Aposetolo Edia Kara

27 Abia hidi idia karaia ai be sisima amo Italia dekenai do ai lao neganai,+ idia ese Paulo bona dibura taudia ma haida be ami ofesa ta ladana Iulio ena siahu henunai idia atoa, ia be Augusto ena tuari orea tauna ta. 2 Vadaeni sisima ta be Adaramuteno amo ia mai bona Asia provinsi ena kone kahana dekenai do ia lao. Ai be unai sisima dekenai ai guia bona Tesalonika amo ia mai Makedonia tauna, Arisitako,+ be ai ia bamoa. 3 Murina dinana ai, Sidono dekenai ai ginidae bona Iulio be mai hebogahisi ida Paulo ia kara henia bona gwaumaoro ia henia ena turadia dekenai do ia lao, ia idia durua totona.

4 Unai gabu ai rakatania neganai, lai be emai vaira kahana amo ia toa, unai dainai Kupro kahirakahira ai heau. 5 Bena Kilikia bona Pamupulia edia gadobada kahanai ai heau lao ela bona Mura ena haba dekenai ai ginidae, unai be Lukia tanona ai. 6 Unuseniai ami ofesa ese Alesandria amo ia mai sisima ta ia davaria. Unai sisima be Italia dekenai ia lao gwauraia, bona ai ia oda henia unai sisima dekenai do ai guia. 7 Bena dina haida lalonai metairametaira mai hekwarahi ida ai heau lao bona Kenido dekenai ai ginidae. To lai be ia toa goadagoada dainai, Salamone dekenai ai lao bona Kerete ena kone kahirakahira ai heau lao. 8 Bona mai hekwarahi ida kone kahana ai badinaia ela bona gabu ta ladana Haba Namona dekenai ai ginidae, unai be Lasea siti kahirakahira.

9 Dina haida idia ore to davara ia dika dainai ai heau diba lasi, bona Kara Dika Davana Karaia Dinana ena aniani lasi* negana+ ia ore, unai dainai Paulo be ena lalohadai ia gwauraia, 10 ia gwau: “Tatau e, lau diba iseda laolao do ia dika bona gau momo do ita haboioa. Kago bona sisima sibona lasi, to iseda mauri danu.” 11 To ami ofesa ese sisima taria tauna bona sisima ena biaguna edia hereva ia abia dae, to Paulo ena hereva ia kamonai lasi. 12 Keru negana lalonai, unai gabu be namo lasi ai noho totona. Vadaeni momo idia gwau unai gabu do ai rakatania bona Poinike dekenai do ai lao, bona keru negana lalonai unuseniai do ai noho. Poinike be Kerete ena haba ta mai ena vareai gabudia rua, ta be notist kahanai bona ta be sautist kahanai.

13 Saut kahana amo lai namona ia toa neganai, idia laloa idia lao henia gabuna dekenai idia ginidae diba, vadaeni dogo idia veria daekau bona Kerete ena kone idia badinaia. 14 To nega sisina murinai, lai badana ta ladana Iuroakwilo* ia toa. 15 Vadaeni lai ia goada momokani dainai, sisima be hegeregere lasi lai ia heau henia totona, bona lai ese ai ia odaia lao. 16 Bena ai be motumotu maragina ta ladana Kauda ena lai bada lasi kahanai ai heau, bona ai hekwarahi bada sisima ena murina kahana amo bouti maragina ai veria totona. 17 To bouti maragina idia veria daekau murinai, kwanau amo sisima idia kwatua auka. Idia gari, dika sisima be Sitis* davara ena miri dekenai ia kamokau, vadaeni palai ena varo idia ruhaia bona lai ese sisima ia odaia lao. 18 To lai be mai dagedage bada ida sisima ia botaia dainai, murina dinana ai kohu haida idia negea matamaia, sisima ia metau lasi totona. 19 Bona dina ihatoina ai, sisima ena kwanau idia negea.

20 Vadaeni dina momo lalonai dina bona hisiu idia hedinarai lasi, bona lai gubana be mai dagedage ida sisima ia botaia dainai ai laloa do ai mase. 21 Bona nega daudau lalonai idia aniani lasi murinai, Paulo be idia huanai ia gini bona ia gwau: “Tatau e, bema guna egu hereva umui kamonai bona Kerete ita rakatania lasi, inai dika do ita davaria lasi bona kohu danu do ita haboioa lasi.+ 22 To hari umui lau hamaoroa emui lalona ia goada be namo, badina umui ta ena mauri do ia boio lasi, to sisima sibona do ia boio. 23 Lau be Dirava ena hesiai gaukara helagana lau karaia bona ia be egu biaguna. Hanuaboi ai ena aneru ta+ be lau badinai ia gini, 24 bona ia gwau: ‘Paulo e, oi gari lasi, oi be Kaisara vairanai do oi gini.+ Bona Dirava ese oi ida sisima ai idia noho taudia ibounai do ia hamauria.’ 25 Unai dainai tatau e, emui lalona ia goada be namo, lau be Dirava lau abidadama henia, bona lau dekenai ia gwauraia hegeregerena do ia vara momokani. 26 To ita be motumotu ta ena kone dekenai do ita hure daekau.”+

27 Bena dina namba 14 ena hanuaboi ai, Adaria Davarana ai hurehure ese ai ia doria lao doria mai, bona malokihi ai sisima ai idia gaukara taudia idia mamia ai be tano kahirakahira dekenai ai lao. 28 Hahetohoa gauna amo davara ena dobu idia tahua bona idia davaria ena dobu be 36 mita bamona.* Vadaeni sisima ia heau lao sisina bona davara ena dobu idia tahua lou bona idia davaria ena dobu be 27 mita bamona.* 29 Bona idia gari, dika sisima be nadi dekenai do ia heau daekau, unai dainai sisima ena murina kahana amo dogo 4 idia negea diho bona idia ura bada daba do ia rere haraga. 30 To sisima ai idia gaukara taudia idia ura idia heau boio dainai, idia koikoi bona bouti maragina be davara dekenai idia hadihoa, toana be idia ura sisima ena vaira kahanai dogo idia atoa diho. 31 Paulo be ami ofesa bona tuari taudia dekenai ia gwau: “Unai tatau be sisima lalonai idia noho be namo, bema lasi, do umui mauri lasi.”+ 32 Vadaeni tuari taudia ese bouti maragina ena kwanau idia utua oho bena ia moru.

33 Kahirakahira daba ia rere neganai, Paulo ese idia ibounai ia hagoadaia idia aniani totona, ia gwau: “Umui be lalohekwarahi ida umui gima noho bona hari be dina namba 14, bona aniani ta umui ania lasi. 34 Unai dainai umui lau hagoadaia, emui namo totona aniani haida umui ania be namo. Umui ta ena kwarana ena huina ta do ia boio lasi.” 35 Unai ia gwauraia murinai, paraoa ia abia bona idia ibounai vairanai Dirava ia tanikiu henia, bena ia makohia bona ia ania matamaia. 36 Vadaeni idia ibounai edia lalona ia goada bona idia danu idia aniani matamaia. 37 Sisima dekenai ai noho taudia ibounai be 276. 38 Idia bogakunu neganai, witi be davara dekenai idia negea diho, sisima ia metau lasi totona.+

39 Daba ia rere neganai, tano idia itaia namonamo lasi,+ to gohu ta mai ena kone idia itaia, bona idia laloa bema hegeregere, sisima be unai kone dekenai do idia abia lao. 40 Bena dogo ena kwanau idia utua bona dogo be davara dekenai idia moru, bona taria gaudia rua edia kwanau danu idia ruhaia bona sisima ena vaira kahanai ia noho palai maragina idia abia isi murinai, kone dekenai idia heau lao. 41 To davara ena miri dekenai idia kamokau, bona davara be sisima ena kahana kahana ia botaia, bona sisima ena vaira kahana be miri dekenai ia kamokau bona ia marere diba lasi, bena sisima ena murina kahana be hurehure ese ia makohia maragimaragi matamaia.+ 42 Unai neganai tuari taudia idia ura dibura taudia idia alaia, unai amo idia ta do ia nahu oho bona heau boio lasi. 43 To ami ofesa ia ura Paulo ia gimaia namonamo, unai amo tuari taudia ia koua bona edia palani idia hagugurua lasi. Bona oda ia henia: “Nahu umui diba taudia be davara lalonai umui paudobi, unai amo kone dekenai do umui ginidae guna. 44 Bona gabeai umui haida umui paudobi, haida be au latanai bona ma haida be sisima ena kohu haida latanai umui hure lao.” Vadaeni unai dala amo idia ibounai be kone dekenai idia ginidae, dika idia davaria lasi.+