Revareva Ginigunana Korinto Taudia Dekenai

4 Ai be Keriso henunai ai gaukara hesiai taudia bona Dirava ena hunia hereva helagana ai naria taudia, namona be taunimanima ese ai be unai bamona idia laloa.+ 2 Danu, unai naria taudia amo idia tahua gauna be inai: Namona be idia ese edia gaukara idia karaia momokani. 3 Lau laloa bema umui eiava diadi taudia ese egu kara idia tahua, unai be gau badana lasi. Momokani, lau danu be sibona egu kara lau tahua lasi. 4 Badina lau diba lau be kerere ta lau karaia lasi. To unai ese ia hamomokania lasi lau be kara maoromaoro tauna, egu kara ia tahua tauna be Iehova.*+ 5 Unai dainai, gau ta umui hahemaoro henia haraga lasi,+ umui naria ela bona Lohiabada do ia mai. Ia ese dibura lalonai idia hunia gaudia be diari lalonai do ia hahedinaraia, bona kudouna ena ura do ia hahedinaraia, bena taunimanima ta ta ese Dirava amo hanamoa do idia abia.+

6 Tadikaka e, lau ese unai gaudia lau herevalaia neganai, lau bona Apolo+ emai haheitalai lau gaukaralaia umui lau durua totona, unai amo inai taravatu do umui diba: “Namona be Toretore Helagadia lalonai idia torea gaudia sibona do umui badinaia,” unai amo ta do umui hanamoa bona ma ta do umui hadikaia karana dekenai do umui hekokoroku lasi.+ 7 Dahaka dainai oi be ma ta oi hereaia? Momokani, oi abia gaudia ibounai be Dirava amo, ani?+ Bema unai gaudia be Dirava amo oi abia, dahaka dainai oi heagi, hegeregere oi sibona emu goada amo oi abia bamona?

8 Umui be emui ura gaudia ibounai umui abia vadaeni, a? Umui be umui taga vadaeni, a? Ai be do king lasi, to umui be king ai umui lao vadaeni, a?+ Lau ura momokani bema umui be king ai umui lao vadaeni, ai danu be king ai do ai lao, unai amo umui ida do ai lohia.+ 9 Lau laloa toana be Dirava ese ai aposetolo taudia be dokonai ia atoa, do idia hamasea taudia bamona.+ Lau be unai bamona lau laloa badina tanobada taudia bona aneru ese ai idia itaia noho.+ 10 Keriso ai badinaia dainai taunimanima idia laloa ai be kavakava taudia,+ to umui be Keriso umui badinaia dainai umui laloa umui be aonega taudia. Ai be ai manoka bona umui be umui goada, umui be ladana namona umui abia, to ai be idia laloa maragi. 11 Ema bona hari ai be ai hitolo+ bona ranu mase noho,+ ai be dabua lasi, ai idia botaia,+ bona ai be ruma lasi, 12 bona emai imana amo gaukara ai karaia goada.+ Haida ese ai idia hereva dika henia neganai, idia ai hanamoa+ bona ai idia dagedage henia neganai, ai haheauka,+ 13 bona emai ladana idia hadikaia neganai, mai manau ida ai hereva.+ Ema bona hari, taunimanima ese ai be tanobada ena momoru ai idia halaoa bona ai be idia dadaraia miro gaudia bamona.

14 Inai gaudia lau torea, umui lau hahemaraia totona lasi, to umui lau sisiba henia egu lalokau natudia bamona. 15 Keriso ida umui lalotamona dainai, ena be emui hakaua taudia be 10,000, to momokani emui tamana be momo lasi. Sivarai namona dainai Keriso Iesu amo lau be emui tamana ai lau lao.+ 16 Unai dainai umui lau noia, lau do umui tohotohoa.+ 17 Vadaeni umui dekenai Timoteo lau siaia inai, badina Lohiabada ena gaukara lalonai ia be egu lalokau natuna mai ena abidadama. Keriso Iesu lau hesiai henia lalonai, lau badinaia daladia be ia ese umui dekenai do ia hadibaia,+ lau ese gabu ibounai dekenai kongrigeisen lau hadibaia hegeregerena.

18 Umui haida umui laloa lau be umui dekenai do lau mai lasi, unai dainai umui hekokoroku. 19 To kahirakahira umui dekenai do lau mai, bema unai be Iehova* ena ura, bona lau ura lasi unai hekokoroku taudia edia hereva lau diba, to lau ura diba bema Dirava ena siahu ese idia ia hakaua eiava lasi. 20 Badina Dirava ena Basileia be ita herevalaia gauna sibona lasi, to ia be Dirava ena siahu amo. 21 Edena umui ura? Mai kwadia auna ida umui dekenai do lau mai,+ eiava mai lalokau bona manau ida do lau mai?