia tuari henia dalana, be Israela ena king taudia edia buka lalonai idia torea, ani? 16 Bena Iehoasa ia mase* bona ia be Samaria+ dekenai Israela ena king haida idia guria gabuna ai idia guria. Bona iena natuna Ieroboama*+ be king ai ia lao.

17 Israela ena king Iehoahasa+ ena natuna Iehoasa ia mase murinai, Iuda ena king Iehoasa+ ena natuna Amasaia+ be lagani 15 ia noho. 18 Amasaia ena sivarai ibounai, be Iuda edia king taudia edia buka lalonai idia torea, ani? 19 Unai murinai haida ese Ierusalema ai ia hamasea totona palani idia karaia,+ bona ia be Lakisi dekenai ia heau lao, to idia ese Lakisi dekenai tatau haida idia siaia lao bona unuseniai ia idia hamasea. 20 Bena ia be kariota dekenai idia atoa bona idia abia giroa lou, bona Ierusalema ai Davida Ena Siti dekenai ena sene taudia idia guria gabuna ai idia guria.+ 21 Bena Iuda taudia ibounai ese Asaraia,*+ mauri lagani 16 merona+ idia abia bona ena tamana Amasaia ena gabu ai king ai idia halaoa.+ 22 Ia ese Elata+ siti ia haginia lou bona Iuda ena hanua ta ai ia halaoa, unai murinai king* be ia mase.*+

23 Iuda ena king Iehoasa ena natuna Amasaia ena lohia lagani namba 15 ai, Israela ena king Iehoasa ena natuna Ieroboama+ be Samaria ai king ai ia lao, bona ia be lagani 41 lalonai ia lohia. 24 Ia be Iehova ena vairanai ia kara dika noho. Ia ese Nebata ena natuna Ieroboama ena kara dikadia ibounai, Israela taudia ia hakaua idia karaia kara dikadia unai, amo ia raka-siri lasi.+ 25 Ia ese Israela ena tano hetoana ia hanamoa, Lebo-hamata+ amo ela bona Arabaha Davarana+ dekenai. Israela ena Dirava, Iehova, ese ena hesiai tauna Amitai ena natuna Iona,+ Gata-hepere amo ia mai peroveta tauna unai,+ dekenai ia gwauraia herevana hegeregerena. 26 Badina Israela ese ia mamia hisihisi dikana be Iehova ese ia itaia vadaeni.+ Ta ia noho lasi, ladana bada lasi taudia danu, Israela idia durua totona. 27 To Iehova be ia gwauhamata Israela ena ladana be tanobada amo do ia kokia lasi.+ Unai dainai Iehoasa ena natuna Ieroboama ena imana amo ia hamauridia.+

28 Bona Ieroboama ena sivarai ibounai, ia karaia gaudia ibounai danu bona ena siahu, ia tuari daladia bona Israela ai Damaseko+ bona Hamata+ ia hanamoa daladia, be Israela ena king taudia edia buka lalonai idia torea, ani? 29 Bena Ieroboama be ia mase* bona Israela edia king idia guria gabuna ai idia guria. Bona iena natuna Sekaraia+ be king ai ia lao.