Hadibaia Tauna

8 Daika be laloparara tauna bamona? Daika be hekwakwanai hamaoromaoroa dalana* ia diba? Tau ta ena laloparara karana ese ena vairana ia hadiaria bona ena vairana aukana ia hamanaua.

2 Lau gwau: “King ena oda do oi badinaia,+ badina Dirava dekenai gwauhamata metauna oi karaia vadaeni.+ 3 King ena vairana amo do oi raka siri haraga lasi.+ Bona kara kererena ta lalonai oi vareai lasi,+ badina king be ena ura gauna do ia karaia sibona. 4 King ena hereva be mai ena siahu,+ bona ta be ia dekenai do ia gwau lasi, ‘Oi be dahaka oi karaia noho?’”

5 Oda herevadia ia badinaia tauna be dika do ia davaria lasi,+ bona aonega tauna be do ia diba edena be nega maorona bona do ia diba dahaka do ia karaia.+ 6 Taunimanima edia hekwakwanai be momo herea dainai, namona be gau ibounai be dala maorona ai bona nega maorona ai idia hamaoromaoroa.+ 7 Do ia vara gauna be ta ia diba lasi dainai, unai do ia vara dalana be daika ese do ia gwauraia diba?

8 Tau ta be ena mauri siahuna* ia biagua diba lasi, eiava mauri siahuna be ena tauanina ia rakatania neganai ia koua diba lasi, unai dainai ta be siahu lasi ena mase dinana ia koua totona.+ Tuari lalonai tau ta be tuari ia rakatania diba lasi, unai hegeregerena kara dika ese kara dika idia karaia taudia do ia ruhaia lasi.*

9 Tanobada dekenai* idia karaia gaudia ibounai lau stadilaia murinai, unai gaudia ibounai lau dibaia. Unai nega ibounai lalonai, taunimanima ese ta ta idia biagua bona idia hahisia.*+ 10 Bona lau itaia kara dika taudia idia guria, idia be guna helaga gabuna dekenai idia raka vareai bona raka-lasi. Daudau lasi murinai, siti ai idia noho taudia ese unai kara dika taudia idia laloaboio.+ Unai danu be anina lasi momokani.

11 Kara dika ena davana be idia henia haraga lasi dainai,+ taunimanima be mai gari lasi ida kara dika idia karaia.+ 12 Ena be kara dika tauna be reana nega 100 do ia kara dika bona ia mauri daudau, to lau diba Dirava momokanina idia gari henia taudia edia mauri be do ia namo, badina idia be Dirava idia gari henia.+ 13 To kara dika tauna ena mauri be do ia dika,+ bona ena mauri dinadia be dina ena laulau bamona do ia boio haraga,+ badina ia be Dirava ia gari henia lasi.

14 Tanobada ai ia vara anina lasi karana ta be inai: Kara maoromaoro taudia be kara dika taudia bamona idia kara henidia,+ bona kara dika taudia be kara maoromaoro taudia bamona idia kara henidia.+ Lau gwau diba unai danu be anina lasi momokani.

15 Unai dainai lau laloa tanobada dekenai tau ta ia aniani, ia inuinu, bona ia moale be namo.+ Iena mauri dinadia lalonai unai do ia karaia bona do ia gaukara goadagoada.+ Unai mauri dinadia be Dirava momokanina ese ia dekenai ia henia.

16 Mai lalona ibounai ida aonega lau tahua bona tanobada dekenai idia vara gaudia* ibounai lau stadilaia,+ bona danu dina bona hanuaboi lalonai lau mahuta lasi.* 17 Bena Dirava momokanina ena gaukara ibounai lau laloa, bona lau davaria taunimanima be tanobada dekenai idia vara gaudia idia lalopararalaia diba lasi.+ Herevana taunimanima idia hekwarahi bada, to idia laloparara diba lasi. Ena be idia gwau edia aonega be bada, to idia laloparara be auka.+